Baholi Betfu Labanemandla Kakhulu—Loko Labakumelelako Lamuhla

 1. Kungani licebo lenkhosi yaseSiriya neyaka-Israyeli lalingeke liphumelele?

ESIKHATSINI lesitsite emkhatsini wa-762 B.C.E. na-759 B.C.E., inkhosi yaka-Israyeli nenkhosi yaseSiriya yahlasela umbuso wemaJuda. Wawuyini umgomo wawo? Wawukuncoba iJerusalema, aketule iNkhosi Ahazi bese atibekela lenye indvodza lengasiyo intalelwane yeNkhosi Davide. (Isa. 7:5, 6) Lelicebo lawo lalingeke liphumelele. Jehova abetsembisile kutsi lomunye wesitukulwane saDavide utawuhlala esihlalweni saKhe siphelane, futsi kute setsembiso saNkulunkulu lebesingeke sigcwaliseke.—Josh. 23:14; 2 Sam. 7:16.

2-4. Chaza kutsi Isaya 7:14, 16 wagcwaliseka njani (a) ngelikhulu lesiphohlongo B.C.E. (b) ngelikhulu lekucala leminyaka C.E.

² Ekucaleni kwabonakala shengatsi ema-Israyeli nemaSiriya atawuphumelela kulemphi. Emphini yinye nje, Ahazi walahlekelwa ngemadvodza langu-120 000 latingwazi. Maseya “indvodzana yenkhosi” wabulawa. (2 Khr. 28:6, 7) Jehova abekubona loko. Wakhumbula loko lebekakwetsembise Davide, kungako atfumela umphrofethi Isaya kutsi endlulisele umlayeto lokhutsata kakhulu.

³ Isaya watsi: “Intfombi iyawukhulelwa itale indvodzana, yetsiwe libito kutsiwe ngu-Imanyuweli. . . . Kuyawutsi lomfana asengakakwati kwala lokubi akhetse lokuhle, lelo live lalamakhosi lamabili lowesabako, [iSiriya nelaka-Israyeli] liyawube selingasenalutfo.” (Isa. 7:14, 16) Incenye yekucala yalesiphrofetho isebenta ekutalweni kwaMesiya. (Mat. 1:23) Nome kunjalo, ‘lamakhosi lamabili,’ inkhosi yaseSiriya nenkhosi yaka-Israyeli abengasesiyo ingoti kuJuda ngelikhulu lekucala leminyaka C.E. Kungenteka kutsi lesiphrofetho nga-Imanyuweli sagcwaliseka ngesikhatsi sa-Isaya.

⁴ Ngekushesha ngemuva kwekutsi Isaya akhiphe lesimemetelo, umkakhe watetfwala wamtalela indvodzana, libito layo lebekunguMaheri Shalali Hashi Bazi. Kungenteka kutsi loyomntfwana ‘bekungu-Imanyuweli’ lowashiwo ngu-Isaya.a Etikhatsini teliBhayibheli, kungenteka kutsi umntfwana bekanikwa libito linye nakatalwa, mhlawumbe njengesikhumbuto salokutsite lokukhetsekile lokwenteka, kodvwa batali bakhe netihlobo babe bambita ngalelinye libito. (2 Sam. 12:24, 25) Kute bufakazi bekutsi Jesu wake wabitwa ngekutsi ngu-Imanyuweli.—Fundza Isaya 7:14; 8:3, 4.

 5. Ngusiphi sincumo lesibulima lesatsatfwa yiNkhosi Ahazi?

⁵ Ngesikhatsi Israyeli neSiriya banake emaJuda, sive sema-Asiriya naso besenta licebo lekuhlasela emaJuda. Ema-Asiriya bekusive lesinelulaka futsi abenemandla lamakhulu. Ngekusho kwa-Isaya 8:3, 4, ema-Asiriya abetawutsatsa “umcebo waseDamaseko nemphango yaseSamariya” ngaphambi kwekutsi ahlasele iningizimu yembuso wemaJuda. Kunekutsi Ahazi etsembele evini laNkulunkulu labekalikhulume nga-Isaya, wenta sivumelwane lesibulima nema-Asiriya lokwabangela kutsi emaJuda acindzeteleke. (2 Khos. 16:7-10) Njengobe abengumholi nobe umelusi wemaJuda, Ahazi bekufanele abavikele bantfu bakhe. Singahle sitibute kutsi: ‘Nakufanele ngitsatse tincumo ngibeka litsemba lami kuNkulunkulu yini nobe kumuntfu?’—Taga 3:5, 6.

 6. Catsanisa kubusa kwa-Ahazi nekwaHezekiya.

⁶ Ahazi washona nga-746 B.C.E., futsi indvodzana yakhe Hezekiya yaba yinkhosi. Bantfu bakaJuda besebatimphuya futsi besebayekele nekukhonta Jehova. Njengobe lenkhosi yatsatsa bukhosi iseyincane, yini lebeyitawuyenta kucala? Beyingetama yini kutsi yente lesive siphindze sibe nemcebo? Cha. Hezekiya bekatsandza Jehova futsi bekumfanela kuba ngumelusi walesive. Kwekucala lakwenta, kusita lesive kutsi siphindze sibe nebuhlobo lobuhle naJehova. Nakakucondza loko Nkulunkulu labefuna kutsi akwente, Hezekiya walalela ngekushesha futsi usibonelo lesihle kitsi.—2 Khr. 29:1-19.

 7. Kungani kwakubalulekile ngemaLevi kutsi acinisekiswe ngekusekelwa yinkhosi lensha?

⁷ EmaLevi abenemsebenti lobalulekile wekuvusetela kukhonta kweliciniso. Ngako-ke, Hezekiya wakhuluma nawo kute awacinisekise kutsi uyawasekela. Wabone ngemehlo engcondvo emaLevi letsembekile labekhona kulomhlangano, akhala tinyembeti tenjabulo njengobe eva inkhosi itsi: “Simakadze unikhetsile kutsi nime embikwakhe nimsebentele, nimkhonte.” (2 Khr. 29:11) EmaLevi abetfole umyalo wekutfutfukisa kukhonta kweliciniso.

 8. Ngutiphi letinye tinyatselo Hezekiya latitsatsa kute abuyisele kukhonta kweliciniso esiveni sakubo, futsi kwaba namuphi umphumela?

⁸ Hezekiya wamema onkhe emaJuda nema-Israyeli kutsi atewugubha liPhasika, lelalandzelwa nguMkhosi Wesinkhwa Lesite Imvubelo lowatsatsa emalanga lasikhombisa. Bantfu bawujabulela sibili lomkhosi kangangekutsi kwengetwa lamanye emalanga lasikhombisa solo ugujwa. LiBhayibheli litsi: “Kwaba nekujabula lokukhulu eJerusalema, ngobe kusukela etikhatsini taSolomoni, umsa waDavide, inkhosi yaka-Israyeli, kwakungazange kube khona lokufanana naloko eJerusalema.” (2 Khr. 30:25, 26) Lomkhosi wabakhutsata kakhulu bonkhe bantfu. Ku-2 Tikhronike 31:1 siyafundza: “Kwatsi kube kuphele konkhe loko, . . . abhidlita ematje lekwakutsiwa angcwele, agawula naletinsika. . . . Abhubhisa naletindzawo letiphakeme tekukhontela tithico kanye nemalati.” Ngendlela lemangalisako, Juda wacala kubuyela kuJehova. Lokubuyiselwa kwekukhonta kweliciniso bekuyintfo lebaluleke kakhulu nasicabanga ngalobekusetawenteka.

 9. (a) Aphela njani emachinga ema-Israyeli? (b) Ekucaleni, Senaheribi waphumelela njani ekuncobeni Juda?

⁹ Njengobe Isaya abeshito, ema-Asiriya ancoba umbuso waka-Israyeli wasenyakatfo futsi atfumba takhamiti takhona, kwenta njalo kwalicedza licebo lema-Israyeli lekubeka inkhosi lengaveli emndenini waDavide. Yini leyenteka kuloko lebekuhlelwe ngema-Asiriya? Ema-Asiriya abesolo afuna kuwahlasela emaJuda futsi enta konkhe lokusemandleni kute awancobe. ‘Ngemnyaka wesi-14 wekubusa kwenkhosi Hezekiya, kwesuka Senaheribi, inkhosi yase-Asiriya, wahlasela onkhe emadolobha latinqaba akaJuda, wawatfumba.’ Umbiko uveta kutsi Senaheribi wancoba emadolobha akaJuda langu-46. Asewucabange nje kutsi bewungaphatseka njani kube bewuhlala eJerusalema ngaleso sikhatsi. Emabutfo ase-Asiriya ancoba emadolobha akaJuda kancane kancane.—2 Khos. 18:13.

10. Kungani kungenteka kutsi Mikha 5:5, 6, wamkhutsata Hezekiya?

¹⁰ Kuliciniso kutsi Hezekiya bekati kutsi kunengoti letako kodvwa kunekutsi afune lusito etiveni letingemacaba njengobe kwenta Ahazi uyise wakhe lolihlubuka, wetsembela kuJehova. (2 Khr. 28:20, 21) Kungenteka kutsi bekawakhumbula emavi emphrofethi Mikha lobekaphila ngesikhatsi sakhe lowatsi mayelana ne-Asiriya: “Ngesikhatsi ema-Asiriya avimbetela . . . siyawutfumela baholi betfu labanemandla kakhulu bayekulwa nawo. Bayakuyehlula bayincobe i-Asiriya, lekulive laNimrodi; yebo, bayakuyibusa ngemkhonto.” (Mik. 5:5, 6) Lamavi laphefumulelwe kungenteka amkhutsata Hezekiya ngobe aveta kutsi imphi lengaketayeleki beyitawumelana nema-Asiriya futsi lesive lesinelunya besitawuncotjwa.

11. Sitawugcwaliseka nini siphrofetho lesimayelana nebaholi betfu labanemandla kakhulu?

¹¹ Siphrofetho lesimayelana nebaholi betfu labanemandla kakhulu, (“tikhulu,” The New English Bible) besitawugcwaliseka sekwendlule sikhatsi lesidze Jesu atelwe, “umbusi loyawubusa sive saka-Israyeli. Lusendvo lwakhe luyawusukela kulolo lwaluvele lukhona kwasekucaleni.” (Fundza Mikha 5:1, 2.) Loku kutawenteka ngesikhatsi tinceku taJehova tisongelwa “ngumAsiriya” walamuhla. Ngumaphi emabutfo Jehova latawasebentisa ngeNdvodzana yakhe lebusako nyalo kute ancobe lesitsa lesesabekako? Lombuto utawuphendvuleka njengobe sichubeka nalesihloko. Kwekucala ase sicoce ngekutsi sifundzani kuloko lokwentiwa nguHezekiya ngesikhatsi ema-Asiriya amhlasela.

12. Ngutiphi tinyatselo Hezekiya latitsatsa kanye nalabekanabo kute avikele bantfu baNkulunkulu?

¹² Jehova uhlale anesifiso sekusentela loko lesingeke sikhone kutentela kona kodvwa ulindzele kutsi natsi sente lokusemandleni etfu. “Hezekiya wase uhlolisana netindvuna takhe kanye nebaholi bemabutfo kutsi bavale lemitfombo yemanti lephuma ngaphandle kwelidolobha, bavele bamsita kuloko . . . Hezekiya wasebenta kamatima aphishanekile avusetela tonkhe tindzawo telubondza letase tibhidlikile, akha nemibhoshongo kulo. Waphindze wakha lolunye lubondza ngaphandle kwalolo, . . . Wabuye wenta incumbi yetikhali tekulwa kanye nemahawu.” (2 Khr. 32:3-5) Kute avikele aphindze eluse bantfu bakhe ngaleso sikhatsi, Jehova wasebentisa emadvodza latingwazi—Hezekiya, netindvuna takhe kanye nebaphrofethi labetsembekile.

13. Ngusiphi sinyatselo lesibaluleke kakhulu lesatsatfwa nguHezekiya kute alungiselele bantfu ngekuhlaselwa lebekuseta? Chaza.

¹³ Lokwalandzela Hezekiya lakwenta lebekubalulekile, kuvikela lemitfombo yemanti kanye nekucinisa tibondza talelidolobha. Njengobe abengumelusi lokahle, Hezekiya wahlanganisa labantfu wabakhutsata ngemavi latsi: “Ningesabi, futsi ningapheli emandla ngenca yalenkhosi yase-Asiriya . . . , ngobe kitsi kunemandla lamakhulu kunalawa lenawo yona. Kuye kunemkhono wenyama, kodvwa kitsi kunaSimakadze Nkulunkulu wetfu lotasisita atilwe letimphi tetfu.” Lesi bekusikhumbuto lesacinisa kukholwa kwabo, kwati kutsi Jehova utabalwela bantfu bakhe. Nakeva loko emaJuda, ‘ema sibindzi ngaloko Hezekiya, inkhosi yakaJuda, lakusho kuwo.’ Loko kwawasita kutsi abe nekukholwa kuNkulunkulu futsi abe nesibindzi. Hezekiya netikhulu kanye nebaholi bemabutfo kuhlanganise nemphrofethi Mikha na-Isaya, bakhombisa kutsi babelusi labakahle, njengobe Jehova abeshito ngemphrofethi wakhe.—2 Khr. 32:7, 8; fundza Mikha 5:5, 6.

14. Nguyiphi indzima leyadlalwa nguRabishake, futsi bantfu benta njani ngaloko?

¹⁴ Inkhosi yase-Asiriya yakanekisa eLakhishi, eningizimu-nshonalanga yeJerusalema. Yase itfumela titfunywa letintsatfu kutsi tiyewutjela bantfu bakhona kutsi bayekele kulwa. Umkhulumeli wayo, lobekabitwa ngekutsi nguRabishake wasebentisa emachinga lehlukehlukene. Akhuluma ngelulwimi lwesiHebheru, wancenga bantfu kutsi bangayilaleli inkhosi yabo kodvwa balalele ema-Asiriya, wase ucala nemanga abetsembisa kutsi utababuyisela endzaweni yakubo kute baphile imphilo lentofontofo. (Fundza 2 Emakhosi 18:31, 32.) Ngemuva kwaloko, Rabishake wabatjela kutsi bonkulunkulu baletinye tive abakakhoni kuvikela tikhonti tabo, ngako naJehova ngeke awasindzise emaJuda kuma-Asiriya. Ngekuhlakanipha, bantfu bakhetsa kungakunaki lokunyundzela, lokuyindlela levame kulandzelwa tinceku taJehova lamuhla.—Fundza 2 Emakhosi 18:35, 36.

15. Yini lobekufanele yentiwe takhamuti taseJerusalema, futsi Jehova watisindzisa njani?

¹⁵ Kuliciniso kutsi Hezekiya abetfukutsele abila, kodvwa kunekutsi acele lusito kulesinye sive, wabita umphrofethi Isaya. Isaya watjela Hezekiya kutsi: “Ngeke [inkhosi Senaheribi] ingene kulelidolobha nome icibishele imicibisholo kulo.” (2 Khos. 19:32) Lobekudzingekile kutsi takhamuti taseJerusalema tibe nesibindzi tingaphelelwa ngemandla. Jehova abetawalwela emaJuda futsi nguloko kanye lakwenta. ‘Ngalobo busuku ingilosi yaSimakadze yaphuma yabhubhisa emadvodza langu-185 000, labesenkambu yema-Asiriya.’ (2 Khos. 19:35) Kusindziswa kwemaJuda kwefika, hhayi ngekutsi Hezekiya avale lemitfombo yemanti nobe ngekucinisa tibondza talelidolobha, kodvwa ngemandla aJehova.

16. Bobani lamuhla labamelelwa (a) Takhamuti taseJerusalema (b) “ngumAsiriya” (c) baholi betfu labanemandla kakhulu?

¹⁶ Lesiphrofetho sebaholi betfu labanemandla kakhulu, sigcwaliseka kakhulu esikhatsini setfu. Takhamuti taseJerusalema yasendvulo tatihlaselwa ngema-Asiriya. Madvutane, bantfu baJehova batawuhlaselwa “ngumAsiriya” walamuhla lotawetama kubacedza. ImiBhalo ikhuluma ngalokuhlasela kanye nekuhlasela ‘kwaGogi wakaMagogi,’ kuhlasela ‘kwenkhosi yasenyakatfo,’ nekuhlasela ‘kwemakhosi emhlaba.’ (Hez. 38:2, 10-13; Dan. 11:40, 44, 45; Semb. 17:14; 19:19) Loku kumelela kuhlasela lokwehlukehlukene yini? Cha akunjalo. Kungenteka kutsi liBhayibheli lisebentisa emagama lehlukene lachaza kuhlasela lokufanako. Ngusiphi ‘sikhali lesiyimfihlo’ lesichazwa esiphrofethweni saMikha Jehova latasisebentisa kute alwe nalesitsa lesinelunya lesibitwa ngekutsi “ngumAsiriya”? Usebentisa sikhali lelingakavami ‘baholi betfu labanemandla kakhulu.’ (Mik. 5:5) Labelusi nalabaholi (nobe “tikhulu,” NEB) lokulibutfo lelingakavami, ngulabadzala emabandleni. (1 Phet. 5:2) Lamuhla Jehova usebentisa bazalwane labanyenti labavutsiwe kutsi beluse timvu takhe letiligugu kute bacinise bantfu bakhe kulokuhlasela “kwemAsiriya” walamuhla. Siphrofetho saMikha sitsi ‘bayowelusa live lase-Asiriya ngenkemba.’ (Mik. 5:6, NW) Emkhatsini ‘wetikhali lesilwa ngato,’ utawutfola ‘nenkemba yemoya,’ lokuliVi laNkulunkulu.—2 Khor. 10:4; Ef. 6:17.

17. Ngumaphi emaphuzu lamane labadzala labangawatfola kulendzaba lesisandza kucoca ngayo?

¹⁷ Labadzala labafundza lesihloko bangatfola nankha emaphuzu lalusito kulendzaba lesisandza kucoca ngayo: (1) Sinyatselo lesibaluleke kakhulu lesingasitsatsa kute silungele kuhlasela “kwemAsiriya,” kucinisa kukholwa kwetfu kuNkulunkulu nekusita bazalwane betfu kutsi bente ngendlela lefanako. (2) Nakuhlasela “umAsiriya,” labadzala kufanele bangangabati nakancane kutsi Jehova utasisindzisa. (3) Ngaleso sikhatsi, sicondziso lesisindzisa kuphila lesisitfola enhlanganweni yaJehova singase sibonakale singasebenti ngekubona kwetfu. Sonkhe kufanele sihlale sikulungele kulalela ticondziso lesingahle sititfole, nanobe sivumelana nato nobe singavumelani nato, ngenca yekutsi kutilalela kutawusindzisa kuphila kwetfu. (4) Nyalo sikhatsi sekutsi bonkhe lokungenteka betsembe imfundvo lephakeme, umcebo nobe tinhlangano tebantfu bashintje indlela labacabanga ngayo. Labadzala kufanele bahlale bakulungele kusita nome ngubani lokungenteka kutsi nyalo unekukholwa lokubutsakatsaka.

18. Kungase kusizuzise ngani kuzindla ngalendzaba esikhatsini lesitako?

¹⁸ Sitawufika sikhatsi lapho tinceku taNkulunkulu talamuhla titawubonakala tingakavikeleki njengobe bekunjalo kumaJuda lebekavaleleke eJerusalema ngesikhatsi saHezekiya. Shengatsi sonkhe angasicinisa emavi aHezekiya ngaleso sikhatsi. Asikhumbule kutsi etitseni tetfu “kunemkhono wenyama, kodvwa kitsi kunaSimakadze Nkulunkulu wetfu lotasisita atilwe letimphi tetfu.”—2 Khr. 32:8.