Imfundvo Nemali Kungasenta Siciniseke Yini Kutsi Sitawuba Nelikusasa Lelijabulisako?
Bantfu labanyenti bacabanga kutsi labo labafundze kakhulu nalabanjingile banelikusasa lelihle. Bakholelwa kutsi imfundvo yasenyuvesi ingenta umuntfu abe sisebenti lesihle, lilunga lemndeni lelikahle kanye nesakhamuti lesikahle. Bangase beve ungatsi imfundvo lesezingeni lelisetulu itabenta batfole umsebenti loholela kahle nekutsi labo labahola imali lenyenti batawujabula.
SINCUMO LESENTIWA BANTFU LABANYENTI
Cabanga ngalokwashiwo nguZhang Chen, waseChina. Utsi, “Bengikholelwa kutsi ngidzinga kuba ne-degree kuze ngingaphuyi nekutsi umsebenti loholela kahle utawungenta ngibe nemphilo lejabulisako naleyenetisako.”
Kuze baphile imphilo lejabulisako, bantfu labanyenti bafuna kufundza emanyuvesi ladvumile lokungenteka akulamanye emave. Loku bekuyintfo levame kakhulu kwaze kwaba ngulapho imitsetfo ye-COVID-19 ivimbela kuya kulamanye emave. Umbiko wanga-2012 we-Organisation for Economic Co-operation and Development utsi: “Kubo bonkhe bafundzi labafundza kulamanye emave, labangetulu kwehhafu bachamuka e-Asia.”
Batali batidzela kakhulu kuze bantfwana babo bayofundza emanyuvesi lakulamanye emave. Qixiang, waseTaiwan, utsi: “Batali bami bebangakanjingi, kodvwa bangibhadalela mine nebantfwana bakitsi labatsatfu kutsi siyofundza ekolishi lese-United States.” Njengaleminye imindeni, umndeni waQixiang kwadzingeka ungene etikweletini letinkhulu kuze ukhone kubabhadalela.
IBE YINI IMIPHUMELA?
Bantfu labanyenti labafune imfundvo lephakeme nebunjinga bakhatsatekile
Imfundvo ingakutfutfukisa kuphila ngandlela tsite, kodvwa ayihlali iletsa imiphumela bafundzi lebebayilindzele. Sibonelo nje, ngemuva kwekusebenta kamatima iminyaka leminyenti nekuboleka imali kuze babhadale esikolweni, labanyenti abayitfoli imisebenti labayifunako. Umbiko waRachel Mui ku-Business Times yaseSingapore utsi: “Liyandza linani lebantfu labaphotfule enyuvesi labangawutfoli umsebenti.” Jianjie, indvodza lenema-degree lamanyenti lehlala eTaiwan, watsi, “Bantfu labanyenti abawutfoli umsebenti labawufundzele, futsi bagcina sebemukela nobe ngabe ngumuphi umsebenti.”
Labo labawutfolako umsebenti labawufundzele, bangase batfole kutsi kuphila kwabo akubi njengobe bebakulindzele. Ngemuva kwekubuya enyuvesi lese-United Kingdom, Niran, waseThailand, watfola umsebenti lebekawufundzele. “Njengobe ngangilindzele, kuba ne-degree kwangisita ngatfola umsebenti loholela kakhulu. Nobe kunjalo, bekudzingeka ngisebente kamatima ema-awa lamanyenti kuze ngihole lemali lenyenti. Ekugcineni, lenkapani yadenda tisebenti tayo letinyenti, lokufaka ekhatsi nami. Ngabona kutsi kute umsebenti longasenta siciniseke kutsi sitawuba nelikusasa lelihle.”
Ngisho nalabo labanjingile lababonakala ungatsi baphila kahle babanato tinkinga temndeni, temphilo kanye nekukhatsateka ngetetimali. Katsutoshi, waseJapan, uyavuma, “Benginemali lenyenti, kodvwa bengisolo ngingajabuli ngobe labanye bantfu bebangidlela umona futsi bangiphatsa kabi.” Lam, wesifazane lohlala eVietnam, utsi, “Bantfu labanyenti bazama kutfola imali lenyenti ngobe bacabanga kutsi itawubenta babe nelikusasa lelihle, kodvwa bagcina bakhatsateka kakhulu baze bagule futsi bacindzeteleke.”
NjengaFranklin, bantfu labanyenti baphetse ngekutsi tinyenti tintfo letibalulekile ekuphileni kunekufuna imfundvo lephakeme nebunjinga. Kunekunaka kakhulu tintfo talelive, labanye bantfu bafuna kuba nelikusasa lelihle ngekutsi babe bantfu labalungile nangekwentela labanye tintfo letinhle. Loku kutawubenta baciniseke yini kutsi batawuba nelikusasa lelijabulisako? Sihloko lesilandzelako sitawusiniketa imphendvulo.