Sondzela KuNkulunkulu

Ungatfola Kutsi “Kuyini Kwati Nkulunkulu”

NKULUNKULU JEHOVA usibekele ligugu lelikhulu, futsi ufisa kutsi silitfole. Leligugu alisiletseli umcebo, kodvwa lisiniketa intfo lesingeke size siyitfole ngemali—lokukuthula kwangekhatsi, kwenetiseka, kanye nemphilo lejabulisako. Liyini leligugu? Emavi eNkhosi Solomoni latfolakala encwadzini yeTaga 2:1-6 ayalichaza.

Solomoni utsi leligugu lisho “kwati Nkulunkulu”—lokuliciniso lelimayelana naNkulunkulu kanye netinjongo takhe lelivetwe eBhayibhelini. (Livesi 5) Leligugu lifaka ekhatsi tintfo letinyenti.

Timfundziso letiliciniso. LiBhayibheli linetimphendvulo temibuto lefanana nalena: Ngubani libito laNkulunkulu? (Tihlabelelo 83:18, NW) Kwentekani kitsi nasifa? (Tihlabelelo 78:50) Kungani silapha? (Genesisi 1:26-28; Tihlabelelo 115:16) Ucabanga kutsi tiligugu kangakanani timphendvulo temibuto lebalulekile lefanana nalena?

Seluleko lesihlakaniphile. LiBhayibheli lisifundzisa indlela lencono kakhulu yekuphila. Ungawenta njani umshado wakho uphumelele? (Efesu 5:28, 29, 33) Ungabakhulisa njani bantfwana labatawukwati kutimela? (Dutheronomi 6:5-7; Efesu 6:4) Ungayitfola njani injabulo ekuphileni? (Matewu 5:3; Lukha 11:28) Ucabanga kutsi kubaluleke kangakanani kutfola seluleko longasetsemba etindzabeni letinjengaleti?

Kucondza buntfu baNkulunkulu. LiBhayibheli ngilo lelingumtfombo welwati lolungulonalona ngaNkulunkulu. Unjani Nkulunkulu? (Johane 1:18; 4:24) Unendzaba yini natsi? (1 Phetro 5:6, 7) Ngutiphi letinye tetimfanelo takhe letihamba embili? (Eksodusi 34:6, 7; 1 Johane 4:8) Ucabanga kutsi lwati loluliciniso ngeMdali wetfu lubaluleke kangakanani?

“Kwati Nkulunkulu” kubaluleke kakhulu. Ungalutfola njani lolo lwati? Imphendvulo isevesini 4 encwadzini yeTaga sehluko 2, lapho Solomoni afananisa khona lolwati ‘nemcebo lofihliwe.’ Cabanga ngaloku: Umcebo lofihliwe angeke umane uwutfole ungakawusebenteli. Kufanele wente umetamo lomkhulu kute uwutfole. Kunjalo nangekwati Nkulunkulu. Ecinisweni, lwati ngaye lufihlwe eBhayibhelini. Kute silutfole, kufanele sente umetamo.

Solomoni uchaza loko lokufanele sikwente kute sitfole kutsi “kuyini kwati Nkulunkulu.” Emavi latsi “yemukela loku lengikufundzisa kona” nalatsi “inhlitiyo yakho ibe nekucondza” aveta kutsi kufanele sibe nenhlitiyo letimisele kulalela. (Emavesi 1, 2) Emavi latsi “cela,” ‘funisisa,’ nalatsi ‘mbani,’ aveta kutsi kufanele sisebente kamatima futsi sitimisele. (Emavesi 3, 4) Ngako-ke kute sitfole leligugu kufanele sitadishe liBhayibheli ngekutimisela, nangenhlitiyo lecotfo.—Lukha 8:15.

Nasenta umetamo lonjalo, Jehova utawusisita. Livesi 6 litsi: “NguSimakadze lowephana ngekuhlakanipha.” Sidzinga lusito lwaNkulunkulu kute siwacondze kahle emaciniso laseBhayibhelini. (Johane 6:44; Imisebenti 16:14) Naku longaciniseka ngako: Nangabe ulihlolisisa ngebucotfo liVi laNkulunkulu, utawutfola kutsi “kuyini kwati Nkulunkulu”—lelo ligugu lelitawukuletsela injabulo lenkhulu ekuphileni.—Taga 2:10-21.a

[Umbhalo longentansi]