Sita Umntfwana Wakho Loseminyakeni Yekutfomba Kutsi Aphumelele

1, 2. Ngutiphi tinsayeya kanye nenjabulo lengaletfwa minyaka yekutfomba?

KUBA nemntfwana loseminyakeni yekutfomba ekhaya akufanani nekuba nemntfwana loneminyaka lesihlanu nobe lelishumi. Iminyaka yekutfomba inetinsayeya netinkinga tayo, kodvwa ingaphindze iletse injabulo kanye netibusiso. Tibonelo letifanana nesaJosefa, Davide, Josaya, kanye naThimothi tiveta kutsi bantfu labasha bangenta tintfo letibhadlile futsi babe nebuhlobo lobuhle naJehova. (Genesisi 37:2-11; 1 Samuweli 16:11-13; 2 Emakhosi 22:3-7; Imisebenti 16:1, 2) Labasha labanyenti lamuhla bayakufakazela loko. Cishe nawe kukhona lobatiko.

² Kulabanye, iminyaka yekutfomba ita nekuphatamiseka. Bantfu labasha bayashintjashintja. Bafana kanye nemantfombatane lakuleminyaka bangase bafune kukhululeka kakhudlwana, futsi bangase bangahambisani nemincele labayibekelwa batali babo. Labo bantfwana basuke basete lokuhlangenwe nako, futsi basuke badzinga kutsi batali babo babatsandze baphindze bababeketelele. Empeleni, iminyaka yekutfomba ingajabulisa, futsi ingadida​—kokubili kubatali kanye nakubantfwana. Bantfu labasha labakuleminyaka bangasitwa njani?

 3. Batali bangabaniketa njani bantfwana babo labasakhula litfuba lelihle ekuphileni?

³ Batali labalandzela seluleko seliBhayibheli baniketa bantfwana babo labasakhula litfuba lelihle lekwendlula ngemphumelelo kuleto tinkinga babe bantfu labadzala labavutsiwe. Kuwo onkhe emave nangato tonkhe tikhatsi, batali kanye nalabasebasha labasebentisa timiso teliBhayibheli ndzawonye, baye babusiswa ngekutsi batfole imphumelelo.​—Tihlabelelo 119:1.

 4. Kungani inkhulumo lesifuba ibaluleke kakhulu ngeminyaka yekutfomba?

⁴ LiBhayibheli litsi: “Tinhloso atiphumeleli nakungekho inkhulumo lesifuba.” (Taga 15:22, NW.) Nangabe inkhulumo lesifuba yayidzingeka ngesikhatsi bantfwana bakho basebancane, idzingeka kakhulu-ke nasebaseminyakeni yekutfomba, ngobe ngaleso sikhatsi bantfwana baba nesikhatsi lesincane basekhaya futsi sikhatsi lesinyenti basicitsa nebangani babo basesikolweni. Nangabe inkhulumo lesifuba ingekho​—lokusho kutsi nakute kukhulumisana ngekwetsembeka nangalokukhululekile emkhatsini webantfwana nebatali, labo bantfwana bangafanana netihambi ekhaya. Kodvwa-ke kukhulumisana kungalondvolotwa njani?

 5. Bantfwana labaseminyakeni yekutfomba bakhutsatwa kutsi bayitsatse njani indzaba yekukhulumisana nebatali babo?

⁵ Bantfwana kanye nebatali kufanele badlale indzima yabo kuloku. Kuliciniso kutsi bantfu labasha bangakutfola kumatima kukhuluma nebatali babo kunangesikhatsi basebancane. Nanobe kunjalo, khumbula kutsi “sive siyawa ngenca yekweswela kucondziswa; siyawuphepha nangabe sinebeluleki labanyenti.” (Taga 11:14) Lamavi asebenta kuwo wonkhe umuntfu, lomdzala nalomncane. Labo labaseminyakeni yekutfomba futsi labakucaphelako loku batawucondza kutsi basakudzinga kucondziswa, njengobe bahlangabetana netinkinga letinyenti kunasesikhatsini lesendlulile. Kufanele bacaphele kutsi batali babo labangemaKhristu bakufanelekela kahle kuba beluleki ngobe banalokuhlangenwe nako lokunyenti, futsi eminyakeni leminyenti sebaye baveta kukhatsalela kwabo kwelutsandvo. Ngako-ke, kulesikhatsi sekuphila kwabo, bantfu labasha labahlakaniphile angeke babafulatsele batali babo.

 6. Ngusiphi simo sengcondvo batali labahlakaniphile nalabanelutsandvo labatawuba naso mayelana nekucoca nebantfwana babo labaseminyakeni yekutfomba?

⁶ Kukhulumisana ngekukhululeka kusho kutsi umtali utawetama ngako konkhe lokusemandleni akhe kutsi alalele lapho umntfwana afuna kukhuluma naye. Nangabe ungumtali, ciniseka kutsi wena uhlale ukhona futsi ukulungele kukhulumisana nebantfwana bakho. Loku angeke kube melula. LiBhayibheli litsi ‘kunesikhatsi sekubindza nesikhatsi sekukhuluma.’ (Umshumayeli 3:7) Lapho losemusha eva kutsi sesikhatsi sekutsi akhulume, leso kungaba sikhatsi sakho sekuthula. Kungenteka kutsi leso sikhatsi usuke sewusihlelele sifundvo lotichubela sona, kuphumula, nobe kwenta imisebenti yasendlini. Nanobe kunjalo, nangabe umntfwana wakho afuna kukhuluma nawe, yetama kulungisa luhlelo lwakho futsi ulalele. Nawungakwenti loko, angeke aphindze afune kukhuluma nawe. Khumbula sibonelo saJesu. Ngalelinye lilanga, abehlele sikhatsi sekuphumula. Kodvwa-ke, ngesikhatsi bantfu befika bagcwala kuye kute bamlalele, wayekela kuphumula futsi wabafundzisa. (Makho 6:30-34) Bantfwana labanyenti labaseminyakeni yekutfomba bayacaphela kutsi batali babo bamatasatasa, kodvwa badzinga sicinisekiso sekutsi batali babo bayatfolakala nababadzinga. Ngako-ke, hlala utfolakala futsi ube ngulocondzako.

 7. Yini batali lokufanele bayibalekele?

⁷ Kufanele ukhumbule kutsi bekunjani ngesikhatsi nawe useminyakeni yekutfomba, futsi uhleke ngako. Batali kufanele bakujabulele kuba nebantfwana babo. Batali, nisisebentisa njani sikhatsi leningenti lutfo ngaso? Nangabe ngaso sonkhe sikhatsi batali bafuna kusebentisa sikhatsi sabo labangenti lutfo ngaso etintfweni tabo bodvwana, bantfwana batawusheshe bakubone loko. Nangabe labasha bafika esiphetfweni sekutsi bangani babo labafundza nabo babatsatsa njengalabalulekile kunebatali babo, nobe kanjani batawuba netinkinga.

 8. Kubaluleka kwekwetsembeka, kukhutsala, kanye nekutiphatsa lokufanele kungagcizelelwa njani kubantfwana?

⁸ Nangabe batali basengakakunamatsiseli kubantfwana babo kubaluleka kwekwetsembeka nekukhutsala, kufanele bakwente nobe kanjani eminyakeni yekutfomba. (1 Thesalonika 4:11; 2 Thesalonika 3:10) Kubalulekile futsi nekutsi baciniseke kutsi bantfwana babo bakukholelwa ngenhlitiyo yonkhe kubaluleka kwekuphila imphilo yekutiphatsa lokuhle nalokuhlantekile. (Taga 20:11) Umtali ufundzisa lokunyenti ngalendzaba ngesibonelo sakhe. Njengobe nje nemadvodza langakholwa ‘angazuzeka ngaphandle kwenkhulumo, azuzwe yintfobeko yebafati bawo,’ nalabasha nabo bangafundza timiso tekulunga ngekutiphatsa kwebatali babo. (1 Phetro 3:1) Nanobe kunjalo, sibonelo sisodvwa asikeneli, ngobe bantfwana babona tibonelo letinyenti letimbi futsi beva netinkhulumo letinyenti letilite letiyengako nabangekho ekhaya. Ngako-ke, batali labanelutsandvo kudzingeka bayati imibono yebantfwana babo ngaloko labakubonako nalabakuvako, futsi loku kudzinga kutsi bacoce ngendlela leyakhako.​—Taga 20:5.

9, 10. Kungani batali kufanele baciniseke ngekutsi bayabafundzisa bantfwana babo ngetindzaba letimayelana nekuya ecasini, futsi bangakwenta njani loko?

⁹ Loku kuliciniso ikakhulukati nakutiwa etindzabeni letimayelana nekuya ecasini. Batali, ninemahloni yini ekucoca nebantfwana benu ngekuya ecasini? Nanobe kunjalo, yetamani kucoca nebantfwana benu ngalendzaba, ngobe naningenti njalo batawufundza ngayo kulotsite. Nangabe bangafundzi kini, ngubani lowatiko kutsi batawutfola kwatiswa lokusontseke njani? EBhayibhelini, Jehova akesabi kukhuluma ngetindzaba letimayelana nekuya ecasini, nebatali nabo akukafaneli besabe.​—Taga 4:1-4; 5:1-21.

¹⁰ Siyabonga ngekutsi liBhayibheli licuketse ticondziso leticacile endzabeni yekuya ecasini, futsi i-Watchtower Society ishicilele kwatiswa lokunyenti lokulusito lokukhombisa kutsi lesicondziso sisasebenta nalamuhla. Kungani ungakusebentisi? Kungani ungabuketi nendvodzana nobe indvodzakati yakho tehluko letifanele kumculu 1 na-2 wencwadzi letsi “Intsha Iyabuza​—Izimpendulo Ezisebenzayo”? Ingase ikumangalise futsi ikujabulise imiphumela.

11. Nguyiphi indlela lephumelelako batali labangafundzisa ngayo bantfwana babo indlela yekukhonta Jehova?

¹¹ Nguyiphi indzaba lebaluleke kakhulu batali nebantfwana lokufanele bacoce ngayo? Umphostoli Pawula wakhuluma ngayo nakabhala: “Bakhuliseni ngekubayala nangekubacondzisa ngemphilo yebuKhristu.” (Efesu 6:4) Bantfwana kufanele bachubeke bafundza ngaJehova. Ngalokukhetsekile, kufanele bafundze kumtsandza, futsi kufanele bafise nekumkhonta. Nalapha futsi, bantfwana bangafundza lokunyenti ngekubekelwa sibonelo. Nangabe bantfu labasha babona kutsi batali babo bayamtsandza Nkulunkulu ‘ngenhlitiyo yabo yonkhe, umphefumulo wabo wonkhe, kanye nengcondvo yabo yonkhe,’ nekutsi loko kunetitselo letinhle ekuphileni kwabo, nabo bangase bafune kwenta lokufananako. (Matewu 22:37) Ngalokufananako, nangabe bantfwana babona kutsi batali babo banembono lofanele ngemcebo, futsi babeka uMbuso waNkulunkulu kucala, nabo bangasitakala kutsi babe nembono lofananako.​—Umshumayeli 7:12; Matewu 6:31-33.

12, 13. Ngumaphi emaphuzu lokufanele akhunjulwe kute sifundvo semndeni sibe yimphumelelo?

¹² Sifundvo seliBhayibheli semndeni samaviki onkhe silusito loluhamba embili ekundluliseleni emagugu akamoya kubantfwana. (Tihlabelelo 119:33, 34; Taga 4:20-23) Kuba naso njalo lesifundvo kubaluleke kakhulu. (Tihlabelelo 1:1-3) Batali kanye nebantfwana babo kufanele bacaphele kutsi sifundvo semndeni kufanele site kucala kunaletinye tintfo, kungabi ngulokuphambene naloku. Ngetulu kwaloko, simo sengcondvo lesicondzile sibalulekile kute sifundvo semndeni siphumelele. Lomunye babe watsi: “Imfihlo ikutsi umchubi akhutsate labanye kutsi bakhululeke nakuchubeka lesifundvo​—kodvwa kufanele kube nenhlonipho, kungadlalwa. Kulinganisela lokuhle kungase kungafinyeleleki melula ngaso sonkhe sikhatsi, futsi kuyawudzingeka bantfu labasha balungise simo sengcondvo njalo. Nangabe tintfo tingahambi kahle kwekucala nobe kwesibili, beketela futsi ubuke embili esikhatsini lesitako.” Yena lobabe watsi emthandazweni wakhe ngembikwesifundvo ngasinye, abecela ngalokucondzile kutsi Jehova abasite bonkhe babe nembono lomuhle.​—Tihlabelelo 119:66.

¹³ Kuchuba sifundvo semndeni kungumtfwalo webatali. Kuyavunywa, labanye batali kungenteka bete likhono lekufundzisa, futsi kungaba matima ngabo kutfola tindlela tekwenta lesifundvo sijabulise. Nanobe kunjalo, nangabe ubatsandza “ngetento nangeliciniso” bantfwana bakho labaseminyakeni yekutfomba, utawufuna kubasita ngekutfobeka nangebucotfo kutsi batfutfuke ebuhlotjeni babo naNkulunkulu. (1 Johane 3:18) Ngaletinye tikhatsi bangase bakhonone, kodvwa cishe batawukuva kukhatsalela lonako ngenhlalakahle yabo.

14. Dutheronomi 11:18, 19 angasetjentiswa njani nakwendluliselwa tintfo takamoya kubantfwana labaseminyakeni yekutfomba?

¹⁴ Sifundvo semndeni akusingiso kuphela sikhatsi sekwendlulisela tindzaba letibalulekile ngekwakamoya. Uyawukhumbula yini umyalo Jehova lawuniketa batali? Watsi: “Lamavi ami niyakuwagcina etinhlitiyweni tenu, niwanamatselise nasetingcondvweni tenu, niyakuwabophela abe luphawu etandleni tenu, abe ngimihlobiso yemabunti enu. Niyakuwafundzisa bantfwabenu nikhulume ngawo nanihleti emakhaya, nome nihamba endleleni, nome nilala, nome nivuka.” (Dutheronomi 11:18, 19; fundza na-Dutheronomi 6:6, 7.) Loku akusho kutsi batali kufanele bashumayele bantfwana babo ngaso sonkhe sikhatsi. Kodvwa-ke, inhloko yemndeni lenelutsandvo kufanele ihlale iwaphaphamele ematfuba ekwakha umndeni wayo ngekwakamoya.

15, 16. (a) Siyini siyalo? (b) Bobani labanemtfwalo wekukhipha siyalo, futsi bobani lokufanele baciniseke ngekutsi bayasilalela?

¹⁵ Siyalo sikuceceshwa lokulungisako, futsi sifaka ekhatsi kukhulumisana. Sinemcondvo wekulungisa hhayi kujezisa​—nanobe nje kujezisa kungadzingeka. Nangabe bantfwana bakho bebasidzinga siyalo ngesikhatsi basebancane, nanyalo njengobe sebakhulile basasidzinga, futsi kungenteka basidzinga kakhulu. Bantfwana labaseminyakeni yekutfomba labahlakaniphile bayati kutsi loku kuliciniso.

¹⁶ LiBhayibheli litsi: “Silima siyakwedzelela kuyalwa nguyise; kodvwa indvodzana leyemukela kuyalwa inekucondza.” (Taga 15:5) Sifundza lokunyenti kulomBhalo. Utsi siyalo sitawukhishwa. Umntfwana loseminyakeni yekutfomba angeke ‘asemukele siyalo’ nangabe angasitfoli. NguJehova lonikete batali umtfwalo wekukhipha siyalo, ikakhulukati bobabe. Umtfwalo wekulalela lesiyalo unikwe bantfwana labaseminyakeni yekutfomba. Nabasilalela siyalo sebatali babo, batawufundza lokunyenti futsi angeke bente emaphutsa lamanyenti. (Taga 1:8) LiBhayibheli litsi: “Umuntfu longayinaki imphatfocotfo uyaphuya ahlazeke; kodvwa umuntfu lowemukela kutsetsiswa uyakuhlonipheka.”​—Taga 13:18.

17. Ngukuphi kulinganisela batali lokufanele babe nako nabakhipha siyalo?

¹⁷ Nabayala bantfwana labaseminyakeni yekutfomba, batali kudzingeka balinganisele. Kufanele bakubalekele kucinisa sandla ngobe batawutfukutselisa bantfwana babo, baze babente bangasatetsembi. (Kholose 3:21) Batali akukafaneli bayekelele kakhulu baze bantfwana babo bangakutfoli kuceceshwa lokubalulekile. Nabenta njalo, kutawuba netinkinga letinkhulu. Taga 29:17 titsi: “Condzisa indvodzana yakho, khona itakunika kuthula kwemphefumulo.” Vesi 21 utsi: “Nangabe wetayeta sisebenti ngekusinika konkhe lesikufunako, nase sikhulile sitakwemuka konkhe lokukwakho.” Nanobe lelivesi likhuluma ngesisebenti, liyasebenta nakubantfwana ekhaya.

18. Siyalo sibufakazi bani, futsi yini batali lokufanele bayibalekele nabakhipha siyalo lesingashintjashintji?

¹⁸ Ecinisweni, siyalo lesifanele sibufakazi belutsandvo umtali lanalo ngemntfwana wakhe. (Hebheru 12:6, 11) Nangabe ungumtali, uyati kutsi akusimelula kukhipha siyalo lesingashintjashintji nalesiveta kucabangela. Kute kube nekuthula, kungaba melula kuvumela umntfwana lonenkhani kutsi atentele lakutsandzako. Kodvwa ngekuhamba kwesikhatsi, umtali lowenta njalo utawuvuna ngekuba nelikhaya lelingalawuleki.​—Taga 29:15; Galathiya 6:9.

19, 20. Batali bangasebentelana njani ngekuhlakanipha nebantfwana babo ngetindzaba tekutijabulisa?

¹⁹ Kadzeni bekuye kulindzeleke kutsi bantfwana basite ekhaya nobe emasimini. Lamuhla, bantfwana labaseminyakeni yekutfomba banesikhatsi lesinyenti labangenti lutfo ngaso. Ngako-ke, kute tetekutsengiselana tisisebentise leso sikhatsi, tikhangisa ngetintfo letinyenti tekutijabulisa. Ngetulu kwaloko, lelive alititsatsi njengaletibalulekile timiso teliBhayibheli tekutiphatsa, futsi loku kungaphumela enhlekeleleni.

²⁰ Ngako-ke, batali labanekwehlulela lokuhle bahlale banelilungelo lekukhetsa indlela yekutijabulisa. Nanobe kunjalo, batali akukafaneli bakhohlwe kutsi bantfwana babo labaseminyakeni yekutfomba bayakhula. Umnyaka ngamunye, batawufuna kuphatfwa njengebantfu labadzala. Ngako-ke, kukuhlakanipha ngemtali kuvumela umntfwana wakhe kutsi atikhetsele indlela yekutijabulisa njengobe akhula​—nangabe nje leto tindlela tiveta kuvutfwa ngekwakamoya. Ngaletinye tikhatsi, umntfwana angenta tincumo letingakahlakaniphi nakakhetsa tingoma, bangani, kanye nalokunye. Nakwenteka loko, umtali kufanele akhulume nemntfwana wakhe kute esikhatsini lesitako atewukwati kwenta tincumo letihlakaniphile.

21. Kulinganisela esikhatsini lasisebentisela kutijabulisa kungamvikela njani umntfwana loseminyakeni yekutfomba?

²¹ Singakanani sikhatsi lokufanele basicitse batijabulisa? Kulamanye emave bantfwana babenta bacabange kutsi kufanele batijabulise ngaso sonkhe sikhatsi. Ngako-ke, umntfwana lowengce eminyakeni lelishumi nakubili angase ahlele kutsi atijabulise ngaso sonkhe sikhatsi. Batali kufanele kube ngibo labafundzisa bantfwana babo kutsi kufanele babe nesikhatsi sekwenta letinye tintfo, letinjekuhlala ndzawonye njengemndeni, sifundvo latichubela sona, kucoca nebantfu labavutsiwe ngekwakamoya, kuya emihlanganweni yebuKhristu kanye nekwenta imisebenti yasekhaya. Loku kutawukwenta kutsi ‘tinjabulo talomhlaba’ tingaminyanisi liVi laNkulunkulu.​—Lukha 8:11-15.

22. Kutijabulisa kufanele kulingane nani ekuphileni kwemntfwana loseminyakeni yekutfomba?

²² INkhosi Solomoni yatsi: “Ngiyati kutsi kute lokuncono ngaphandle kwekutsi bajabule baphile imphilo lekahle basesemhlabeni. Ngetulu kwaloko kutsi umuntfu adle anatse atijabulise ngayo yonkhe imishikashika yakhe kusipho saNkulunkulu.” (Umshumayeli 3:12, 13) Kuliciniso kutsi kutijabulisa kuyincenye yekuphila ngekulinganisela. Kusebenta matima nako kunjalo. Bantfwana labanyenti labaseminyakeni yekutfomba abati kutsi kwenetiseka kutfolakala ngekusebenta kamatima, nobe kutsi kuba nemuva wekutihlonipha kubangelwa kukwati kucatulula tinkinga. Labanye bantfwana abanikwa sikhatsi sekutfutfukisa emakhono nobe kwenta imisebenti labatawutiphilisa ngayo esikhatsini lesitako. Lena yinsayeya batali lababukene nayo. Utawuciniseka yini kutsi umntfwana wakho uba naso sikhatsi lesinjalo? Nawutawukwati kufundzisa umntfwana wakho kutsi ajabulele kusebenta matima futsi akubone kubaluleka kwako, utawuba nesimo sengcondvo lesihle lesitawumletsela tinzuzo letingapheli.

23. Batali bangabakhutsata njani bantfwana babo?

²³ Ngisho nalapho uba netinkinga nemntfwana wakho loseminyakeni yekutfomba, lombhalo uhlale uliciniso: “Lutsandvo alusoze luphele.” (1 Khorinte 13:8) Ungayekeli kuvetela umntfwana wakho lutsandvo lonalo ngaye. Tibute: ‘Ngiyambonga yini umntfwana ngamunye ngekukwati kulungisa tinkinga ngendlela lephumelelako nobe kuncoba lushushiso? Ngiyawasebentisa yini ematfuba lavelako kute ngitsandze ngiphindze ngibonge bantfwana bami, ngembikwekutsi endlule?’ Nanobe ngaletinye tikhatsi kuba nekungevani, nangabe bantfwana bacinisekiswa kutsi bayatsandvwa, nabo bayaluveta lolo tsandvo.

24. Ngusiphi simiso semBhalo lesihlale siliciniso ekukhuliseni umntfwana, futsi yini lokufanele sihlale siyikhumbula?

²⁴ Ecinisweni, njengobe bantfwana bakhulela ekubeni bantfu labadzala, nabo batawutentela tincumo letibaluleke kakhulu. Ngaletinye tikhatsi, kungenteka batali bangatitsandzi leto tincumo. Kutsiwani nangabe umntfwana wabo akhetsa kungasamkhonti Nkulunkulu Jehova? Loku kungenteka. Lamanye emadvodzana aJehova latidalwa temoya asala seluleko sakhe futsi ahlubuka. (Genesisi 6:2; Juda 6) Bantfwana abasibo bongcondvomshini lesingavele sibentise loko lesifuna bakwente. Batidalwa letinenkhululeko yekutikhetsela, futsi ngibo labatawutilandzisela embikwaJehova ngetincumo labatentako. Nanobe kunjalo, Taga 22:6 tinesimiso lesiliciniso: “Khulisa umntfwana ngendlela lekufanele aphile ngayo; kuyakutsi nome asakhulile angesuki kuyo.”

25. Nguyiphi indlela lenhle batali labangaveta ngayo kubonga Jehova ngelilungelo lekuba batali?

²⁵ Ngako-ke, batsandze kakhulu bantfwana bakho. Yenta konkhe lokusemandleni akho kute ulandzele timiso teliBhayibheli nawubakhulisa. Babekele sibonelo lesihle sekuphila ngekwesaba Nkulunkulu. Ngekwenta njalo, utawube unika bantfwana bakho sikhatsi sekutsi bakhule babe bantfu labadzala labahlakaniphile, futsi labesaba Nkulunkulu. Lena yindlela lenhle batali labangaveta ngayo kubonga Jehova ngelilungelo lekuba batali.