Imibono YaZakhariya​—Isho Kutsini Kuwe?

1-3. (a) Ngusiphi simo bantfu baNkulunkulu lebebakuso ngesikhatsi Zakhayira acala kuphrofetha? (b) Kungani Jehova acela bantfu bakhe kutsi ‘babuyele kuye’?

INCWADZI yaZakhariya ikhuluma ngemibono lemangalisako. Ikhuluma ngencwadzi legocotwako lendizako, ngemfati lovaleleke ebhasikidini, kanye nangebafati lababili labandiza emoyeni ngetimphiko tabo letifanana netadvoye. (Zak. 5:1, 7-9) Yini leyenta Jehova wakhombisa lomphrofethi wakhe lemibono lemangalisako? Ngusiphi simo ema-Israyeli labekuso ngaleso sikhatsi? Loko lokwabonwa nguZakhayira, kusitsintsa njani lamuhla?

² Umnyaka wanga-537 B.C.E. bekungumnyaka lojabulisako kubantfu labatinikele kuJehova. Ngemuva kweminyaka lengu-70 batfunjwe eBhabhulona, bakhululwa. Bebajabule kakhulu, futsi bacala kubuyisela kukhonta kweliciniso eJerusalema. Nga-536 B.C.E., kwabekwa sisekelo selithempeli. Ngaleso sikhatsi ‘benta umsindvo lomkhulu kakhulu futsi lomsindvo wevakala khashane.’ (Ezra 3:10-13) Noma kunjalo, lomsebenti wekwakha waphatamiseka. Ngenca yekudvunyatwa tinkinga labahlangabetana nato, bantfu bayekela kwakha lithempeli futsi bacala kunaka emakhaya kanye nemasimu abo. Kwaphela iminyaka lengu-16 kwakhiwa kwelithempeli laJehova kungachubeki. Bantfu baNkulunkulu bebadzinga kukhunjutwa kutsi kufanele babuyele kuJehova nekutsi bayekele kubeka kucala tintfo letizuzisa bona. Jehova bekafuna babuyele kuye, baphindze bamkhonte ngenhlitiyo yonkhe.

³ Kute asite bantfu bakhe bakhumbule kutsi kungani abakhulula eBhabhulona, Nkulunkulu watfumela umphrofethi wakhe Zakhariya nga-520 B.C.E. Kungenteka kutsi ligama laZakhariya lelisho kutsi “Jehova Ukhumbulile,” labakhumbuta liciniso lelibalulekile. Nkulunkulu abesabakhumbula bantfu bakhe nanobe bona besebatikhohliwe tento takhe tekubasindzisa. (Fundza Zakhariya 1:3, 4.) Ngelutsandvo wabacinisekisa kutsi utawubasita babuyisele kukhonta kweliciniso, futsi waphindze wabecwayisa ngekutsi abengeke akubeketelele kumkhonta kwabo kwekugcina licala. Manje asesibone kutsi Jehova wabasita njani asebentisa umbono waZakhariya wesitfupha newesikhombisa. Sitawuphindze sibone nekutsi loku kusifundzisani lamuhla.

 4. Yini Zakhariya layibona embonweni wakhe wesitfupha, futsi kusho kutsini kubhalwa kwalencwadzi kuwo omabili emakhasi? (Buka sitfombe sekucala lesisekucaleni kwalesihloko.)

⁴ Sehluko 5 sencwadzi yaZakhayira sikhuluma ngembono longaketayeleki. (Fundza Zakhariya 5:1, 2.) Zakhariya wabona kundiza incwadzi legocotwako lengemamitha langu-9 budze, nemamitha langu-4.5 bubanti. Beyingakagocwa futsi beyilungele kufundvwa. Beyinemlayeto wesehlulelo lebewubhalwe kuwo omabili emakhasi. (Zak. 5:3) Ngalokuvamile, bekubhalwa ekhasini linye lalomculu, ngako kuyacaca kutsi lencwadzi lena beyinemlayeto lobaluleke kakhulu.

5, 6. Jehova utiva njani ngato tonkhe tinhlobo tekweba?

⁵ Fundza Zakhariya 5:3, 4. Nanoma bonkhe bantfu batawulandzisa kuJehova, bantfu lababitwa ngelibito lakhe batawulandzisa kakhulu. Bantfu labatsandza Nkulunkulu bayati kutsi lonkhe luhlobo lwekweba luhlambalata ligama laNkulunkulu wabo. (Taga 30:8, 9) Nanobe lisela lingaba netisusa letibonakala titinhle tekweba, lisuke likhombisa kutsi litsandza kakhulu umcebo kunaNkulunkulu lokusho kuba nesifiso sebugovu. Wephula umtsetfo waJehova futsi usuke akhombisa kutsi ligama laNkulunkulu alikabaluleki.

⁶ Unakile yini kutsi Zakhariya 5:3, 4 utsi ‘lesicalekiso . . . siyewungena endlini yelisela . . . futsi siyawuhlala lapha endlini yalo siyibhubhise’? Sehlulelo saJehova angeke sivinjwe yiminyango lekhiyiwe noma tinsimbi. Jehova uyakhona kwembula bubi, ngisho noma bantfu bakhe bangabufihla. Ngisho noma umuntfu angetama kufihlela bemtsetfo, bacashi, bazalwane labadzala nebatali kutsi webile, angeke ukhone kufihlela Nkulunkulu ngoba ubona konkhe futsi usicinisekisa kutsi utowembula bonkhe bubi. (Heb. 4:13) Kusijabulisa kakhulu kutihlanganisa nebantfu labetama kwetsembeka “kuto tonkhe tintfo.”​—Heb. 13:18.

 7. Singasibalekela njani sicalekiso lesisencwadzini lendizako?

⁷ Jehova utenyanya tonkhe tinhlobo tekweba. Siyajabula ngekuphila ngetimiso taJehova letiphakeme tekutiphatsa futsi sibalekele tintfo letitawuhlambalata ligama lakhe. Loku kutawusenta sisindze ngesikhatsi Jehova aletsa sehlulelo sakhe kubantfu labayephula ngemabomu imitsetfo yakhe.

8-10. (a) Siyini sifungo? (b) Ngusiphi sifungo iNkhosi Sedekiya leyehluleka kusifeza?

⁸ Lomlayeto lobhalwe encwadzini lendizako uphindze uvete secwayiso lesiya kulabo ‘labafunga emanga ngelibito laNkulunkulu.’ (Zak. 5:4) Sifungo sisho emavi lafakazela kutsi lokutsite kuliciniso noma setsembiso sekutsi utawenta lokutsite noma angeke ukwente.

⁹ Jehova ukutsatsa njengalokubalulekile kwenta sifungo ngelibito lakhe.

Sedekiya inkhosi yakaJuda lebeyibusela eJerusalema yenta sifungo kuJehova yatsi itawuhlala yetsembekile enkhosini yaseBhabhulona. Noma kunjalo, Sedekiya akazange asigcine lesifungo. Umphumela waloko waba kutsi Jehova amnikete nasi sehlulelo: “Ngifunga kuphila kwami, . . . [Sedekiya] uyawufela eBhabhulona, eveni laleyo nkhosi leyambeka esihlalweni sebukhosi, lowo lowedzelela sifungo sayo wephula nesivumelwane sayo.”​—Hez. 17:16.

¹⁰ Jehova bekalindzele kutsi iNkhosi Sedekiya isifeze sifungo lebeyisente ngeligama lakhe. (2 Khr. 36:​13) Esikhundleni saloko Sedekiya wacela iGibhithe kutsi imsite kuze bakhululeke ekucindzetelweni yiBhabhulona.​—Hez. 17:​11-15, 17, 18.

11, 12. (a) Ngusiphi sifungo lesibaluleke kakhulu lesingasenta? (b) Kutinikela kwetfu kuJehova kukutsintsa njani kuphila kwetfu?

¹¹ Jehova uyatilalela tetsembiso lesitentako. Utitsatsa njengaletibalulekile, futsi ufuna sitifeze kute semukeleke kuye. (Hla. 76:​11) Setsembiso sekutinikela kuJehova ngiso lesibaluleke kakhulu kunato tonkhe tetsembiso lesitentako. Kutinikela kusho kwetsembisa Jehova kutsi utamkhonta kuphila kwakho konkhe.

¹² Singaphila njani ngekuvumelana nesetsembiso setfu lesasenta nasitinikela? Indlela lesenta ngayo nasibhekana netilingo kufanele ikhombise kutsi sikutsatsa njengalokubalulekile kudvumisa Jehova onkhe malanga. (Hla. 61:⁠8) Nasi sibonelo: Nangabe lotsite esikolweni noma emsebentini asidlalisa ngelutsandvo, sikutsatsa njengelitfuba lekukhombisa kutsi “sitigcina ngekunakekela tindlela [taJehova]” yini ngekutsi singavumi? (Taga 23:​26) Nangabe sisemndenini lonetinkholo letihlukene, siyamcela yini Jehova kutsi asisite sikhombise buntfu bebuKhristu ngisho noma bantfu lesihlala nabo bangabukhombisi? Sithantaza onkhe malanga yini kuBabe wetfu lositsandzako, simbonge ngekutsi unguNkulunkulu wetfu futsi uyasitsandza? Siyasakha yini sikhatsi sekufundza liBhayibheli onkhe malanga? Setsembisa kutsi sitawutenta letintfo, ngako kufanele sisifeze setsembiso setfu. Kutimisela ekukhonteni Jehova kukhombisa kutsi siyamtsandza futsi sitinikele mbamba kuye. Kumkhonta kwetfu kuyindlela yekuphila, hhayi nje kutsi simane sigcine licala. Kugcina tetsembiso tetfu kusita tsine, futsi kuhlala setsembekile kutasisita sibe nelikusasa lelihle.​—Dut. 10:12, 13.

13. Yini lesiyifundza embonweni waZakhariya wesitfupha?

¹³ Umbono waZakhariya wesitfupha usisitile sabona kutsi bantfu labatsandza Jehova akukafaneli bebe noma bente tifungo labangeke bakhone kutigcina. Siphindze sibone kutsi nanobe ema-israyeli ehluleka kugcina tetsembiso, Jehova akazange awalahle. Wasicondza simo lakahlangabetana naso ngoba bekanetitsa letinyenti. Usibekela sibonelo sekugcina tetsembiso takhe futsi natsi utasisita sigcine tetsembiso lesitentako. Lenye indlela lasisita ngayo kusinika litsemba lekutsi masinyane utabucedza bonkhe bubi lobusemhlabeni. Umbono lolandzelako waZakhariya usicinekisa ngekutsi loku kutawenteka.

14, 15. (a) Yini Zakhariya layibona kulombono wesikhombisa? (Buka sitfombe sesibili lesisekucaleni.) (b) Lomfati losebhasikidini umelela ini, futsi kungani avalelwa?

¹⁴ Ngemva kwekubona incwadzi legocotwako lendizako, ingelosi yatjela Zakhariya kutsi ‘aphakamise emehlo akhe.’ Bowukhombisa ini lombono wesikhombisa? Wabese ubona kuphuma intfo lebitwa ngekutsi “libhasikidi lekukala.” (Fundza Zakhariya 5:5-8.) Lelibhasikidi beline ‘simbonyo lesasentiwe ngemtfofu.’ Nakususwa lesimbonyo, Zakhariya wabona “kuhleti umfati.” Lengilosi yatsi, lomfati lohleti kulebhasikidi ‘bubi.’ Cabanga ngendlela Zakhariya letfuka ngayo nakabona lomfati etama kucanca aphume kulebhasikidi! Ngekushesha lengilosi yambuyisela kulebhasikisi yabese ivala ngesimbonyo lesisindzako. Kusho kutsini loku?

¹⁵ Lombono uchaza kutsi Jehova angeke abubeketelele bubi banoma nguluphi luhlobo kubantfu bakhe. Utawuciniseka kutsi kucedvwa ngekushesha. (1 Ko 5:13) Ingilosi iyasicinisekisa ngaloko ngekutsi icindzetele lesimbonyo kulebhasikidi.

16. (a) Yini Zakhariya layibona yenteka kulebhasikidi yekukala? (Buka sitfombe sesitsatfu lesisekucaleni kwalesihloko.) (b) Labafati lababili labanetimphiko bayibekaphi lebhasikidi?

¹⁶ Kuwo lombono kwabonakala bafati lababili labanetimphiko leticinile, letifana netadvoye. (Fundza Zakhariya 5:9-11.) Labafati lababili behluke kakhulu kulomfati lokulebhasikidi. Labafati basebentisa timphiko tabo letinemandla bandiza, baphakamisa lebhasikidi ‘lenebubi.’ Bebabuyisaphi? Bubi balahlwa “eveni lase Bhabhulona.” Kungani lebhasikidi bayilahla eBhabhulona?

17, 18. (a) Kungani iBhabhulona bekuyindzawo lekahle yebubi? (b) Kufanele sibubheke kanjani bubi?

¹⁷ Kuma-Israyeli abephila ngesikhatsi saZakhariya iBhabhilona beyimelela indzawo lekahle yekulahla bubi. Zakhariya kanye nalamanye emaJuda bebaciniseka kutsi iBhabhulona bekuyindzawo legcwele bubi lobunyenti ngaleso sikhatsi. Ngenca yekutsi bakhula kugcwele bubi kanye nekungcola bekudzingeka balwisane nalomoya lomubi. Lombono wabaniketa kuthula waphindze wabacinisekisa kutsi Jehova utakugcina kumsulwa kukhonta kweliciniso.

¹⁸ Nakuba kunjalo lombono waphindze wakhumbuta emaJuda ngemsebenti lebekumele awente kuze agcine kukhonta kweliciniso kuhlantekile. Bubi angeke buvunyelwe kutsi buhlale emkhatsini webantfu baJehova. Ngemuva kwekutsi sibe senhlanganweni yaJehova lesivikelako nalesinakekelako, natsi sinemtfwalo wekutsi siyigcine ihlantekile. Asikhutsateki yini kutsi siyigcine ihlantekile “lenhlangano”? Noma nguluphi luhlobo lwebubi alwemukeleki enhlanganweni yaJehova.

19. Imibono yaZakhariya ingasho kutsini kitsi lamuhla?

¹⁹ Umbono waZakhariya wesitfupha newesikhombisa usecwayiso kubantfu labangaketsembeki, ubakhumbuta kutsi Jehova akabubeketeleli bubi. Bakhulekeli bakhe labacotfo kufanele babenyanye ngalokusuka enhlitiyweni bubi. Lemibono iphindze ibe sicinisekiso selutsandvo lesibuya kuBabe wetfu losezulwini. Nangabe sisebenta kamatima kute semukelwe nguNkulunkulu siphindze sitfole sivikelo sakhe angeke kudzingeke kutsi sihlangabetane nesimo lesisongela kuphila, kunaloko Jehova utasibusisa. Yonkhe imetamo yetfu yekuhlala simsulwa kulelive lelibi ayisilo lite. Singaciniseka kutsi singancoba ngelusito lwaJehova. Kepha kungani singaciniseka kutsi kukhonta kweliciniso kutawuncoba kulelive lelingamhloniphi Nkulunkulu? Ngukuphi kuciniseka lesinako ngekutsi Jehova utayivikela inhlangano yakhe njengobe kusondzela lusizi lokhulu? Loko sitawucoca ngako esihlokweni lesilandzelako.