INCENYE 1
‘Ngiyakuyifuna Lelahlekile’
Lemvu seyididekile. Itse isadla tjani emadlelweni yatikhandza seyiyodvwana. Ayisawuboni umhlambi nobe umelusi. Sekucala kuhwalala. Isendzaweni lapho khona kunetilwane letingayihlasela futsi kute nalongayivikela. Kutsi kusenjalo, ive livi leyiletayele lemelusi logijima acondze kuyo ayitsatse ayigocotele ngendvwangu yakhe bese uyanayo ekhaya.
TIKHATSI letinyenti Jehova utifananisa nemelusi lonjalo. EVini lakhe uyasetsembisa: “Mine ngekwami ngitatifunela letimvu tami, ngitelusele.”—Hezekeli 34:11, 12.
“Ngiyawutelusela Timvu Tami”
Bobani labatimvu taJehova? Timvu taJehova bantfu labamtsandzako nalabamkhontako. LiBhayibheli litsi: ‘Sikhuleke, simkhotsamele, asiguce embikwaJehova, uMenti wetfu. Ngobe yena unguNkulunkulu wetfu, tsine sitimvu telidlelo lakhe, nesive lesisetandleni takhe.’ (Tihlabelelo 95:6, 7) Njengetimvu letilandzela umelusi, tikhonti taJehova tiyakulangatelela kulandzela uMelusi wato. Tite yini emaphutsa? Tinawo. Ngaletinye tikhatsi tinceku taNkulunkulu tibe ‘timvu letisakatekile,’ ‘timvu letilahlekile’ taphindze tafanana ‘netimvu letidukile’. (Hezekeli 34:12; Matewu 15:24; 1 Phetro 2:25) Noma kunjalo, ngesikhatsi umuntfu ahlehlela emuva, Jehova akamlahli.
Ucabanga kutsi Jehova solo unguMelusi wakho yini? Jehova ukhombisa njani kutsi unguMelusi namuhla? Cabangela nati tindlela letintsatfu:
Uyasondla ngetimfundziso teliBhayibheli. Jehova utsi: “Ngiyawutelusela edlelweni lelihle. tiyawulala phansi edlelweni lelihle, ngulapho tiyawuklaba khona edlelweni lelineluhlata.” (Hezekeli 34:14) Jehova akakaze ehluleke kusinika tinhlobonhlobo tekudla lokuvela kuye lokufika ngesikhatsi. Cabanga ngesihloko, inkhulumo, nobe i-video leyakusita futsi yaphendvula umthantazo wakho. Loko akukwentanga yini wabona kutsi Jehova uyakukhatsalela?
Uyasisekela aphindze asivikele. Jehova uyetsembisa: “Letilimele ngiyawutibopha emanceba, ngiticinise emadvolo letibutsakatsaka.” (Hezekeli 34:16) Jehova uyabacinisa labo lababutsakatsaka nobe labacindzetelwe kukhatsateka. Ubopha emanceba etimvu takhe, atisite telulame nangabe tilimele, mhlawumbe aze asebentise emakholwa lakanye nato. Uphindze abuyise labo labaphambukile nalabo lokungenteka balwisana nekutisola.
Ukutsatsa njengemsebenti wakhe kusinaka. Jehova utsi: “Ngiyawutephula kuto tonkhe tindzawo lapho tisakatelwe khona. Ngiyakutifuna letilahlekile.” (Hezekeli 34:12, 16) KuJehova imvu lelahlekile akusiyo imvu lengeke isabuya. Uyati nangabe imvu ilahlekile, uyayifuna futsi uyajabula nakayitfola. (Matewu 18:12-14) Jehova ubita tikhonti takhe ngekutsi “timvu tami, timvu telidlelo lami.”(Hezekeli 34:31) Nawe ungulomunye waleto timvu.
KuJehova imvu lelahlekile akusiyo imvu lengeke isabuya. Uyajabula nakayitfola
“Sivusetele Emalanga Etfu Abe Njengemalanga Asendvulo”
Yini leyenta Jehova akufune futsi akumeme kutsi ubuyele kuye? Kungobe ufuna ujabule. Wetsembisa timvu takhe kutsi ‘titawuba nemvula yetibusiso.’ (Hezekeli 34:26) Lesetsembiso siliciniso. Nawe utibonele bufakazi baloko.
Cabanga ngalokwenteka kuwe ngesikhatsi ufundza ngaJehova. Wativa njani ngesikhatsi ucala kufundza emaciniso lajabulisako lamayelana naNkulunkulu kanye nenjongo yakhe ngebantfu? Uyakhumbula yini kutsi bekukucabula kangakanani kuba ndzawonye ngebunye nebazalwane emihlanganweni yesigodzi neyesifundza? Awubuyelanga yini ekhaya ujabulile futsi wenetisekile, ngesikhatsi ucocele lomunye umuntfu lobekanesifiso lesicotfo sekwati tindzaba letimnandzi?
Leyo njabulo ungaphindze ube nayo. Tinceku taNkulunkulu tasendvulo tathantaza tatsi: “Awu! Simakadze, sibuyisele kuwe, sitewubuyela kuwe; sivusetele emalanga etfu abe njengemalanga asendvulo.” (Sililo 5:21) Jehova wawuphendvula loyo mthantazo futsi bantfu bakhe babuyela kuye banenjabulo levuseletelwe. (Nehemiya 8:17) Jehova utawenta lokufanako nakuwe.
Nanobe kunjalo, kubuyela kuJehova akusiyo intfo lemelula. Cabanga ngaletinye tinkinga longahlangabetana nato nekutsi ungatincoba njani.