Baphristi Bebukhosi Labazuzisa Bonkhe Bantfu
‘Nine nibeluhlanga lolukhetsiwe, nibaphristi bebukhosi, sive lesingcwele; nibantfu baNkulunkulu labakhetsiwe.’—1 PHET. 2:9.
1. Yini leyenta kutsi “sidlo seNkhosi” sakusihlwa siphindze sibitwe ngekutsi Sikhumbuto, futsi iyini injongo yaso?
NGEBUSUKU baNisani 14, ngemnyaka wa-33 C.E., Jesu Khristu kanye nebaphostoli bakhe labangu-12 bagubha liPhasika lemaJuda kwekugcina. Ngemuva kwekucosha Judasi Skariyothi, lobekangaketsembeki, Jesu wamisa umkhosi lowehlukile, lowagcina ubitwa ngekutsi “sidlo seNkhosi” sakusihlwa. (1 Khor. 11:20) Jesu washo kabili watsi: “Yentani loku ngetikhatsi tonkhe, kuze ningikhumbule.” Lomkhosi uphindze watiwe ngekutsi Sikhumbuto sekufa kwaKhristu. (1 Khor. 11:24, 25) Njengobe BoFakazi BaJehova emhlabeni wonkhe bahlonipha lomyalo, basigubha minyaka yonkhe Sikhumbuto. Ngemnyaka wa-2012, Nisani 14 welikhalenda leliBhayibheli utawucala ngemuva kwekushona kwelilanga, ngaLesine, April 5.
2. Yini Jesu layisho ngetifanekiselo latisebentisa?
2 Emavesini lamabili eliBhayibheli, umfundzi Lukha wakhuluma ngaloko Jesu lakwenta kanye naloko lakusho ngalelo langa, watsi: “Wase utsatsa sinkhwa, wabonga kuNkulunkulu, wasihlephula, wabanika watsi kubo: ‘Loku ngumtimba wami lonikelwe esikhundleni senu. Yentani loku kuze kube sikhumbuto ngami.’ Wenta njalo futsi ngekubanika indzebe emvakwekudla, atsi: ‘Lendzebe sivumelwane lesisha sengati yami lecitselwe nine.’” (Luk. 22:19, 20) Bawacondza njani baphostoli lamavi?
3. Baphostoli bayicondza njani inchazelo yetifanekiselo?
3 Njengobe bebangemaJuda, baphostoli bebatayelene nemihlatjelo yetilwane umphristi labeyinikela kuNkulunkulu, ethempelini lebeliseJerusalema. Iminikelo lenjalo beyentiwa kute bantfu bemukelwe nguNkulunkulu futsi batsetselelwe netono. (Lev. 1:4; 22:17-29) Ngako-ke, kufanele kutsi baphostoli bacondza kutsi ngesikhatsi Jesu atsi umtimba kanye nengati yakhe bekufanele ‘kunikelwe futsi kucitselwe bona,’ bekasho kutsi utawunikela ngekuphila kwakhe lokuphelele njengemhlatjelo. Lona bekutawuba ngumhlatjelo lobaluleke kakhulu kwendlula wetilwane.
4. Bekasho kutsini Jesu ngesikhatsi atsi “lendzebe sivumelwane lesisha sengati yami”?
4 Kutsiwani ngemavi aJesu latsi “lendzebe sivumelwane lesisha sengati yami”? Baphostoli bebasati siphrofetho lesimayelana nesivumelwane lesisha, lebesibhalwe ku-Jeremiya 31:31-33. (Fundza.) Lamavi aJesu bewaveta kutsi ngaleso sikhatsi besekenta sivumelwane lesisha, lebesitawungena esikhundleni sesivumelwane seMtsetfo Jehova labekasente nema-Israyeli, asebentisa Mosi. Letivumelwane letimbili betihlobene yini?
5. Sivumelwane seMtsetfo sawaniketa siphi setsembiso ema-Israyeli?
5 Yebo, injongo yato beyisondzelene kakhulu. Ngesikhatsi Jehova enta sivumelwane seMtsetfo nesive saka-Israyeli, watsi: “Naniyawulilalela livi lami nigcine nesivumelwane sami, niyawuba ligugu lami emkhatsini wato tonkhe tive; ngobe wonkhe umhlaba wami. Niyawuba ngumbuso webaphristi, nibe sive lesingcwele.” (Eks. 19:5, 6) Bewasho kutsini lamavi kuma-Israyeli?
SETSEMBISO SEBAPHRISTI BEBUKHOSI
6. Sivumelwane seMtsetfo besisita ekugcwalisekeni kwasiphi setsembiso?
6 Ema-Israyeli bekalicondza ligama lelitsi “sivumelwane,” ngobe Jehova bekente sivumelwane lesibalulekile nabokhokho babo, boNowa na-Abrahama. (Gen. 6:18; 9:8-17; 15:18; 17:1-9) Encenyeni yesivumelwane Jehova lasenta na-Abrahama, wetsembisa: “Tive tonkhe temhlaba tiyawubusiswa ngetitukulwane takho.” (Gen. 22:18) Sivumelwane seMtsetfo besisita ekugcwalisekeni kwaleso setsembiso. Ngaso, ema-Israyeli abengaba ‘ligugu laJehova emkhatsini wato tonkhe tive.’ Ngayiphi injongo? Kute abe ‘ngumbuso webaphristi’ kuJehova.
7. Bewasho kutsini emavi latsi ‘umbuso webaphristi’?
7 Ema-Israyeli bewatayelene nemakhosi kanye nebaphristi, kodvwa nguMelkhisedeki kuphela lowaba ngiko kokubili, ngobe bekavunyelwe nguJehova. (Gen. 14:18) Ngesivumelwane seMtsetfo, Jehova bekaniketa sive sema-Israyeli litfuba lekuba “ngumbuso webaphristi.” Njengobe imibhalo lephefumulelwe yaveta ngekuhamba kwesikhatsi, loku bekusho kutsi bewaniketwe litfuba lekuba ngemakhosi kanye nebaphristi.—1 Phet. 2:9.
8. Ngumuphi umsebenti lobewentiwa baphristi labebabekwe nguJehova?
8 Kuliciniso kutsi umsebenti wenkhosi kubusa. Kodvwa uyini umsebenti wemphristi? Incwadzi yemaHebheru 5:1 iyachaza: “Lowo nalowo mPhristi Lomkhulu ukhetfwa emkhatsini webantfu amiselwe kumela bantfu kuNkulunkulu, kuze anikele tipho nemihlatjelo ngenca yetono.” Ngako-ke, umphristi lobekabekwe nguJehova bekamelela bantfu labanesono embikwaKhe, ngekutsi ente iminikelo yekubacelela. Ngalokwehlukile kuloko, umphristi bekaphindze amelele Jehova embikwebantfu, abafundzise ngemitsetfo yakhe. (Lev. 10:8-11; Mal. 2:7) Ngalendlela, umphristi lobekwe nguJehova bekenta umsebenti wekwakha kuthula emkhatsini waNkulunkulu nebantfu.
9. (a) Yini ema-Israyeli lobekufanele ayente kute abe “ngumbuso webaphristi”? (b) Kungani Jehova amisa baphristi ka-Israyeli? (c) Yini leyavimbela ema-Israyeli kutsi abe “ngumbuso webaphristi” ngaphansi kwesivumelwane seMtsetfo?
9 Sivumelwane seMtsetfo besinika ema-Israyeli litfuba lekuba baphristi bebukhosi labebatawuzuzisa ‘tonkhe tive.’ Lelitfuba lelihle belihambisana nalokutsite Nkulunkulu labelindzele kutsi kwentiwe ngema-Israyeli, watsi: “Naniyawulilalela livi lami nigcine nesivumelwane sami.” Ema-Israyeli bewangakhona yini ‘kulilalela livi laJehova’? Yebo, kodvwa ngelizinga lelitsite. Bewangakhona yini kwenta njalo ngalokuphelele? Cha, bewangeke. (Rom. 3:19, 20) Ngaleso sizatfu, Jehova wakhetsa baphristi emkhatsini wema-Israyeli labebangeke babe ngemakhosi, kodvwa labebatawunikela imihlatjelo yetilwane kute kutsetselelwe tono tema-Israyeli. (Lev. 4:1–6:7) Letono betifaka ekhatsi naleto lebetentiwa baphristi. (Heb. 5:1-3; 8:3) Jehova bekayemukela iminikelo lenjalo, kodvwa beyingeke itisuse ngalokuphelele tono talabo labanikelako. Baphristi labebangaphansi kwesivumelwane seMtsetfo bebangeke bente ema-Israyeli abuyisane naNkulunkulu ngalokuphelele. Umphostoli Pawula wakuchaza ngalendlela loku: “Kungeke kwenteke kutsi ingati yetinkunzi neyetimbuti itisuse tono.” (Heb. 10:1-4) Ngesizatfu sekutsi ema-Israyeli abengawulaleli uMtsetfo, loko kwawaletsela sicalekiso. (Gal. 3:10) Bewangeke asaba baphristi bebukhosi emhlabeni.
10. Nguyiphi injongo lebeyifezwa sivumelwane seMtsetfo?
10 Setsembiso saJehova sekutsi ema-Israyeli bekatawuba “ngumbuso webaphristi,” besingeke sisagcwaliseka yini? Cha, besitawugcwaliseka. Nangabe bewatama kulalela ngebucotfo, bewatawuba nalo lelo tfuba, kodvwa hhayi ngephansi kwesivumelwane seMtsetfo. Kungani kunjalo? (Fundza Galathiya 3:19-25.) Kungobe labo labebawugcina ngekwetsembeka uMtsetfo, bewubavikela enkholweni lengakahlanteki. Bewenta emaJuda acaphele tono tawo, kanye nesidzingo semhlatjelo lomkhulu kwendlula lowo lobewentiwa ngumphristi lomkhulu. LoMtsetfo bewungumcondzisi lobewubaholela kuKhristu nobe kuMesiya, lokusho kutsi ‘Logcotjiwe.’ Nanobe kunjalo, ngesikhatsi Mesiya efika, bekatawucalisa sivumelwane lesisha, lesabiketelwa nguJeremiya. Labo labamemukela Khristu bamenywa kutsi babe yincenye yalesivumelwane lesisha, futsi bebatawuba “ngumbuso webaphristi.” Ase sihlole kutsi loko bekutakwenteka njani.
SIVUMELWANE LESISHA SIVETA BAPHRISTI BEBUKHOSI
11. Jesu waba njani sisekelo sebaphristi bebukhosi?
11 Nga-29 C.E., Jesu waseNazaretha waba nguMesiya. Ngesikhatsi aneminyaka lecishe ibe ngu-30 budzala, Jesu watinikela kuJehova kute ente intsandvo yakhe lekhetsekile, ngekutsi abhajatiswe. Jehova wamemukela ngekumbita ngekutsi ‘yiNdvodzana yakhe, letsandzekako,’ futsi wamgcoba ngemoya longcwele, hhayi ngemafutsa. (Mat. 3:13-17; Imis. 10:38) Kugcotjwa kwakhe kwamenta uMphristi Lomkhulu wabo bonkhe bantfu labanekukholwa kuye, kanye neNkhosi yabo yesikhatsi lesitako. (Heb. 1:8, 9; 5:5, 6) Bekatawuba sisekelo sebaphristi bebukhosi beliciniso.
12. Umhlatjelo waJesu waniketa bantfu liphi litfuba?
12 NjengeMphristi Lomkhulu, ngumuphi umnikelo Jesu labekanganikela ngawo kute kutsetselelwe tono tebantfu labanekukholwa? Njengobe aveta ngesikhatsi acalisa Sikhumbuto sekufa kwakhe, kuphila kwakhe lokute sono ngiko lobekutawuba ngumhlatjelo. (Fundza Hebheru 9:11, 12.) Kusukela ngesikhatsi abhajatiswa nga-29 C.E., Jesu, uMphristi Lomkhulu, wabeketelela kulingwa futsi waceceshwa kwate kwaba sekufeni kwakhe. (Heb. 4:15; 5:7-10) Ngemuva kwakuvuswa kwakhe, wanyukela ezulwini futsi wanikela ngemhlatjelo wekuphila kwakhe kuJehova. (Heb. 9:24) Ngemuva kwaloko, Jesu besekangakhona kubacelela kuJehova labo labanekukholwa emhlatjelweni wakhe, futsi bekangabasita kutsi bakhonte Nkulunkulu banelitsemba lekuphila phakadze. (Heb. 7:25) Umhlatjelo wakhe waphindze waba bufakazi besivumelwane lesisha.—Heb. 8:6; 9:15.
13. Bewayini ematsemba alabo labamenywa kutsi babe yincenye yesivumelwane lesisha?
13 Labo labebamenywa kutsi babe yincenye yesivumelwane lesisha, nabo bebatawugcotjwa ngemoya longcwele. (2 Khor. 1:21) Loku bekuhlanganisa emaJuda letsembekile kanye nebeTive. (Ef. 3:5, 6) Beliyini litsemba lalabo labanencenye esivumelwaneni lesisha? Bebatawutsetselelwa tono tabo ngalokuphelele. Jehova bekatsembisile: “Ngiyawubatsetselela bubi babo, tono tabo ngingasaphindzi ngitikhumbule.” (Jer. 31:34) Ngekutsetselelwa kwetono tabo ngalokuphelele, bebatawuba setfubeni lekuba “ngumbuso webaphristi.” Akhuluma nemaKhristu lagcotjiwe, Phetro wabhala: “Nine nibeluhlanga lolukhetsiwe, nibaphristi bebukhosi, sive lesingcwele; nibantfu baNkulunkulu labakhetselwe kumemetela imisebenti lemihle yaNkulunkulu. Nguye lowanibita kutsi niphume ebumnyameni nitewungena ekukhanyeni kwakhe lokumangalisako.” (1 Phet. 2:9) Kulelivesi, Phetro wacaphuna emavi Jehova lawasho kuma-Israyeli ngesikhatsi acalisa uMtsetfo, futsi wawasebentisa kumaKhristu lasesivumelwaneni lesisha.—Eks. 19:5, 6.
BAPHRISTI BEBUKHOSI BAZUZISA BONKHE BANTFU
14. Batawubusa kuphi baphristi bebukhosi?
14 Batawubusa kuphi labo labasesivumelwaneni lesisha? Batawubusa emhlabeni njengelicembu, futsi njengebaphristi, bamelele Jehova kubantfu ngekutsi ‘bamemetele imisebenti yakhe lemihle,’ baphindze babalungiselele kudla kwakamoya. (Mat. 24:45; 1 Phet. 2:4, 5) Ngemuva kwekufa kanye nekuvuswa kwabo, bayobusa naKhristu ezulwini, njengemakhosi kanye nebaphristi, futsi bayoyifeza ngalokugcwele yomibili lemisebenti. (Luk. 22:29; 1 Phet. 1:3-5; Semb. 1:6) Agcizelela loku, umphostoli Johane wabona embonweni tidalwa temoya letinyenti time edvute nesihlalo saJehova sebukhosi ezulwini. Betihlabelela ‘liWundlu’ “ingoma lensha,” titsi: “Ngengati yakho wahlawulela bantfu kuNkulunkulu. Labantfu bachamuka emindenini yonkhe, nasetilimini tonkhe, nasetiveni tonkhe, nasemaveni onkhe. Wabenta baba ngemakhosi nebaphristi kuNkulunkulu wetfu, bayawubusa etikwemhlaba wonkhe.” (Semb. 5:8-10) Embonweni wakhe wekugcina, naku Johane lakushoko ngalababusi: “Baphristi baNkulunkulu naKhristu, bayawubusa naye iminyaka leyinkhulungwane.” (Semb. 20:6) Bakanye naKhristu, bakha baphristi bebukhosi labatawuzuzisa bonkhe bantfu.
15, 16. Ngutiphi tinzuzo baphristi bebukhosi labatatiletsela bantfu bonkhe?
15 Labantfu labangu-144 000 batabaletsela tiphi tinzuzo labo labasemhlabeni? Sembulo sehluko 21 sibachaza ngekutsi balikhaya lasezulwini, iJerusalema Lensha, futsi babitwa ngekutsi ‘ngumkaWundlu.’ (Semb. 21:9) Emavesi 2 kuya ku-4 atsi: “Ngabona likhaya lelingcwele, iJerusalema Lensha, lehla liphuma ezulwini kuNkulunkulu, lilungiswe kahle lahlotjiswa njengamakoti ahlobele kuyawuhlangabeta umyeni wakhe emshadweni. Ngeva livi liphuma esihlalweni sebukhosi limemeta kakhulu litsi: ‘Nalo likhaya laNkulunkulu likubantfu. Nkulunkulu utawuhlala emkhatsini wabo, bona babe bantfu bakhe. Nkulunkulu cobo lwakhe uyawuhlala nabo, abe nguNkulunkulu wabo. Uyakwesula tonkhe tinyembeti emehlweni abo, sekuyawubate kufa, nekulila, nekukhala, nebuhlungu, ngobe kwakucala sekwendlulile.’” Leti tibusiso letimangalisako! Kucedvwa kwekufa kutawususa loko lokubangela tinyembeti, kulila, kukhala kanye nebuhlungu. Loku kutawusho kutsi bantfu labetsembekile sebatawuba bete sono, futsi batawubuyisana naNkulunkulu ngalokuphelele.
16 Nasichaza kabanti tibusiso letitawuletfwa ngulabaphristi bebukhosi, Sembulo 22:1, 2, sitsi: “Yase ingikhombisa umfula wemanti ekuphila, wawukhanya njengengilazi lekhanya kubonakale ngale. Emanti awo abegeleta aphuma esihlalweni sebukhosi saNkulunkulu neseliWundlu. Ageleta ehla nemgwaco welikhaya [iJerusalema Lensha]. Ngale nangale kwalomfula bekunesihlahla sekuphila. Besitsela titselo emahlandla lali-12 ngemnyaka, lokusho kutsi kanye ngenyanga. Emacembe aso abephilisa tive.” Lombono uveta kutsi “tive,” nobe imindeni yebantfu, titawelashwa ngalokuphelele esonweni letasizuza njengelifa ku-Adamu. Ngalokucinisekile, konkhe ‘kwekucala kutawube sekwendlulile.’
BAPHRISTI BEBUKHOSI BACEDZA UMSEBENTI WABO
17. Yini madvutane letawufezwa baphristi bebukhosi?
17 Nasekuphele iminyaka lengu-1 000 yemsebenti lozuzisako, baphristi bebukhosi batawube sebasisusile sono kubantfu. Khristu, njengeMphristi Lomkhulu kanye neNkhosi, utawubese ubuyisela umndeni webantfu lote sono kuJehova. (Fundza 1 Khorinte 15:22-26.) Ngaleyo ndlela, baphristi bebukhosi batawube sebayifezile injongo yabo.
18. Ngemuva kwekutsi baphristi bebukhosi sebafeze umsebenti wabo, Jehova utabasebentisa njani?
18 Ngemuva kwaloko, Jehova utawasebentisa njani lamalunga lakanye naKhristu? Ngekusho kweSembulo 22:5, ‘ayawubusa phakadze naphakadze.’ Atawubusa bobani? LiBhayibheli alisho. Kodvwa kuphila kwawo lokusezingeni lelisetulu latakutfola kanye nalokuhlangenwe nako kwekusita bantfu labanesono, kutawahlomisela kutsi achubeke afeza tinjongo taJehova phakadze.
19. Yini labatawukhunjutwa yona labo labatawuba khona eSikhumbutweni?
19 Nasihlangana kute sigubhe Sikhumbuto sekufa kwaJesu, ngaLesine, April 5, 2012, sitawukhunjutwa ngaletimfundziso teliBhayibheli. Insali yemaKhristu lagcotjiwe lasasemhlabeni itawudla tifanekiselo tesinkhwa lesite imbiliso kanye neliwayini lelibovu, kute ikhombise kuba kwayo nencenye kulesivumelwane lesisha. Letifanekiselo temhlatjelo waKhristu titayikhumbuta ngemsebenti wayo lomkhulu kanye nemitfwalo lenayo enjongweni yaNkulunkulu yaphakadze. Shengatsi sonkhe singahlanganyela ngetinhlitiyo letigcwele kubonga ngelilungiselelo laNkulunkulu Jehova lebaphristi bebukhosi kute kuzuze bonkhe bantfu.
UNGACHAZA NJANI?
․․․․․
Setsembiso sebaphristi bebukhosi sacala nini?
․․․․․
Sivumelwane lesisha sibaveta njani baphristi bebukhosi?
․․․․․
Baphristi bebukhosi batabaletsela tiphi tinzuzo bonkhe bantfu?
[Sitfombe ekhasini 29]
Baphristi bebukhosi batawuletsa tinzuzo taphakadze kubo bonkhe bantfu