“Kulalelisise Loko Lokushiwo Bantfu Labahlakaniphile”

 1. Seluleko singasitfola ngayiphi indlela, futsi yini leyenta kutsi sonkhe sisidzinge?

SONKHE sihle sisidzinga seluleko. Ngaletinye tikhatsi singacela umuntfu lesimetsembako kutsi aseluleke. Ngaletinye tikhatsi, umzalwane lokhatsatekile ngatsi angeta kitsi atositjela kutsi sihamba ‘endleleni lengasiyo,’ lesitawutisola ngayo. (Gal. 6:1) Seluleko singasitfola nangemuva kwekwenta liphutsa lelikhulu. Ngisho nobe seluleko singasitfola ngatiphi tindlela, kufanele sisilalele. Kutasisita kwenta loko futsi kungasindzisa kuphila kwetfu!—Taga 6:23.

 2. Ngekusho kweTaga 12:15, ngusiphi sizatfu lesenta silalele seluleko?

² Umbhalo lokusekelwe kuwo lesihloko usikhutsata kutsi ‘silalelisise loko lokushiwo bantfu labahlakaniphile.’ (Taga 22:17) Kute umuntfu lowati tonkhe tintfo, kuhlale kunalotsite lowati kancono kunatsi. (Fundza Taga 12:15.) Ngako kulalela seluleko kukhombisa kutsi sitfobekile. Kukhombisa nekutsi siyati kutsi kunetintfo lesingakhoni kutenta kahle, siyati kutsi siyakudzinga kusitwa kuze sifinyelele imigomo yetfu. INkhosi Solomoni lebeyihlakaniphile yaphefumulelwa kutsi ibhale: “Emacebo . . . ayaphumelela nangabe kunebeluleki labanyenti.”—Taga 15:22.

 3. Ngutiphi tindlela lesingatfola ngato seluleko?

³ Singasitfola seluleko kulotsite. Lomdzala welibandla nobe lomunye umzalwane angasitjela lakufanele silungise khona. Nangabe umuntfu asinika seluleko lesisekelwe eBhayibhelini usuke akhombisa kutsi uyasitsandza, ngako kufanele sikhombise kutsi siyabonga ngekutsi simlalele futsi setame nekusisebentisa leseluleko lasiniketa sona. Loko singasho kutsi seluleko lesisitfola kulotsite. Kodvwa seluleko singaphindze sisitfole nangalenye indlela. Nguyiphi? Singafundza lokutsite eBhayibhelini nobe etincwadzini tetfu lokungasenta sicabange ngetintfo lesitentako futsi loko lesikufundzako kusente sishintje indlela lesicabanga ngayo nalesenta ngayo tintfo. Loko singatsi seluleko lesisitfola ngalenye indlela.—Heb. 4:12.

 4. Ngekusho kweMshumayeli 7:9, yini lokufanele singayenti naselulekwa?

⁴ Kuliciniso kutsi singahle sikutfole kumatima kwemukela seluleko kulotsite. Singaze siphatseke kabi. Kungentiwa yini loko? Ngisho nobe sati kutsi sinesono, kungahle kube matima kwemukela seluleko nangabe umuntfu asitjela ngeliphutsa letfu. (Fundza Umshumayeli 7:9.) Singahle sibeke tizatfu futsi singabate tisusa takhe, nobe sitfukutseliswe yindlela laseluleke ngayo. Singahle sibone liphutsa kulona loselulekako, sicabange sitsi: ‘Ungubani nje yena kutsi angeluleka mine? Naye unemaphutsa akhe!’ Nangabe singasitsandzi leseluleko singahle singasemukeli, nobe sicele lomunye kutsi aseluleke ngobe sinelitsemba lekutsi utawusinika seluleko lesisitsandzako.

 5. Sitawucoca ngani kulesihloko?

⁵ Kulesihloko, sitawucoca ngetibonelo tebantfu labaseBhayibhelini labangazange basemukele seluleko, nalabo labasemukela. Sitawuphindze sicoce ngaloko lokungasisita kutsi semukele seluleko futsi sizuze kuso.

 6. Yini lesiyifundzako endleleni iNkhosi Rehobhowamu leyenta ngayo nayitfola seluleko?

⁶ Cabanga ngesibonelo saRehobhowamu. Ngesikhatsi aba yinkhosi yaka-Israyeli, bantfu lebekababusa beta kuye batokhuluma naye. Bamcela kutsi abaphatse kahle kunababe wakhe Solomoni. Rehobhowamu wenta kahle ngobe wabuta emadvodza lamadzala aka-Israyeli kutsi abaphendvule njani labantfu. Lamadvodza lamadzala amtjela kutsi akente lokufunwa ngulabantfu kuze batochubeka bamsekela. (1 Khos. 12:3-7) Kungenteka, Rehobhowamu asizange simenetise leseluleko, ngako wacela seluleko kulamanye emadvodza labekakhule nawo. Lamadvodza kungenteka bekaseminyakeni yabo-40, ngako kunyenti lebekakwati ngemphilo. (2 Khr. 12:13) Kodvwa amniketa seluleko lesikabi, amtjela kutsi acindzetele labantfu. (1 Khos. 12:8-11) Njengobe besekaneteluleko letimbili, bekangathantaza kuJehova ambute kutsi asebentise siphi seluleko. Kunekutsi ente njalo, wasebentisa seluleko lasitsandzako, walalela lamadvodza lasemasha. Ngenca yaloko, Rehobhowamu nebantfu baka-Israyeli babhekana nemiphumela lebuhlungu. Lamuhla, singahle singasitsandzi seluleko lesiniketwa sona. Kodvwa nangabe sisekelwe eVini laNkulunkulu kufanele sisemukele.

 7. Yini lesingayifundza esibonelweni seNkhosi Uziya?

⁷ INkhosi Uziya ayizange isemukele seluleko. Yangena ethempelini laJehova lakungena khona baphristi kuphela futsi yashisa imphepho. Baphristi batsi kuye: “Ye-Uziya, akukafaneli kutsi wena ushisele Jehova imphepho! Baphristi kuphela lokufanele bashise imphepho.” Wenta njani Uziya? Kube wasemukela seluleko futsi waphuma ngaleso sikhatsi ethempelini, kungenteka Jehova bekatamcolela. Kunaloko, “Uziya . . . watfukutsela kakhulu.” Yini leyamenta wangasemukeli leseluleko? Ngenca yekutsi bekayinkhosi, bekacabanga kutsi angenta nobe ngabe yini layifunako. Kodvwa Jehova akazange abone kanjalo. Ngenca yekutsi wenta intfo lebekungakafaneli ayente ‘waba nebulephelo kwaze kwaba lilanga lafa ngalo.’ (2 Khr. 26:16-21) Sibonelo sa-Uziya sisifundzisa kutsi ngisho nobe sibobani, nangabe singasemukeli seluleko lesisekelwe eBhayibhelini, Jehova angeke aze asemukele.

 8. Wenta njani Jobe ngesikhatsi anikwa seluleko?

⁸ Ngalokwehlukile kuletibonelo letisecwayiso lesesicoce ngato, liBhayibheli linetibonelo letinhle talabo lababusiswa ngenca yekwemukela seluleko. Cabanga ngaloku, nanobe Jobe bekamesaba Nkulunkulu, kodvwa bekawenta emaphutsa. Ngesikhatsi acindzeteleke kakhulu, washo tintfo letikabi. Ngenca yaloku, Elihu naJehova, bamniketa seluleko. Wenta njani Jobe? Watfobeka futsi wasemukela leseluleko. Watsi: “Ngikhulumile, kodvwa bengingacondzi . . . kungako ngikuhocisa loko lengikushito, futsi ngiphendvuka ngiselutfulini nasemlotseni.” Jehova wambusisa Jobe ngenca yekutsi watitfoba.—Jobe 42:3-6, 12-17.

 9. Mosi usibekela siphi sibonelo lesihle nakutiwa endzabeni yekwemukela seluleko?

⁹ Mosi wasemukela seluleko ngemuva kwekutsi ente liphutsa lelikhulu. Ngalelinye lilanga, watfukutsela futsi wangamniki Jehova ludvumo. Ngenca yaloko, Mosi akazange avunyelwe kutsi angene eVeni Lesetsembiso. (Num. 20:1-13) Ngesikhatsi Mosi acela Jehova kutsi ashintje lesincumo sakhe, Jehova wamtjela watsi: “Ungaphindze ukhulume nami ngalendzaba.” (Dut. 3:23-27) Mosi akazange atfukutsele, kunaloko, wasemukela lesincumo saJehova, futsi Jehova wachubeka amsebentisa kuze ahole ema-Israyeli. (Dut. 4:1) BoJobe naMosi basibekela sibonelo lesihle lesingasilingisa nasitfola seluleko. Jobe wayishintja indlela lebekacabanga ngayo futsi akazange abeke taba. Mosi wakhombisa kutsi uyasemukela seluleko saJehova ngekuhlale etsembekile ngisho nangemuva kwekulahlekelwa lilungelo lebekalitsandza.

10. (a) Taga 4:10-13 titsi kusisita ngani kwemukela seluleko? (b) Yini labanye labayentile nabatfola seluleko?

¹⁰ Siyazuza nasilingisa sibonelo lesabekwa ngemadvodza letsembekike lanjengaJobe naMosi. (Fundza Taga 4:10-13.) Bazalwane betfu labanyenti nabodzadze bente lokufanako. Naku lokushiwo ngumzalwane Emmanuel, lohlala eCongo, utsi: “Bazalwane labavutsiwe ebandleni lengikulo babona kutsi besengitolinyalelwa buhlobo bami naJehova ngako bangisita. Ngasisebentisa seluleko sabo futsi sangisita kutsi ngibalekele tinkinga letinyenti.”b Naku lokushiwo ngulelinye lihlahlandlela lelihlala eCanada lokutsiwa nguMegan mayelana neseluleko: “Asikaze singijabulise, kodvwa bengisuke ngisidzinga.” Lomunye umzalwane waseCroatia lokutsiwa nguMarko utsi: “Ngalahlekelwa lilungelo ebandleni kodvwa nangicabanga ngaloku, ngiyabona kutsi seluleko lengasitfola sangisita ngaphindze ngacinisa buhlobo bami naJehova.”

11. Yini leyashiwo nguMzalwane Karl Klein mayelana nekwemukela seluleko?

¹¹ Lesinye sibonelo salomunye lowasitwa kwemukela seluleko nguMzalwane Karl Klein, lobekalilunga leSigungu LeSibusako. Nakacoca ngemlandvo wakhe wekuphila, uMzalwane Klein usitjela ngalokwenteka ngesikhatsi uMzalwane Joseph F. Rutherford, lobekangumngani wakhe lomkhulu amniketa seluleko. UMzalwane Klein washo kutsi wacale wangasemukeli kahle leseluleko. Utsi: “Ngesikhatsi [uMzalwane Rutherford] angibona ngemuva kwekungeluleka, wangivusela ajabulile watsi: ‘Sawubona Karl!’ Kodvwa ngenca yekutsi bengisolo ngiva buhlungu, ngavumela phansi. Watsi: ‘Caphela Karl, Develi uyakunyonyobela!’ Ngadliwa mahloni, futsi ngamphendvula ngatsi: ‘Konkhe kuhamba kahle Mzalwane Rutherford.’ Kodvwa ngenca yekutsi wabona kutsi ngimtfukutselele, waphindze watsi: ‘Kukahle, kodvwa caphela. Develi uyakunyonyobela.’ Bekacinisile! Nasitfukutselela umzalwane ngekutsi ushito intfo lebekufanele ayisho . . . , senta kube melula ngaDeveli kutsi asibambe.”c (Ef. 4:25-27) UMzalwane Klein wasemukela seluleko seMzalwane Rutherford futsi bachubeka babangani.

12. Kutfobeka kungasisita njani kutsi semukele seluleko? (Tihlabelelo 141:5)

¹² Yini lengasisita semukele seluleko? Kufanele sitfobeke, sikhumbule kutsi sinesono nekutsi ngaletinye tikhatsi senta tintfo letingakahlakaniphi. Njengobe sibonile, Jobe bekanembono longasiwo kodvwa wayishintja indlela lebekacabanga ngayo futsi Jehova wambusisa ngaloko. Yini leyenta Jehova wambusisa? Kungobe bekatfobekile. Wakhombisa kutsi utfobekile ngekutsi asemukele seluleko lasinikwa ngu-Elihu, nanobe Elihu bekamncane kakhulu kunaye. (Jobe 32:6, 7) Kutfobeka kutasisita kutsi sisisebentise seluleko ngisho nobe sicabanga kutsi asisidzingi, nobe ngisho lona losinika sona amncane kunatsi. Lomunye lomdzala welibandla waseCanada utsi: “Njengobe singakhoni kutibona ngendlela labanye labasibona ngayo, kungaba matima kutsi sitfutfuke nangabe kute loselulekako.” Sonkhe sidzinga kutiveta kakhudlwana titselo temoya futsi sibe bafundzisi labancono betindzaba letimnandzi.—Fundza Tihlabelelo 141:5.

13. Kufanele sisitsatse njani seluleko lesinikwa sona?

¹³ Tsatsa seluleko njengendlela Nkulunkulu lakhombisa ngayo kutsi uyasitsandza. Jehova usifunela lokuhle. (Taga 4:20-22) Nakaseluleka asebentisa liVi lakhe, tincwadzi letisekelwe eBhayibhelini nobe umzalwane nobe dzadze, usuke asikhombisa kutsi uyasitsandza. KumaHebheru 12:9, 10 utsi: “Usiyala kuze kusitakale tsine.”

14. Yini lokufanele siyinake nangabe selulekwa?

¹⁴ Naka leseluleko hhayi indlela lesiniketwe ngayo. Ngaletinye tikhatsi singahle sive shengatsi asikaniketwa kahle leseluleko. Kuliciniso kutsi lona loniketa leseluleko kufanele ente kube melula ngalona lowelulekwako kutsi asemukele.d (Gal. 6:1) Kodvwa nangabe kungitsi leselulekwako, kufanele sinake lomlayeto, ngisho nobe siva shengatsi indlela leselulekwe ngayo ayikabi kahle. Singahle sitibute: ‘Ngisho nobe ngingakayitsandzi indlela lenginiketwe ngayo leseluleko, kodvwa kukhona yini lokungangisita kuso? Ngingakhona yini kungawanaki emaphutsa alona longelulekako futsi ngizuze kuleseluleko?’ Sitawube sikhombisa kutsi sihlakaniphile nangabe silalela nobe ngabe ngusiphi seluleko lesisitfolako.—Taga 15:31.

15. Yini leyenta kudzingeke sicele seluleko?

¹⁵ LiBhayibheli lisikhutsata kutsi sicele seluleko. Taga 13:10 titsi: “Labo labafuna seluleko bahlakaniphile.” Aliciniso lamavi! Labo labacela seluleko kunekutsi bamele lotsite kutsi abeluleke bavama kutfutfuka ekukhonteni Jehova kunalabo labangasiceli. Ngako akube nguwe locela seluleko.

16. Kukutiphi timo lasingacela khona seluleko?

¹⁶ Kunini lapho singacela khona seluleko? Cabanga nganati timo letilandzelako. (1) Dzadze ucela ummemeteli losanesikhatsi ashumayela kutsi abe khona nakafundza nalotsite liBhayibheli, ngemuva kwaloko umcela ameluleke ngekutsi angawatfutfukisa njani emakhono akhe ekufundzisa. (2) Dzadze longakashadi ufuna kutsenga timphahla, ngako ubuta kulomunye dzadze lovutsiwe kutsi ucabangani ngaletimphahla latikhetsile. (3) Umzalwane wabelwe inkhulumo yakhe yekucala, ngako ucela umzalwane losanesikhatsi abeka tinkhulumo kutsi ayilalele bese uyamtjela kutsi ngukuphi langatfutfukisa khona. Ngisho nemzalwane losanesikhatsi abeka tinkhulumo, wenta kahle ngekubuta labanye labanelikhono lekubeka tinkhulumo kutsi ngukuphi lapho angatfutfukisa khona bese uyasisebentisa leseluleko labamniketa sona.

17. Singasisita njani seluleko?

¹⁷ Emavikini nobe etinyangeni letitako, sonkhe sitawutfola seluleko, kungenteka sisitfole ngalenye indlela nobe kulotsite. Nakwenteka loko, khumbula lamaphuzu lesesicoce ngawo. Hlale utfobekile, unake leseluleko hhayi indlela lesiniketwe ngayo. Sisebentise leseluleko. Kute umuntfu lotalwa ahlakaniphile, kodvwa nangabe ‘sisemukela seluleko futsi silalele nasiyalwa,’ liVi laNkulunkulu letsembisa kutsi ‘sitawuhlakanipha.’—Taga 19:20.