Imibuto Levela Kubafundzi

Cha, kute lapho sifundza khona eBhayibhelini nobe etincwadzini temlandvo kutsi emaKhristu bekabhajatiswa ngenca yebantfu labafile.

Indlela lelivesi lelihunyushwe ngayo emaBhayibhelini lamanyenti yenta labanye bacabange kutsi emaKhristu ekucala bekabhajatiswa ngenca yalabafile. Nasi sibonelo: “Nangabe labafile bangeke bavuke, batawenta njani labo lababhajatiswa ngenca yalabafile?”—New International Version.

Nobe kunjalo, naka naku lokwashiwo tati teliBhayibheli letimbili. Sati seliBhayibheli lokutsiwa nguGregory Lockwood satsi kute bufakazi lobuseBhayibhelini nobe umlandvo lokhombisa kutsi kukhona umuntfu lowabhajatiswa “ngenca yemuntfu lofile.” Ngendlela lefanako, Professor Gordon D. Fee wabhala watsi: “Kute umlandvo nobe sibonelo lesiseBhayibhelini selubhabhatiso lolunjalo. Kute lakukhulunywa khona ngalolubhabhatiso eTestamendeni Lelisha futsi kute bufakazi lobukhombisa kutsi lwake lwentiwa ngemaKhristu ekucala nobe lwentiwa ngemasontfo ngekushesha nje ngemuva kwekufa kwebaphostoli.”

LiBhayibheli litsi balandzeli baJesu bekufanele ‘bente bantfu bato tonkhe tive babe bafundzi bakhe, bababhabhatise . . . babafundzise kugcina konkhe’ lebekabatjele kona. (Mat. 28:19, 20) Ngaphambi kwekutsi umuntfu abhajatiswe, bekufanele afundze ngaJehova nangeNdvodzana yaKhe akholwe kubo futsi abalalele. Umuntfu lobekasavele afile bekangeke akhone kukwenta loko futsi nemKhristu lophilako bekangeke akhone kumentela loko.—Shu. 9:5, 10; Joh. 4:1; 1 Khor. 1:14-16.

Ngako bekasho kutsini Pawula?

Labanye bantfu baseKhorinte bebatsi bantfu labafile ngeke bavuswe. (1 Khor. 15:12) Pawula wabakhombisa kutsi loko bekungemanga. Kanjani? Washo kutsi ‘malanga onkhe bekabhekana nekufa.’ Kuliciniso kutsi bekasaphila. Ngisho nobe bekaba sengotini tikhatsi letinyenti, bekaciniseka kutsi ngemuva kwekufa bekatawuvuselwa ezulwini, njengaJesu.—1 Khor. 15:30-32, 42-44.

Bantfu baseKhorinte bekudzingeka bacondze kutsi kuba ngumKhristu logcotjiwe bekusho kutsi bebatawubhekana netinkinga letinyenti futsi bafe, ngemuva kwaloko bese bayavuswa. Ngako ‘nababhajatiswa kuKhristu Jesu’ bebaphindze ‘babhajatiselwe ekufeni kwakhe.’ (Rom. 6:3) Loko kusho kutsi njengaJesu, bebatawubhekana netinkinga letinyenti futsi bafe bese bavuselwa ezulwini.

Ngemuva kweminyaka lemibili Jesu abhajatisiwe emantini, watjela baphostoli bakhe lababili watsi: “Nani nitawubhajatiswa ngalolubhabhatiso lengitawubhajatiswa ngalo.” (Mak. 10:38, 39) Jesu bekasengakabhajatiswa emantini ngaleso sikhatsi. Kulamavi, Jesu bekasho kutsi kwetsembeka kwakhe kuNkulunkulu bekutawenta kutsi abulawe. Pawula wabhala kutsi labagcotjiwe ‘bebatawuhlupheka naJesu baphindze bakhatinyuliswe naye.’ (Rom. 8:16, 17; 2 Khor. 4:17) Ngako nabo bekutawudzingeka kutsi bafe ngaphambi kwekutsi bavuselwe ezulwini.

Ngako lamavi aPawula angabekwa ngalokucondzile, kanje: “Ngako batawenta njani labo lababhajatiswe ngenjongo yekuba ngulabafile? Nangabe labafile bangeke bavuswe, kungani babhajatiselwa leyo njongo?”