Loko Lesingakufundza Emavini AJesu Ekugcina

1-2. Yini leyenteka ngaphambi kwekutsi Jesu asho emavi akhe ekugcina?

KUSEMINI ngaNisan 14, 33 C.E. Ngemuva kwekutsi Jesu abekwe licala lelingemanga futsi limulahle, kuhlekiswa ngaye, uphatfwa kabuhlungu, ngemuva kwaloko ubetselwa elugodvweni. Tipikili tibhobosa tandla takhe netinyawo. Nakadvonsa umoya nobe nakakhuluma, kubuhlungu kakhulu. Kodvwa kufanele akhulume ngobe kunetintfo letibalulekile lafuna kutisho.

² Ase sicoce ngemavi Jesu lawasho ngesikhatsi afa elugodvweni, netifundvo lesingatitfola kuwo. Ngalamanye emavi, ase ‘simlalele.’—Mat. 17:5.

 3. Kungenteka Jesu bekasho kubobani nakatsi: “Babe, batsetselele”?

³ Watsini Jesu? Ngesikhatsi Jesu aselugodvweni, wathantaza watsi: “Babe, batsetselele.” Atsetselele bobani? Emavi akhe lalandzela asisita sibone kutsi bekasho kubobani, watsi: “Abakwati labakwentako.” (Luk. 23:33, 34) Kungenteka Jesu bekasho emasotja emaRoma lambetsela elugodvweni. Bekangamati kutsi ungubani. Kungenteka futsi bekasho labanye kulesicumbi lebebafuna kutsi abulawe, kodvwa lebebatawukholwa kuye ngekuhamba kwesikhatsi. (Imis. 2:36-38) Jesu akazange avumele kuphatfwa kabi labhekana nako kumente atfukutsele futsi angabatsetseleli labo labamphatsa kabi. (1 Phet. 2:23) Kunaloko, wacela Jehova kutsi abatsetselele laba labambetsela.

 4. Singafundzani kuJesu nasicabanga ngesifiso bekanaso sekutsetselela lebebamphikisa?

⁴ Yini lesingayifundza emavini aJesu? NjengaJesu, natsi kufanele sikulungele kutsetselela labanye. (Khol. 3:13) Labanye bantfu, lokufaka ekhatsi tihlobo tetfu, bangasiphikisa ngenca yekutsi abaticondzi tinkholelo tetfu nobe indlela lesiphila ngayo. Bangakhuluma emanga ngatsi, basihlaze embikwebantfu, badzabule tincwadzi tetfu, nobe basisongele ngekusilimata. Kunekutsi sihlale sitfukutsele, singacela Jehova asite labo labasiphikisako kutsi bemukele liciniso. (Mat. 5:44, 45) Ngaletinye tikhatsi singakutfola kumatima kutsetselela labanye, ikakhulukati nangabe basiphetse kabi kakhulu. Kodvwa nangabe sitawuhlale sitfukutsele futsi singabacoleli, sitilimata tsine. Lomunye dzadze watsi: “Ngabona kutsi kucolela labanye akusho kutsi kukahle loku labakwentile, nobe kutsi ngibavumela kutsi bachubeke bangiphatsa kabi. Kodvwa kusho kutsi ngikhetsa kungasabatfukutseleli.” (Hla. 37:8) Nangabe sitsetselela, sisuke sikhetsa kungativumeli tintfo letimbi letenteke kitsi kutsi tisente sihlale sitfukutsele.—Ef. 4:31, 32.

 5. Yini Jesu layetsembisa lesinye sigebengu lebekabetselwe naso, futsi kungani enta lesetsembiso?

⁵ Watsini Jesu? Jesu bekabetselwe netigebengu letimbili. Ekucaleni, totimbili betimhleka. (Mat. 27:44) Kodvwa ngekuhamba kwesikhatsi, lesinye sato sayekela kumhleka. Sabona kutsi “kute lokubi” lebekakwentile. (Luk. 23:40, 41) Saphindze sakhombisa kutsi siyakholwa kutsi Jesu utawuvuswa futsi abe yinkhosi ngalelinye lilanga. Satsi kuMsindzisi: “Jesu, ungikhumbule nawufika eMbusweni wakho.” (Luk. 23:42) Lendvodza yakhombisa kutsi inekukholwa lokucinile! Jesu wayiphendvula watsi: “Lamuhla ngiyakutjela ngitsi: Uyawuba nami [hhayi eMbusweni, kepha] ePharadisi.” (Luk. 23:43) Naka kutsi ngesikhatsi Jesu etsembisa lendvodza, wasebentisa ligama lelitsi “mine” nalelitsi “wena.” Ngenca yekutsi bekati kutsi Babe wakhe unemusa, Jesu watjela lesigebengu emavi lasinika litsemba.—Hla. 103:8.

 6. Yini lesiyifundza kulokwashiwo nguJesu kulesigebengu?

⁶ Yini lesingayifundza emavini aJesu? Jesu ufana naBabe wakhe. (Heb. 1:3) Jehova ufuna kusitsetselela futsi asikhombise umusa, kodvwa utasitsetselela nangabe sitisola mbamba ngetintfo letimbi lesatenta esikhatsini lesendlulile futsi sikholwa emhlatjelweni waJesu Khristu. (1 Joh. 1:7) Labanye bangakutfola kumatima kukholwa kutsi Jehova angabacolela emaphutsa labawenta esikhatsini lesendlulile. Nangabe uhle utiva kanjalo, cabanga nganaku: Ngaphambi nje kwekutsi Jesu afe, wasikhombisa umusa lesigebengu lebesisandza kukholwa. Ngako-ke, Jehova utatikhombisa umusa kakhulu tinceku takhe letetsembekile letenta konkhe lokusemandleni ato kuze tilalele imitsetfo yakhe!—Hla. 51:1; 1 Joh. 2:1, 2.

 7. Yini Jesu layisho kuMariya nakuJohane, njengobe kubhalwe kuJohane 19:26, 27, futsi kungani akusho?

⁷ Watsini Jesu? (Fundza Johane 19:26, 27.) Jesu bekakhatsateke ngamake wakhe, lokungenteka bese kangumfelokati. Kungenteka bomnakaboJesu bebangamsita ngetintfo latidzingako kuze aphile. Kodvwa ngubani lebekatamsita kutsi ahlale etsembekile kuJehova? Kute lokukhombisa kutsi banakaboJesu bese babafundzi bakhe. Nobe kunjalo, Johane bekangumphostoli waJesu lowetsembekile futsi angumngani wakhe lomkhulu. Jesu bekatsatsa labo bekakhonta nabo Jehova njengemndeni wakhe. (Mat. 12:46-50) Ngako, ngenca yekutsi bekamtsandza Mariya futsi amkhatsalela, wacela Johane kutsi amnakekele ngobe bekati kutsi utamsita achubeke akhonta Jehova. Kumake wakhe watsi: “Buka, nayi indvodzana yakho!” KuJohane watsi: “Buka, nangu make wakho!” Kusukela ngalelo langa, Johane waba njengendvodzana kuMariya, futsi wamnakekela kwaba shengatsi ngumake wakhe. Jesu wamkhombisa lutsandvo lolukhulu lomfati loligugu lowamnakekela kusukela atalwa futsi lebekeme eceleni kwakhe njengobe afa!

 8. Yini lesingayifundza kuloko Jesu lakusho kuMariya nakuJohane?

⁸ Yini lesingayifundza emavini aJesu? Buhlobo lesinabo nebazalwane nabodzadze bungacina kwendlula buhlobo lesinabo nemalunga emindeni yetfu. Tihlobo tetfu tingasiphikisa nobe tisilahle, kodvwa njengobe Jesu asetsembisa, nasihlale sisondzelene naJehova nenhlangano yakhe, sitawutfola tihlobo “ngalokuphindvwe tikhatsi letingu-100” kunaletisilahlekele. Banyenti labatasitsandza, babe ngemadvodzana, emadvodzakati, bomake nobe bobabe kitsi. (Mak. 10:29, 30) Utiva njani ngekuba nebazalwane nabodzadze ebandleni labanebunye ngenca yekutsi banekukholwa nelutsandvo, futsi labatsandza Jehova?—Khol. 3:14; 1 Phet. 2:17.

 9. Yini lesingayifundza emavini aJesu labhalwe kuMatewu 27:46?

⁹ Watsini Jesu? Ngaphambi nje kwekutsi Jesu afe, wamemeta watsi: “Nkulunkulu wami, Nkulunkulu wami, ungishiyeleni?” (Mat. 27:46) LiBhayibheli alichazi kutsi kungani Jesu asho lamavi. Kodvwa naka kutsi yini lesingayifundza kulamavi. Lokunye lesikufundzako kutsi nakasho lamavi, bekagcwalisa siphrofetho lesikuTihlabelelo 22:1.b Ngetulu kwaloko, lamavi akwenta kucace kutsi Jehova ‘bekangakayivikeli’ iNdvodzana yakhe. (Jobe 1:10) Jesu bekati kutsi Babe wakhe uvumele titsa takhe kutsi tikuvivinye kakhulu kukholwa kwakhe aze afe. Kute umuntfu loke wavivinywa kwengca Jesu. Ngetulu kwaloko, lamavi akhombisa kutsi Jesu bekamsulwa futsi kute sizatfu lebesenta afenelwe kubulawa.

10. Ngutiphi tifundvo lesititfola kuloko Jesu lakusho kuBabe wakhe?

¹⁰ Yini lesingayifundza emavini aJesu? Singafundza kutsi akukafaneli silindzele Jehova kutsi asivikele etintfweni letivivinya kukholwa kwetfu. Njengobe kukholwa kwaJesu kwavivinywa kakhulu waze wafa, natsi kufanele sikulungele kukhombisa kutsi setsembekile kuze kube sekufeni nangabe kunesidzingo. (Mat. 16:24, 25) Nanobe kunjalo, siyaciniseka kutsi Nkulunkulu angeke avume silingwe ngetulu kwaloko lesingakhona kukwetfwala. (1 Khor. 10:13) Lesinye sifundvo lesisitfolako kutsi njengaJesu, natsi singaphatfwa kabi ngaphandle kwesizatfu. (1 Phet. 2:19, 20) Bantfu bayasiphikisa, hhayi ngobe kunalokubi lesikwentako, kodvwa ngenca yekutsi asisiyo incenye yalelive futsi sifakazela liciniso. (Joh. 17:14; 1 Phet. 4:15, 16) Jesu bekati kutsi kungani Jehova avumela kutsi ahlupheke. Kodvwa ngalesinye sikhatsi, tinceku taNkulunkulu letetsembekile tiyatibuta kutsi kungani Jehova avumele letinye tintfo kutsi tenteke. (Hab. 1:3) Nkulunkulu wetfu lonemusa futsi lobeketelako uyati kutsi loko akusho kutsi letinceku takhe tite kukholwa; kodvwa tidzinga yena kutsi atidvudvute.—2 Khor. 1:3, 4.

11. Kungani Jesu asho emavi lakuJohane 19:28?

¹¹ Watsini Jesu? (Fundza Johane 19:28.) Kungani Jesu atsi: “Ngomile”? Loko wakusho “kuze kugcwaliseke umbhalo,” lokusiphrofetho lesikuTihlabelelo 22:15 lesitsi: “Sengiphelelwe ngemandla, ngifanana nelucetu lwesitja selubumba; lulwimi lwami lunamatsele elwangeni lwami.” Ngetulu kwaloko, kungenteka Jesu besekome kakhulu ngemuva kwato tonkhe letintfo letimbi labhekana nato, lokufaka ekhatsi buhlungu lobukhulu labuva nakabetselwa elugodvweni. Bekadzinga lokutsite langakunatsa kuze acedze koma.

12. Yini lesingayifundza emavini aJesu latsi “ngomile”?

¹² Yini lesingayifundza emavini aJesu? Jesu akazange acabange kutsi kukabi kuveta indlela lativa ngayo; futsi natsi akukafaneli sesabe kwenta njalo. Kungenteka ekuphileni kwetfu konkhe, timbalwa tikhatsi lesitjele ngato labanye tintfo lesitidzingako. Kodvwa nakwenta sidzinga lusito, kufanele singesabi kucela labanye kutsi basisite. Sibonelo nje, nangabe sikhulile nobe sigula, singacela umngani kutsi asimikise esitolo nobe kudokotela. Nangabe sidvumatekile, singatjela lomdzala welibandla nobe umKhristu lovutsiwe indlela lesitiva ngayo, nobe simcele asitjele “emavi lamnandzi” latasikhutsata. (Taga 12:25) Kufanele sikhumbule kutsi bazalwane betfu nabodzadze bayasitsandza, futsi bafuna kusisita “ngesikhatsi sekuhlupheka.” (Taga 17:17) Kepha abayati indlela lesitiva ngayo nobe loko lesikucabangako. Kungenteka abati kutsi sidzinga lusito, ngako kufanele sibatjele.

13. Yini Jesu layifeza ngekuhlala acotfo kuze kube sekufeni?

¹³ Watsini Jesu? Ngabo 3 ntsambama, ngaNisan 14, Jesu wamemeta watsi: “Sekufezekile!” (Joh. 19:30) Ngaphambi nje kwekufa kwakhe, Jesu bekakwente konkhe loko Jehova bekalindzele kutsi akwente. Ngenca yekutsi wahlala etsembekile kwaze kwaba sekufeni, Jesu wafeza tintfo letinyenti. Kwekucala, waveta kutsi Sathane ungumcambimanga. Jesu wakhombisa kutsi umuntfu lote sono angahlala etsembekile ngisho nobe Sathane angamentani. Kwesibili, Jesu wanikela ngekuphila kwakhe kwaba yinhlawulo. Ngenca yekutsi wanikela ngekuphila kwakhe, bantfu labanesono bangaba nebuhlobo lobuhle naNkulunkulu, futsi babe nelitsemba lekuphila phakadze. Kwesitsatfu, Jesu waveta kutsi Jehova ungumbusi lolungile futsi walihlanta libito laBabe wakhe njengobe belihlantjalatiwe.

14. Chaza kutsi yini lofukanele sitimisele kuyenta onkhe malanga.

¹⁴ Yini lesingayifundza emavini aJesu? Kufanele sitimisele kuhlala setsembekile onkhe malanga. Naka naku lokwashiwo nguMzalwane Maxwell Friend, lobekafundzisa eSikolweni SeliBhayibheli SaseGileyadi. UMzalwane Friend wabeka inkhulumo kulomunye umhlangano wetive lebeyikhuluma ngekwetsembeka, watsi: “Ungacali utsi utokwenta kusasa lebewungakwenta nobe ukusho lamuhla. Uyaciniseka yini kutsi utawube uphila kusasa? Lilanga ngalinye litsatse njengelitfuba lakho lekugcina lekutiveta ukufanele kuphila phakadze.” Shengatsi lilanga ngalinye singalitsatsa njengelitfuba lekugcina lekuhlale sicotfo! Ngisho singafa, sitawukhona kutsi: “Jehova, ngente konkhe lokusemandleni ami kuze ngigcine bucotfo bami, ngivetile kutsi Sathane unemanga, futsi ngilingcwelisile libito lakho nebukhosi bakho!”

15. Ngekusho kwaLukha 23:46, yini Jesu lebekaciniseka ngayo?

¹⁵ Watsini Jesu? (Fundza Lukha 23:46.) Ngekuciniseka lokukhulu, Jesu watsi: “Babe, ngibeka umoya wami etandleni takho.” Jesu bekati kutsi likusasa lakhe lisetandleni taJehova, futsi bekaciniseka kutsi Babe wakhe utamkhumbula.

16. Yini loyifundza kulokwenteka kulomunye Fakazi loneminyaka lengu-15?

¹⁶ Yini lesingayifundza emavini aJesu? Hlala wetsembekile kuJehova ngisho nobe kuphila kwakho kusengotini. Kuze ukhone kukwenta loko, kudzingeka wetsembe “Jehova ngayo yonkhe inhlitiyo yakho.” (Taga 3:5) Cabanga ngesibonelo saJoshua, lobekaneminyaka lengu-15, futsi anesifo lesingelapheki. Wala kwelashwa ngendlela lebeyishayisana nemtsetfo waNkulunkulu. Ngaphambi kwekutsi afe, watjela make watsi: “Make, Jehova utanginakekela. . . . Loku ngikusho ngekuciniseka lokukhulu: Ngiyati kutsi nakanjani Jehova utangivusa ekufeni. Uyakwati lengikucabangako nendlela lengitiva ngayo, futsi ngimtsandza kakhulu.”c Sonkhe kufanele sitibute, ‘Nangabe kukholwa kwami kuvivinywa ngulokutsite lokungangenta kutsi ngife, ngingahlala yini ngetsembekile kuJehova futsi ngetsembe kutsi utangikhumbula?’

17-18. Ngutiphi tifundvo lesititfolile? (Buka libhokisi lelitsi, “Yini Lesiyifundza Emavini AJesu Ekugcina?”)

¹⁷ Sitfola tifundvo letibaluleke kakhulu emavini aJesu ekugcina! Emavi akhe asikhumbuta kutsi kufanele sitsetselele labanye futsi setsembe kutsi natsi Jehova utasitsetselela. Sinelilungelo lekuba nebazalwane nabodzadze labanyenti ebandleni labakulungele kusisita, kodvwa nangabe sidzinga lusito kufanele silucele. Siyati kutsi Jehova utasisita sicinisele ngisho singabhekana naluphi luvivinyo. Sibonile nekutsi kubalulekile kutsi lilanga ngalinye silitsatse njengelitfuba letfu lekugcina lekukhombisa kuba cotfo, siciniseka kutsi Jehova utasivusa nangabe sesifile.

¹⁸ Emavi lashiwo nguJesu nakafa elugodvweni asifundzisa tintfo letinyenti! Nasitisebentisa letifundvo lesititfolile, sitawube silalela emavi aJehova lamayelana neNdvodzana yakhe latsi: “Yilaleleni.”—Mat. 17:5.