Cale Wakhe Kuthula Nemnakenu​—Kanjani?

Asewuticabange uhlala eGalile ngesikhatsi saJesu. Uhambile waya eJerusalema kuyogubha uMkhosi weMadlangala. Lelidolobha liyaphitsitela, ligcwele lamanye emaKhristu lamanyenti labachamuka etindzaweni letikhashane. Ufuna kuyowenta umnikelo kuJehova. Kuloluhambo loludze uhamba nembuti futsi wendlula tindlu letinyenti letakhelene uya ethemphelini. Nawufika ethemphelini, utfola kutsi nalo ligcwele bantfu labanyenti labatokwenta umnikelo. Ekugcineni bese siyefika sikhatsi sekutsi nawe unikele ngalembuti yakho. Kusenjalo ubese uyakhumbula kutsi umnakenu lokungenteka ukulesicumbi noma ukulelidolobha, kukhona lomphetse kabi ngako. Jesu wachaza kutsi yini lokufanele uyente. (Fundza Matewu 5:24.) Ungakwakha njani kuthula nemnakenu njengobe Jesu asho? Kuloluhlu lolulandzelako, maka imphendvulo lengiyo.

KUFANELE . . .

• ukhulume nemnakenu kuphela nangabe wati kutsi unesizatfu lesicinile sekukhubeka

• wetame kulungisa kucabanga kwemnakenu nawubona kutsi usheshe ahlutfuke nobe naye unalo liphutsa kulenkinga

• ulalelisise njengobe umnakenu atfulula sifuba sakhe ngisho nobe ungamuva kahle, colisa ngebuhlungu lomvise bona noma ngekumphatsa kabi ungakacondzi

UMNAKENU KUFANELE . . . 

• atfole labanye labatamsekela ebandleni ngekubatjela kutsi umenteni

• akutsetsise, akubalele tonkhe tintfo lotentile futsi akwente ulivume liphutsa

• akunake kutfobeka kwakho kanye nesibindzi lobe naso sekuya kuye futsi akucolele ngalokusuka enhlitiyweni

Ngisho nobe kukhonta kwetfu lamuhla kungafaki ekhatsi kunikela ngetilwane, yini Jesu layifundzisa ngekwakha kuthula nemnakenu kanye nekwemukelwa nguNkulunkulu?