Jehova Ubanika Umvuzo Labo Labamfuna Ngekutimisela

1, 2. (a) Lutsandvo nekukholwa kuhlobene njani? (b) Ngumiphi imibuto lesitawucoca ngayo?

JEHOVA simtsandza “ngobe yena wasitsandza kucala.” (1 Joh. 4:19) Indlela Jehova lakhombise ngayo kutsi uyasitsandza, kutsi utsetse sinyatselo sekubusisa tinceku takhe letetsembekile. Nangabe sichubeka sitsandza Jehova, nekukholwa kwetfu kuyacina. Asimtsandzi nje ngenca yekutsi ukhona kuphela, kepha siyamtsandza nangenca yekutsi utawubaniketa umvuzo labo labatsandzako.​—Fundza Hebheru 11:6.

² Kuniketa bantfu umvuzo kubalulekile kuJehova. Kukholwa kwetfu akukacini nangabe singaciniseki kutsi Jehova utawubanika umvuzo labo labamfuna ngekuciniseka, ngobe “kukholwa kukutilindzela ngekuciniseka tintfo letetsenjwako.” (Heb. 11:1) Ngako, kukholwa kufaka ekhatsi kulindzela tibusiso taNkulunkulu latetsembisile. Kwetsemba kutsi sitawutfola tibusiso kusizuzisa njani? Jehova utibusise njani tinceku takhe tasendvulo netangesikhatsi setfu? Ase sicoce ngaloku.

 3. Ngusiphi setsembiso lesisitfola kuMalakhi 3:10?

³ Jehova Nkulunkulu utibophe yena matfupha kutsi utatinika umvuzo tinceku takhe letetsembekile, ngako uyasincusa kutsi sente konkhe lesingakwenta kuze siwutfole. LiVi laNkulunkulu litsi: “Simakadze utsi: ‘Ase ningilinge, . . .nitewubona kutsi ngingeke yini nginivulele emafasitelo asezulwini ekutfulula, nginitfululele tibusiso letinyenti, nize nehluleke kutfola indzawo leyenele yekutigcina.’” (Mal. 3:10) Nangabe siwemukela umvuzo Jehova lasinika wona sisuke sikhombisa kutsi simtsandza kakhulu.

 4. Kungani kufanele siwetsembe emavi aJesu labhalwe kuMatewu 6:33?

⁴ Jesu wacinisekisa bafundzi bakhe kutsi nangabe bafuna kucala uMbuso, Nkulunkulu utawubasekela. (Fundza Matewu 6:33.) Lesetsembiso saJesu lesiliciniso besisekelwe ekutseni Jehova unemlandvo lomuhle wekukwenta loko lakwetsembisile. Jesu bekati kutsi tetsembiso taNkulunkulu nakanjani tiyagcwaliseka. (Isa. 55:11) Natsi lamuhla kufanele siciniseke kutsi nangabe sinekukholwa lokucinile kuJehova, utasifeza setsembiso sakhe lesitsi: “Ngeke ngize ngikushiye, futsi ngeke ngize ngikulahle.” (Heb. 13:5) Lamavi laphefumulelwe singawahlobanisa kahle naloko Jesu lakusho mayelana nekufuna uMbuso kucala kanye nekulunga kwaNkulunkulu.

 5. Kungani imphendvulo Jesu layiniketa Phetro ikucinisa kukholwa kwetfu?

⁵ Umphostoli Phetro wake wabuta Jesu watsi: “Sishiye tonkhe tintfo sakulandzela; yini-ke lesitayitfola?” (Mat. 19:27) Esikhundleni sekutsi Jesu amtsetsise Phetro ngekubuta lombuto, Jesu watjela bafundzi bakhe kutsi batawutfola umvuzo ngekutidzela kwabo. Labaphostoli labetsembekile kanye nalabanye batawubusa naJesu ezulwini. Ngisho nanyalo tisekhona tibusiso. Jesu watsi: “Nobe ngubani loshiye tindlu, banakabo, bodzadzewabo, uyise, unina, nobe bantfwana nobe emasimu ngenca yami, utawutfola loku sekuphindvwe kanyenti, atfole nekuphila lokuphakadze.” (Mat. 19:29) Bafundzi bakhe batawutfola tibusiso letingetulu kwaloko lokubalahlekele. Bobabe, bomake, banaketfu, bodzadzewetfu kanye nebantfwana lesibatfola ebandleni, abakabaluleki yini kwendlula nobe ngabe yini lesilahlekele nobe lesiyishiyile ngenca yeMbuso?

 6. Kungani Jehova etsembisa kutinika umvuzo tinceku takhe?

⁶ Jehova nakatsembisa tinceku takhe umvuzo, usuke atisita kutsi time ticine nativivinywa bucotfo bato. Ngetulu kwekujabulela tibusiso letisisita sicinise buhlobo betfu naNkulunkulu nyalo, tinceku taNkulunkulu tibuke phambili ekutfoleni tibusiso letinyenti esikhatsini lesitako. (1 Thim. 4:8) Ngako, nasiciniseka kutsi Jehova “ubanika umvuzo labo labamfuna ngekutimisela,” loko kutasisita kutsi sibe nekukholwa lokucinile.​—Heb. 11:6.

 7. Litsemba lifana njani nelihhuka lemkhumbi?

⁷ Enshumayelweni yakhe yaseNtsabeni, Jesu watsi: “Jabulani nitfokote, ngenca yekutsi umvuzo wenu mkhulu ezulwini, ngobe nebaphrofethi baphatfwa ngaleyo ndlela.” (Mat. 5:12) Ngaphandle kwelitsemba labanalo labo labatawutfola umvuzo wekuya ezulwini, litsemba lesinalo lekuphila phakadze emhlabeni lolipharadisi lisizatfu lesicinile sekutsi ‘sijabule futsi sitfokote.’ (Hla. 37:11; Luk. 18:30) Kungakhatsaliseki kutsi sitawuphila ezulwini nobe emhlabeni, litsemba lesinalo lingaba “njengelihhuka lemkhumbi emiphefumulweni yetfu, kantsi licinisekisiwe futsi licinile.” (Heb. 6:17-20) Njengobe lihhuka lemkhumbi lenta umkhumbi ume ucine nakunesiphepho, nelitsemba lesinalo lekutfola umvuzo liyasisita kutsi sikhone kulawula indlela lesitiva ngayo, sikhone nekulawula simo setfu sengcondvo, siphindze sibe nebuhlobo lobuhle naNkulunkulu. Liphindze lisisite sibe nemandla ekukhutsatelela bumatima.

 8. Kungani litsemba linemandla ekunciphisa kukhatsateka?

⁸ Litsemba letfu lelisekelwe eBhayibhelini linemandla ekunciphisa kukhatsateka lesibhekana nako lamuhla. Tetsembiso taNkulunkulu tifana nemafutsa langokomoya latsambisa tinhlitiyo tetfu letikhatsatekile. Kuyasidvudvuta kwati kutsi ‘singalahlela imitfwalo yetfu’ kuJehova, futsi sati nekutsi ‘yena utasisimisa.’ (Hla. 55:22) Singaciniseka kutsi Nkulunkulu angenta “lokukhulu kakhulu kunato tonkhe tintfo lesiticelako nobe lesiticabangako.” (Ef. 3:20) Cabanga nje, Jehova aketsembisi kusentela tintfo letinkhulu kodvwa wetsembisa kusentela tintfo ‘letinkhulu kakhulu kunato tonkhe’!

 9. Siciniseka kangakanani kutsi Jehova utakwenta loko lakwetsembisile?

⁹ Nangabe sifuna kutfola umvuzo, kufanele sikhombise kutsi sinekukholwa lokucinile kuJehova futsi sititfobe eticondzisweni takhe. Mosi watsi esiveni saka-Israyeli: “Ngobe kulelive Simakadze Nkulunkulu wenu lanipha lona kutsi nilidle libe lifa lenu utanibusisa kakhulu ngemcebo, nangabe kambe nimlalela kuko konkhe Simakadze Nkulunkulu wenu, futsi ninakekela nilandzele yonkhe lemiyalo lengininika yona lamuhla. Ngobe Simakadze Nkulunkulu wenu utanibusisa njengobe etsembisile.” (Dut. 15:4-6) Uyaciniseka yini kutsi Jehova utakubusisa nangabe uchubeka umkhonta ngekwetsembeka? Unetizatfu letinhle tekuciniseka.

10, 11. Jehova wambusisa njani Josefa?

¹⁰ LiBhayibheli labhalwa kuze kufundziswe tsine. Linetibonelo letinyenti letikhombisa kutsi Nkulunkulu watibusisa njani tinceku takhe letetsembekile. (Rom. 15:4) Josefa ungulomunye walabo lababusiswa nguJehova. Josefa wavalelwa ejele laseGibhithe ngenca yekutsi bekatondvwa bomnakabo futsi wacanjelwa nemanga ngumfati wenkhosi yakhe. Loku kwamenta walahlekelwa ngumusa waNkulunkulu yini? Cha! LiBhayibheli litsi: “Simakadze wajinge waba naye, wamentela umusa, wamupha kutsandzeka . . . Simakadze abenaye, futsi konkhe labekwenta Josefa Simakadze abekuphumelelisa.” (Gen. 39:21-23) Kuleto tikhatsi letimatima, Josefa walindzela Nkulunkulu wakhe.

¹¹ Ngemuva kweminyaka letsite, Faro wakhulula Josefa ejele futsi wamenta waba wesibili embusweni waseGibhithe. (Gen. 41:1, 37-43) Umfati wakhe wamtalela emadvodzana lamabili futsi “lona wekucala Josefa wametsa libito watsi nguManase, ngobe ngaloko abesho kutsi, ‘Nkulunkulu ungente ngakhohlwa konkhe kuhlupheka kwami nemndeni waketfu.’ Lona wesibili Josefa wametsa libito watsi ngu-Efrayimu, ngaloko abesho kutsi, ‘Nkulunkulu ungiphe bantfwana eveni lekuhlupheka kwami.’” (Gen. 41:51, 52) Ngenca yekutsi Josefa wahlala etsembekile kuNkulunkulu, watfola tibusiso letavikela kuphila kwema-Israyeli kanye nekwemaGibhithe. Liciniso likutsi, Josefa bekati kutsi nguJehova lebekambusisile.​—Gen. 45:5-9.

12. Jesu wahlala njani etsembekile ngisho nobe avivinywa?

¹² Jesu wachubeka nekutitfoba kuNkulunkulu ngesikhatsi kukholwa kwakhe kuvivinywa futsi naye watfola umvuzo. Wasitwa yini? LiVi laNkulunkulu litsi: “Ngobe ngenca yenjabulo lebeyibekwe embikwakhe wabeketelela kufa elugodvweni, wangalinaki lihlazo.” (Heb. 12:2) Jesu bekakujabulela kungcwelisa ligama laNkulunkulu. Ngetulu kwaloko, wabusiswa ngekwemukelwa nguBabe wakhe futsi watfola nemalungelo lamanyenti. LiBhayibheli litsi: “Wahlala ngesekudla sesihlalo sebukhosi saNkulunkulu.” Liphindze litsi: “Nkulunkulu wamphakamisela esikhundleni lesisetulu, futsi ngemusa wamnika ligama lelingetulu kwawo onkhe emagama.”​—Fil. 2:9.

13, 14. Jehova utiva njani ngaloko lesimentela kona?

¹³ Kufanele siciniseke kutsi Jehova uyayijabulela yonkhe imetamo lesiyentako kuze simkhonte. Uyakucondza kukhatsateka kwetfu nobe kungabata lesingahle sibe nako. Uyasivela nangabe sicindzetelwe timo temnotfo nalapho temphilo nobe indlela lesitiva ngayo yenta singakhoni kwenta lesingatsandza kukwenta ekumkhonteni yena. Kufanele siciniseke kutsi Jehova uyatitsandza tinceku takhe letenta nobe ngabe yini kuze tihlale tetsembekile kuye.​—Fundza Hebheru 6:10, 11.

¹⁴ Kufanele sikhumbule nekutsi singasondzela kuNkulunkulu ‘lova imithandazo’ futsi siciniseke kutsi utayiphendvula imithantazo yetfu. (Hla. 65:2) Ngenca yekutsi Nkulunkulu ‘unguYise wemusa, naNkulunkulu wayo yonkhe indvudvuto,’ kufanele siciniseke kutsi utasisekela kuze sibe nebuhlobo lobuhle naye, mhlawumbe ngekutsi asebentise bazalwane lesikanye nabo. (2 Khor. 1:3) Jehova uyajabula nangabe siba nemusa kulabanye. LiBhayibheli litsi: “Lowo lopha lomphofu uboleka Simakadze; Simakadze uyakumvuza ngaloko lakwentile.” (Taga 19:17; Mat. 6:3, 4) Ngako, nangabe sibasita labanye lababhekene nebumatima, kufana nekutsi siboleka Jehova. Wetsembisa kutsi utawubaniketa umvuzo labo labanemusa kulabanye.

15. Ngumuphi umvuzo lolindzele kuwutfola? (Buka sitfombe lesisekucaleni kwalesihloko.)

¹⁵ EmaKhristu lagcotjiwe acinisekiswa ngelitsemba lekutfola ‘umchele wekulunga, lowo iNkhosi lengumehluleli lolungile letabanika wona njengemvuzo ngalelo langa.’ (2 Thim. 4:7, 8) Nobe kunjalo, ngeke bese uyayekela kukhonta Nkulunkulu ngobe nje ukunike umvuzo lobewungakawulindzeli. Tigidzi ‘taletinye timvu’ tilangatelela kutfola umvuzo wekuphila lokuphakadze emhlabeni lolipharadisi. Ngaleso sikhatsi, titawuhlala emhlabeni ‘titijabulise ngekuthula lokukhulu.’​—Joh. 10:16; Hla. 37:11.

16. Nguyiphi indvudvuto lesiyitfola ku-1 Johane 3:19, 20?

¹⁶ Ngaletinye tikhatsi singeva shengatsi kuncane lesikwentako, nome singahle sitibute kutsi Jehova uyajabula yini ngemetamo yetfu. Singahle sitive shengatsi asikufanelekeli kutfola nome ngumuphi umvuzo. Nobe kunjalo akukafanele sikhohlwe kutsi “Nkulunkulu mkhulu kakhulu kunetinhlitiyo tetfu, futsi wati tonkhe tintfo.” (Fundza 1 Johane 3:19, 20.) Nkulunkulu ubusisa wonkhe umsebenti lesiwentako losuka enhlitiyweni leshukunyiswa kukholwa nelutsandvo, kungakhatsaliseki kutsi siwubona umncane kanganani.​—Mak. 12:41-44.

17. Ngutiphi letinye tibusiso lesitijabulelako nyalo?

¹⁷ Ngisho nome siphila kulamalanga ekugcina alesimiso lesibi saSathane, Jehova uyababusisa bantfu bakhe. Uyaciniseka kutsi tikhonti teliciniso tiyatfutseleka ekukhulekeleni lokuhlantekile. (Isa. 54:13) Njengoba Jesu atsembisa, Jehova uyasibusisa nyalo ngekutsi sibe yincenye yemndeni lonelutsandvo lowakhiwa bazalwane kanye nabodzadzewetfu labasemhlabeni wonkhe. (Mak 10:29, 30) Ngetulu kwaloko labo labafuna Nkulunkulu ngekutimisela batfola tibusiso letinyenti letifaka ekhatsi kuthula kwengcondvo, kwenetiseka kanye nenjabulo.​—Fil. 4:4-7.

18, 19. Tinceku taJehova titiva njani ngetibusiso letivela kuye?

¹⁸ Tinceku taJehova letisemhlabeni wonkhe tingafakaza kutsi titfola tibusiso letinyenti letivela kuye. Nasi sibonelo, lomunye wesifazane waseJalimane longuBianca utsi: “Ngimbonga ngingacedzi Jehova ngekungisita kutsi ngibhekane netinkinga tami kanye nekuba kwakhe sedvute nami. Live libi langephandle. Kepha njengoba ngisebenta dvutane naJehova, ngitiva ngivikelekile. Nangitidzela kute ngimkhonte, ungibusisa ngalokuphindvwe kalikhulu.”

¹⁹ Cabanga nangaPaula loneminyaka lengu-70 budzala loseCanada futsi lonenkinga yemgogodla, utsi: “Kungakhoni kutihambela akusho kungakhoni kwenta umsebenti wekushumayela. Ngiyakujabulela kusebentisa tindlela letehlukene tekushumayela, njengekusebentisa lucingo nekufakaza ngingakahleli. Kuze ngikhutsateke, ngihlale nginelibhuku lelinemiBhalo kanye netindlela tekushumayela lengititfola etincwadzini letisekelwe eBhayibhelini lengilibuka njalo nangishumayela. Ngilibita ngekutsi ‘Libhuku Lami Lekuphila.’ Kudvumateka kuba kwesikhashana nangabe sihlala sinake tetsembiso taJehova. Jehova uhlale akulungele kusisita ngisho nobe sikusiphi simo.” Kungenteka simo sakho sehlukile kuleso saBianca nesaPaula. Nome kunjalo ungacabanga ngetindlela Jehova lakubusise ngato wena kanye nalabo lohlala nabo. Kuhle kunaka indlela Jehova lasibusisa ngayo nyalo kanye nendlela latasibusisa ngayo esikhatsini lesitako!

20. Yini lesingayilindzela nangabe sichubeka sikhonta Jehova ngemphefumulo wonkhe?

²⁰ Ungakhohlwa kutsi umthantazo wakho losuka enhlitiyweni kanye nendlela lokhuluma ngayo ngekukhululeka naNkulunkulu itawuba “nemvuzo lomkhulu.” Ungaciniseka kutsi ‘nasewente intsandvo yaNkulunkulu, utawutfola kugcwaliseka kwesetsembiso.’ (Heb. 10:35, 36) Ngako asichubeke sicinisa kukholwa kwetfu futsi sisebente ngekutinikela ngemphefumulo wonkhe kuJehova. Loku sikwenta sati kutsi Jehova utawusiniketa umvuzo.​—Fundza Kholose 3:23, 24.