Ungasita Yini Kulomsebenti Wekwenta Bafundzi?

 1. Yini Jehova lakwentele yona?

YINI leyakusita kuze ube nguFakazi waJehova? Kungenteka wacale weva ‘tindzaba letimnandzi’ kubatali bakho, kulosebenta naye, kulofundza naye esikolweni nobe kulomunye Fakazi lowefika atokushumayela ekhaya. (Mak. 13:10) Ngemuva kwaloko, lotsite wacitsa sikhatsi lesinyenti nawe kanye nemandla akhe adadisha nawe liBhayibheli. Nanisafundza, wabese uyamtsandza Jehova futsi wabona kutsi naye uyakutsandza. Jehova wakudvonsela ecinisweni futsi njengobe nyalo sewungumfundzi waJesu Khristu, sewunelitsemba lekuphila phakadze. (Joh. 6:44) Ubonga kakhulu ngekutsi Jehova wasebentisa lotsite kuze akufundzise liciniso nekutsi yena ukwemukele njengalomunye wetikhonti takhe.

 2. Sitawucoca ngani kulesihloko?

² Njengobe nyalo sesilati liciniso, sinelilungelo lekusita labanye kutsi bahambe kanye natsi kulendlela leya ekuphileni. Mhlawumbe sikutfola kumelula kushumayela emtini ngemuti, kodvwa kungenteka sikutfola kumatima kucela lotsite kutsi afundze natsi liBhayibheli, nobe kudadisha liBhayibheli nemuntfu. Utiva kanjalo yini nawe? Nangabe kunjalo, kungenteka kutakusita loku lesitawucoca ngako kulesihloko. Sitawucoca ngaloko lokusikhutsata kutsi sente bafundzi. Ngemuva kwaloko, sitawubese sicoca ngekutsi singatincoba njani tinkinga letingasivimbela kutsi sidadishe liBhayibheli nebantfu. Kwekucala, asesicoce ngekutsi kungani kufanele singagcini nje ngekushumayela bantfu, kodvwa siphindze sibafundzise tindzaba letimnandzi.

 3. Kungani sishumayela?

³ Ngesikhatsi Jesu alapha emhlabeni, wanika balandzeli bakhe umsebenti lonetincenye letimbili. Kwekucala, wabatjela kutsi bashumayele tindzaba letimnandzi teMbuso, wabakhombisa nekutsi bashumayele kanjani. (Mat. 10:7; Luk. 8:1) Sibonelo saloko kutsi watjela bafundzi bakhe loko lokufanele bakwente nangabe bantfu bawulalela umlayeto weMbuso, naloko lokufanele bakwente nangabe bangawulaleli. (Luk. 9:2-5) Waphindze watsi bafundzi bakhe batawushumayela bantfu labanyenti, bashumayele nasetindzaweni letinyenti ngesikhatsi atsi ‘batawufakaza kuto tonkhe tive.’ (Mat. 24:14, umbhalo longentasi; Imis. 1:8) Ngisho nobe bantfu bawulalela lomlayeto nobe bangawulaleli, Jesu watjela bafundzi bakhe kutsi batjele bantfu ngeMbuso waNkulunkulu nangaloko lotakufeza.

 4. Ngekusho kwaMatewu 28:18-20, yini lenye lokufanele siyente ngaphandle nje kwekushumayela ngeMbuso?

⁴ Nguyiphi intfo yesibili Jesu latjela bafundzi bakhe kutsi bayente? Wabatjela kutsi bafundzise bantfu kugcina tonkhe tintfo lebekabatjele tona. Kodvwa lomsebenti wekushumayela newekufundzisa bekufanele wentiwe ngemaKhristu ekucala kuphela yini, njengobe labanye basho? Cha, Jesu watsi lomsebenti lobaluleke kakhulu bewutawuchubeka wentiwa kuze kube ngulamuhla, “kuze kube sekupheleni kwalelive.” (Fundza Matewu 28:18-20.) Kungenteka Jesu wakhipha lomyalo ngesikhatsi abonakala kubafundzi bakhe labangetulu kwa-500. (1 Khor. 15:6) Embonweni lawunika Johane, Jesu washo ngalokucacile kutsi bonkhe bafundzi bakhe kufanele basite labanye bafundze ngaJehova.—Semb. 22:17.

 5. Ngekusho kwa-1 KubaseKhorinte 3:6-9, Pawula wakufananisa nani kushumayela nekufundzisa?

⁵ Umphostoli Pawula wafananisa umsebenti wekwenta bafundzi nekulima, wakhombisa kutsi kufanele singagcini nje ngekuhlanyela. Wakhumbuta baseKhorinte watsi: “Mine ngahlanyela, Apholosi wanisela . . . Nine niyinsimu yaNkulunkulu lelinywako.” (Fundza 1 KubaseKhorinte 3:6-9.) Njengobe sitisebenti ‘ensimini yaNkulunkulu,’ asifuni kugcina ngekuhlanyela, kunaloko sifuna kukunisela loko lesikuhlanyele futsi sikuhlole njalo kutsi kuyakhula yini. (Joh. 4:35) Kodvwa siyati kutsi nguNkulunkulu lowenta lenhlanyelo ikhule, lokusho kutsi nguye lodvonsela bantfu kuye.

 6. Njengobe sifundzisa bantfu, yini lokufanele sibasite kutsi bayente?

⁶ Sifuna labo ‘labatimisele kutfola kuphila lokuphakadze.’ (Imis. 13:48) Kuze sibasite babe bafundzi, kufanele sibasite kutsi (1) bakucondze, (2) bakwemukele, futsi (3) bakusebentise loko labakufundza eBhayibhelini. (Joh. 17:3; Khol. 2:6, 7; 1 Thes. 2:13) Bonkhe ebandleni bangabasita labafundzelwa liBhayibheli ngekutsi babakhombise lutsandvo futsi babemukele nabete emihlanganweni. (Joh. 13:35) Ummemeteli lodadisha liBhayibheli nemfundzi kungahle kudzingeke acitse sikhatsi lesinyenti kanye nemandla akhe amsita kutsi ayekele tinkholelo kanye nemikhuba ‘lembelwe yacina’ kuye. (2 Khor. 10:4, 5) Kungahle kutsatse tinyanga letinyenti kusita umfundzi kutsi ente lolushintjo ekuphileni kwakhe kuze agcine abhajatisiwe. Kodvwa kwenta lolushintjo kuzuzisa kakhulu.

 7. Yini lesenta sishumayele futsi sifundzise labanye tindzaba letimnandzi?

⁷ Yini lesenta kutsi sente umsebenti wekushumayela newekwenta bafundzi? Kwekucala, kutsi siyamtsandza Jehova. Nangabe wenta konkhe lokusemandleni akho kuze ulalele lomyalo wekushumayela newekwenta bafundzi, ukhombisa kutsi uyamtsandza Nkulunkulu. (1 Joh. 5:3) Cabanga nganaku: Ushumayela bantfu ngobe uyamtsandza Jehova. Bekumelula yini kutsi ulalele lomyalo? Kungenteka bekulukhuni. Ngesikhatsi uyoshumayela kwekucala, bewesaba yini? Yebo! Kodvwa bewati kutsi lona ngumsebenti Jesu lafuna kutsi uwente futsi wawulalela lomyalo. Kungenteka kutsi njengobe sikhatsi sihamba, sewukutfola kumelula kushumayela. Kodvwa utiva njani ngekudadisha liBhayibheli nemuntfu? Nawucabanga ngako, ufikelwa kwesaba yini? Kungenteka. Kodvwa nangabe ucela Jehova kutsi akusite uncobe kwesaba futsi ube nesibindzi sekucela lotsite kutsi udadishe naye liBhayibheli, Jehova angakusita uchubeke unesifiso sekwenta bafundzi.

 8. Ngekusho kwaMakho 6:34, yini lenye lesenta sifune kufundzisa labanye?

⁸ Kwesibili, kutsandza bomakhelwane betfu kwenta kutsi sibafundzise liciniso. Nasi sibonelo, Jesu nebafundzi bakhe bebadzinwe kakhulu ngemuva kwekushumayela. Bebadzinga indzawo lapho bebangaphumula khona, kodvwa sicumbi lesikhulu sebantfu sabalandzela. Jesu wabahawukela labantfu, futsi wacala kubafundzisa “tintfo letinyenti.” (Fundza Makho 6:34.) Nanobe bekadziniwe, kepha wasebenta kamatima. Kungani? Jesu bekati kutsi labantfu bativa njani. Bekafuna kubasita ngobe bekabona kutsi bayahlupheka futsi badzinga litsemba. Nalamuhla bantfu basesimeni lesifanako. Ungacali ukhohliswe yindlela lababukeka ngayo. Bafana netimvu letilahlekile futsi letite umelusi. Umphostoli Pawula watsi bantfu labanjalo abamati Nkulunkulu futsi bete litsemba. (Ef. 2:12) ‘Basendleleni leya ekubhujisweni’! (Mat. 7:13) Nasicabanga ngekutsi bantfu labasensimini yetfu bakudzinga kangakanani kwati Nkulunkulu, lutsandvo neluvelo lwenta kutsi sibasite. Indlela lencono kakhulu yekubasita kutsi sicele kufundza nabo liBhayibheli.

 9. Ngekusho kwembhalo waKubaseFiliphi 2:13, Jehova angakusita njani?

⁹ Mhlawumbe uyesaba kucela kufundzela lotsite liBhayibheli ngobe uyati kutsi loko kutawudzinga sikhatsi lesinyenti sekulungiselela nesekufundza naye. Nangabe kunjalo, tjela Jehova indlela lotiva ngayo. Mcele akusite ube nesifiso sekutfola umuntfu lotawufundza naye liBhayibheli. (Fundza KubaseFiliphi 2:13.) Umphostoli Johane wasicinisekisa kutsi Nkulunkulu utayiphendvula imithantazo levumelana nentsandvo yakhe. (1 Joh. 5:14, 15) Ngako ungaciniseka kutsi Jehova utakusita ube nesifiso sekufundzisa bantfu.

10-11. Yini lengasenta singabate kudadisha liBhayibheli nemuntfu?

¹⁰ Siyati kutsi kubaluleke kakhulu kufundzisa, kodvwa ngaletinye tikhatsi kungaba matima kwenta lesifise kukwenta kulomsebenti wekwenta bafundzi. Asesicoce ngekutsi ngutiphi letinye taletinkinga nekutsi singatincoba njani.

¹¹ Kungenteka singakhoni kwenta loko lesifuna kukwenta. Nasi sibonelo, labanye bamemeteli sebakhulile ngeminyaka nobe bayagula. Usesimeni lesifanako yini nawe? Nangabe kunjalo, cabanga ngaletinye tintfo lesitibonile ngesikhatsi se-COVID-19. Sibonile kutsi singakhona kudadisha liBhayibheli nebantfu sisebentisa tintfo tebuchwephesha! Ngako ungakhona kucalisa sifundvo seliBhayibheli nemuntfu futsi uchubeke ufundza naye ngisho usekhaya. Naku lokunye lokuhle: Labanye bangatsandza kutsi kube nalotsite lodadisha nabo liBhayibheli, kepha abatfolakali ngetikhatsi lesivame kushumayela ngato. Kodvwa kungenteka batfolakala ekuseni kakhulu nobe ebusuku. Ungakhona yini kudadisha liBhayibheli nemuntfu ngaletikhatsi leti? Jesu wafundzisa Nikhodemu ebusuku, lebekusikhatsi Nikhodemu besimlungela.—John 3:1, 2.

12. Yini lesicinisekisako kutsi singaba bafundzisi labakahle?

¹² Singahle sicabange kutsi angeke sikhone kudadisha liBhayibheli nemuntfu. Kungenteka sicabanga kutsi kudzingeka sibe nelwati lolunyenti nobe likhono lekufundzisa ngaphambi kwekutsi sidadishe liBhayibheli nemuntfu. Nangabe utiva ngalendlela, cabanga nganati tintfo letintsatfu letingakusita uciniseke kutsi ungakhona. Kwekucala, Jehova uyabona kutsi uyakufanela kufundzisa labanye. (2 Khor. 3:5) Kwesibili, Jesu lonalo “lonkhe ligunya ezulwini nasemhlabeni,” ukunike umyalo wekutsi ufundzise. (Mat. 28:18) Kwesitsatfu, ungetsembela kulabanye kutsi bakusite. Jesu wetsembela kuloko Babe wakhe lamfundzisa kutsi akukhulume, futsi nawe ungenta njalo. (Joh. 8:28; 12:49) Ngetulu kwaloko, ungacela umbonisi welicembu lokulo nobe lihlahlandlela lelinelikhono lekufundzisa, nobe ummemeteli kutsi akusite ucalise sifundvo seliBhayibheli futsi uchubeke ufundza naloyo muntfu. Lenye indlela longafundza ngayo kuba ngumfundzisi lokahle kutsi ube khona nangabe labamemeteli badadisha liBhayibheli nemuntfu.

13. Kungani kufanele sikulungele kusebentisa tindlela letinsha tekufundzisa?

¹³ Singakutfola kumatima kusebentisa tindlela letinsha nemathulusi lamasha ekushumayela. Indlela lesidadisha ngayo liBhayibheli nebantfu seyishintjile. Incwadzi letsi Jabulela Kuphila Kuze Kube Phakadze!, lesesiyisebentisa nasidadisha liBhayibheli nebantfu idzinga kutsi silungiselele nasiyofundza nabo futsi sifundze nabo ngendlela leyehlukile kunaleyo besiyisebentisa ngaphambili. Timbalwa tigaba lesitifundzako futsi sesicoca kakhulu nemfundzi. Nasifundzisa, sisebentisa ema-video lamanyenti nemathulusi latfolakala etintfweni tebuchwephesha, njenge-JW Library^®. Nangabe ungakhoni kusebentisa lamathulusi, coca nalomunye longakusita ukhone kuwasebentisa. Bantfu bayatsandza kwenta tintfo labajwayele kutenta. Akusimelula kwetayela indlela lensha yekwenta tintfo. Kodvwa usitwa nguJehova nalabanye utakutfola kumelula kwetayela lendlela lensha futsi ukujabulele kakhulu kufundza nebantfu. Lelinye lihlahlandlela latsi lendlela yekufundzisa “iyamjabulisa umfundzi kanye nemmemeteli.”

14. Yini lokufanele siyikhumbule nasishumayela ensimini lenebantfu labanyenti labangalaleli, futsi umbhalo wa-1 KubaseKhorinte 3:6, 7 usikhutsata njani?

¹⁴ Kungenteka kumatima kucalisa tifundvo teliBhayibheli endzaweni lesishumayela kuyo. Labanye bantfu abawutsandzi umlayeto lesiwushumayelako futsi labanye bayawuphikisa. Yini lengasisita kutsi sihlale sinembono lokahle ngebantfu labanjalo? Khumbula kutsi kuphila kwebantfu kungashintja ngekushesha kulelive lelinetinkinga, nekutsi labo lebebangenandzaba bangabese bayabona kutsi siyakudzinga kucondziswa nguNkulunkulu. (Mat. 5:3) Labanye lebebangatifuni tincwadzi tetfu babese bayasemukela sifundvo seliBhayibheli ngekuhamba kwesikhatsi. Siyati nekutsi Jehova yiNkhosi yekuvuna. (Mat. 9:38) Ufuna kutsi sichubeke sihlanyela futsi sinisela, kodvwa Nguye lokhulisako. (1 Khor. 3:6, 7) Kusikhutsata kakhulu kukhumbula kutsi ngisho nobe kwanyalo singakhoni kudadisha liBhayibheli nalotsite, Jehova usinika umvuzo ngemetamo yetfu hhayi ngemiphumela lesiyitfolako!b

15. Jehova utiva njani nangabe umuntfu emukela sifundvo seliBhayibheli futsi akusebentisa loko lakufundzako?

¹⁵ Jehova uyajabula nangabe umuntfu emukela liciniso leliseBhayibhelini, futsi alicocela nalabanye. (Taga 23:15, 16) Jehova ujabula kakhulu nakabona loko lokwentekako lamuhla! Nasi sibonelo, nanobe bekunemkhuhlane lohlasele umhlaba wonkhe ngemnyaka wemsebenti wa-2020, kepha kudadishwe liBhayibheli nebantfu labangu-7 705 765 futsi labangu-241 994 batinikela kuJehova base bayabhajatiswa. Labafundzi labasha nabo batawudadisha liBhayibheli nalabanye futsi babente babe bafundzi. (Luk. 6:40) Siyaciniseka kutsi Jehova uyajabula nangabe sifundzisa labanye kuze babe bafundzi.

16. Ngumuphi umgomo lomuhle lesingatibekela wona?

¹⁶ Umsebenti wekwenta bafundzi umatima, kodvwa sisitwa nguJehova singakhona kuwenta, sifundzise labanye kutsandza Babe wetfu losezulwini. Singatibekela yini umgomo lokungenani wekudadisha liBhayibheli nemuntfu munye nje? Kungakumangalisa kubona lokungenteka nangabe sicela kudadisha liBhayibheli nabo bonkhe bantfu lesihlangana nabo. Singaciniseka kutsi Jehova utayibusisa imetamo yetfu.

17. Sitawutiva njani nangabe sidadisha liBhayibheli nemuntfu?

¹⁷ Sinelilungelo lelikhulu lekushumayela labanye nelekubafundzisa liciniso! Lomsebenti usenta sijabule mbamba. Umphostoli Pawula, lowasita labanyenti eThesalonika kutsi babe bafundzi, wachaza indlela lativa ngayo, futsi watsi: “Ngesikhatsi sekuba khona kweNkhosi Jesu, ngubani lotawuba litsemba letfu, lotawuba yinjabulo yetfu nobe umchele wetfu wekujabula? Akusini yini? Ecinisweni, nine niyinkhatimulo yetfu nenjabulo yetfu.” (1 Thes. 2:19, 20; Imis. 17:1-4) Labanyenti lamuhla bativa ngaleyondlela. Lomunye dzadze lokutsiwa nguStéphanie, akanye nemyeni wakhe basite bantfu labanyenti kutsi babhajatiswe. Lodzadze utsi: “Kute injabulo lenkhulu leyengca yekusita bantfu kutsi batinikele kuJehova.”