Singahlala Njani ‘Sinesimo Sengcondvo Sekulindza’?

 1. Yini lengase isente siphelelwe kubeketela?

NGESIKHATSI uMbuso waMesiya ubekwa nga-1914, live lelibuswa nguSathane langena emalangeni ekugcina. Umphumela wemphi leyaba khona ezulwini waba kutsi Jesu ajikijele Develi nemadimoni akhe lapha emhlabeni. (Fundza Sembulo 12:7-9.) Sathane uyati kutsi “unesikhatsi lesincane.” (Semb. 12:12) Nome kunjalo, ‘lesosikhatsi’ sesibe yiminyaka leminyenti futsi labanye babona shengatsi emalanga ekugcina sekatsatse sikhatsi lesidze kakhulu. Njengobe silindzele kutsi Jehova atsatse sinyatselo, sekusiphelele yini kubeketela?

 2. Sitawucoca ngani kulesihloko?

² Kungabeketeli kungaba yingoti ngobe kungasibangela kutsi sente tintfo letitsite singakacabangisisi. Singahlala njani sinesimo sengcondvo sekulindza? Lesihloko sitasisita kutsi sikwente loko ngekusiphendvulela lemibuto lelandzelako. (1) Yini lesingayifundza ngekubeketela esibonelweni lesabekwa ngumphrofethi Mikha? (2) Ngutiphi tintfo letitawenteka letikhombisa kutsi kuphela sekusedvute? (3) Singakhombisa njani kutsi siyabonga kuJehova ngekubeketela kwakhe?

 3. Ngesikhatsi saMikha, sasinjani simo ka-Israyeli?

³ Fundza Mikha 7:2-6. Mikha umphrofethi waJehova wabona tintfo letabangela kutsi ema-Israyeli ehlise emandla ekukhonteni kwawo Nkulunkulu, lokwaba kubi kakhulu ngesikhatsi kubusa iNkhosi lembi Ahazi. Mikha wafananisa lama-Israyeli labekangaketsembeki nenchachabutane “nelukhula” lolunemanyeva. Njengobe inchachabutane nobe lukhula lolunemanyeva lungahlaba umuntfu lohamba etikwalo, ema-Israyeli labekakhohlakele abelimata nobe ngabe ngubani lobekasebentelana nawo. Lokukhohlakala kwaba kukhulu kakhulu kangangekutsi imindeni yabhidlika. Ati kutsi kute labekangakwenta kute ashintje leso simo, Mikha watfululela inhlitiyo yakhe kuJehova. Ngekubeketela, walindzela Nkulunkulu kutsi atsatse sinyatselo. Mikha bekaciniseka kutsi Jehova utawulungisa lesimo ngesikhatsi saKhe.

 4. Ngutiphi tinsayeya lesibhekana nato?

⁴ NjengaMikha, siphila nebantfu labaticabangela bona. Labanyenti ‘ababongi, abetsembeki futsi bete lutsandvo.’ (2 Thim. 3:2, 3) Siyacindzeteleka nangabe lesisebenta nabo, lesifundza nabo kanye nabomakhelwane betfu bakhombisa simo sengcondvo sekuticabangela bona. Kodvwa letinye tinceku taNkulunkulu tibhekene netinsayeya letinkhulu kakhulu. Jesu watsi balandzeli bakhe batawuphikiswa emindenini futsi wasebentisa emavi lafana nalawo lakuMikha 7:6 kute achaze emandla umlayeto wakhe lowawutaba nawo. Jesu watsi: “Ngitele kutewuhlukanisa, indvodzana imelane neyise, indvodzakati imelane nenina, namalukatana amelane neninatala. Titsa temuntfu kuyawuba bantfu bakabo.” (Mat. 10:35, 36) Kumatima kakhulu kubeketelela kuphikiswa nekuhlekwa ngemalunga emndeni langakholwa. Nasibhekene nalesosilingo, asingaphelelwa ngemandla ngenca yekucindzetelwa lesikutfola emndenini. Kunaloko, shengatsi singahlala setsembekile futsi ngekubeketela silindze Jehova kutsi acatulule leso simo. Nasicela lusito kuye njalo, utasipha emandla nekuhlakanipha lesikudzingako kute sibeketele.

5, 6. Jehova wambusisa njani Mikha, kodvwa yini Mikha langayibonanga?

⁵ Jehova wambusisa Mikha ngenca yekutsi wabeketela. Mikha wabona nakususwa iNkhosi Ahazi nangesikhatsi kuphela kubusa kwayo. Wabona ngesikhatsi iNkhosi lebeyikahle Hezekiya, indvodzana yeNkhosi Ahazi, iba yinkhosi futsi ibuyisela kukhonta kweliciniso. Sehlulelo saJehova lebesimayelana neSamariya lasendlulisela ngaMikha, sagcwaliseka ngesikhatsi ema-Asiriya ahlasela umbuso wasenyakatfo waka-Israyeli.—Mik. 1:6.

⁶ Nobe kunjalo, Mikha akazange akubone kugcwaliseka kwako konkhe Jehova labekamtfume kutsi aphrofethe ngako. Nasi sibonelo: Mikha wabhala watsi: “Ngemalanga ekugcina intsaba yelithempeli laSimakadze iyawucina, ibe ngulephakeme kwendlula tonkhe tintsaba; iyawuphakanyiswa ibe ngetulu kwemagcuma, tive letinyenti tiyawubekelela tiye kuyo tingasakhawuli. Tive letinyenti tiyawufika titsi: ‘Wotani, senyukele entsabeni yaSimakadze.’” (Mik. 4:1, 2) Mikha wafa ngaphambi kwekutsi lesiphrofetho sigcwaliseke. Nome kunjalo, abetimisele kuhlale etsembekile kuJehova kute kube sekufeni nome bantfu labekaphila nabo bebangentani. Ngenca yaloko, Mikha wabhala watsi: “Tonkhe tive tikhonta tihloniphe bonkulunkulu bato, kodvwa tsine siyawukhonta Simakadze Nkulunkulu wetfu phakadze naphakadze.” (Mik. 4:5) Mikha walindza ngekubeketela kuleto tikhatsi letaticindzetela ngenca yekutsi abeciniseka kutsi Jehova utatigcwalisa tonkhe tetsembiso taKhe. Lomphrofethi lowetsembekile wetsembela kuJehova.

7, 8. (a) Kungani sinesizatfu sekuba nelitsemba? (b) Yini letawenta sikhatsi sihambe ngekushesha lokukhulu?

⁷ Simetsemba ngendlela lefanako yini Jehova? Sinesizatfu lesihle sekumetsemba. Sitibonele matfupha kugcwaliseka kwesiphrofetho saMikha. “Ngemalanga ekugcina,” tigidzigidzi tebantfu letivela kuto tonkhe tive, tinhlanga netilwimi tikhuphukela ‘entsabeni yelithempeli laSimakadze.’ Nanobe tivela etiveni lapho kunetimphi khona, letikhonti taNkulunkulu tiye ‘takhandza tinkemba tato tatenta taba ngemakhuba,’ futsi ‘atisaceceshelwa kulwa imphi.’ (Mik. 4:3) Kulilungelo kutsi sibalwa emkhatsini webantfu baJehova labanekuthula.

⁸ Sonkhe sifuna kutsi Jehova alibhubhise masinyane lelive lelibuswa nguSathane. Ngako-ke, nasifuna kulindza ngekubeketela sidzinga kuba nembono waJehova. Ubeke lilanga lapho atawehlulela bantfu asebentisa “loyo lamkhetsa,” Jesu Khristu. (Imis. 17:31) Kute kube nguleso sikhatsi, Nkulunkulu uniketa bonkhe bantfu litfuba lekutfola “lwati lolungulonalona lweliciniso,” basebentise loko labakufundzile kute basindziswe. Kuphila lokuligugu kwebantfu kusengotini. (Fundza 1 Thimothi 2:3, 4.) Nasimatasa sisita labanye kutsi batfole lwati lolungilo ngaNkulunkulu, sikhatsi lesisele ngaphambi kwekufika kwekwehlulela kwaJehova sitawuhamba ngekushesha. Masinyane—ngekuphutfuma lokukhulu—sikhatsi sitawube sesiphelile. Nasesiphelile leso sikhatsi sitawujabula kakhulu ngekutsi sibe matasa ngemsebenti wekushumayela ngeMbuso.

9-11. Ugcwalisekile yini umbhalo wa-1 Thesalonika 5:3? Chaza.

⁹ Fundza 1 Thesalonika 5:1-3. Madvutane nje, tive titawukhipha simemetelo lesitsi: “Kuthula nekulondzeka!” Nasingafuni kukhohliswa ngulesimemetelo, kufanele ‘sihlale siphapheme futsi sisangulukile etingcondvweni.’ (1 Thes. 5:6) Kute sihlale siphapheme, ase sihlolisise nati tintfo lesetentekile letendvulela lesimemetelo lesibalulekile.

¹⁰ Ngenca yemiphumela yemphi yelive yekucala neyesibili, tive tatikufuna ngenkhani kuthula. Ngemuva kwemphi yelive yekucala kwasungulwa inhlangano yeTive Letihlangene ngelitsemba lekutsi itawuletsa kuthula. Ngekuhamba kwesikhatsi, ngemuva kwemphi yelive yesibili bantfu labanyenti bebetsemba kutsi Mhlabuhlangene utawuletsa kuthula emhlabeni. Bohulumende nebaholi betinkholo bebetsembe kutsi leto tinhlangano titawuletsa kuthula emhlabeni. Nasi sibonelo: Nga-1986, Mhlabuhlangene wamemetela kutsi loyo Ngumnyaka Wekuthula Wetive Tonkhe. Ngalowo mnyaka, bomengameli bemave kanye nebaholi betinkholo bahlangana eTaliyane eSontfweni lemaKatolika lelise-Assisi bathantazela kuthula.

¹¹ Nobe kunjalo, leso simemetelo sekuthula nekulondzeka nobe letinye letifanana naso, atisho kugcwaliseka kwalesiphrofetho lesiku-1 Thesalonika 5:3. Kungani kunjalo? Kungobe ‘kubhujiswa lokutumako’ akukenteki.

12. Yini lesiyatiko mayelana nesimemetelo ‘seKuthula nekulondzeka’?

¹² Ngubani lotawukhipha lesimemetelo lesibalulekile ‘seKuthula nekulondzeka’ esikhatsini lesitako? Baholi beTinkholo Letitsi TebuKhristu nebaholi baletinye tinkholo batawuba nayiphi indzima kuloku? Bomengameli bemave lehlukahlukene batawuba nayiphi incenye kuloku? LiBhayibheli alisitjeli. Siyati kutsi nanobe singakhishwa kangakhi lesimemetelo nobe sibonakale sikhanga, kodvwa ngeke sibe liciniso. Lelive lelidzala litawuchubeka libuswa nguSathane futsi njengobe lonakele, litawuchubeka linjalo. Kungaba buhlungu kakhulu nangabe singakukholelwa lokuyengwa nguSathane bese senta lokuphambene nekungatsatsi kwetfu luhlangotsi njengemaKhristu.

13. Kungani tingilosi tibambe imimoya yembubhiso?

¹³ Fundza Sembulo 7:1-4. Njengobe siselindze kugcwaliseka kwesiphrofetho lesiku-1 Thesalonika 5:3, tingilosi letinemandla tibambisise imimoya yembubhiso yekuhlupheka lokukhulu. Yini letiyilindzele? Lokunye lokuyinhloko lokutakwenteka lokuchazwa ngumphostoli Johane—kubekwa kweluphawu kwekugcina ‘kwetinceku taNkulunkulu wetfu.’a Nasekuphelile lokubekwa luphawu, letingilosi tiyayiyekela lemimoya yembubhiso. Yini letakwenteka ngemuva kwaloko?

14. Yini lekhombisa kutsi kubhujiswa kweBhabhulona Lenkhulu kusedvute?

¹⁴ IBhabhulona Lenkhulu, umbuso wemhlaba wenkholo yemanga, itawubhujiswa njengobe kuyifanele. “Bantfu, ticumbi, tive netilwimi” ngeke tiyisite. Sesivele siyatibonela kutsi sekusedvute kubhujiswa kwayo. (Semb. 16:12; 17:15-18; 18:7, 8, 21) Sekuvele kuyabonakala loko ngobe nasetindzabeni tiyanyembenywa tinkholo nebaholi bato. Nome kunjalo, baholi beBhabhulona Lenkhulu ababoni kutsi basengotini. Benta liphutsa lelikhulu ngaloko! Ngemuva kwalesimemetelo ‘seKuthula nekulondzeka!’ bohulumende batawuhlasela inkholo yemanga ngekutumeka lokukhulu futsi bayibhubhise bayicedze nya. IBhabhulona Lenkhulu ayiyuphindze ibe khona! Kungako kufanele sitilindzele ngekubeketela letintfo letibalulekile letitawenteka.—Semb. 18:8, 10.

15. Yini leyenta Jehova kutsi angabhudvuteli?

¹⁵ Nanobe bantfu balingcolisile libito laJehova, ngekubeketela ulindzele sikhatsi lesifanele sekutsatsa sinyatselo. Jehova akafuni kutsi bantfu labetsembekile babhujiswe. (2 Phet. 3:9, 10) Nguloko lesikufisako yini natsi? Ngaphambi kwekutsi kufike lilanga laJehova, singakhombisa kutsi siyambonga ngekubeketela kwakhe nganati tindlela letilandzelako.

16, 17. (a) Kungani kufanele sibe nesifiso sekusita labo labapholile? (b) Kungani kuphutfuma kutsi labapholile babuyele kuJehova?

¹⁶ Sita labo labapholile. Jesu watsi kuba nenjabulo lenkhulu ezulwini lapho kutfolakala imvu yinye lebeyilahlekile. (Mat. 18:14; Luk. 15:3-7) Kuyabonakala kutsi Jehova ubakhatsalela ngalokujulile bonkhe labakhombise lutsandvo ngelibito lakhe nanobe nyalo bapholile. Nasibasita kutsi babuyele ebandleni, siba nencenye ekwenteni Jehova netingilosi takhe kutsi bajabule.

¹⁷ Ungulomunye webantfu labapholile yini nyalo? Kungenteka kutsi lotsite ebandleni wakuvisa buhlungu futsi ngenca yaloko wayekela kutihlanganisa nenhlangano yaJehova. Kungenteka kutsi sekuhambe sikhatsi lesitsite utehlukanisile, ase utibute: ‘Kuphila kwami kusenenjongo yini, futsi ngiyajabula yini ngako? NguJehova yini lowangikhuba nobe ngumuntfu lonesono? Kukhona yini Nkulunkulu Jehova lake wakwenta kute angivise buhlungu?’ Empeleni, usentela lokuhle ngaso sonkhe sikhatsi. Ngisho nobe singaphili ngekuvumelana nekutinikela kwetfu, uyasivumela kutsi sijabulele tintfo letinhle lasiniketa tona. (Jak. 1:16, 17) Lilanga laJehova litawufika ngekushesha. Nyalo sesikhatsi sekubuyela kuBabe wetfu losezulwini lonelutsandvo nasebandleni, lokukuphela kwendzawo lephephile kulamalanga ekugcina.—Dut. 33:27; Heb. 10:24, 25.

18. Kungani kufanele sibambisane nalabaholako?

¹⁸ Bambisana nalabaholako ngekwetsembeka. Njengobe anguMelusi lonelutsandvo, Jehova uyasicondzisa futsi asivikele. Ukhetse iNdvodzana yakhe kutsi ibe nguMelusi Lomkhulu wemhlambi. (1 Phet. 5:4) Labadzala labasemabandleni langetulu kwa-100 000 belusa imvu ngayinye yaNkulunkulu. (Imis. 20:28) Nasibambisana ngekwetsembeka nalabo labakhetsiwe kutsi bahole, sikhombisa kubonga kuJehova nakuJesu ngaloko labasentele kona.

19. Singasondzelana kanjani?

¹⁹ Sondzelanani. Kusho kutsini loko? Nangabe libutfo lelicecesheke kahle lihlaselwa sitsa, emasotja avala tikhala letivulekile, lokusho kutsi ayasondzelana. Aba libutfo lokungasimelula kulehlula. Sathane ubahlasela kakhulu bantfu baNkulunkulu. Nyalo akusiso sikhatsi sekutilwela. Nyalo sikhatsi sekutsi sisondzelane, singawanaki emaphutsa alabanye futsi sikwetsembe kuhola kwaJehova.

20. Kufanele senteni nyalo?

²⁰ Shengatsi sonkhe singahlale sinebuhlobo lobucinile naNkulunkulu futsi sikhombise simo sengcondvo sekulindza. Asisilindze ngekubeketela simemetelo ‘seKuthula nekulondzeka!’ kanye nekubekwa kweluphawu kwekugcina kwalabo labakhetsiwe. Ngemuva kwaloko, letingilosi letine titawuyekela imimoya yembubhiso futsi iBhabhulona Lenkhulu itawubhujiswa. Njengobe silindzele letintfo letibalulekile kutsi tenteke, asilalele sicondziso salabo lababekwe kutsi bahole enhlanganweni yaJehova. Asimelane naDeveli nemadimoni! Nyalo sikhatsi sekulalela sikhutsato semhlabeli lesitsi: “Cinani, tinhlitiyo tenu tibe nesibindzi, nonkhe nine lenilindzele Simakadze.”—Hla. 31:24.