‘Cinisekani Kutsi Kubete Umuntfu Lonitfumbako’

 1. Ngekusho kwaKholose 2:4, 8, Sathane wetama njani kulawula indlela lesicabanga ngayo?

SATHANE ufuna sikhweshe kuJehova. Kute afeze lomgomo wakhe, Sathane wetama konakalisa indlela lesicabanga ngayo aphindze asente sicabange ngendlela yakhe. Uyasiyenga kute simlandzele. Loko ukwenta ngekusebentisa tintfo letenetisa tifiso tetfu.—Fundza Kholose 2:4, 8.

2-3. (a) Kungani kufanele sisinakisise secwayiso lesikuKholose 2:8? (b) Sitawucoca ngani kulesihloko?

² Sisengotini lenkhulu yekudukiswa nguSathane. Khumbula kutsi secwayiso saPawula lesisencwadzini yaKholose 2:8 sasingakabhalelwa bantfu labangakholwa. Pawula bekasibhalele emaKhristu lebekagcotjwe ngemoya longcwele. (Khol. 1:2, 5) LamaKhristu asendvulo bekasengotini yekudukiswa nguSathane, futsi natsi sisengotini lenkhulu kakhulu. (1 Khor. 10:12) Kungani? Kungobe Sathane wajikijelwa emhlabeni futsi wenta konkhe lokusemadleni akhe kute adukise tinceku taNkulunkulu letetsembekile. (Semb. 12:9, 12, 17) Ngetulu kwaloko, siphila esikhatsini lapho khona bantfu lababi nebakhohlisi bachubeka ‘badlanga ngebubi.’—2 Thim. 3:1, 13.

³ Kulesihloko sitawucoca ngekutsi Sathane ukusebentisa njani kuyenga lokulite kute etame kushintja indlela lesicabanga ngayo. Sitawufundza ‘ngemachinga’ akhe lamatsatfu. (Ef. 6:11) Esihlokweni lesilandzelako sitawucoca ngendlela yekulungisa imiphumela lemibi yemachinga aSathane endleleni lesicabanga ngayo. Asesicale sicoce ngaloko lesingakufundza endleleni Sathane ladukisa ngayo ema-Israyeli ngemuva kwekutsi angene eVeni Lesetsembiso.

4-6. Ngekusho kwaDutheronomi 11:10-15, nguyiphi indlela lensha yekulima ema-Israyeli bekufanele ayifundze nakefika eVeni Lesetsembiso?

⁴ Ngekuhlakanipha, Sathane wakhohlisa ema-Israyeli kute akhonte titfombe. Wakwenta njani loko? Sathane bekati kutsi bantfu bayakudzinga kudla, ngako wasebentisa lesidzingo kute abente tigcili takhe. Ngesikhatsi ema-Israyeli angena eVeni Lesetsembiso, bekufanele ashintje indlela labelima ngayo. Ngesikhatsi aseGibhithe, ema-Israyeli bekanisela emasimu awo ngemanti labebuya emfuleni iNayili. Nobe kunjalo, eVeni Lesetsembiso bekute umfula lomkhulu, ngako ema-Israyeli beketsembele kakhulu emvuleni nasematolweni kute anisele emasimu awo. (Fundza Dutheronomi 11:10-15; Isa. 18:4, 5) Ngako, ema-Israyeli bekufanele afundze indlela lensha yekulima. Loko bekungeke kuze kube melula ngobe bantfu labanyenti lebebakwati kulima bebafele ehlane.

⁵ Jehova wachazela bantfu bakhe kutsi timo tabo besetishintjile. Waphindze wabaniketa secwayiso lebesibonakala shengatsi asikahlobani nekulima. Watsi: “Caphelani-ke kutsi tinhlitiyo tenu tingayengeki bese niyaphambuka nikhonte labanye bonkulunkulu nikhotsamele bona.” (Dut. 11:16, 17) Ngesikhatsi Jehova akhuluma nebantfu bakhe ngekulima, kungani abacwayisa ngekukhonta bonkulunkulu bemanga?

⁶ Jehova bekati kutsi ema-Israyeli bekatawulingeka kutsi afundze tindlela tekulima kubomakhelwane babo lebebakhonta bonkulunkulu bemanga. Kuliciniso kutsi labomakhelwane bebati lokunyenti ngekulima futsi bantfu baNkulunkulu bebangafundza emakhono lamahle kubo, kodvwa loko bekuyingoti. Indlela balimi lebebangemaKhenani lebebacabanga ngayo beyonakaliswe kutsi bebakhonta Bhali. Bebacabanga kutsi sibhakabhaka saBhali futsi nguye lebekenta kutsi imvula ine. Jehova bekangafuni kutsi bantfu bakhe badukiswe nguletimfundziso letingemanga. Nobe kunjalo, esikhatsini lesinyenti ema-Israyeli akhetsa kukhonta Bhali. (Num. 25:3, 5; Khu. 2:13; 1 Khos. 18:18) Naka indlela Sathane lawagcilata ngayo ema-Israyeli.

 7. Kukholwa kwema-Israyeli kwavivinywa njani ngesikhatsi angena eVeni Lesetsembiso?

⁷ Lichinga lekucala Sathane lalisebentisa sifiso lesivamile sekubona umhlaba uniselwa yimvula. Eveni Lesetsembiso betiba tincane kakhulu timvula lebetiba khona kusukela ekupheleni kwa-April kuze kuyofika September. Kute asindze futsi abe nenala yekudla, ema-Israyeli beketsembele etimvuleni lebetivame kucala ngenyanga ya-October. Sathane wadukisa ema-Israyeli ngekuwenta acabange kutsi kute aphumelele bekufanele ente imikhuba lebeyentiwa bomakhelwane babo lebebakhonta tithico. Labomakhelwane bebakholelwa kutsi bekufanele kwentiwe imisimeto letsite kute labonkulunkulu bente litulu line. Bantfu labebete kukholwa kuJehova, bebetsemba kutsi lena ngiyo kuphela indlela yekucedza somiso, kungako bacala kukhonta Bhali.

 8. Nguliphi licebo lesibili Sathane lalisebentisa? Chaza.

⁸ Sathane wasebentisa lichinga lesibili kute adukise ema-Israyeli. Wasebentisa sifiso sekutiphatsa kabi. Tive lebetingamkhonti Nkulunkulu, betikhonta bonkulunkulu bato ngekutsi tente tento tekutiphatsa lokubi. Loluhlobo lwekukhonta lolwenyanyekako belufaka ekhatsi kutiphatsa lokubi lobekwentiwa bafati nemadvodza ethempelini. Bantfu bebangagcini nje ngekuvumela butabani kanye naletinye tinhlobo tekutiphatsa lokubi kodvwa bebaphindze bakutsatse njengentfo letayelekile! (Dut. 23:17, 18; 1 Khos. 14:24) Bebacabanga kutsi lokwenta lamasiko bekutawukhutsata bonkulunkulu babo kutsi bente umhlaba ukhicite. Ema-Israyeli abelingisa imikhuba yekutiphatsa kabi kwebantfu lebebangamkhonti Nkulunkulu futsi ayengeka kutsi akhonte bonkulunkulu bemanga. Ecinisweni, besewatigcili taSathane.

 9. Ngekusho kwaHoseya 2:16, 17, Sathane wawushintja njani umbono wema-Israyeli ngaJehova?

⁹ Sathane wasebentisa licebo lesitsatfu. Wenta ema-Israyeli aba nembono lokabi ngaJehova. Ngesikhatsi kusaphila umphrofethi Jeremiya, Jehova watsi baphrofethi bemanga babangela ema-Israyeli kutsi alikhohlwe libito lakhe ngenca “yekukhonta Bhali.” (Jer. 23:27) Bantfu baNkulunkulu bayekela kusebentisa libito laJehova futsi esikhundleni salo basebentisa libito laBhali lelisho “Umnikati” nobe “Inkhosi.” Loko bekutawenta ema-Israyeli acabange kutsi kute umehluko emkhatsini waJehova naBhali. Ngenca yaloko bekutawuba melula kubo kuhlanganisa kukhonta Jehova kanye nemikhosi yaBhali. —Fundza Hoseya 2:16, 17.

10. Ngumaphi emachinga Sathane lawasebentisako lamuhla?

¹⁰ Sathane solo usebentisa emachinga lafanako nalamuhla. Ubamba bantfu ngekusebentisa tifiso tabo, kukhutsata kutiphatsa lokubi ngekwelicasi kanye nekonakalisa umbono bantfu labanawo ngaJehova. Sitawucale sicoce ngekutsi Sathane ubenta njani bantfu babe nembono lokabi ngaJehova.

11. Sathane uwonakalise njani umbono bantfu labanawo ngaJehova?

¹¹ Sathane wonakalisa umbono bantfu labanawo ngaJehova. Ngemuva kwekufa kwebaphostoli baJesu, bantfu lebebatibita ngekutsi bangemaKhristu bacala kusakata timfundziso letingemanga. (Imis. 20:29, 30; 2 Thes. 2:3) Letihlubuki tacala kuyenga bantfu kute bangati kutsi Nkulunkulu weliciniso ungubani. Nasi sibonelo, letihlubuki tayekela kusebentisa ligama laNkulunkulu emaBhayibhelini ato futsi tancuma kusebentisa ticu letifana nalesitsi “Nkhosi.” Kususa ligama laNkulunkulu futsi tifake sicu lesitsi “Nkhosi,” bekwenta kube lukhuni kutsi umfundzi weliBhayibheli abone umehluko emkhatsini waJehova nalamanye emakhosi lokukhulunywa ngawo emiBhalweni. (1 Khor. 8:5) Letihlubuki betisebentisa sicu lesitsi “Nkhosi” natikhuluma ngaJehova naJesu, futsi loko bekwenta kube matima kucondza kutsi Jehova neNdvodzana yakhe abafani futsi banetikhundla letehlukene. (Joh. 17:3) Lokudideka kwabangela kutsi lemfundziso yaMtsatfu amunye yandze, lokuyimfundziso lengekho eVini laNkulunkulu. Ngenca yaloko, bantfu labanyenti bacabanga kutsi Nkulunkulu akacondzakali futsi ngeke baze bamati. Lawa ngemanga lamabi kakhulu!—Imis. 17:27.

12. Ngekusho kwaRoma 1:28-31, yini lekhutsatwa yinkholo yemanga, futsi kube namiphi imiphumela?

¹² Sathane usebentisa tifiso tekutiphatsa lokubi. Esikhatsini sasendvulo, Sathane wasebentisa inkholo yemanga kute akhutsate kutiphatsa lokubi. Nalamuhla wenta lokufanako. Inkholo yemanga iyakubekeletela kutiphatsa lokubi futsi ize ikukhutsate. Ngenca yaloko, bantfu labatsi bakhonta Nkulunkulu abatilandzeli timiso takhe leticacile tekutiphatsa. Umphostoli Pawula uchaza imiphumela yaloko encwadzini yakhe layibhalela emaKhristu aseRoma. (Fundza Roma 1:28-31.) “Tintfo letingakafaneli,” tihlanganisa tonkhe tinhlobo tekutiphatsa lokubi ngekwelicasi lokufaka ekhatsi butabani. (Rom. 1:24-27, 32; Semb. 2:20) Kuyacaca kutsi kubaluleke kakhulu kulalela timfundziso teliBhayibheli.

13. Nguliphi lelinye lichinga Sathane lalisebentisako?

¹³ Sathane usebentisa tintfo lesitifisako. Kuyintfo levamile kutsi sibe nesifiso sekufundza emakhono latasisita kute sitinakekele tsine kanye nemindeni yetfu. (1 Thim. 5:8) Lamakhono siwatfola ngekutsi siye etikolweni futsi sibe bafundzi labatimisele. Kepha kufanele sicaphele. Emaveni lamanyenti, tikolwa tifundzisa bafundzi emakhono lalusito, kepha baphindze bafundziswe kuhlakanipha kwebantfu. Labafundzi bakhutsatwa kutsi bangabate kutsi Nkulunkulu ukhona futsi bangakunaki loko lokushiwo liBhayibheli. Babatjela kutsi kutigucukela kwemvelo kuyimfundziso lehlakaniphile lechaza kutsi kwaba khona njani kuphila. (Rom. 1:21-23) Timfundziso letinjalo tiphambene nekuhlakanipha kwaNkulunkulu.—1 Khor. 1:19-21; 3:18-20.

14. Yini lekhutsatwa kuhlakanipha kwebantfu?

¹⁴ Kuhlakanipha kwebantfu kuphambene netimiso taJehova letilungile. Akusenti sibe netitselo temoya waNkulunkulu, kodvwa kusikhutsata kutsi sente “imisebenti yenyama.” (Gal. 5:19-23) Kukhutsata kutigcabha nekutikhukhumeta futsi loko kubangela kutsi bantfu ‘batitsandze bona.’ (2 Thim. 3:2-4) Buntfu lobunjalo buphambene nemoya wekutfobeka tinceku taNkulunkulu letikhutsatwa kutsi tibe nawo. (2 Sam. 22:28) Labanye labalwele kutfola imfundvo lephakeme bacabanga ngendlela live lelicabanga ngayo kunendlela Nkulunkulu lacabanga ngayo. Ase sicoce ngesibonelo saloko lokungenteka nasingayinaki lengoti.

15-16. Yini lesiyifundzako kulokwenteka kulomunye dzadze?

¹⁵ Dzadze lobekasemsebentini wasikhatsi sonkhe iminyaka lengetulu kwalengu-15 utsi: “Njengobe besengibhajatisiwe, bengisolo ngifundza futsi ngiva ngebungoti bemfundvo lephakeme, kepha angizange ngikunake loko. Bengicabanga kutsi leseluleko besingasebenti kimi.” Ngutiphi tinkinga labhekena nato? Utsi: “Kudadisha tincwadzi tesikolwa bekutsatsa sikhatsi nemandla ami onkhe kangangekutsi bengingasasitfoli sikhatsi lesanele sekuthantaza ngendlela bengivame kuthantaza ngayo. Bengingasakujabuleli kucoca nebantfu ngeliBhayibheli, futsi nemihlangano besengingayilungiseleli kahle ngobe besengihlale ngidziniwe. Kunaka kakhulu imfundvo lephakeme kwabulimata buhlobo bami naJehova, ngako ngabona kutsi kufanele ngiyekele. Ngavele ngayekela.”

¹⁶ Imfundvo lephakeme yayitsintsa njani indlela lodzadze bekacabanga ngayo? Uphendvula utsi: “Nginemahloni ekuvuma kutsi lemfundvo lephakeme yangifundzisa kunakisisa emaphutsa alabanye ikakhulukati ebazalwane nabodzadze, kulindzela lokungetulu kunaloko labangakukhona, kanye nekutehlukanisa nabo. Kwangitsatsa sikhatsi lesidze kushintja indlela lebengicabanga ngayo. Tikhatsi letifana naleti ekuphileni kwami tangenta ngabona kutsi kuyingoti kangakanani kungayinaki imiyalo lesiyitfola kuBabe wetfu losezulwini asebentisa inhlangano yakhe. Jehova bekangati kancono kwendlula indlela mine bengitati ngayo. Kube mane ngamlalela!”

17. (a) Yini lokufanele sitimisele kuyenta? (b) Yini lesitawucoca ngayo esihlokweni lesilandzelako?

¹⁷ Timisele kutsi kube bete umuntfu lokutfumba “ngekuhlakanipha kwebantfu, nekuyenga lokulite” kwalelive laSathane. Ungamvumeli Sathane kutsi akudukise. (1 Khor. 3:18; 2 Khor. 2:11) Ungamvumeli Sathane akwente ukhohlwe kutsi ungubani Jehova nekutsi ufuna umkhonte njani. Phila ngetimiso taJehova tekutiphatsa ngaso sonkhe sikhatsi. Ungavumi Sathane akuyenge kutsi ungayinaki imiyalo yaJehova. Yini lokufanele uyente nawubona timphawu letikhombisa kutsi sewucabanga ngendlela lelive lelicabanga ngayo? Sihloko lesilandzelako sitasikhombisa kutsi liVi laNkulunkulu litasisita njani kutsi sibhidlite imicabango netento “letimbelwe tacina.”—2 Khor. 10:4, 5.