Jesu Wabeka Sibonelo Sekutitfoba

1, 2. Ngebusuku bekugcina bekuphila kwakhe emhlabeni, ngusiphi sifundvo lesibalulekile Jesu lasifundzisa baphostoli bakhe?

LOBU busuku bekugcina bekuphila kwaJesu emhlabeni. Lesikhatsi usicitsa anebaphostoli bakhe ekamelweni lelisetulu endlini leseJerusalema. Njengobe badla, Jesu uyasukuma akhumule ingubo yakhe yangephandle, futsi abophe lithawula ekhalo. Utsela emanti kubheseni, bese ucala kugeza tinyawo tebafundzi futsi atesule ngelithawula. Ngemuva kwaloko, wembatsa ingubo yakhe yangephandle. Yini leyabangela Jesu wenta lesento sekutitfoba?—Joh. 13:3-5.

² Jesu wachaza: “Niyakwati yini loku lengikwentile? Nangabe-ke mine lengiyiNkhosi yenu neMfundzisi wenu, nginigeza tinyawo, nani-ke kufanele nigezane tinyawo. Ngobe nginentele sibonelo, kuze nani nente njengobe nami ngentile kini.” (Joh. 13:12-15) Ngekukhombisa sifiso sekwenta umsebenti lophansi, Jesu wafundzisa baphostoli bakhe sifundvo lesibalulekile lebesitawuhlala etingcondvweni tabo siphindze sibakhutsate kutsi batfobeke.

 3. (a) Jesu wakuveta njani kubaluleka kwekutfobeka tikhatsi letimbili? (b) Yini lesitawucoca ngayo kulesihloko?

³ Ngesikhatsi Jesu ageza tinyawo tebaphostoli, bekungasiko kwekucala kutsi akhombise kubaluleka kwekutfobeka. Esikhatsini lesendlulile, ngesikhatsi baphostoli bakhombisa umoya wekufuna kuba bakhulu, Jesu waletsa umntfwana lomncane wammisa eceleni kwakhe, wase ubatjela kutsi: “Umuntfu lowemukela lomntfwana ngelibito lami, wemukela mine; nalowo lowemukela mine, wemukela lowo longitfumile. Ngobe lowo lomncane kakhulu kunani nonkhe, nguye lomkhulu kunani nonkhe.” (Luk. 9:46-48) Ngesikhatsi Jesu achubeka nemsebenti wakhe wekushumayela futsi abona kutsi baFarisi batifunela ludvumo, watsi: “Wonkhe umuntfu lotiphakamisako uyawutfotjiswa, nalotitfobako uyawuphakanyiswa.” (Luk. 14:11) Kuyacaca kutsi Jesu ufuna balandzeli bakhe batfobeke lokusho kutsi batitfobe enhlitiyweni, bangatigcabhi nobe batikhukhumete. Njengobe sifisa kumlingisa, ase sihlolisise sibonelo sekutitfoba kwakhe. Sitawuphindze sibone nekutsi kutitfoba kubazuzisa njani labanye ngaphandle kwekuzuzisa loyo lotitfobako.

 4. INdvodzana yaNkulunkulu lokukuphela kwayo yakukhombisa njani kutitfoba ngembikwekutsi ite emhlabeni?

⁴ INdvodzana yaNkulunkulu lekukuphela kwayo yatitfoba ngisho nangembikwekuta emhlabeni. Ngesikhatsi asengaketi emhlabeni, Jesu wacitsa iminyaka leminyenti anaBabe wakhe wasezulwini. Incwadzi yeliBhayibheli ya-Isaya ikhuluma ngebuhlobo lobusedvute iNdvodzana lebeyinabo neYise, itsi: “INkhosi Simakadze inginike lulwimi Iolufundzisiwe, kuze ngati livi lekucinisa labamadvolo abo asaceka. Ungivusa njalo nje, ekuseni avuse indlebe yami itewulalela, njengemuntfu nakafundziswa. INkhosi Simakadze itivulile tindlebe tami, nami angikayivuseli umdlonga, angikagucuki kuyo.” (Isa. 50:4, 5) INdvodzana yaNkulunkulu yakhombisa simo sekutitfoba futsi yakunakisisa loko Jehova labeyifundzisa kona. Abetimisele futsi afisa kufundza kuNkulunkulu weliciniso. Jesu wasinakisisa sibonelo saJehova sekutitfoba endleleni lakhombisa ngayo umusa kubantfu labanesono.

 5. Njengobe Jesu anguMikhayeli ingilosi lenkhulu, wasibeka njani sibonelo sekutfobeka nekuzitsa ngesikhatsi angavumelani naDeveli?

⁵ Akusito tonkhe tidalwa tasezulwini lebetinesimo lesifanana neseNdvodzana yaNkulunkulu lekukuphela kwayo. Esikhundleni sekufisa kufundza kuJehova, ingilosi leyagcina inguSathane Develi yavumela kuba nesimo lesiphambene nekutfobeka—kutibeka embili nekutigabatisa—futsi ekugcineni yahlubuka kuJehova. Ngakulolunye luhlangotsi, Jesu abenetisekile ngesikhundla labenaso ezulwini, akazange afise nekuwasebentisa kabi emandla akhe. Njengobe Jesu anguMikhayeli ingilosi lenkhulu, akazange ente lokungetulu kwemandla labekaniketwe wona ‘mhlazane angavumelani naSathane ngesidvumbu saMosi.’ Esikhundleni saloko, iNdvodzana yaNkulunkulu yatitfoba futsi yazitsa. Yakujabulela kuba naJehova, uMehluleli Lomkhulu wendzawo yonkhe, ngobe abetayilungisa lendzaba ngendlela yaKhe nangesikhatsi sakhe.—Fundza Juda 9.

 6. Jesu wakukhombisa njani kutfobeka ngekwemukela sabelo sekuba nguMesiya?

⁶ Tintfo Jesu latifundza ngalesikhatsi angaketi emhlabeni, betifaka ekhatsi tiphrofetho lebetibiketela imininingwane yekuphila kwakhe emhlabeni njengaMesiya. Ngako-ke, kungenteka kutsi abesavele ati kutsi ulindzelwe tentakalo letibuhlungu. Nobe kunjalo, Jesu wasemukela sabelo sekuphila emhlabeni nekufa njengaMesiya lobekatsenjisiwe. Yini leyamenta wasemukela? Naku umphostoli Pawula lakubhala agcizelela kutfobeka kweNdvodzana yaNkulunkulu lokukuphela kwayo: “Lowatsi anesimo saNkulunkulu, wangete washo kutsi kulingana naNkulunkulu kuyintfo yekunkonkoshelwa. Kepha watidzela, watsatsa simo senceku, waba ngumuntfu njengatsi.”—Fil. 2:6, 7.

7, 8. Jesu wakukhombisa ngatiphi tindlela kutfobeka ngesikhatsi asengumntfwana nangesikhatsi enta umsebenti wekushumayela emhlabeni?

⁷ Pawula wabhala: “[Jesu] watsi atfolakale anjengemuntfu ngesimo, watitfoba, walalela kwadzimate kwaba ngusekufeni, yebo, ekufeni elugodvweni lekuhlushwa.” (Fil. 2:8, NW.) Kusukela ebuntfwaneni bakhe, Jesu wasibekela sibonelo sekutfobeka. Ngisho nobe akhuliswa batali labanesono—boJosefa naMariya—Jesu “watitfoba, waba ngephansi kwabo.” (Luk. 2:51) Leso sibonelo lesihle kubantfwana labatawubusiswa nguNkulunkulu ngekutitfoba kwabo kubatali babo.

⁸ Ngesikhatsi asakhulile, Jesu watitfoba ngekutsi ente intsandvo yaJehova ite kucala ekuphileni kwakhe, kunekutsi ente yakhe. (Joh. 4:34) Ngesikhatsi enta umsebenti wakhe wekushumayela, Jesu Khristu wasebentisa libito laNkulunkulu futsi wasita bantfu labacotfo kutsi batfole lwati lolunembile ngebuntfu baJehova nangenjongo yaKhe ngebantfu. Jesu waphindze waphila ngekuvumelana naloko labekakufundzisa ngaJehova. Emthantazweni losibonelo, liphuzu lekucala Jesu lakhuluma ngalo belitsi: “Babe wetfu losezulwini, alingcweliswe libito lakho.” (Mat. 6:9) Ngako-ke, Jesu wayala balandzeli bakhe kutsi bente kungcweliswa kwelibito laJehova kube yintfo lebaluleke kakhulu. Naye matfupha abephila ngekuvumelana naloko. Ngasekupheleni kwemsebenti wakhe wekushumayela, Jesu abengathantaza kuJehova atsi: “Ngibatisile [baphostoli] libito lakho, futsi ngisetawuchubeka ngente njalo.” (Joh. 17:26) Ngetulu kwaloko, kuko konkhe kushumayela kwakhe nangaloko lakwenta nakasemhlabeni, Jesu wadvumisa Jehova.—Joh. 5:19.

 9. Yini leyaphrofethwa nguZakhariya mayelana naMesiya, futsi Jesu wakugcwalisa njani loko?

⁹ Zakhariya wabhala lesiphrofetho mayelana naMesiya: “Jabula kakhulu, Ndvodzakati yaseSiyoni! Memeta ngekujabula, Ndvodzakati yaseJerusalema! Ase ubuke, inkhosi yakho ita kuwe, ilungile, futsi iphetse insindziso, ita itfobekile, igibele embongolweni, etikwelitfole lembongolo, inkhonyane yembongolo.” (Zak. 9:9) Loku kwagcwaliseka ngesikhatsi Jesu angena eJerusalema ngembikweliPhasika ngemnyaka wanga-33 C.E. Bantfu bendlala tingubo tabo phansi emgwacweni nemagala etihlahla. Kuyabonakala kutsi bantfu bakulo lonkhe lelidolobha bajabula kakhulu ngekufika kwakhe. Ngisho nangesikhatsi bantfu bamdvumisa batsi uyiNkhosi, Jesu watfobeka.—Mat. 21:4-11.

10. Yini leyakhonjiswa sifiso saJesu sekulalela kute kube sekufeni?

¹⁰ Kuphila kwaJesu Khristu emhlabeni ngekutitfoba nangekulalela, kwaphela ngalesikhatsi afa esigodvweni sekuhlushwa. Ngako-ke wakhombisa ngalokusebaleni kutsi bantfu bangetsembeka kuJehova ngisho nobe bangavivinywa kangakanani. Jesu waphindze wakhombisa kutsi Sathane abenemanga ngekutsi atsi bantfu bakhonta Jehova ngetizatfu tebugovu. (Jobe 1:9-11; 2:4) Umlandvo webucotfo baKhristu wakhombisa kutsi bukhosi baJehova bendzawo yonkhe buyafaneleka futsi bunekulunga. Jehova wajabula kakhulu ngesikhatsi abona kwetsembeka kweNdvodzana yakhe letfobekile.—Fundza Taga 27:11.

11. Umhlatjelo wenhlawulo waJesu Khristu wavula maphi ematfuba kubantfu labakholwako?

¹¹ Ngekufa elugodvweni lekuhlushwa, Jesu wakhokha linani lenhlawulo yebantfu. (Mat. 20:28) Loko kwavula litfuba lekutsi bantfu labanesono baphile phakadze futsi bekuhambisana nemitsetfo yekulunga kwaNkulunkulu. Pawula wabhala watsi: “Ngesento sinye lesilungile bonkhe bayakwentiwa balungelane naNkulunkulu ekuphileni.” (Rom. 5:18) Kufa kwaJesu kwavulela emaKhristu lagcotjwe ngemoya litfuba lekuba nekuphila lokute kufa kwasezulwini nekuphila lokuphakadze emhlabeni ‘kwaletinye timvu.’—Joh. 10:16; Rom. 8:16, 17.

12. Jesu wabukhombisa njani bumnene nekutfobeka endleleni laphatsa ngayo bantfu labanesono?

¹² Jesu wamema bonkhe labo ‘labakhatsele nalabasindvwa yimitfwalo’ kutsi bete kuye. Watsi: “Bekani lijoko lami etikwenu, nifundze kimi, ngobe mine ngimnene, ngitfobekile ngenhlitiyo, khona niyawutfola kuphumula kwemiphefumulo yenu.” (Mat. 11:28, 29) Kutfobeka nebumnene kwenta Jesu waba nemusa futsi wangakhetsi endleleni laphatsa ngayo bantfu labanesono. Abenekucabangela kuloko labelindzele kutsi kwentiwe bafundzi bakhe. Jesu abebancoma futsi abakhutsata. Akazange abente bative shengatsi bayehluleka nobe abakufaneli kwenta lokutsite. Jesu abete lulaka nobe acindzetele labanye. Esikhundleni sekwenta njalo, wacinisekisa balandzeli bakhe kutsi ngekusondzela kuye nekwenta loko labebafundzisa kona, bebatawutfola kuphumula ngobe lijoko lakhe limelula nemtfwalo wakhe awusindzi. Bantfu labadvuna nalabasikati, labadzala nalabancane bebativa bakhululekile nabanaye.—Mat. 11:30.

13. Jesu wasikhombisa njani sihawu kubantfu labahluphekile?

¹³ Ngesikhatsi akanye nebantfu labavamile baka-Israyeli, Jesu waba nesihawu ngabo, ngobe bebahluphekile futsi watinaka ngelutsandvo tidzingo tabo. Ngesikhatsi advutane naseJerikho, wahlangana nendvodza lebeyiyimphumphutse, libito layo kunguBhathimeyosi ikanye nemngani wayo naye labeyimphumphutse. Bebachubeka bacela lusito lwaJesu, kodvwa sicumbi sebantfu besibekhuta sitsi ababindze. Bekungaba melula kutsi ungakunaki kucela kwalamadvodza latimphumphutse. Esikhundleni saloko, Jesu wacela kutsi aletfwe kuye futsi wawahawukela wawenta abona. Jesu walingisa Babe wakhe Jehova, ngekukhombisa kutfobeka nekuba nemusa kubantfu labatoni.—Mat. 20:29-34; Mak. 10:46-52.

14. Ngutiphi tinzuzo letitfolakele ngekuphila kwaJesu kwekutitfoba?

¹⁴ Kuphila kwaJesu Khristu kwekutitfoba kusizatfu sekujabula futsi kuzuzisa kakhulu. Jehova wajabula ngekubona iNdvodzana yakhe letsandzekako ititfoba entsandvweni yaKhe. Baphostoli nebafundzi bebatfola kuphumula ngobe Jesu abemnene futsi atfobekile ngenhlitiyo. Sibonelo sakhe, timfundziso takhe, nekubancoma kwakhe bekubakhutsata kutsi batfutfukise buhlobo babo naNkulunkulu. Bantfu bebazuza ngekutfobeka kwaJesu ngobe bebatfola lusito lwakhe, abebafundzisa futsi abakhutsata. Ecinisweni, bonkhe bantfu labakholwa kuye batawutfola tinzuzo taphakadze emhlatjelweni wenhlawulo waJesu.

15. Jesu wazuza njani ngekutfobeka?

¹⁵ Kutsiwani ngaJesu? Kutfobeka kwakhe kwamzuzisa yini? Yebo kwamzuzisa ngobe Jesu watjela bafundzi bakhe kutsi: ‘Lotitfobako uyawuphakanyiswa.’ (Mat. 23:12) Lawo mavi abonakala aliciniso kuye. Pawula wachaza: “Ngako-ke Nkulunkulu wamphakamisa kakhulu [Jesu], wamnika libito lelingetulu kwemabito onkhe, kuze kutsi ngelibito laJesu emadvolo onkhe aguce, alabasezulwini, newalabasemhlabeni, newalabangaphansi kwemhlaba, netilimi tonkhe tivume kutsi Jesu Khristu uyiNkhosi, kube ludvumo kuNkulunkulu longuYise.” Ngesizatfu sekuphila kwaJesu ngekutitfoba nangekwetsembeka emhlabeni, Nkulunkulu Jehova wayiphakamisa iNdvodzana yakhe, wayiniketa ligunya kuko konkhe lokusezulwini nasemhlabeni.—Fil. 2:9-11.

16. Yini lekhombisa kutsi kutfobeka kutawuchubeka kubonakala emisebentini yeNdvodzana yaNkulunkulu?

¹⁶ Kutfobeka kutawuchubeka kubonakala emisebentini leyentiwa yiNdvodzana yaNkulunkulu. Ngesikhatsi abiketela kutsi Jesu utawenta njani ngetitsa taKhe nasekasesikhundleni sakhe lesiphakeme ezulwini, umhlabeli wahlabela watsi: ‘Gibela ngebukhosi bakho, uphume imphi, uyewuncoba, umele liciniso, uvikele nekutfobeka.’ (Hla. 45:4) Ngekuhambisana neliciniso nekulunga, Jesu Khristu utawugibela ngekutfobeka e-Amagedoni. Yini letawenteka ekupheleni kwekuBusa Kweminyaka Leyinkhulungwane ngesikhatsi iNkhosi lenguMesiya ‘seyicitse yonkhe imibuso, nebukhosi bonkhe, nemandla onkhe’? Utakukhombisa yini kutfobeka? Yebo utawukukhombisa, ngobe ‘utawunikela umbuso kuNkulunkulu uYise.’—Fundza 1 Khorinte 15:24-28.

17, 18. (a) Kubaluleke ngani kutsi tinceku taJehova tilandzele sibonelo saJesu sekutitfoba? (b) Yini lesitawucoca ngayo esihlokweni lesilandzelako?

¹⁷ Kutsiwani-ke ngatsi? Sitawusilandzela yini sibonelo saJesu futsi sitfobeke? Sitawutfolakala sinjani ngesikhatsi iNkhosi lenguJesu Khristu ikhipha sehlulelo e-Amagedoni? Kugibela kwakhe, kukhombisa kutsi utawusindzisa kuphela labo labatfobekile futsi labalungile. Ngako-ke, kutfobeka kubalulekile kute sisindze. Ngetulu kwaloko, njengobe kuphila kwaJesu Khristu kwekutfobeka kwazuzisa yena nalabanye, natsi kukhombisa kwetfu kutfobeka kungazuzisa ngetindlela letinyenti.

¹⁸ Yini lengasisita kutsi silandzele sibonelo saJesu sekutfobeka? Singetama njani kutfobeka ngisho nobe kungenteka sibhekane netilingo? Lemibuto itawuphendvulwa esihlokweni lesilandzelako.