“Ngitabucedza Nya Lobugwadla Bakho”

1, 2. Nguluphi luhlobo lwengwadla longatsi nawulubona ulucansukele kakhulu?

KUVISANA buhlungu kubona umuntfu loyingwadla. Mhlawumbe singahle sitibute kutsi yini lemente wakhetsa lemphilo lehlazisako. Ludlame nobe kuhlukunyetwa ekhaya yini lokwamphocelela kutsi akhetse imphilo lenjena amncane nakangaka? Nobe kuhlupheka lokungetulu kwemandla yini lokwamenta watitsengisa kulokugcilateka? Nobe kungenteka yini kutsi lena bekuyindlela yekubalekela umyeni wakhe losidlova? Tindzaba letibuhlungu njengaleti sitiva onkhe malanga kulelive lelibi. Akumangalisi-ke kutsi Jesu Khristu watikhombisa umusa lomkhulu letinye tingwadla. Wagcizelela kutsi labo labaphendvukako futsi bashintje indlela labaphila ngayo bebangaba nelitsemba lekuphila imphilo lencono.—Mat. 21:28-32; Luk. 7:36-50.

² Nanobe kunjalo, nyalo asesicabange ngalolunye luhlobo lwengwadla. Cabanga ngemuntfu wesifazane loyikhetsa ngemabomu lendlela yekuphila. Akayitsatsi njengemphilo lehlazisako, kepha uyibona ngatsi itamenta aphumelele. Intfo nje lacabanga ngayo kwakha imali kanye nekutfola tinzuzo letita nalomsebenti. Lokubi nakakhulu: kutsiwani nangabe lomfati bekanendvodza lelungile naleyetsembekile, kodvwa ngemabomu akhetse kungetsembeki kuyo kute abe yingwadla? Kungaba matima kuvelana nemuntfu lonjalo, futsi nawumbona ungavele umcansukele ngenca yalendlela yekuphila layikhetsile. Indlela lesitiva ngayo isizatfu lesihamba embili lesenta Jehova Nkulunkulu wasebentisa lenchazelo yengwadla ngalokuphindzaphindziwe kute avete indlela lativa ngayo ngenkholo yemanga.

 3. Ngukuphi kulandzisa lesitawucoca ngako kulesehluko?

³ Incwadzi yaHezekeli icuketse tindzaba letimbili letimangalisako lapho khona bugwadla bufanekisela tintfo letimbi letentiwa bantfu baNkulunkulu lebebangaketsembeki ka-Israyeli nakaJuda. (Hez., tehlu. 16 na-23) Ngaphambi kwekutsi sicoce ngaletindzaba, ase sibuke nayi lenye ingwadla lengumfanekiso. Lobugwadla bayo bacala kadzeni ngaphambi kwesikhatsi saHezekeli, ngisho nangaphambi kwekutsi kube nesive saka-Israyeli—kantsi futsi busekhona nalamuhla. Incwadzi yekugcina yeliBhayibheli, lokuSembulo, iyasitjela kutsi ingubani lengwadla.

4, 5. Iyini “iBhabhulona Lenkhulu,” futsi sikwati njani loko? (Buka sitfombe lesisekucaleni kwalesehluko.)

⁴ Ngasekupheleni kwelikhulu lekucala leminyaka C.E., embonweni, Jesu wakhombisa umphostoli Johane umuntfu lotsite lomangalisako. Ubitwa ngekutsi “yingwadla lenkhulu” futsi uyiBhabhulona “Lenkhulu, make wetingwadla.” (Semb. 17:1, 5) Kwaphela emakhulu eminyaka solo baholi benkholo netati teliBhayibheli bangacondzi kutsi lengwadla ingubani mbambambamba. Bantfu labanyenti bebayichaza ngetindlela letehlukahlukene, batsi imelele iBhabhulona, iRoma nobe Lisontfo lemaRoma Katolika. Nobe kunjalo, sekuphele emashumi eminyaka BoFakazi BaJehova bacondza kutsi ingubani vele ‘lengwadla lenkhulu.’ Ingumbuso welive wenkholo yemanga. Sikwati njani loko?

⁵ Lengwadla iyajeziswa ngenca yekutiphatsa kabi ‘nemakhosi emhlaba,’ nobe baholi betepolitiki. Ngako kuyacaca kutsi yona ayisilo licembu letepolitiki. Ngetulu kwaloko, Sembulo siyaveta kutsi “batsengisi bemhlaba” nobe betemabhizinisi nobe tekutsengiselana talelive, batawulila ngenca yekubhujiswa kweBhabhulona Lenkhulu. Ngako iBhabhulona Lenkhulu ayimeleli tekutsengiselana talelive. Ngako, iyini lengwadla? Inelicala ‘lekusebentelana nemimoya,’ kukhonta tithico kanye nekukhohlisa. Tonkhe letintfo leti tentiwa tinhlangano tetinkholo letikhohlakele letikulelive. Naka nekutsi lengwadla ivetwa njengaleyo legibele nobe leneligunya kutepolitiki talelive. Iphindze iphatse kabi tinceku letetsembekile taJehova Nkulunkulu. (Semb. 17:2, 3; 18:11, 23, 24) Letintfo leti akusito yini lebetisolo tentiwa yinkholo yemanga kuze kube ngulamuhla?

 6. IBhabhulona Lenkhulu ‘ingumake wetingwadla’ ngamuphi umcondvo?

⁶ Kodvwa kungani iBhabhulona Lenkhulu ingabitwa ngekutsi “yingwadla lenkhulu” nje kuphela, kepha ibitwe nangekutsi ‘ngumake wetingwadla’? Inkholo yemanga inemacembu lamanyenti kakhulu. Inetincenye nemahlelo longeke uze ukhone kuwabala. Kusukela ngesikhatsi lokwasanganiswa ngaso tilwimi eBhabhele yasendvulo, nobe eBhabhulona, tinkholo letinyenti tandza futsi tasakatekela emhlabeni wonkhe. Ngaleyo ndlela, kwabese kucaliswa tinkholo letinsha letinyenti. Kufaneleka kahle-ke kutsi leligama lelitsi “iBhabhulona Lenkhulu” lisuselwe egameni lelidolobha iBhabhulona, lapho tinkholo letinyenti temanga tacaliswa khona. (Gen. 11:1-9) Kungako tonkhe letinkholo titsatfwa ‘njengemadvodzakati’ enhlangano yinye, nobe engwadla yinye lenkhulu. Sathane uvame kusebentisa letinkholo kute ayenge bantfu kutsi basebentelane nemimoya, bakhonte tithico futsi babe netinkholelo kanye nemasiko lakhombisa kungamhloniphi Nkulunkulu. Kungako bantfu baNkulunkulu becwayiswa ngalenhlangano lekhohlakele naleyandze emhlabeni wonkhe: “Phumani kuyo bantfu bami, nangabe ningafuni kuhlanganyela nayo etonweni tayo.”—Fundza Sembulo 18:4, 5.

 7. Kungani silalela secwayiso lesitsi ‘siphume’ eBhabhulona Lenkhulu?

⁷ Wena sewusilalele yini lesecwayiso? Khumbula kutsi nguJehova lowadala bantfu baba nesifiso sekunakisisa “tintfo letiphatselene naNkulunkulu.” (Mat. 5:3) Leso sifiso singenetiseka kuphela ngekutsi sikhonte Jehova ngendlela lehlantekile. Ngalokuvamile, tinceku taJehova tinesifiso sekwenta konkhe lokusemandleni ato kuze tibalekele kukhonta kwemanga, kepha Sathane Develi unemgomo lowehlukile. Uyatsandza kwenta bantfu baNkulunkulu kutsi bawele elugibeni lwaloluhlobo lwebugwadla. Etikhatsini letinyenti uphumelele kuloko. Ngesikhatsi saHezekeli, bantfu baNkulunkulu bebanemlandvo lomudze wekuba nencenye ekukhonteni kwemanga. Senta kahle kuwuhlolisisa lomlandvo ngobe ungasifundzisa lokunyenti ngetimiso taJehova, kulunga kwakhe kanye nemusa wakhe.

8-10. Nguyiphi intfo lelindzelekile nalebalulekile ekukhonteni kweliciniso lesisita kutsi sicondze indlela Jehova lativa ngayo ngenkholo yemanga? Fanekisa.

⁸ Encwadzini yaHezekeli, Jehova usebentisa lomfanekiso wengwadla kuze akhombise indlela lebekativa ngayo. Hezekeli waphefumulelwa kutsi abhale tindzima letimbili leticacile, lebetimayelana nendlela Jehova bekeva buhlungu ngayo ngekungetsembeki kanye nekutiphatsa kabi kwebantfu bakhe. Yini leyenta wabafananisa netingwadla?

⁹ Kuze sicondze imphendvulo, kufanele sicale sikhumbule intfo lebalulekile lemayelana nekukhonta lokuhlantekile njengobe ichazwe eSehlukweni 5 salencwadzi. Emtsetfweni lawunika ema-Israyeli, Jehova watsi: “Ungacali ube nalabanye bonkulunkulu ngaphandle kwami [nobe, “wephule umtsetfo wami,” umbhalo longentasi]. . . . Mine Jehova Nkulunkulu wakho nginguNkulunkulu lofuna kutsi ukhonte yena yedvwa.” (Eks. 20:3, 5) Ngekuhamba kwesikhatsi waphindze wagcizelela leliciniso ngalendlela: “Kufanele ningamkhotsameli lomunye nkulunkulu ngobe Jehova ufuna kukhontwe yena yedvwa. Phela unguNkulunkulu lofuna bantfu bakhe bakhonte yena kuphela.” (Eks. 34:14) Jehova wayenta yacaca kahle lendzaba. Angeke sikwati kukhonta Jehova ngendlela leyemukelekako nangabe singakhonti yena yedvwa.

¹⁰ Kute siyifanekise kahle lendzaba, asesicabange ngemshado. Indvodza nemfati banelilungelo lekulindzela kutsi lomunye etsembeke ngalokuphelele kulomunye. Nangabe lomunye wabo akhombisa kuba nemiva yelutsandvo ngalomunye umuntfu ngaphandle kwalona lashade naye, lomlingani wakhe angaba nesikhwele futsi advumateke, kube kufanele kutsi ative ngaleyo ndlela. (Fundza KumaHebheru 13:4.) Ngendlela lefanako, nakutiwa endzabeni yekukhonta, Jehova uyadvumateka nangabe bantfu bakhe labatinikele kuye kuphela, bagucukela kubonkulunkulu bemanga. Loku ukuveta kahle encwadzini yaHezekeli sehluko 16.

11. Yini Jehova layisho mayelana neJerusalema kanye nesicalo sayo?

¹¹ Sehluko 16 sencwadzi yaHezekeli sicuketse inkhulumo yaJehova lendze kakhulu kulencwadzi, futsi inguletinye tetiphrofetho letindze kakhulu letashiwo nguJehova EmiBhalweni YesiHebheru. Jehova ukhuluma nalelidolobha laseJerusalema njengobe limelela emaJuda langaketsembeki. Usitjela indzaba lebuhlungu naleyetfusako lemayelana nesicalo salo nekungetsembeki kwalo. Ekucaleni iJerusalema beyifana nemntfwana lolahliwe, longcolile futsi longanakekelwa. Batali bayo bekungemaKhenani lebekahlala kulendzawo futsi lebekangamkhonti Jehova. Bese kusikhatsi lesidze iJerusalema ilawulwa ngemaJebusi, lebekusive saseKhenani, kwaze kwaba ngulapho Davide ancoba lelidolobha. Jehova walivela buhlungu lelidolobha lebelilahliwe, walihlanta futsi walinakekela. Ngekuhamba kwesikhatsi, laba njengemkakhe. Ecinisweni ema-Israyeli lebesekahlala kulelidolobha bekente sivumelwane naJehova, futsi asenta ngekutitsandzela ngesikhatsi kusaphila Mosi. (Eks. 24:7, 8) Ngemuva kwekutsi Jehova sekente iJerusalema yaba yinhlokodolobha, wayibusisa, wayenta yaceba futsi yaba yinhle, njengalapho indvodza lenjingile nalesegunyeni inika umfati wayo kwekutihlobisa lokuhle.—Hez. 16:1-14.

12. Kukhonta kwemanga kwangena njani eJerusalema?

¹² Naka naku lokwenteka ngemuva kwaloko. Jehova watsi: “Wacala kwetsembela ebuhleni bakho, wabese uba yingwadla ngenca yeludvumo lwakho. Wagwadla nabo bonkhe bantfu labendlula ngendlela futsi waba babo.” (Hez. 16:15) Ngemalanga aSolomoni, Jehova wabusisa waphindze wenta bantfu bakhe banjinga, kangangekutsi iJerusalema yaba lidolobha lelihle kakhulu, yawendlula khashane lamanye lebekakhona endvulo. (1 Khos. 10:23, 27) Nobe kunjalo, kancane kancane kwabese kungena kungetsembeki. Ngenca yekutsi Solomoni bekafuna kujabulisa bafati bakhe labanyenti bakuletinye tive, wacala kungcolisa iJerusalema ngekukhonta bonkulunkulu bemanga. (1 Khos. 11:1-8) Nalamanye emakhosi lalandzela ngemuva kwakhe enta lokubi kakhulu, angcolisa lelive ngekukhonta kwemanga. Jehova wativa njani ngaletento tawo tebugwadla nekungetsembeki? Watsi: “Tintfo letinjalo akukafaneli tentiwe futsi akukafaneli tiphindze tenteke.” (Hez. 16:16) Kodvwa bantfu bakhe labangalaleli bangena shi etentweni tekukhohlakala!

13. Bantfu baNkulunkulu lebebaseJerusalema bebanaliphi licala lebubi?

¹³ Cabanga buhlungu Jehova labuva nendlela lakhubeka ngayo njengobe abuveta ebaleni bubi bebantfu bakhe labakhetsile, watsi: “Watsatsa emadvodzana akho nemadvodzakati akho lobewungitalele wona, wenta ngawo imihlatjelo kuletithico. Solo awukeneli yini ngalobugwadla bakho? Ubulale nemadvodzana ami futsi wanikela ngawo kutsi abe ngumhlatjelo ngekuwashisa emlilweni.” (Hez. 16:20, 21) Letintfo letetfusako lebetentiwa bantfu baseJerusalema tikhombisa indlela Sathane lamubi ngayo. Ukutsandza kakhulu kudukisa bantfu baJehova kuze bente imikhuba leyenyanyeka njengalena! Kodvwa Jehova ubona konkhe. Nkulunkulu utatilungisa tintfo letimbi naletibuhlungu kakhulu letentiwe nguSathane futsi utawehlulela ngekulunga.—Fundza Jobe 34:24.

14. Emfanekisweni waJehova, bekubobani bosisi beJerusalema lababili, futsi ngubani lobekakhohlakele kakhulu kubo bobatsatfu?

¹⁴ IJerusalema bekufanele yetfuke ngenca yaletento tayo letimbi kodvwa ayizange. Yachubeka nebugwadla bayo. Jehova watsi beyingafani naletinye tingwadla ngobe beseyite emahloni futsi beyize ibabhadale labanye lebeyigwadla nabo! (Hez. 16:34) Nkulunkulu watsi iJerusalema beyifana ‘namake’ wayo, lokutive lebetingamkhonti Jehova lebetibusa lelive. (Hez. 16:44, 45) Achubeka nalomfanekiso wemndeni, watsi sisi weJerusalema lomdzala bekuyiSamariya, futsi bekungiyo lebeyicale kwenta lomkhuba wekukhonta kwemanga. Nkulunkulu uphindze ukhuluma ngasisi wayo wesibili, lokuyiSodoma futsi kulenkhulumo wentiwe saga ngobe besekusikhatsi lesidze abhujiswa ngenca yekutikhukhumeta nekutiphatsa kabi. Jehova bekaveta liphuzu lekutsi iJerusalema beseyikhohlakele kakhulu kunalabosisi bayo lababili, lokuyiSamariya neSodoma! (Hez. 16:46-50) Bantfu baNkulunkulu abatilalelanga tecwayiso letinyenti futsi bachubeka netento tabo letenyanyekako.

15. Beyiyini injongo yaJehova ngesikhatsi akhipha sehlulelo lesimelene neJerusalema, futsi ngaleyondlela bekabanika liphi litsemba bantfu bakhona?

¹⁵ Yini Jehova bekatawuyenta? Wetsembisa iJerusalema watsi: “Ngitawubutsa tonkhe letingani takho lotivise bunandzi,” futsi “ngitakunikela etandleni taletingani takho.” Letive letingamkhonti Jehova lebetibangani bayo betitayibhubhisa, tiyicedze buhle bayo, tiyikhumule netintfo tayo letiligugu. Watsi: ‘Batakugcoba ngematje futsi bakubulale ngetinkemba tabo.’ Beyiyini injongo yaJehova ngesikhatsi akhipha lesehlulelo? Beyingasiko kucotfula bantfu bakhe. Kunaloko, bekafuna kwenta naku, watsi: “Ngitabucedza nya lobugwadla bakho.” Wachubeka watsi: “Ngitawukhiphela yonkhe intfukutselo yami kuwe futsi itawubese iyabohla; ngitawubese ngibeka umoya wami phansi, futsi ngingasakutfukutseleli.” Njengobe kuvetiwe eSehlukweni 9 salencwadzi, injongo yaJehova beyikutsi abuyisele bantfu bakhe eveni labo ngemuva kwekutfunjwa kwabo. Kungani? Watsi: “Kodvwa mine lucobo lwami, ngitasikhumbula lesivumelwane lengasenta nawe ngemalanga ebusha bakho.” (Hez. 16:37-42, 60) Ngalokwehlukile kubantfu bakhe, Jehova bekatawetsembeka ngelizinga lelikhulu!—Fundza Sembulo 15:4.

16, 17. (a) Kungani singasasho kutsi Ohola na-Oholibha bamelela Tinkholo Letitsi TebuKhristu? (Buka libhokisi lelitsi “Bosisi Labatingwadla.”) (b) Ngutiphi tifundvo lesingatitfola kuHezekeli sehluko 16 na-23?

¹⁶ Asebentisa inkhulumo lendze nalenemandla lebhalwe kuHezekeli sehluko 16, Jehova usifundzisa kabanti ngetimiso takhe letilungile, ngekulunga kwakhe, nangemusa wakhe lomkhulu. Kungashiwo lokufanako nangesehluko 23. EmaKhristu eliciniso lamuhla ayawulalela umlayeto waJehova locacile lomayelana nekungetsembeki kwebantfu bakhe. Asifuni kumvisa buhlungu Jehova njengobe kwenta emaJuda nebantfu baseJerusalema! Ngako sifuna kutigwema tonkhe tinhlobo tekukhonta tithico. Loku kufaka ekhatsi bugovu kanye nekutsandza umcebo, njengobe nako kutinhlobo tekukhonta tithico. (Mat. 6:24; Khol. 3:5) Sifuna kuhlala sibonga ngekutsi Jehova ubuyisele kukhonta lokuhlantekile kulamalanga ekugcina futsi angeke aphindze avume kutsi kungcoliswe. Jehova wente “sivumelwane saphakadze” nemaKhristu lagcotjiwe, futsi lesingeke sephulwe kungetsembeki. (Hez. 16:60) Ngako asilitsatse njengaleliligugu lelilungelo lesinalo lekutihlanganisa nebantfu baJehova labahlantekile lamuhla.

¹⁷ Inkhulumo yaJehova lemelene netingwadla letichazwa kuHezekeli isifundzisani ‘ngengwadla lenkhulu,’ lokuyiBhabhulona Lenkhulu? Ase sibone.

18, 19. Ngukuphi kufana lokukhona emkhatsini wetingwadla letichazwa kuHezekeli kanye nengwadla lechazwa kuSembulo?

¹⁸ Jehova akashintji. (Jak. 1:17) Indlela lativa ngayo ngenkholo yemanga ayikashintji, kuwo wonkhe umlandvo walengwadla lenkhulu. Ngako asimangali nasibona kufana lokukhulu emkhatsini wesehlulelo saletingwadla lokukhulunywa ngato encwadzini yaHezekeli kanye nesiphetfo ‘sengwadla lenkhulu’ lechazwe encwadzini yeSembulo.

¹⁹ Naka kutsi letingwadla lokukhulunywa ngato etiphrofethweni taHezekeli atijeziswanga nguJehova ngalokucondzile, kodvwa tajeziswa ngito tonkhe tive lebetiphinga nato. Ngalokufanako, umbuso welive wenkholo yemanga utawujeziswa ngenca yekutiphatsa kabi “nemakhosi emhlaba.” Lesijeziso sitawuchamuka kubani? Sifundza kutsi baholi betepolitiki ‘batayitondza lengwadla, batsatse konkhe lenako futsi bayingcunule, batawudla nenyama yalengwadla baphindze bayishise ingcongce.’ Yini leyenta kutsi bohulumende balelive batsatse lesinyatselo lesimangalisa kangaka? Kungobe Nkulunkulu utakufaka ‘etinhlitiyweni tabo kutsi bente injongo yakhe.’—Semb. 17:1-3, 15-17.

20. Yini lekhombisa kutsi sehlulelo seBhabhulona sitawuba sekugcina?

²⁰ Jehova utawusebentisa tive temhlaba kuze tifeze sehlulelo sakhe latasikhipha ngalokumelene nenkholo yemanga, lefaka ekhatsi tonkhe Tinkholo Letitsi TebuKhristu. Lesehlulelo sitawuba sekugcina; inkholo yemanga angeke icolelwe futsi kute lamanye ematfuba letawuniketwa wona ekutsi ishintje tindlela tayo. Incwadzi yeSembulo iyaveta kutsi iBhabhulona “ngeke iphindze itfolakale.” (Semb. 18:21) Tingilosi taNkulunkulu titawujabula ngekubhujiswa kwayo, futsi titawutsi: “Dvumisani Jehova! Intfutfu yekusha kwayo ichubeka yenyuka phakadze naphakadze.” (Semb. 19:3) Lesehlulelo siyawukuma kuze kube phakadze. Inkholo yemanga angeke ivunyelwe kutsi iphindze ivuke futsi ingcolise kukhonta lokuhlantekile. Sehlulelo seBhabhulona sekubhujiswa ngemlilo sitawenta kushunce intfutfu lengumfanekiso letawuchubeka iphakama kuze kube phakadze.

21. Kubhujiswa kwenkholo yemanga kutawucalisa siphi sikhatsi, futsi lesikhatsi sitophela njani?

²¹ Kutawutsi lapho bohulumende bemhlaba sebacala kuvukela iBhabhulona Lenkhulu, batawube bafeza sehlulelo lesikhishwe nguJehova, futsi leso kutawube kusentakalo lesikhulu lesigcwalisa injongo yakhe. Loku kutawube kuluphawu lwekucala kwekuhlupheka lokukhulu nesikhatsi sekucindzeteleka lokukhulu. (Mat. 24:21) Umvutfwandzaba walokuhlupheka kutawuba yi-Amagedoni, lokutawube kuyimphi yaJehova lemelene nalelive lelibi. (Semb. 16:14, 16) Njengobe sitawubona etehlukweni letilandzelako talencwadzi, incwadzi yaHezekeli inalokunyenti letasitjela kona mayelana nendlela lokutawucala ngayo kuhlupheka lokukhulu. Kwanyalo, ngutiphi tifundvo letikuHezekeli sehluko 16 na-23 lesifuna kutikhumbula futsi sitisebentise?

22, 23. Kucabangisisa ngendlela letichazwe ngayo letingwadla lokukhulunywa ngato kuHezekeli nakuSembulo, kungawutsintsa njani umsebenti wetfu longcwele?

²² Sathane uyatsandza kukhohlisa labo labakhonta Jehova ngendlela lehlantekile. Kute lokungamjabulisa kakhulu kwendlula kusikhweshisa ekukhonteni lokuhlantekile nekutsi asidvonsele endleleni lefana naleyetingwadla letichazwe encwadzini yaHezekeli. Ngako-ke kufanele sikhumbule kutsi Jehova akakubeketeleli kuvukela nekungetsembeki! (Num. 25:11) Ngako kufanele siciniseke kutsi sikhwesha ngalokuphelele enkholweni yemanga, futsi ‘asitsintsi lutfo lolungcolile’ emehlweni aNkulunkulu. (Isa. 52:11) Ngaleso sizatfu, asilutsatsi luhlangotsi etindzabeni tepolitiki talelive lelihlukene ekhatsi. (Joh. 15:19) Kutsandza buve sikutsatsa njengalolunye luhlobo lwenkholo yemanga lolukhutsatwa nguSathane, futsi kute lokusihlanganisa nako.

²³ Ngetulu kwako konkhe, kufanele sikhumbule kutsi sinelilungelo lelikhetsekile lekukhonta Jehova ethempelini lakhe lelihlantekile nalelingcwele. Njengobe sijabulela lesibusiso, shengatsi singatimisela kutsi kube bete lokusihlanganisa nenkholo yemanga kanye nebugwadla bayo!