Jehova Wembula Loko “Lokufanele Kwenteke Masinyane”
“Lesi Sembulo saJesu Khristu, lasiniketwa nguNkulunkulu kutsi akhombise tinceku takhe loko lokufanele kwenteke masinyane.”—SEMB. 1:1.
UNGAPHENDVULA NJANI?
Ngutiphi tincenye talesitfombe lesicwebetelako letifanekisela uMbuso weMhlaba wemaNgisi nemaMelika?
Johane ubuchaza njani budlelwane lobusemkhatsini weMbuso weMhlaba wemaNgisi nemaMelika naMhlabuhlangene?
BoDanyela naJohane bakuchaza njani kutsi bonkhe bohulumende bemhlaba batawubhujiswa?
1, 2. (a) Tiphrofetho taDanyela naJohane tisisita kutsi senteni? (b) Timphondvo letisitfupha tesilo timelelani?
TIPHROFETHO taDanyela naJohane tivumelana ngetindlela letisenta siyicondze kahle inchazelo yaloko lokwenteka nyalo emhlabeni naloko lokutakwenteka esikhatsini lesitako. Yini lesingayifundza ngekucatsanisa umbono waJohane wesilo, nekulandzisa kwaDanyela lokumayelana nesilo lesesabekako lesinetimphondvo letilishumi, kanye nenchazelo yesitfombe lesicwebetelako? Kuticondza ngalokucacile letiphrofetho kufanele kusente sitsatse siphi sinyatselo?
2 Ase sicoce ngembono waJohane wesilo. (Semb., sehl. 13) Njengobe sifundzile esihlokweni lesendlulile, tinhloko letisitfupha talesilo timelela iGibhithe, i-Asiriya, iBhabhulona, iMede nePheresiya, iGrisi kanye neRoma. Yonkhe lemibuso ayizange iyitsandze intalo yemfati. (Gen. 3:15) Ngemuva kwekuba Johane akubhalile loko lakubona, umbuso waseRoma lomelelwa yinhloko yesitfupha, wachubeka unguwo lonemandla. Ngekushesha inhloko yesikhombisa beyitawutsatsela umbuso waseRoma sikhundla. Ngumuphi umbuso lobewutawutsatsela lona waseRoma sikhundla, futsi bewutayiphatsa njani intalo yemfati?
EMANGISI NEMAMELIKA ABA NEMANDLA
3. Simelela bani silo lesesabekako lesinetimphondvo letilishumi, futsi letimphondvo letilishumi timelelani?
3 Singayibona inhloko yesikhombisa yalesilo lokukhulunywa ngaso kuSembulo sehluko 13 ngekucatsanisa umbono waJohane nembono waDanyela wesilo lesesabekako lesinetimphondvo letilishumi.a (Fundza Danyela 7:7, 8, 23, 24.) Lesilo Danyela lasibona simelela uMbuso wemaRoma. (Buka lishadi lelisemakhasini 12-13.) Ngelikhulu lesihlanu leminyaka C.E., uMbuso wemaRoma wacala kwehlukana. Timphondvo letilishumi letahluma enhloko yalesilo lesesabekako timelela imibuso leyaphuma embusweni waseRoma.
4, 5. (a) Yini leyentiwa luphondvo loluncane? (b) Imelelani inhloko yesikhombisa yalesilo?
4 Letine taletimphondvo nobe imibuso leyavela enhloko yalesilo, yatfola kuhlonishwa lokukhetsekile. Timphondvo letintsatfu tatsatselwa sikhundla ‘luphondvo loluncane.’ Loku kwenteka ngalesikhatsi emaNgisi, lake aba yincenye yeMbuso wemaRoma, aba ngumbuso. Lisengakafiki likhulu lesi-17 leminyaka, emaNgisi abengumbuso lote emandla. Leminye imibuso lemitsatfu leyayingephansi kweMbuso waseRoma—Spain, iNetherlands kanye neFulansi—nayo yaba nemandla. EmaNgisi ayehlula lemibuso ayisusa etikhundleni tayo letiphakeme. Ngelikhulu lesi-18 leminyaka, umbuso wemaNgisi bese utawuba ngumbuso lonemandla emhlabeni wonkhe, kodvwa ngaleso sikhatsi wawungakabi yinhloko yesikhombisa yalesilo.
5 Ngisho nobe umbuso waseNgilandi waba nemandla, tindzawo letatiseNyakatfo Melika taphuma ngaphansi kwekubusa kwawo. Nobe kunjalo, uMbuso waseMelika waba mkhulu, uvikelwe ngemaNgisi. Nakucala lilanga leNkhosi nga-1914, emaNgisi abengumbuso lomkhulu kwendlula nobe ngabe ngumuphi lowake waba khona futsi iMelika beyingumbuso lomkhulu wetentsengiselwane emhlabeni.b NgeMphi Yelive Yekucala, iMelika yaba nebudlelwane lobusedvute nemaNgisi. Ngako-ke, inhloko yesikhombisa yalesilo kwaba nguMbuso weMhlaba wemaNgisi nemaMelika. Lombuso wayiphatsa njani intalo yemfati?
6. Inhloko yesikhombisa ibaphetse njani bantfu baNkulunkulu?
6 Ngemuva kwekucala kwelilanga leNkhosi, inhloko yesikhombisa yacala kuhlasela bantfu baNkulunkulu—bomnakabo Khristu labasasele emhlabeni. (Mat. 25:40) Jesu washo kutsi nasekabusa, incenye yalentalo itawube isekhona emhlabeni. (Mat. 24:45-47; Gal. 3:26-29) UMbuso weMhlaba wemaNgisi nemaMelika wacala kulwisana nalabagcotjiwe. (Semb. 13:3, 7) Ngesikhatsi seMphi Yelive Yekucala wacindzetela bantfu baNkulunkulu, wavala kusakatwa kwaletinye tincwadzi futsi wafaka lamanye emalunga esigaba sesisebenti lesetsembekile ejele. Inhloko yesikhombisa yalesilo yadzimate yawuvala umsebenti wekushumayela sikhashana. Jehova wakubona kusengakenteki loku wase ukwembulela Johane. Nkulunkulu waphindze wamtjela Johane kutsi incenye yesibili yalentalo beyitawuphindze iwucale umsebenti wekushumayela. (Semb. 11:3, 7-11) Umlandvo wetinceku taJehova walamuhla uyakufakazela kutsi loko kwenteka.
UMBUSO WEMHLABA WEMANGISI NEMAMELIKA NETINYAWO LETINENSIMBI NELUBUMBA
7. Bukuphi budlelwane emkhatsini wenhloko yesikhombisa yalesilo kanye nesitfombe lesicwebetelako?
7 Bukuphi budlelwane emkhatsini wenhloko yesikhombisa yalesilo nesitfombe lesikhulu lesicwebetelako? Ngesizatfu sekutsi emaNgisi avela embusweni waseRoma, iMelika yavela embusweni wemaNgisi, singasho kutsi nayo iMelika yavela eMbusweni waseRoma. Kutsiwani-ke ngetinyawo talesitfombe? Tichazwe ngekutsi incenye yato lenye iyinsimbi kantsi lenye ilubumba. (Fundza Danyela 2:41-43.) Lenchazelo yaletinyawo ikhuluma ngesikhatsi lokutawuvela ngaso inhloko yesikhombisa—uMbuso Wemhlaba wemaNgisi nemaMelika. Njengobe insimbi lehlanganiswe nelubumba ibutsakatsaka kunensimbi lengakahlanganiswa nalutfo, uMbuso weMhlaba wemaNgisi nemaMelika nawo ubutsakatsaka kunembuso lovela kuwo. Loku kwakuyowenteka njani?
8, 9. (a) Umbuso wesikhombisa wakhombisa njani kutsi ucine njengensimbi? (b) Lumelelani lubumba etinyaweni talesitfombe?
8 Ngalesinye sikhatsi umbuso lomelelwa yinhloko yesikhombisa, ukhombise kuba njengensimbi. Loku kwabonakala ngalesikhatsi uphumelela eMphini Yelive Yekucala. NgeMphi Yelive Yesibili, lombuso lonjengensimbi loyinhloko yesikhombisa bewusolo ubonakala.c Ngemuva kwalemphi, inhloko yesikhombisa yakhombisa kuba njensimbi. Nobe kunjalo, kusukela ekucaleni lensimbi beyihlangene nelubumba.
9 Tinceku taJehova betisolo tifuna kwati kutsi tinyawo talesitfombe timelelani. Danyela 2:41 uchaza kutsi letinyawo tensimbi nelubumba ‘tingumbuso’ munye hhayi leminyenti. Lubumba lumelela lokutsite lokukuloMbuso weMhlaba wemaNgisi nemaMelika, lokuwenta ube butsakatsaka kuneMbuso lonjengensimbi wemaRoma. Lubumba lubhekisela ‘kubantfu.’ (Dan. 2:43) Bantfu bawente waba butsakatsaka uMbuso weMhlaba wemaNgisi nemaMelika ngekutsi balwele kutfola emalungelo, bakhankasele kuba nemalungelo lengetiwe emsebentini baphindze bafune kubuswa ngentsandvo yelinyenti. Bantfu bakwenta kube lukhuni ngeMbuso weMhlaba wemaNgisi nemaMelika kutsi ucine njengensimbi. Banemibono leyehlukene ngetepolitiki, nangabe lotsite atfole emavoti lambalwa ubabete ligunya lekwenta loko latsembise sive kutsi utasentela kona. Danyela wabiketela: ‘Umbuso nganhlanye uyawuba nemandla, kutsi nganhlanye ube yintekenteke.’—Dan. 2:42; 2 Thim. 3:1-3.
10, 11. (a) Liyini likusasa ‘letinyawo’? (b) Yini lesingayisho ngelinani letintwane talesitfombe?
10 Kulelikhulu lesi-21 leminyaka, emaNgisi nemaMelika solo anebudlelwane lobuhle njengobe abambisene etindzabeni letibalulekile temhlaba. Tiphrofetho letimayelana nesitfombe lesicwebetelako nesilo tiyavuma kutsi uMbuso weMhlaba wemaNgisi nemaMelika angeke utsatselwe sikhundla nguleminye imibuso yelive. Lombuso wekugcina welive utawuba butsakatsaka kunaloyo lomelelwe ngimilente yensimbi, kodvwa angeke umane nje utiphelele.
11 Linani letintwane talesitfombe linenchazelo lebalulekile yini? Asewucabange ngaloku: Kuleminye imibono Danyela usho emanani lacondzile—sibonelo saloku kutsi uyalisho linani letimphondvo letisetinhloko tetilo letehlukene. Lawo manani abalulekile. Nobe kunjalo, nakachaza lesitfombe, Danyela akalisho linani letintwane. Ngako-ke, lelinani kubonakala shengatsi alikabaluleki kangako njengobe nelinani lemikhono, tandla, iminwe nemilente kanye netinyawo talesitfombe kungashiwo. Lakamane akusho Danyela kutsi letintwane takhiwa yinsimbi nelubumba. Lenchazelo ikwenta kucace kutsi uMbuso weMhlaba wemaNgisi nemaMelika nguwo lotawube ubusa ngalesikhatsi litje lelimelela uMbuso waNkulunkulu lishaya tinyawo talesitfombe.—Dan. 2:45.
UMBUSO WEMHLABA WEMANGISI NEMAMELIKA KANYE NESILO LESINETIMPHONDVO LETIMBILI
12, 13. Silo lesinetimphondvo letimbili simelelani, futsi sentani?
12 Nanobe uMbuso weMhlaba wemaNgisi nemaMelika uyinsimbi lehlanganiswe nelubumba, umbono Jesu lawubonisa Johane ukhombisa kutsi lombuso utawuba nendzima lebalulekile ngemalanga ekugcina. Ngayiphi indlela? Johane wabona umbono wesilo lesinetimphondvo letimbili lesikhuluma njenganyokangwenya. Simelelani lesilo? Sinetimphondvo letimbili, lokusho kutsi ngimibuso lemibili lebambisene. Johane uphindze ubona uMbuso weMhlaba wemaNgisi nemaMelika kodvwa nyalo sewenta lomunye umsebenti.—Fundza Sembulo 13:11-15.
13 Lesilo sitjela bantfu kutsi bakhe umfanekiso wesilo. Johane wabhala kutsi lomfanekiso wesilo utawuvela, unyamalale uphindze uvele futsi. Nguloko kanye lokwenteka enhlanganweni leyavetwa ngemaNgisi nemaMelika, lebeyentelwe kutsi ihlanganise imibuso yemhlaba iphindze iyimelele.d Lenhlangano yavela ngemuva kweMphi Yelive Yekucala, futsi beyatiwa ngekutsi yiNhlangano Yetive. Yanyamalala ngeMphi Yelive Yesibili. Ngesikhatsi saleyoMphi, bantfu baNkulunkulu bamemetela kutsi ngekusho kwesiphrofetho seSembulo lenhlangano beyitawuphindze ivele. Yaphindze yavela seyinguMhlabuhlangene.—Semb. 17:8.
14. Kungamuphi umcondvo kutsiwa umfanekiso wesilo ‘uyinkhosi yesiphohlongo’?
14 Johane uchaza lomfanekiso walesilo ‘njengenkhosi yesiphohlongo.’ Ngayiphi indlela? Akusho kutsi uyinhloko yesiphohlongo yalesilo. Umane nje ungumfanekiso waso. Emandla alomfanekiso avela etiveni letingemalunga aMhlabuhlangene, ikakhulukati eMbusweni weMhlaba wemaNgisi nemaMelika. (Semb. 17:10, 11) Kodvwa siphindze sitfole ligunya lekuba njengenkhosi kute sente umsebenti lotsite lotawutsintsa umhlaba wonkhe.
UMFANEKISO WESILO UNCOBA INGWADLA LENKHULU
15, 16. Imelelani ingwadla lenkhulu, futsi kwentekeni kulabo labayisekelako?
15 Johane uphindze achaze kutsi wabona silo lesibovu—lesifanana nalesi lesinetimphondvo letisikhombisa—kugibele kuso ingwadla lenkhulu. Lengwadla kwakubhalwe kuyo ligama lelitsi “iBhabhulona lenkhulu.” (Semb. 17:1-6) Lengwadla lenkhulu imelela tonkhe tinkholo temanga, ngalokuyinhloko lokutinkholo letitsi tebuKhristu. Tinhlangano tenkholo tisekela silo ngekwetama kucondzisa tinhlangano tetembangave.
16 Nobe kunjalo, ngelilanga leNkhosi, iBhabhulona Lenkhulu ibona emanti, nobe bantfu labayisekelako baphela. (Semb. 16:12; 17:15) Sibonelo saloko kutsi ngalesikhatsi umfanekiso walesilo ubonakala kwekucala, tinkholo letitsi tebuKhristu—incenye lenemandla yeBhabhulona Lenkhulu—taba nemandla lamakhulu emaveni langaseNshonalanga. Kodvwa lamuhla bantfu labanyenti abasawahloniphi emasontfo futsi abasabasekeli nebaholi bawo. Bantfu labanyenti baze bakholelwe kutsi tinkinga letigcwele umhlaba wonkhe tibangelwa tinkholo. Labanye bakusho ngalokucondzile kutsi kufanele kucedvwe nya lokutsiwa yinkholo emhlabeni.
17. Yini letawenteka masinyane enkholweni yemanga, futsi ngani?
17 Nanobe kunjalo, inkholo yemanga angeke imane iphele nje. Ingwadla lenkhulu itawuchubeka inemandla, futsi yenta emakhosi ente intsandvo yayo kudzimate kube ngulapho Nkulunkulu afaka etinhlitiyweni tabohulumende bemhlaba umcabango wekuyitondza. (Fundza Sembulo 17:16, 17.) Ngekushesha Jehova utawubangela bohulumende belive lelibuswa nguSathane, njengobe bamelelwa nguMhlabuhlangene, kutsi bahlasele inkholo yemanga. Batayibhubhisa lengwadla kuphele nekunjinga kwayo. Emashumini eminyaka lendlulile bantfu bebangacabangi kutsi intfo lenjena ingahle yenteke. Lamuhla, lengwadla ihleti icubile emhlane walesilo lesibovu. Nobe kunjalo, angeke ibhujiswe kancane kancane, esikhundleni saloko, itawuvele icedvwe ngekushesha lokukhulu.—Semb. 18:7, 8, 15-19.
TILO TIYABHUJISWA
18. (a) Yini letawentiwa silo, futsi kutawuba namuphi umphumela? (b) Danyela 2:44 uchaza kutsi uMbuso waNkulunkulu utawubhubhisa miphi imibuso? (Fundza libhokisi lelisekhasini 17.)
18 Ngemuva kwekubhujiswa kwenkholo yemanga, lesilo lesimelelwa tinhlangano taSathane tetembangalive sitawutfukutsela sifune kuhlasela uMbuso waNkulunkulu. Ngesizatfu sekutsi angeke afinyelele ezulwini, emakhosi emhlaba atawukhiphela lulaka lwawo kulabo labasekela uMbuso waNkulunkulu emhlabeni. Umphumela waloko kutawuba yimphi yekugcina yaNkulunkulu. (Semb. 16:13-16; 17:12-14) Danyela usichazela lokutsite ngalemphi yekugcina. (Fundza Danyela 2:44.) Lesilo lokukhulunywa ngaso kuSembulo 13:1, umfanekiso waso nesilo lesinetimphondvo letimbili, kutawubhujiswa kuphele nya.
19. Yini lesingaciniseka ngayo, futsi nyalo sikhatsi sekutsi senteni?
19 Siphila esikhatsini sekubusa kwenhloko yesikhombisa. Ayikho lenye inhloko letawuhluma kulesilo ngembikwekutsi sibhujiswe. Kutawube kubusa uMbuso weMhlaba wemaNgisi nemaMelika nakubhujiswa inkholo yemanga. Tiphrofetho taDanyela naJohane tigcwalisekile, ngisho nemininingwane yato lemincane. Singaciniseka kutsi inkholo yemanga itawubhujiswa nekutsi imphi ye-Amagedoni isemnyango. Nkulunkulu usembulele loko lokutawenteka kusasele sikhatsi. Sitawutilalela yini tecwayiso letisiphrofetho? (2 Phet. 1:19) Nyalo sikhatsi sekutsi sinamatsele kuJehova futsi sisekele uMbuso wakhe.—Semb. 14:6, 7.
[Imibhalo lengentansi]
a EBhayibhelini lishumi ngalokuvamile lisho lokuphelele—ngako-ke, timphondvo letilishumi timelela yonkhe imibuso leyavela eMbusweni wemaRoma.
b Nanobe umbuso wemaNgisi nemaMelika wacala kubusa ngelikhulu lesi-18 leminyaka, Johane uwuchaza njengaloyo lobewutawubonakala ekucaleni kwelilanga leNkhosi. Kugcwaliseka kwalombono lokuSembulo kwenteka nyalo ‘ngelilanga leNkhosi.’ (Semb. 1:10) Lombuso lomelelwa yinhloko yesikhombisa wacala kubusa uhlangene, ngemuva kweMphi Yelive Yekucala.
c Danyela wakubona kusesele sikhatsi kuhlasela lokwesabekako lobekutakwentiwa ngulenkhosi kulemphi, wabhala: “Iyawukwenta umonakalo lowesabekako.” (Dan. 8:24) Sibonelo saloku kutsi iMelika yabhomba titsa teMbuso weMhlaba wemaNgisi nemaMelika ngemabhomu lamabili e-atom.
d Fundza incwadzi letsi “IsAmbulo—Umvuthwandaba Waso Omkhulu Useduze!” emakhasini 240, 241 kanye na-253, ngesiZulu.
[Libhokisi ekhasini 17]
BOBANI LABAKHA ‘YONKHE LEMIBUSO’?
[Emavi lahambisana nesitfombe ekhasini 17]
Siphrofetho lesikuDanyela 2:44 sitsi uMbuso waNkulunkulu ‘uyawupitjita yonkhe lemibuso uyicedze.’ Lesiphrofetho sibhekisela kuphela kulemibuso lemelelwa ngulesitfombe lesicwebetelako.
Kutsiwani ngayo yonkhe lena leminye imibuso? Siphrofetho lesikuSembulo sichaza kabanti ngayo. Sikhombisa kutsi “emakhosi emhlaba wonkhe” atawubutselwa ndzawonye kute amelane naJehova ‘ngelilanga lelikhulu laNkulunkulu, Somandla.’ (Semb. 16:14; 19:19-21) Ngako-ke, angeke kubhujiswe lemibuso lemelelwa ngulesitfombe lesicwebetelako kuphela, kodvwa nayo yonkhe leminye imibuso itawubhujiswa e-Amagedoni.