Jehova Uyakwati Kukhulula Bantfu Bakhe

“INkhosi [Jehova] iyakwati kubakhulula ekulingweni labo labesaba Nkulunkulu.”—2 PHET. 2:9.

KUNGANI SINGACINISEKA KUTSI JEHOVA:

․․․․․

Uyatati tikhatsi tetehlakalo letimayelana nekugcwaliseka kwenjongo yakhe?

․․․․․

Utawusebentisa emandla akhe kute alwele bantfu bakhe?

․․․․․

Ukwati ngalokucacile loko lokutawenteka ngesikhatsi sekuhlupheka lokukhulu?

 1. Yini letawenteka ngesikhatsi ‘sekuhlupheka lokukhulu’?

KUKHISHWA kwesehlulelo saNkulunkulu kulelive laSathane, kutawufika ngekushesha. (1 Thes. 5:2, 3) Njengobe “lilanga lelikhulu laSimakadze” lisondzela, umhlaba wonkhe utawugcwala lusizi. (Zef. 1:14-17) Kutawuba nebumatima kanye nekuhlupheka. Kuphindze kube sikhatsi sekucindzeteleka “lokungazange sekube khona kusukela seloku kwasekelwa umhlaba, kuze kube ngulamuhla.”—Fundza Matewu 24:21, 22.

2, 3. (a) Yini bantfu baNkulunkulu labatawuhlangabetana nayo ngesikhatsi “sekuhlupheka lokukhulu”? (b) Yini lengasenta kutsi sibuke sikhatsi lesitako ngekuciniseka?

² Njengobe “kuhlupheka lokukhulu” kusondzela ngasekupheleni kwako, bantfu baNkulunkulu batawuhlaselwa ‘nguGogi waseveni lakaMagogi.’ Ngaleso sikhatsi “imphi lenemandla kakhulu” itawuvikela bantfu baNkulunkulu “njengelifu lelisibekela live.” (Hez. 38:2, 14-16) Kute inhlangano yebantfu letawukwati kuvikela bantfu baJehova. NguNkulunkulu kuphela lotawusindzisa bantfu. Batawenta njani bantfu baJehova ngalesikhatsi titsa tabo tetama kubabulala?

³ Nangabe uyinceku yaJehova, uyakholwa yini kutsi Jehova angabavikela bantfu bakhe ekuhluphekeni lokukhulu, kanye nekutsi utawenta njalo? Umphostoli Phetro wabhala: “INkhosi [Jehova] iyakwati kubakhulula ekulingweni labo labesaba Nkulunkulu; kodvwa labangakalungi ibagcinela kujeziswa ngelilanga lekwehlulelwa.” (2 Phet. 2:9) Kuzindla ngetento taJehova tekukhulula bantfu bakhe, kungasenta sibuke sikhatsi lesitako ngekuciniseka. Ase sihlole tibonelo letintsatfu letitawusenta sibe nekukholwa kutsi Jehova utawubakhulula bantfu bakhe.

WASINDZA KUZAMCOLO

 4. Kungani sikhatsi sasibalulekile mayelana nekufika kwaZamcolo?

⁴ Ase sicale sicoce ngaZamcolo wangesikhatsi saNowa. Kwakudzingeka sikhatsi kute injongo yaJehova igcwaliseke. Umsebenti wekwakha umkhumbi bekufanele ucedvwe futsi kufakwe netilwane kuwo ngembikwekutsi imvula ine. Kulandzisa lokukuGenesisi akusho kutsi Jehova walindza kwaze kwaphela kwakhiwa kwemkhumbi ngemuva kwaloko wase ubeka lilanga lekufika kwaZamcolo. Jehova abengakhetsa lilanga Zamcolo labetawucala ngalo ngaphandle kwekukhatsateka ngekutsi umkhumbi utawube ungakapheli ngaleso sikhatsi. Kunaloko, Nkulunkulu wabeka lilanga lekufika kwaZamcolo kusesele sikhatsi lesidze atjele Nowa kutsi akhe umkhumbi. Sikwati njani loko?

 5. Yini Jehova layincuma ngekusho kwaGenesisi 6:3, futsi lesincumo sentiwa nini?

⁵ LiBhayibheli lisitjela kutsi Jehova wenta sincumo ezulwini. KuGenesisi 6:3, watsi: ‘Umoya wami angeke usabenta bantfu baphile kuze kube phakadze, ngobe bantfu bayinyama, emalanga abo asayawuba ngiminyaka lengu-120.’ Lesi bekungasiso silinganiso sekutsi umuntfu uphila sikhatsi lesingakanani. Bekumane nje kusimemetelo Jehova lasikhipha kute avete kutsi utababhubhisa nini bantfu labangamhloniphi.a Njengobe Zamcolo wacala nga-2370 B.C.E., singaphetsa ngekutsi Nkulunkulu wakhipha lesimemetelo nga-2490 B.C.E. Ngaleso sikhatsi, Nowa abeneminyaka lengu-480 budzala. (Gen. 7:6) Ngemuva kweminyaka lengu-20, nga-2470 B.C.E., Nowa watala emadvodzana akhe. (Gen. 5:32) Kwatsi sekusele iminyaka lecishe ibe likhulu ngembikwekutsi Zamcolo ucale, Jehova abesolo angakamembuleli Nowa umsebenti lokhetsekile lobekufanele awente kute bantfu basindze. Nkulunkulu abetawulindza sikhatsi lesingakanani ngembikwekutsi atjele Nowa?

 6. Jehova wamtjela nini Nowa kutsi akhe umkhumbi?

⁶ Jehova walindza iminyaka leminyenti ngembikwekutsi embulele Nowa loko labefuna akwente. Sikwati njani loko? Kulandzisa lokuphefumulelwe kuveta kutsi emadvodzana aNowa besekakhulile futsi ashadile ngesikhatsi Nkulunkulu atjela Nowa kutsi akhe umkhumbi. Naku Jehova lamtjela kona: “Ngitakwenta sivumelwane sami nawe: Utawungena emkhunjini wena, nemadvodzana akho, nemkakho, nabomalukatana bakho.” (Gen. 6:9-18) Ngako-ke, kungenteka kutsi ngalesikhatsi Nowa atjelwa kutsi akhe umkhumbi, besekusele iminyaka lengu-40 nobe lengu-50 Zamcolo ufike.

 7. (a) Nowa kanye nemndeni wakhe bakuveta njani kukholwa? (b) Nkulunkulu wamtjela nini Nowa lilanga lelicondzile lekufika kwaZamcolo?

⁷ Njengobe umsebenti wekwakha umkhumbi bewuchubeka, kungenteka kutsi Nowa kanye nemndeni wakhe bebatibuta kutsi Nkulunkulu abetayifeza njani injongo yakhe kanye nekutsi Zamcolo abetawufika nini. Nanobe kunjalo, kungayati lemininingwane yalendzaba, akuzange kubente bayekele kwakha lomkhumbi. Kulandzisa kwemBhalo kutsi: “Nowa wakwenta konkhe layalwa nguNkulunkulu kutsi akwente.” (Gen. 6:22) Kusesele emalanga lasikhombisa kufike zamcolo—lokusikhatsi lesasenele sekutsi Nowa kanye nemndeni wakhe bafake tilwane emkhunjini—Jehova wase uyamtjela Nowa lilanga lelicondzile lekufika kwaZamcolo. Ngako-ke, ngesikhatsi emafasitelo asezulwini avuleka ‘ngemnyaka wesi-600 wekuphila kwaNowa, enyangeni yesibili, mhlazana tingu-17,’ konkhe bese kume ngabolonina.—Gen. 7:1-5, 11.

 8. Kulandzisa lokumayelana naZamcolo kusicinisekisa njani ngekutsi Jehova uyati kutsi utawubakhulula nini bantfu bakhe?

⁸ Indzaba yaZamcolo ayikhombisi nje kuphela kutsi Jehova unguMgcini Wesikhatsi kodvwa iphindze ikhombise nekutsi unguMkhululi. Njengobe sikhatsi sekuphela kwalelive laSathane sisondzela, singaciniseka kutsi tonkhe tinjongo taJehova titawugcwaliseka ‘ngelilanga nemzuzu’ lawubekile.—Mat. 24:36; fundza Habakhuki 2:3.

BAKHULULWA ELWANDLE LOLUBOVU

9, 10. Jehova wabasebentisa njani bantfu bakhe kute abambe libutfo laseGibhithe?

⁹ Njengobe sesifundzile, sibonile kutsi Jehova ucondzisa sikhatsi latawugcwalisa ngaso tetsembiso takhe. Sibonelo sesibili lesitawucoca ngaso sigcizelela lesinye sizatfu sekwetsemba kutsi Jehova angabakhulula bantfu bakhe. Utawusebentisa emandla akhe lamakhulu kute aciniseke kutsi intsandvo yakhe iyenteka. Kuliciniso kutsi Jehova unawo emandla ekukhulula tinceku takhe, kodvwa ngaletinye tikhatsi uyativumela kutsi tibe sesimeni lesiyingoti kute abambe titsa takhe. Loko kwenteka ngalesikhatsi akhulula ema-Israyeli ekugcilatweni bantfu baseGibhithe.

¹⁰ Ema-Israyeli laphuma eGibhithe abecishe abe tigidzi letintsatfu. Jehova wasebentisa Mosi kutsi awahole ngendlela lebeyitawenta Faro acabange kutsi adidekile. (Fundza Eksodusi 14:1-4.) Faro wehluleka kukubona loko, wahola libutfo lakhe lalandzela ema-Israyeli labekawagcilatile ladzimate lawakhandza eLwandle Lolubovu. Besekubonakala angeke akwati kuphunyula. (Eks. 14:5-10) Kodvwa ema-Israyeli bewangekho engotini. Kungani kunjalo? Kungobe Jehova abetawungenela kute awavikele.

11, 12. (a) Jehova wangenela njani kute asindzise bantfu bakhe? (b) Waba yini umphumela wekungenela kwakhe, futsi lokulandzisa kusifundzisani ngaJehova?

¹¹ “Lensika yelifu” leyayihola ema-Israyeli yaba semvakwawo, yavimba libutfo laFaro futsi laba sebumnyameni. Kodvwa ngalokumangalisako lelifu laba kukhanya esiveni sema-Israyeli. (Fundza Eksodusi 14:19, 20.) Jehova wase wehlukanisa lwandle asebentisa umoya lonemandla lovela emphumalanga, “wenta lwandle lwaba ngumhlabatsi lowomile.” Loku kwatsatsa sikhatsi lesidze, ngobe kulandzisa kutsi “sive sema-Israyeli sewela Lwandle Lolubovu sihamba emhlabatsini lowomile.” Nasiwacatsanisa nemabutfo aFaro ngalesikhatsi agibele tincola temphi, ema-Israyeli bewahamba kancane. Nobe kunjalo, kwakungeke kwenteke kutsi baseGibhithe bakwati kuwatfola ngobe Jehova abewalwela ema-Israyeli. “Emabutfo aseGibhithe wawasanganisa. Wenta kutsi emasondvo etincola temphi abhajwe adzimate ahamba matima.”—Eks. 14:21-25.

¹² Ngesikhatsi onkhe ema-Israyeli asawele lwandle aphephile, Jehova watsi kuMosi: “Yelula sandla sakho usengamise etikwelwandle, khona lamanti atewukwehlela atseleke etikwemaGibhithe, nasetikwetincola tawo temphi kanye nasetikwebagibeli bawo bemahhashi.” Ngesikhatsi lamasotja etama kubalekela emanti, “Simakadze wawatsintsitsela ekujuleni kwelwandle onkhe emaGibhithe.” Beyingekho indlela yekuphunyula. “Kute nome munye lowasindza.” (Eks. 14:26-28) Ngaleyondlela Jehova waveta kutsi unemandla ekusindzisa bantfu bakhe ngisho nobe bakusiphi simo.

KUSINDZA EKUBHUJISWENI KWEJERUSALEMA

13. Ngutiphi ticondziso Jesu latiniketa, futsi yini balandzeli bakhe labebacabanga ngayo?

¹³ Jehova wati kahle kutsi tehlakalo titawenteka njani kute kugcwaliseke injongo yakhe. Kuhlaselwa kweJerusalema ngelikhulu lekucala leminyaka, kusibonelo sesitsatfu lesitawucoca ngaso lesigcizelela kubaluleka kwaloku. Asebentisa iNdvodzana yakhe, Jehova waniketa emaKhristu labehlala eJerusalema naseJudiya ticondziso lebetitawenta asindze sisengakefiki sikhatsi sekubhujiswa kwalelidolobha nga-70 C.E. Jesu watsi: “Nanibona sinengisoncitsakalo sime endzaweni lengcwele, njengobe asho umphrofethi Danyela, . . . labo labaseJudiya ababalekele etintsabeni.” (Mat. 24:15, 16) Balandzeli baJesu bebatakubona njani kugcwaliseka kwalesiphrofetho?

14. Tehlakalo letatenteka tayicacisa njani inchazelo yeticondziso taJesu?

¹⁴ Njengobe tehlakalo tichubeka, inchazelo yemavi aJesu yacaca. Nga-66 C.E., libutfo lemaRoma lelaliholwa nguCestius Gallus lefika eJerusalema kute licedze kuvukela kwemaJuda. Tihlubuki temaJuda lebetatiwa ngekutsi ngemaZelothi, tafuna sivikelo ethempelini, loko kwabangela kutsi emabutfo emaRoma acale kudzilita lubondza lelithempeli. EmaKhristu labecaphile, akhumbula ticondziso taJesu. Ati kutsi libutfo lemacaba lebeliphetse imijeka leyayinetitfombe tabonkulunkulu bemanga (“sinengisoncitsakalo”) beselisondzela ngaselubondzeni lelithempeli (“endzaweni lengcwele”). Besekusikhatsi sekutsi balandzeli baJesu ‘babalekele etintsabeni.’ Kodvwa bebatawuphuma njani kulelidolobha lebelihlaselwa? Kunalokutsite lobekutawenteka.

15, 16. (a) Ngusiphi sicondziso lesicacile Jesu lasiniketa, futsi kungani kwakubalulekile ngebalandzeli bakhe kusilalela? (b) Kukhululwa kwetfu kutawusekelwa kuphi?

¹⁵ Ngaphandle kwesizatfu, Cestius Gallus kanye nemasotja akhe abazange balibhubhise liJerusalema futsi bacala kubuyela emuva. EmaZelothi abagijimisa. Njengobe lamabutfo besekahambile, balandzeli baJesu batfola litfuba lekubaleka. Jesu wabatjela kutsi bangatsatsi lutfo futsi baphume ngekushesha kulelo dolobha. (Fundza Matewu 24:17, 18.) Bekubalulekile yini kutsi bente njalo? Lombuto waphendvuleka ngekushesha. Ngemuva kwemalanga lambalwa, emaZelothi aphindze abuya acidzetela bantfu baseJerusalema kanye nebaseJudiya kutsi bahlanganyele kulemphi. Simo kulelidolobha saba sibi kakhulu ngesikhatsi licembu lemaJuda letama kubaleka, ngobe besekungasimelula kwenta njalo. Ngesikhatsi emaRoma abuyela eJerusalema nga-70 C.E., besebangeke bakhone kubaleka. (Luk. 19:43) Bonkhe bantfu labebakulelodolobha bavaleleka kutsi bahambe. EmaKhristu lalalela ticondziso taJesu abalekela etintsabeni, asindzisa kuphila kwawo. Atibonela kutsi Jehova uyakwati kukhulula bantfu bakhe. Ngusiphi sifundvo lesisitfola kulokulandzisa?

¹⁶ Njengobe tehlakalo titawuchubeka nasesikhatsini sekuhlupheka lokukhulu, emaKhristu kufanele alalele ticondziso letiseVini laNkulunkulu nasenhlanganweni yakhe. Nasi sibonelo: Umyalo waJesu ‘wekubalekela etintsabeni’ uyasebenta nalamuhla. Kodvwa tsine asiyati indlela lesitawubaleka ngayo.b Nanobe kunjalo, siyaciniseka kutsi Jehova utasicacisela inchazelo yaleticondziso nasesifikile sikhatsi sekutilandzela. Njengobe kukhululwa kwetfu kutawuya ngendlela lesilalela ngayo, senta kahle kutibuta: ‘Ngiyatilalela yini ticondziso Jehova latiniketa bantfu bakhe lamuhla? Ngitilalela ngekushesha yini nobe ngicale ngingabate?’—Jak. 3:17.

SICINISELWA LOKO LOKUSETA

17. Yini umphrofethi Habakhuki layiveta mayelana nekuhlaselwa kwebantfu baNkulunkulu?

¹⁷ Nyalo ase sihlole tonkhe tindlela taGogi tekuhlasela lokukhulunywe ngato ekucaleni. Kulesinye siphrofetho, Habakhuki watsi: “Ngeva, nenhlitiyo yami yabhakuta, netindzebe temlomo wami tavevetela ngalomsindvo, kubola kwakhasabela ematsanjeni ami, imilente yami yachachatela. Noko ngiyakulilindzela ngekubeketela lilanga lesehlakalo leliyawusifikela sive lesisihlasele.” (Hab. 3:16) Nakeva lombiko lomayelana nekuhlaselwa kwebantfu baNkulunkulu, lomphrofethi wagula, tindzebe temlomo wakhe tavevetela futsi waphelelwa ngemandla. Indlela Habakhuki lenta ngayo nakeva lombiko, iveta indlela natsi lesitativa ngayo nasihlaselwa nguGogi. Nobe kunjalo, lomphrofethi abetimisele kulindza kudzimate kufike lilanga laJehova, futsi etsemba kutsi Jehova utawubakhulula bantfu bakhe. Natsi singaba nekuciniseka lokufananako.—Hab. 3:18, 19.

18. (a) Kungani kungakafaneli sikwesabe kuhlasela kwetitsa tetfu? (b) Yini lesitawucoca ngayo esihlokweni lesilandzelako?

¹⁸ Letibonelo letintsatfu lesisandza kucoca ngato tiveta kutsi Jehova uyakwati kukhulula bantfu bakhe. Injongo yakhe itawuphumelela. Kute natsi sihlanganyele kulemphumelelo, kufanele sihlale setsembekile kudzimate kube sekupheleni. Jehova usisita njani kutsi sihlale sicotfo lamuhla? Loku sitawucoca ngako esihlokweni lesilandzelako.

[Imibhalo lengentansi]

[Sitfombe ekhasini 24]

Ema-Israyeli bewasengotini yekuhlaselwa libutfo laFaro yini?