Wetsembeka Ngesikhatsi Avivinywa

1, 2. Yini lokungenteka Phetro abeyilindzele ngesikhatsi Jesu akhuluma nebantfu eKhaphanawume, kodvwa yini leyenteka?

PHETRO abesolo abukisise tilaleli taJesu. Bebahlangene esinagogeni leliseKhaphanawume. Likhaya laPhetro belikulo lelidolobha, libhizinisi lakhe lekudweba belikhona lapha elugwini lolungasenyakatfo yeLwandle LwaseGalile, futsi bangani bakhe labanyenti, tihlobo takhe, kanye nebantfu labesebenta nabo, bebahlala lapha eKhaphanawume. Asingabati kutsi Phetro abenelitsemba lekutsi bantfu bakubo bebatawutsatsa Jesu ngendlela naye labemtsatsa ngayo, futsi bakujabulele kufundza ngeMbuso waNkulunkulu kulomfundzisi lomkhulu kunabo bonkhe. Kodvwa-ke akuzange kube njalo.

² Labanyenti bayekela kulalela. Labanye bacala kukhonona futsi bakuphikisa loko Jesu labekhuluma ngako. Lokwamkhatsata kakhulu Phetro nguloko lokwentiwa ngisho nangulabo lebebabafundzi baJesu. Ebusweni babo beseyingasekho injabulo yekuva nekufundza emaciniso lamasha labeshiwo nguJesu. Esikhundleni saloko, besebacansukile futsi batfukutsele. Labanye baze batsi lenkhulumo yaJesu ihlasimulisa umtimba. Njengobe bebangasafuni kulalela, baphuma esinagogeni futsi bayekela nekulandzela Jesu.​—Fundza Johane 6:60, 66.

 3. Etikhatsini letinyenti, kukholwa Phetro labenako kwamsita kutsi enteni?

³ Lesi bekusikhatsi lesimatima kuPhetro nakulaba labanye baphostoli. Abengakucondzi kahle loko lebekushiwo nguJesu ngalelo langa. Kufanele nekutsi abesibona sizatfu lebesingenta emavi aJesu abakhube labanye nangabe atsatfwa njengobe anjalo. Yini-ke labetawuyenta? Bekungasiko kwekucala kutsi kwetsembeka kwakhe eNkhosini yakhe kuvivinywe, futsi bekungeke kube kwekugcina. Asesibone indlela kukholwa kwaPhetro lokwamsita ngayo kutsi aphumelele kuleto tinsayeya futsi achubeke etsembekile.

4, 5. Ngutiphi tintfo Jesu latenta lebetingahambisani naloko bantfu lebebakulindzele kuye?

⁴ Etikhatsini letinyenti, Phetro abevame kumangaliswa tintfo lebetentiwa nguJesu. Ngaletinye tikhatsi, iNkhosi yakhe beyenta tintfo iphindze ikhulume ngendlela lengahambisani naloko bantfu lebebakulindzele kuyo. Ngayitolo, Jesu abesutsise tinkhulungwane tebantfu ngalokusimangaliso. Nababona loko, labantfu betama kumenta inkhosi. Kodvwa labanyenti bamangala ngesikhatsi abashiya, futsi atjela bafundzi bakhe kutsi bagibele sikebhe baye ngaseKhaphanawume. Njengobe bafundzi bebahamba elwandle ebusuku, Jesu waphindze wabamangalisa ngekutsi ahambe etikweLwandle LwaseGalile lebelunesiphepho lesikhulu, futsi wafundzisa Phetro sifundvo lesibalulekile mayelana nekukholwa.

⁵ Kwatsi ngekushesha nasekusile, babona kutsi lesicumbi sebantfu besibalandzele ngetikebhe. Kepha kubonakala shengatsi labantfu babalandzela ngobe bebanesifiso sekutsi Jesu abentele lokunye kudla ngalokusimangaliso, hhayi ngobe bebalambele kufundza ngaNkulunkulu. Jesu wabekhuta ngenca yekutsandza kwabo tintfo tenyama. (Joh. 6:25-27) Loku kwachubeka nasesinagogeni laseKhaphanawume, lapho Jesu aphindze washo intfo lebebangakayilindzeli ngesikhatsi abafundzisa liciniso lelibalulekile kodvwa lelimatima.

 6. Ngumuphi umfanekiso Jesu lawusho, futsi yini leyentiwa ngulabantfu lebebamlalele?

⁶ Jesu abefuna kutsi labantfu bangamtsatsi njengemuntfu lobanika kudla kuphela, kodvwa bamtsatse njengemuntfu labalungiselelwe yena nguNkulunkulu, lokutawutsi ngekuphila nangekufa kwakhe bantfu batfole kuphila lokuphakadze. Ngako wabatjela umfanekiso futsi ngawo watifananisa nemana, lokusinkhwa lebesehla ezulwini esikhatsini saMosi. Ngesikhatsi labanye bakuphikisa loku, wasebentisa umfanekiso locacile watsi kubalulekile kutsi badle inyama yakhe futsi banatse ingati yakhe kute batfole kuphila. Kungaleso sikhatsi lapho bantfu labanyenti bacala khona kutfukutsela. Labanye batsi: “Lenkhulumo ihlasimulisa umtimba, futsi ayilaleleki.” Ngisho nebafundzi baJesu labanyenti bakhetsa kuyekela kumlandzela.a​—Joh. 6:48-60, 66.

7, 8. (a) Yini Phetro labesolo angayicondzi mayelana nendzima yaJesu? (b) Phetro wawuphendvula njani umbuto Jesu labewubute baphostoli?

⁷ Phetro abetawukwenta njani? Kufanele kutsi naye kwammangalisa loko lebekushiwo nguJesu. Abesolo angacondzi kutsi Jesu kufanele afe kute afeze intsandvo yaNkulunkulu. Phetro walingeka yini kutsi naye ayekele kulandzela Jesu njengalaba labanye bafundzi lebebete kukholwa labakhetsa kushiya Jesu ngalelo langa? Cha; kunentfo lebaluleke kakhulu leyenta Phetro wehluka kulaba labanye. Bekuyini leyo?

⁸ Jesu wabuka baphostoli bakhe wase utsi: “Nani senifuna kuhamba yini?” (Joh. 6:67) Abekhuluma nabo bonkhe laba labangu-12, kodvwa nguPhetro lowaphendvula. Etikhatsini letinyenti bekuba nguPhetro lophendvula kucala. Kungenteka kutsi nguye labemdzala kunabo bonkhe. Kunobe ngukuphi, kubonakala shengatsi nguye labetsandza kukhuluma kwendlula bonkhe, futsi bekungakavami kutsi esabe kusho loko labekucabanga. Nakuloku, engcondvweni yakhe bekunalamavi lamnandzi nalesingeke size siwakhohlwe, latsi: “Nkhosi, singahamba siyephi? Ngobe nguwe lonemavi ekuphila lokuphakadze.”—Joh. 6:68.

 9. Phetro wakhombisa njani kutsi wetsembekile kuJesu?

⁹ Lamavi awayitsintsi yini inhlitiyo yakho? Kukholwa Phetro labenako kuJesu kwamsita kutsi etsembeke, futsi loku bekubaluleke kakhulu. Phetro wabona ngalokucacile kutsi Jesu nguye kuphela uMsindzisi Jehova labebalungiselele yena, nekutsi usindzisa bantfu ngemavi akhe​—lokutimfundziso takhe letimayelana neMbuso waNkulunkulu. Phetro bekati kutsi ngisho nobe bekunetintfo langaticondzi, kute lenye indzawo labengaya kuyo nangabe afuna kwemukelwa nguNkulunkulu futsi afuna kutfola sibusiso sekuphila lokuphakadze.

10. Lamuhla, singakulingisa njani kwetsembeka kwaPhetro?

¹⁰ Nawe utiva kanjalo yini? Kuyadzabukisa kutsi bantfu labanyenti lamuhla batsi bayamtsandza Jesu kodvwa abetsembeki lapho kukholwa kwabo kuvivinywa. Kuze setsembeke ngebucotfo kuKhristu kufanele sibe nembono lofana newaPhetro ngetimfundziso taJesu. Kufanele sitifundze, setame kuticondza, futsi siphile ngekuvumelana nato, ngisho nobe tingasimangalisa ngekungabi nguloko lebesikulindzele nobe tingahambisani naloko lesikufisako. Kwetsembeka kwetfu ngiko kuphela lokungasinika litsemba lekutfola kuphila lokuphakadze Jesu lasifunela kona.​—Fundza Tihlabelelo 97:10.

11. Nguluphi luhambo Jesu lalutsatsa nebalandzeli bakhe? (Fundza nembhalo longentansi.)

¹¹ Ngekushesha ngemuva kwaloko, Jesu watsatsa baphostoli bakhe nalabanye bafundzi waya nabo eluhambeni loludze loluya ngasenyakatfo. Sicongo seNtsaba iHemoni legcwele lichwa futsi lesenyakatfo yeLive Lesetsembiso, ngaletinye tikhatsi besibonakala kahle ngisho nangale kweLwandle LwaseGalile. Kancane kancane njengobe bebasondzela, lentsaba yachubeka ibonakala kakhulu, futsi besebakhuphukela emadolobhaneni lasedvute neKhesariya Filiphi.b Kulendzawo lenhle leyenta umuntfu alibone kahle Live Lesetsembiso nangaseningizimu yalo, Jesu wabuta balandzeli bakhe umbuto lobaluleke kakhulu.

12, 13. (a) Kungani Jesu abuta kutsi bantfu bacabangani ngaye? (b) Emphendvulweni layisho kuJesu, Phetro waveta njani kutsi unekukholwa lokucinile?

¹² Wababuta watsi: “Bantfu batsi ngingubani?” Singase simcabange Phetro abuka Jesu emehlweni futsi abona umusa kanye nekuhlakanipha kweNkhosi yakhe. Jesu abefuna kwati loko bantfu labakucabangako ngetintfo labetisho. Bafundzi baJesu bawuphendvula lombuto, basho imibono leminyenti levamile lebeyishiwo mayelana nekutsi Jesu ungubani. Kodvwa Jesu yena abefuna kwati lokwengetiwe. Kungenteka yini kutsi nebalandzeli bakhe labasedvute bebenta liphutsa lelifanako? Ngako wababuta watsi: “Nine-ke nitsi ngingubani?”​—Luk. 9:18-20.

¹³ Nakuloku, Phetro waba wekucala kuphendvula. Washo emavi lacacile futsi laveta sibindzi, achaza loko lebekusetinhlitiyweni tabo bonkhe bafundzi. Watsi: “UnguKhristu, iNdvodzana yaNkulunkulu lophilako.” Singamcabanga Jesu abuka Phetro ngemusa futsi amomotseka kute ambonise kutsi uphendvule kahle. Jesu wakhumbuta Phetro kutsi nguJehova Nkulunkulu​—hhayi nobe ngumuphi umuntfu—​lowembule leliciniso lelibalulekile kubantfu labanekukholwa lokucinile. Phetro wasitwa kutsi acondze lelinye lemaciniso labaluleke kakhulu labembulwe nguJehova​—lekutsi ungubani Mesiya lowetsenjisiwe nobe Khristu!​—Fundza Matewu 16:16, 17.

14. Ngumiphi imisebenti lebalulekile Jesu layinika Phetro?

¹⁴ LoKhristu ngulona tiphrofetho tasendvulo lebetimbita ngekutsi litje lebelitawukwaliwa bakhi. (Hla. 118:22; Luk. 20:17) Acabanga ngetiphrofetho letifana naleti, Jesu waveta kutsi Jehova abetawukwakha libandla kulelitje nobe lidvwala, lelo lelachazwa nguPhetro. Wabese unika Phetro leminye imisebenti lebaluleke kakhulu labetayenta kulelibandla. Jesu akazange abeke Phetro ngetulu kwalaba labanye baphostoli njengobe labanye bantfu bacabanga kanjalo, kodvwa wamphatsisa imisebenti leyengetiwe. Wamnika “tikhiya teMbuso.” (Mat. 16:19) Phetro abetakujabulela kakhulu kuvulela tinhlobo letintsatfu tebantfu indlela yekutfola litsemba lekungena eMbusweni waNkulunkulu​—bekucala ngemaJuda, kulandzele baseSamariya, kugcine bantfu beTive nobe labangesiwo emaJuda.

15. Yini leyenta Phetro wekhuta Jesu, futsi wamekhuta watsini?

¹⁵ Kepha ngekuhamba kwesikhatsi Jesu watsi labo labanikwe lokunyenti batawulandzisa kakhulu ngako, futsi kuba liciniso kwalamavi sikubona kuloko lokwenteka kuPhetro. (Luk. 12:48) Jesu wachubeka aveta emaciniso labalulekile lamayelana naMesiya, lafaka ekhatsi kuhlupheka kanye nekubulawa kwakhe eJerusalema lebekutawukwenteka ngekushesha. Phetro kwamvisa buhlungu loko. Wabitela Jesu eceleni wase uyamekhuta utsi: “Bani nemusa kuwe Nkhosi; loku ngeke kwenteke kuwe.”​—Mat. 16:21, 22.

16. Jesu wameluleka njani Phetro, futsi ngusiphi seluleko lesingasitfola kulamavi aJesu?

¹⁶ Phetro abehlose lokuhle ngekwenta njalo, ngako kufanele kutsi imphendvulo yaJesu yammangalisa kakhulu. Jesu wafulatsela Phetro, wabuka laba labanye bafundzi lokungenteka nabo bebacabanga intfo lefanako, wase utsi kuye: “Suka Sathane! Usikhubekiso kimi, ngobe awucabangisi kwaNkulunkulu kodvwa ucabangisa kwebantfu.” (Mat. 16:23; Mak. 8:32, 33) Lamavi aJesu aneseluleko lesisasebenta nakitsi. Kumelula kakhulu kuvumela kucabanga kwetfu kutsi kube ngiko lokubaluleke kwendlula imicabango yaNkulunkulu. Nangabe senta njalo ngisho nobe sihlose lokuhle, singase sititfole sesisekela injongo yaSathane kuneyaNkulunkulu. Kodvwa-ke Phetro wativa njani ngaloku?

17. Jesu abesho kutsini ngesikhatsi atjela Phetro kutsi ‘akasuke’ kuye?

¹⁷ Kungenteka kutsi Phetro wabona kutsi Jesu abengatsi yena unguSathane Develi. Phela Jesu akazange akhulume naPhetro ngendlela lakhuluma ngayo naSathane. KuSathane watsi: “Hamba”; kantsi kuPhetro watsi: “Suka.” (Mat. 4:10) Jesu akazange amcoshe lomphostoli labebone lokuhle kuye, kodvwa wamane walungisa indlela leliphutsa labecabanga ngayo ngalendzaba. Akusimatima kubona kutsi Phetro bekudzingeka angabi sikhubekiso eNkhosini yakhe kodvwa bekufanele ayisekele njengobe angumlandzeli wayo.

18. Phetro wakuveta njani kwetsembeka, futsi singamlingisa njani?

¹⁸ Phetro waphikisana yini naJesu, watfukutsela nobe wadvuba? Cha, wasemukela ngekutfobeka leseluleko. Ngekwenta njalo waphindze wakhombisa kwetsembeka. Bonkhe labalandzela Khristu bayakudzinga kwelulekwa ngaletinye tikhatsi. Kwemukela seluleko ngekutfobeka nekutfola sifundvo kuso ngiko kuphela lokungasenta sichubeke sisondzelana naJesu Khristu naBabe wakhe, Jehova Nkulunkulu.​—Fundza Taga 4:13.

19. Ngumaphi emavi lamangalisako Jesu lawasho, futsi yini lokungenteka Phetro wayicabanga?

¹⁹ Ngekushesha Jesu waphindze washo emavi lamangalisako, watsi: “Ngicinisile ngitsi kini: Kukhona labalapha labangeke bafe bangakayiboni iNdvodzana yemuntfu ita iseMbusweni wayo.” (Mat. 16:28) Akungabateki kutsi lamavi enta Phetro watibuta imibuto leminyenti. Jesu abesho kutsini? Mhlawumbe Phetro abecabanga kutsi leseluleko lasitfolile besisho kutsi abengeke alitfole lilungelo lelinjalo.

20, 21. (a) Chaza umbono lowabonwa nguPhetro. (b) Loko lobekukhulunywa ngako kulombono kwakulungisa njani kucabanga kwaPhetro?

²⁰ Ngemuva kweliviki, Jesu watsatsa boJakobe, Johane naPhetro waya nabo “entsabeni lendze”​—mhlawumbe eNtsabeni iHemoni lebeyikhashane ngemakhilomitha langu-25. Kungenteka kutsi bekusebusuku ngobe lamadvodza lamatsatfu abephetfwe butfongo. Kodvwa ngesikhatsi Jesu athantaza, kunalokutsite lokwenteka lokwavele kwacedza butfongo bawo.​—Mat. 17:1; Luk. 9:28, 29, 32.

²¹ Jesu wacala kushintja embikwabo. Buso bakhe bakhanya, bakhatimula baze baba mhlophe njengekukhanya kwelilanga. Netimphahla takhe betimengetela. Ngemuva kwaloko kwabonakala emadvodza lamabili anaJesu, lenye beyifanekisela Mosi, kantsi lena lenye ifanekisela Elija. Abecoca naye “mayelana nekuhamba kwakhe lobekuhlelelwe kutsi kwenteke eJerusalema”​—lokungenteka kutsi bekusho kufa nekuvuswa kwakhe. Kwacaca kutsi Phetro abente liphutsa ngekuphikisa kutsi Jesu abetawuhlangabetana nalesimo lesibuhlungu.​—Luk. 9:30, 31.

22, 23. (a) Phetro wakhombisa njani kuba nenshisekelo nemusa? (b) BoPhetro, Jakobe, naJohane baphindze babusiswa njani ngalobo busuku?

²² Phetro wakubona kufanele kutsi abe nencenye ngandlela tsite kulombono lomangalisako​—mhlawumbe awente uchubeke sikhatsi lesidze. Kwabonakala shengatsi boMosi na-Elija bayamshiya Jesu. Ngako Phetro watsi: “Mfundzisi, kuhle kutsi sibe lapha, ngako asakheni emathende lamatsatfu, linye libe lakho, lelinye libe laMosi futsi lelinye libe la-Elija.” Kodvwa labantfu lababili lebebafanekisela tinceku taJehova letafa kadzeni bebangawadzingi emathende. Ecinisweni, Phetro abengatati kutsi utsini. Ngako, loko lokwenteka kusenta sifune kumati kancono ngenca yekutsi abenenshisekelo nemusa.​—Luk. 9:33.

²³ BoPhetro, Jakobe, naJohane baphindze babusiswa ngalobo busuku. Kwavela lifu futsi labasibekela lapho entsabeni. Kulo kwevakala livi laJehova Nkulunkulu, litsi: “Lena yiNdvodzana yami lengiyikhetsile. Yilaleleni.” Lombono wase uyanyamalala, ngako basala naJesu lapho entsabeni.—Luk. 9:34-36.

24. (a) Lombono wekuguculwa kwesimo wamzuzisa njani Phetro? (b) Lamuhla singazuza njani kulombono?

²⁴ Lombono wekuguculwa kwesimo waba ligugu kuPhetro, futsi ungilo nakitsi. Ngemuva kwemashumi eminyaka wabhala ngelilungelo laba nalo ngalobo busuku lekubona Jesu ayiNkhosi yasezulwini lekhatimulako, nekuba semkhatsini walabo lababa ‘bofakazi bekutibonela bebukhulu bakhe.’ Lombono wacinisekisa naletinye tiphrofetho letiseVini laNkulunkulu waphindze wacinisa nekukholwa kwaPhetro kute akwati kubeketelela tilingo labetawubhekana nato. (Fundza 2 Phetro 1:16-19.) NjengakuPhetro, kungenteka lokufanako nakitsi nangabe sihlala setsembekile eNkhosini lesiyibekelwe nguJehova, sichubeke sifundza kuyo, futsi semukele siyalo nekwelulekwa ngiyo, siphindze siyilandzele ngekutfobeka malanga onkhe.