Unayo Yini “Inhlitiyo Yekwati” Jehova?

1, 2. Yini lengenta labanye bawatsandze emakhiwa?

UYAKUTSANDZA yini kudla emakhiwa, kungaba ngulasandza kukhiwa esihlahleni nobe lomisiwe? Labanyenti bayatsandza kuwadla. Emakhiwa alinywa etindzaweni letinyenti emhlabeni. EmaJuda asendvulo abewatsandza kakhulu emakhiwa. (Nah. 3:12; Luk. 13:6-9) Emakhiwa ayimphilo futsi labanyenti batsi akahle kakhulu ngobe ayayisita inhlitiyo.

² Jehova wake wahlobanisa emakhiwa netinhlitiyo. Nkulunkulu abengachazi kutsi kuyimphilo kangakanani kudla emakhiwa, kodvwa abemane nje afanekisa. Loko lakusho ngemphrofethi Jeremiya kuyayisita inhlitiyo yakho kanye netinhlitiyo talabo lobatsandzako. Njengobe sihlola loko lakusho, cabanga ngekutsi loko kungasho kutsini ngemaKhristu.

 3. Emakhiwa lokukhulunywa ngawo kuJeremiya sehluko 24, amelelani?

³ Ase sicale sicoce ngaloko Nkulunkulu lakusho ngesikhatsi saJeremiya ngemakhiwa. Ngemnyaka wanga-617 B.C.E., budlelwane besive sakaJuda naNkulunkulu bebumunyu. Nkulunkulu wasiniketa umbono ngaloko lobekutawenteka kuso esikhatsini lesitako, wakwenta loko ngekutsi akufanekise ngetinhlobo letimbili temakhiwa—emakhiwa “lamahle” ‘nalamabi.’ (Fundza Jeremiya 24:1-3.) Emakhiwa lamabi abemelela iNkhosi Sedekiya nalabanye labafanana nayo labaphatfwa kabuhlungu yiNkhosi Nebukhadnezari nemabutfo ayo. Kodvwa kutsiwani ngaHezekeli, Danyela kanye nebangani bakhe labatsatfu labebaseBhabhulona nalamanye emaJuda labekatawutfunjelwa khona? Bebafanana nemakhiwa lamahle. Insali yawo beyitawuncandzeka kute iyewakha kabusha liJerusalema nelithempeli lalo. Ngekuhamba kwesikhatsi, loko kwenteka.—Jer. 24:8-10; 25:11, 12; 29:10.

 4. Ngusiphi sikhutsato lesingasitfola kuloko lokwashiwo nguNkulunkulu ngemakhiwa lamahle?

⁴ Jehova washo nankha emavi mayelana nalabo labamelelwa ngemakhiwa lamahle: “Ngiyawubapha inhlitiyo yekwati mine kutsi mine nginguSimakadze. Bayawuba bantfu bami.” (Jer. 24:7) Sihloko salesifundvo setfu sisekelwe kulamavi, futsi ayakhutsata. Nkulunkulu unesifiso sekuniketa ngamunye wetfu “inhlitiyo yekwati” yena. Kulesimo, “inhlitiyo” isho sifiso umuntfu lanaso. Kuliciniso kutsi uyafuna kuba nenhlitiyo lenjalo nekuba yincenye yebantfu baNkulunkulu. Kute ukwati kukwenta loko, kudzingeka utadishe uphindze ukwente loko lokushiwo liVi lakhe, uphendvuke futsi ugucuke, unikele kuphila kwakho kuNkulunkulu bese uyabhajatiswa egameni leYise, neleNdvodzana, nelemoya longcwele. (Mat. 28:19, 20; Imis. 3:19) Kungenteka sewutitsetse leto tinyatselo, nobe sewuhlangana njalo naboFakazi BaJehova futsi ufuna kutsatsa leto tinyatselo.

 5. Ngalokuyinhloko Jeremiya wakhuluma ngetinhlitiyo tabobani?

⁵ Kusenekwenteka sesititsetse letinye taletinyatselo nobe tonkhe, kodvwa sisadzinga kusinaka simo setfu sengcondvo nendlela lesitiphatsa ngayo. Ungabona kutsi yini lebangela loko nawuhlola lokunye lokwabhalwa nguJeremiya ngenhlitiyo. Letinye tehluko tencwadzi yaJeremiya betikhuluma ngaletinye tive, kodvwa ngalokuyinhloko lencwadzi beyikhuluma ngesive sakaJuda ngesikhatsi sekubusa kwemakhosi lasihlanu. (Jer. 1:15, 16) Jeremiya wabhala ngemadvodza, bafati kanye nebantfwana labebatinikele banebudlelwane lobuhle naJehova. Bokhokho babo bebatikhetsele kuba sive kulobo budlelwane. (Eks. 19:3-8) Ngesikhatsi saJeremiya, labantfu bavuma kutsi batinikele kuNkulunkulu. Badzimate batsi: “Siyakuta kuwe, ngobe wena unguSimakadze Nkulunkulu wetfu.” (Jer. 3:22) Nobe kunjalo, ucabanga kutsi sasinjani simo sabo senhlitiyo?

 6. Yini lesenta sibe nesifiso sekwati loko lokwashiwo nguNkulunkulu ngenhlitiyo?

⁶ Bodokotela balamuhla bangasebentisa bucwepheshe lobusetulu kute babone kutsi sinjani simo senhlitiyo nendlela lesebenta ngayo. Nobe kunjalo, Jehova angenta lokungetulu kwaloko, njengobe enta ngesikhatsi saJeremiya. Kuyamfanela kukwenta loko, njengobe sibona emavini akhe latsi: “Inhlitiyo iyayengana ngetulu kwato tonkhe tintfo, futsi yonakele ngalokwengcile. Ngubani nje longayicondza? Mine Simakadze ngiphenya inhlitiyo, . . . kuze ngimvuze umuntfu njengekwekutiphatsa kwakhe nanjengekwemisebenti yakhe.” (Jer. 17:9, 10) ‘Kuphenya inhlitiyo’ akusho kutsi bodokotela kufanele bahlole inhlitiyo lengashaya tikhatsi letitigidzigidzi letintsatfu nasewuneminyaka lengu-70 nobe lengu-80 budzala. Esikhundleni saloko, Jehova abekhuluma ngekuphenya inhlitiyo lengumfanekiso. Leyo ‘nhlitiyo’ imelela loko umuntfu langiko ngekhatsi, lokuhlanganisa tifiso takhe, imicabango, indlela lativa ngayo, simo sengcondvo nemigomo. Nawe unenhlitiyo lenjalo. Nkulunkulu angayihlola, futsi nawe ungayihlola ngelizinga lelitsite.

 7. Jeremiya wasichaza njani simo senhlitiyo yemaJuda lamanyenti ngesikhatsi sakhe?

⁷ Kute silungele lokutihlola, singase sitibute: ‘Besinjani simo senhlitiyo lengumfanekiso kumaJuda lamanyenti ngesikhatsi saJeremiya?’ Kute siphendvule lombuto, asicabange ngesimo lesingakavami kuloko lokwabhalwa nguJeremiya: “Yonkhe indlu yaka-Israyeli ayikasoki enhlitiyweni.” Abengakhulumi ngekusoka lokuvamile lobekwentiwa kumaJuda esilisa, ngobe watsi: “Lalela ngikutjele! Ayeta emalanga, lapho ngiyawujezisa bonkhe labasoke enyameni kuphela.” Ngako-ke, ngisho nemaJuda lasokile ‘abengakasoki enhlitiyweni.’ (Jer. 9:25, 26) Bekusho kutsini loko?

8, 9. Yini emaJuda lamanyenti lokwadzingeka ayente ngetinhlitiyo tawo?

⁸ Umcondvo wemavi latsi ‘inhlitiyo lengakasoki’ siwutfola kuloko Nkulunkulu lacela emaJuda kutsi akwente: “Susani lijwabu letinhlitiyo tenu, nitinikele kuye ngalokuphelele, nine madvodza akaJuda nesive saseJerusalema. Ngaphandle kwaloko lulaka lwami lutawucitseka luvutse . . . ngenca yebubi lenibentile.” Kodvwa bubi labebabentile bebusuka kuphi? Bebusuka etinhlitiyweni tabo. (Fundza Makho 7:20-23.) Asebentisa Jeremiya, Nkulunkulu wawutfola umtfombo webubi bemaJuda. Bewanenkhani futsi avukela etinhlitiyweni tawo. Indlela labewenta ngayo tintfo nemicabango yawo, beyingamjabulisi. (Fundza Jeremiya 5:23, 24; 7:24-26.) Nkulunkulu wawatjela: “Tisokeni nine kuJehova, susani lijwabu letinhlitiyo tenu.”—Jer. 4:4; 18:11, 12, NW.

⁹ Ngako-ke, emaJuda angesikhatsi saJeremiya abedzinga kwelashwa tinhlitiyo tawo letingumfanekiso—‘kusokwa kwenhlitiyo’—njengobe nalabo bangesikhatsi saMosi benta. (Dut. 10:16; 30:6) ‘Kususa lijwabu letinhlitiyo tawo’ bekusho kususa loko lobekwenta tinhlitiyo tawo tingaphili—imicabango yawo, tifiso nobe tintfo lebetiwenta angayilaleli imiyalo yaNkulunkulu.—Imis. 7:51.

10. Sibonelo saDavide sisita kutsi sifune kwenta ini?

¹⁰ Sijabula kakhulu ngekutsi Nkulunkulu usiniketa kucondza mayelana nenhlitiyo yetfu lengumfanekiso. Labanye bangatibuta kutsi: ‘Kodvwa yini lamuhla lengabangela boFakazi BaJehova bakhatsateke ngaloko?’ Akusho kutsi emaKhristu lamanyenti emabandleni enta tintfo letingakalungi nobe ‘angemakhiwa lamabi’ njengobe abenjalo emaJuda lamanyenti esikhatsini lesendlulile. Ngalokwehlukile, tinceku taNkulunkulu lamuhla tibantfu labatinikele kuye futsi tiphila imphilo lehlantekile. Nobe kunjalo, khumbula sicelo Davide lasenta kuJehova nakatsi: “Ngihlolisise, Nkulunkulu, wati inhlitiyo yami! Ngilinge, wati imicabango yami, ubone kutsi kute yini lokubi ekuhambeni kwami.”—Hla. 17:3; 139:23, 24.

11, 12. (a) Yini leyenta ngamunye wetfu kudzingeke ahlole inhlitiyo yakhe? (b) Yini Nkulunkulu langeke ayente?

¹¹ Jehova ufuna kutsi sonkhe sibe nebudlelwane lobuhle naye futsi semukelwe nguye. Mayelana nalabo labalungile, Jeremiya watsi: “Simakadze, longuSomandla, wena lohlola lolungile, uphenye inhlitiyo nengcondvo.” (Jer. 20:12) Nangabe Somandla ahlola inhlitiyo yalabo labalungile, akukafaneli yini natsi sitihlole ngekwetsembeka? (Fundza Tihlabelelo 11:5.) Nasenta njalo, singase sibone simo sengcondvo, umgomo nobe imiva lejulile ledzinga kunakwa kitsi. Singaphindze sibone intfo letsite leyenta inhlitiyo yetfu ibe butsakatsaka, kube shengatsi ‘lijwabu lenhlitiyo yetfu’ lesibonako kutsi kufanele lisuswe. Loko kungasho kwelapha inhlitiyo yetfu lengumfanekiso. Nangabe uyavuma kutsi kutawuba kahle kuhlola inhlitiyo yakho lengumfanekiso, yini longahle uyibuke? Ungatenta njani tingucuko letidzingekako?—Jer. 4:4.

¹² Lesiciniseka ngako nguloku: Akukafaneli sicabange kutsi Jehova utasenta sishintje ngenkhani. Nakakhuluma ‘ngemakhiwa lamahle’ watsi ‘uyawubapha inhlitiyo yekwati’ yena. Akazange asho kutsi utawubenta bashintje inhlitiyo yabo ngenkhani. Bekufanele babe nesifiso sekuba nenhlitiyo lekhombisa kutsi bayamati Nkulunkulu. Asiyidzingi yini tsine inhlitiyo lenjalo?

13, 14. Kungamuphi umcondvo inhlitiyo yemKhristu ingaba yingoti kuye?

¹³ Jesu watsi: “Enhlitiyweni kuvela imicabango lemibi, nekubulala, nekuphinga, nebugwadla, nekuba, nekucalemanga, nekuhlambalata.” (Mat. 15:19) Kuyacaca-ke kutsi nangabe umzalwane inhlitiyo yakhe lebutsakatsaka imenta aphinge nobe atiphatse kabi ngekwelicasi futsi angaphendvuki, angase alahlekelwe budlelwane bakhe naNkulunkulu. Ngisho nemuntfu longakatenti letintfo letimbi lesisandza kutisho angase avumele sifiso lesibi sikhule enhlitiyweni yakhe. (Fundza Matewu 5:27, 28.) Kulapho-ke kuhlola inhlitiyo kungase kusite khona. Nangabe uhlola inhlitiyo yakho, ungayitfola yini imiva lemibi ngalotsite webulili lobehlukile, lengeke yemukeleke kuNkulunkulu, futsi lokudzingeka uyisuse?

¹⁴ Kusenekwenteka umzalwane akabi ‘ngumbulali,’ kodvwa angahle avumele intfukutselo kutsi ikhule enhlitiyweni yakhe adzimate amenyanye umKhristu lakanye naye. (Lev. 19:17) Angakwenta yini lokusemandleni akhe kute asuse imicabango lenjalo lengenta inhlitiyo yakhe ibe yimbi?—Mat. 5:21, 22.

15, 16. (a) Shano sibonelo lesikhombisa kutsi umKhristu angaba njani ‘njengalongakasoki enhlitiyweni.’ (b) Ucabanga kutsi yini lengenta ‘inhlitiyo lengakasoki’ ingamjabulisi Jehova?

¹⁵ Kuyajabulisa kutsi emaKhristu lamanyenti ete ‘inkinga yenhlitiyo.’ Nobe kunjalo, Jesu waphindze wakhuluma ‘ngemicabango lemibi.’ Lena ngimibono nobe simo sengcondvo lesingangcolisa tici letinyenti tekuphila. Sibonelo saloku kutsi umuntfu angabavuna kakhulu labo lahlobene nabo. Kuliciniso kutsi emaKhristu ayafuna kuba ‘nelutsandvo’ netihlobo tawo, akafuni kufanana nebantfu labanyenti lesebaphelelwe lutsandvo lolunjalo ‘kulamalanga ekugcina.’ (2 Thim. 3:1, 3) Nobe kunjalo, kuvamile kutsi lutsandvo lolunjalo bese silubonisa ngekwecisa. Labanyenti batsi “imbilapho ivela silondza.” Ngekusho njalo bangase bavune tihlobo tabo kunobe yini letiyentako, batfukutsele nangabe sihlobo sabo siphatfwa kabi. Cabanga ngaloko intfukutselo lenkhulu leyabangela bomnakaboDina kutsi bakwente. (Gen. 34:13, 25-30) Phindze ucabanga nangaloko lobekusenhlitiyweni ya-Absalomu lokwamenta wabulala umnakabo, Amnoni. (2 Sam. 13:1-30) Labantfu lesisandza kukhuluma ngabo, bebete yini “imicabango lemibi”?

¹⁶ Kuliciniso kutsi emaKhristu eliciniso awabulali. Nobe kunjalo, kufanele yini abe nemiva lemibi ngemzalwane nobe dzadze lophetse kabi sihlobo sawo nobe lacabanga kutsi wente njalo? Angase angafuni kucitsa sikhatsi nemKhristu lacabanga kutsi uphetse kabi sihlobo sawo nobe angase angambonisi umusa. (Heb. 13:1, 2) Kuba nemiva lenjalo lemibi nekuba bete umusa kulabanye kukhombisa kutsi ute lutsandvo futsi loko akukafaneli kube yintfo letsatfwa melula. UMhloli wetinhlitiyo angakuchaza ngekutsi ‘kungasoki enhlitiyweni.’ (Jer. 9:25, 26) Khumbula labo Jehova latsi kubo ‘abasuse lijwabu letinhlitiyo tabo.’—Jer. 4:4.

17. Kwesaba Jehova kungasisita njani kutsi sibe nenhlitiyo lephilile?

¹⁷ Kutsiwani nangabe uhlola inhlitiyo yakho lengumfanekiso ukhandze kutsi ayitilaleli teluleko taJehova ngendlela lefanele nekutsi ngelizinga lelitsite ‘ayikasoki’? Mhlawumbe uyabona kutsi wesaba bantfu, unesifiso sekwatiwa nobe sekuba nemcebo mhlawumbe unenkhani ufuna kutsi tintfo tenteke ngendlela yakho. Akucali ngawe loko. (Jer. 7:24; 11:8) Jeremiya wabhala kutsi emaJuda langaketsembeki angesikhatsi sakhe ‘abenenkhani netinhlitiyo letihlubukako.’ Wachubeka watsi: “Abatekhuti bona batsi: ‘Asesabe Simakadze Nkulunkulu wetfu, lowehlisa timvula tasekwindla.’” (Jer. 5:23, 24) Loko akukhombisi yini kutsi lokungakusita ‘ususe lijwabu lenhlitiyo’ yakho kutsi wesabe uphindze uhloniphe Jehova? Kumesaba lokunjalo kungasisita kutsi sibe nenhlitiyo lenesifiso sekwenta loko lokufunwa nguNkulunkulu.

18. Ngusiphi setsembiso lesentiwa nguJehova kulabo labasesivumelwaneni lesisha?

¹⁸ Singaphindze sibambisane naJehova njengobe asinika ‘inhlitiyo yekumati.’ Ecinisweni, nguloko letsembisa kukwentela labagcotjiwe esivumelwaneni lesisha: “Ngiyawufaka umtsetfo wami etingcondvweni tabo, ngiwubhale etinhlitiyweni tabo. Ngiyawuba nguNkulunkulu wabo, bona babe bantfu bami.” Kutsiwani ngekumati kahle yena? Wachubeka watsi: “Sekuyawubate umuntfu loyawufundzisa makhelwane wakhe, nome indvodza ifundzise umnakabo, itsi: ‘Yati Simakadze,’ ngobe bonkhe sebayawungati kusukela kulomncane kuye kulomkhulu . . . Ngobe ngiyawubatsetselela bubi babo, tono tabo ngingasaphindzi ngitikhumbule.”—Jer. 31:31-34.a

19. Ngutiphi tibusiso emaKhristu eliciniso latatitfola esikhatsini lesitako?

¹⁹ Nobe ngabe utawutfola tinzuzo taphakadze esivumelwaneni lesisha ezulwini nobe emhlabeni, kufanele ufune kumati Jehova uphindze ube yincenye yebantfu bakhe. Kwekucala lokufanele ukwente kute utfole letibusiso kutsi ucolelwe tono takho ngemhlatjelo wenhlawulo yaKhristu. Kwati kutsi ungacolelwa tono takho kufanele kukwente ucolele labanye, ngisho nalabo lokubonakala kumatima kubacolela. Sifiso sakho sekususa kugula lokungahle kube senhlitiyweni yakho, sitayiphilisa inhlitiyo yakho. Utawubese uyakhombisa kutsi awufuni nje kumane ukhonte Jehova kodvwa nekutsi ufuna kumati kancono. Utawufanana nalabo Jehova latsi kubo ngaJeremiya: “Niyakungifuna ningitfole, naningifunisisa ngayo yonkhe inhlitiyo yenu. Ngiyawutfolwa ngini.”—Jer. 29:13, 14.