Litsini LiBhayibheli Ngekushada Nangekuhlala Ungakashadi?

Kulamanye emasiko, bantfu bakholelwa kutsi kuze ujabule kufanele ushade. Nobe kunjalo, akusibo bonkhe bantfu labashadile labajabulako njengobe kungasibo bonkhe bantfu labangakashadi labangajabuli. Liciniso likutsi liBhayibheli litsi kokubili kushada nekuhlala ungakashadi kutipho letivela kuJehova.

1. Ngutiphi letinye tinzuzo tekuhlala ungakashadi?

LiBhayibheli litsi: “Loyo loshadako wenta kahle, kodvwa loyo longashadi utawube wenta kahle kakhulu.” (Fundza 1 KubaseKhorinte 7:32, 33, 38.) Umuntfu longakashadi angenta “kahle kakhulu” ngatiphi tindlela? EmaKhristu langakashadi ete balingani lokudzingeka anakekele tidzingo tabo. Ngako, akhululekile. Sibonelo nje, lamanye ayakhona kwenta lokunyenti emsebentini waJehova, njengekutfutsela kulelinye live kuze ayoshumayela khona tindzaba letimnandzi. Ngetulu kwako konkhe, angacitsa sikhatsi lesinyenti enta tintfo letitawenta asondzele kuJehova.

2. Ngutiphi letinye tinzuzo tekushada ngalokusemtsetfweni?

Njengobe kungashadi kunetinzuzo tako, nekushada nako kunetinzuzo. LiBhayibheli litsi “bantfu lababili bancono kunamunye.” (Umshumayeli 4:9) Loko kuliciniso kakhulu kumaKhristu lasebentisa timiso teliBhayibheli emishadweni yawo. Bantfu nabashada ngalokusemtsetfweni basuke benta setsembiso sekutsi batawutsandzana, bahloniphane, futsi baphatsane kahle. Loko kubenta bative bavikeleke kwendlula bantfu labahlala ndzawonye bangakashadi, futsi nebantfwababo batawutiva bavikelekile.

3. Uyini umbono waNkulunkulu ngemshado?

Ngesikhatsi Jehova ashadisa bantfu bekucala, watsi: “Indvodza itawushiya babe wayo namake wayo inamatsele kumkayo.” (Genesisi 2:24) Jehova ufuna kutsi indvodza nemfati batsandzane futsi bahlale ndzawonye kuphila kwabo konkhe. Uvumela kutsi badivose kuphela nangabe munye wabo aphingile. Etimeni letikanjalo, Jehova uniketa lomlingani lote licala lilungelo lekuncuma kutsi uyamcolela yini nobe uyamdivosa.a (Matewu 19:9) Jehova akawavumeli emaKhristu kutsi atsatse sitsembu.—1 KuThimothi 3:2.

CHUBEKA UFUNISISA

4. Sisebentise kahle sipho sekungashadi

Jesu bekatsatsa kungashadi njengesipho. (Matewu 19:11, 12) Fundza Matewu 4:23, bese nicoca ngalombuto:

• Jesu wasisebentisa njan sipho sekungashadi kuze akhonte Babe wakhe futsi asite labanye?

EmaKhristu langakashadi angajabulela kusebentisa lesipho sawo sekungashadi njengaJesu. Dlala le-VIDEO, bese nicoca ngalombuto lolandzelako.

I-VIDEO: Labangakashadi Labetsembekile (3:11)

• EmaKhristu langakashadi angasisebentisa njani lesipho ngendlela lezuzisako?

Bewati yini?

LiBhayibheli alisho kutsi kufanele sishade sesineminyaka lemingakhi. Kunaloko, likhutsata bantfu labasha kutsi balindze kuze kwendlule sikhatsi “sekuvutselwa yinkhanuko yebusha,” lokusikhatsi lapho emandla enkhanuko angenta kube matima ngemuntfu lomusha kutsi ente tincumo letihlakaniphile.—1 KubaseKhorinte 7:36.

5. Khetsa umuntfu lotawushada naye ngekuhlakanipha

Kukhetsa umuntfu lotawushada naye kungulesinye setincumo letibaluleke kakhulu loyawuke usente. Fundza Matewu 19:4-6, 9, bese nicoca ngalombuto:

• Kungani umKhristu kungakafaneli ajake kushada?

LiBhayibheli lingakusita wati kutsi yini lokufanele uyibuke kumuntfu lofuna kushada naye. Ngetulu kwako konkhe, buka umlingani wemshado lotsandza Jehova.b Fundza 1 KubaseKhorinte 7:39 na-2 KubaseKhorinte 6:14, bese nicoca ngalemibuto:

• Kungani kufanele sishade kuphela nemKhristu lesikholwa naye?

• Ucabanga kutsi Jehova angativa njani nasishada nemuntfu longamtsandzi yena?

6. Bani nembono lofana newaJehova ngemshado

Ka-Israyeli wasendvulo, lamanye emadvodza adivosa bomkawo ngetizatfu tebugovu. Fundza Malakhi 2:13, 14, 16, bese nicoca ngalombuto:

• Yini leyenta Jehova ayenyanye idivosi yebantfu labehlukana ngetizatfu letingakasekelwa eBhayibhelini?

Dlala le-VIDEO, bese nicoca ngalombuto lolandzelako.

I-VIDEO: Umshado—Usibopho Lesingapheli (4:30)

• Yini longayenta kuze ujabule emshadweni wakho nawushade nemuntfu longamtsandzi Jehova?

7. Sebentisa timiso taJehova letimayelana nemshado

I-VIDEO: Ungaphila Ngetimiso TaJehova Letimayelana Nemshado (4:14)

Fundza KumaHebheru 13:4, bese nicoca ngalemibuto:

• Ucabanga kutsi tikahle yini timiso taJehova letimayelana nemshado? Usho ngani?

Jehova ulindzele kutsi emaKhristu abhalise imishado nemadivosi, njengobe bohulumende emaveni lamanyenti bafuna kwentiwe njalo. Fundza KuThithusi 3:1, bese nicoca ngalombuto:

• Nangabe ushadile, uyaciniseka yini kutsi umshado wakho ubhaliswe ngalokusemtsetfweni?

LOKO LESICOCE NGAKO

Kushada nekuhlala ungakashadi kutipho letivela kuJehova. Kokubili bantfu labashadile nalabangakashadi bangajabula futsi benetiseke nabaphila ngekuvumelana nentsandvo yaJehova.

Yini Loyifundzile?

• Nguyiphi indlela lekahle yekusebentisa sipho sekungashadi?

• Yini leyenta LiBhayibheli litsi kufanele sishade kuphela nalabo labatsandza Jehova?

• LiBhayibheli litsi ngusiphi sizatfu lokukuphela kwaso lesingenta bantfu labashadile badivose?

LOKUNYE LONGAKUHLOLA

Kusho kutsini kushada “eNkhosini kuphela”?

“Imibuzo Evela Kubafundi” (Sicongosekulindza, saJuly 1, 2004 lesitfolakala ngesiZulu)

Bukela ema-video lamatsatfu langakusita wente tincumo letikahle endzabeni yekuganana nemshado.

Kulungiselela Umshado (11:53)

Fundza kutsi yini leyenta lomunye umzalwane weva ngatsi loko Jehova lamupha kona kuligugu kakhulu kwendlula loko lokwamlahlekela.

Bengifisa Kutsi Afundze Liciniso (1:56)

Ngutiphi letinye tintfo umuntfu lokufanele acabange ngato ngaphambi kwekutsi adivose nobe bahlale ngekwehlukana?

Hlonipha “Loko Nkulunkulu Lakuhlanganisile” (Sicongosekulindza, saDecember 2018)