Tfobeka Futsi Ujabulise Jehova

1-2. (a) LiBhayibheli limchaza njani Mosi, futsi yini layenta? (b) Yini lesikhutsata kutsi sitfobeke?

LIBHAYIBHELI litsi “Mosi bekangumuntfu lotfobekile kwendlula wonkhe umuntfu labekhona emhlabeni.” (Num. 12:3) Loko kusho kutsi bekabutsakatsaka yini, angakhoni kwenta tincumo, nome esaba nangabe labanye bamphikisa? Bantfu labanyenti bangamchaza kanjalo umuntfu lotfobekile. Kodvwa lombono awusilo liciniso. Mosi bekanemandla, angesabi kwenta tincumo, futsi ayinceku yaJehova lenesibindzi. Ngelusito lwaJehova, wakhuluma nembusi lomkhulu waseGibhithe, wahola bantfu labacishe babe tigidzi letintsatfu ehlane, futsi wasita sive sema-Israyeli sancoba titsa taso.

² Lamuhla asibhekani netinkinga Mosi lahlangabetana nato, kodvwa onkhe malanga sibeketelela timo nobe bantfu labenta kube matima kutsi sitfobeke. Nanobe kunjalo, kunjalo sinesikhutsato lesinemandla lesisita kutsi sitfobeke. Jehova wetsembisa kutsi “labamnene bayawulidla lifa lemhlaba.” (Hla. 37:11) Wena ungatichaza njengemuntfu lotfobekile yini? Labanye bantfu bangatsi utfobekile yini? Ngaphambi kwekutsi siphendvule lemibuto lebalulekile, kufanele sati kutsi kusho kutsini kutfobeka.

3-4. (a) Kutfobeka kungafananiswa nani? (b) Ngubuphi buntfu lokudzingeka sibe nabo kute sitfobeke, futsi kungani?

³ Kutfobekab kufanana nemdvwebo lomuhle. Kanjani? Njengobe umdvwebi ahlanganisa imibala lemihle kute ente sitfombe, natsi kufanele sibe nebuntfu lobunyenti lobuhle kuze sitfobeke. Lobunye balobuntfu lesingaba nabo kulalela, umoya lomuhle, kanye nesibindzi. Kungani kufanele sibe nalobuntfu kute sijabulise Jehova?

⁴ Bantfu labatfobekile kuphela labenta intsandvo yaNkulunkulu futsi kuyintsandvo yakhe kutsi sitfobeke. (Mat. 5:5; Gal. 5:23) Sathane uyatfukutsela nasenta intsandvo yaNkulunkulu. Ngisho noma sibantfu labatfobekile futsi sinemusa, bantfu labanyenti labayincenye yelive laSathane bayasizonda. (Joh. 15:18, 19) Ngesizatfu saloko kufanele sibe nesibindzi kute sincobe Sathane.

5-6. (a) Kungani Sathane abatondza bantfu labatfobekile? (b) Ngumiphi imibuto lesitayiphendvula?

⁵ Umuntfu longakatfobeki, ngumuntfu lotikhukhumetako, longakhoni kulawula intfukutselo futsi longamhloniphi Jehova. Loko kumchaza kahle Sathane. Kungako abenyanya bantfu labatfobekile! Bakhombisa kutsi ungumuntfu lomubi kangakanani ngobe banebuntfu lobuhle Sathane lete bona. Lokunyanyisa Sathane nakakhulu kutsi bakhombisa kutsi ungumcambimanga. Kungani? Kungobe kute langakusho nome langakwenta kute ayekelise bantfu labatfobekile kukhonta Nkulunkulu!—(Jobe 2:3-5).

⁶ Kunini lapho khona kungaba matima kutfobeka? Kungani kufanele sichubeke sifuna kuba bantfu labatfobekile? Kute siphendvule lemibuto, sitawufundza ngesibonelo saMosi, semaHebheru lamatsatfu labekatfunjwe eBhabhulona kanye nesaJesu.

7-8. Yini Mosi layenta ngesikhatsi labanye bangamhloniphi?

⁷ Nangabe uniketwe emagunya: Kungaba matima kutsi umuntfu loneligunya atfobeke, ikakhulukati nangabe umuntfu longephansi kwakhe angamhloniphi noma atsi akenti tincumo letikahle. Loko kwake kwenteka yini kuwe? Kutsiwani nangabe lilunga lemndeni wakho lingenta kanjalo? Yini longayenta? Cabanga ngaloko Mosi lakwenta nakahlangabetana nesimo lesifanako.

⁸ Jehova wabeka Mosi kutsi abe ngumholi wema-Israyeli futsi wamvumela kutsi abhale phasi imitsetfo yalesive. Asingabati kutsi Jehova bekamsekela Mosi. Nanobe kunjalo, Miriyamu sisi waMosi kanye nabhuti wakhe Aroni, basola Mosi futsi bamtjela kutsi bekungakafaneli ashade nalomfati bekashade naye. Bantfu labanyenti nabangaba kulesimo Mosi labekuso bangatfukutsela futsi batiphindziselele—kodvwa Mosi akazange ente njalo. Akazange atfukutsele, esikhundleni saloko wancenga Jehova kutsi angasamjezisi Miriyamu. (Num. 12:1-13) Kungani Mosi enta ngalendlela?

9-10. (a) Yini Jehova layifundzisa Mosi? (b) Yini tinhloko temindeni kanye nemadvodza lamadzala elibandla langayifundza kuMosi?

⁹ Mosi wavuma kuceceshwa nguJehova. Nakaneminyaka lengu-40 futsi alilunga lemndeni wasebukhosini baseGibhithe, abengakatfobeki. Bekasheshe atfukutsele kangangekutsi waze wabulala lenye indvodza lebebona ngatsi iphatsa kabi bantfu bakubo. Mosi abecabanga kutsi Jehova utawuvumelana naye kuloko lakwenta. Jehova watsatsa iminyaka lengu-40 afundzisa Mosi kutsi bekufanele abe nesibindzi futsi atfobeke kute akhone kuhola sive sema-Israyeli. Kute atfobeke bekudzingeka abe cotfo, alalele futsi abe nemoya lomuhle. Wafundza sifundvo lesibalulekile futsi waba ngumholi lokahle kakhulu.—Eks. 2:11, 12; Imis. 7:21-30, 36.

¹⁰ Tinhloko temindeni kanye nemadvodza lamadzala elibandla kufanele alingise Mosi. Kufanele ungasheshi utfukutsele nangabe labanye bangakuhloniphi. Titfobe futsi uwavume emaphutsa lowentile. (Shu. 7:9, 20) Lalela sicondziso saJehova lesimayelana nendlela yekucatulula tinkinga futsi ube nemusa nawuphendvula labanye. (Taga 15:1) Tinhloko temindeni kanye nebabonisi labenta njalo basibonelo lesihle sekutfobeka, balondvolota kuthula futsi bajabulisa Jehova.

11-13. EmaHebheru lamatsatfu asibekela siphi sibonelo?

¹¹ Nangabe uvivinywa: Kuwo wonkhe umlandvo, bantfu lababaholi bebasolo bacindzetela bantfu baNkulunkulu. Bangahle basimangalele ngemacala lehlukahlukene, ngesizatfu sekutsi ‘silalela Nkulunkulu njengobe angumbusi kunekutsi silalele bantfu.’ (Imis. 5:29) Bangahle bahlekise ngatsi, basifake emajele, noma basihlukumete. Nanobe kunjalo, Jehova utasisita, angeke siphindzisele, kodvwa sitawuchubeka sitfobekile kulo lonkhe luvivinyo lesihlangabetana nalo.

¹² Cabanga ngesibonelo lesihle boHananiya, Mishayeli, na-Azariya emaHebheru lamatsatfu labetfunjiwe lasibekela sona.c Inkhosi yaseBhabhulona yabayala kutsi bakhotsamele sitfombe lesikhulu seligolide. Ngekutfobeka, bachazela inkhosi kutsi kungani bebangeke basikhotsamele lesitfombe. Bachubeka balalela Jehova nanobe inkhosi ibasongela ngekubafaka emlilweni. Jehova wakhetsa kubavikela ngekushesha. Bebaciniseka kutsi Jehova angabasindzisa, kodvwa bebatimisele kwemukela noma ngabe yini Jehova layivumelako kutsi yenteke. (Dan. 3:1, 8-28) Bakhombisa kutsi bantfu labatfobekile banesibindzi ngisho noma inkhosi noma babusi basiyala kutsi sephule umtsetfo waJehova. Siyachubeka sikhonta Jehova ngisho noma labanye basisongela futsi basijezisa.—Eks. 20:4, 5.

¹³ Singawalingisa njani lamaHebheru lamatsatfu nangabe kwetsembeka kwetfu kuJehova kuvivinywa? Kufanele sitfobeke futsi setsembe kutsi Jehova utasinakekela. (Hla. 118:6, 7) Kufanele sibaphendvule ngemusa futsi sibahloniphe labo labasisola kutsi sente lokubi. (1 Phet. 3:15) Asifuni kwenta noma ngabe yini lengalimata buhlobo betfu naBabe wetfu lositsandzako.

14-15. (a) Yini lengenteka nasicindzetelekile? (b) Ngekusho kwemBhalo wa-Isaya 53:7, 10, kungani singatsi Jesu usibonelo lesihle kakhulu sekutfobeka ngisho noma acindzetelekile?

¹⁴ Nangabe ucindzetelekile: Sonkhe siyacindzeteleka ngenca yetizatfu letehlukahlukene. Ungacindzeteleka nawutawubhala luhlolo esikolweni noma nawuniketwe sabelo lesitsite emsebentini. Ungacindzeteleka nawucabanga ngendlela lotawelashwa ngayo noma nawucabanga ngeluhlolo lwetemphilo lokufanele ulwente. Kumatima kutfobeka nangabe sicindzetelekile. Tintfo lebesingenandzaba nato kungenteka ticale kusicasula. Singahle sikhulume kabi nalabanye nobe sibaphatse kabi. Nangabe kuke kwenteka wacindzeteleka, cabanga ngesibonelo saJesu.

¹⁵ Etinyangeni letimbalwa ngaphambi kwekufa kwakhe, Jesu bekacindzeteleke kakhulu. Bekati kutsi utawubulawa futsi aphatfwe kabuhlungu. (Joh. 3:14, 15; Gal. 3:13) Nasekatawufa, watsi ucindzetelekile. (Luk. 12:50) Kusesele emalanga lambalwa kutsi afe, Jesu watsi: “Umphefumulo wami ucindzeteleke kakhulu.” Siyakubona kutfobeka kanye nekutinikela kwakhe kuNkulunkulu njengobe atfululela sifuba sakhe kuye, atsi: “Babe ngisindzise kulesikhatsi. Cha, phela kungako ngifike kuso. Babe, khatimulisa libito lakho.” (Joh. 12:27, 28) Nasekufike sikhatsi sekufa kwakhe, Jesu waba nesibindzi, wativeta etitseni taNkulunkulu letambulala kabuhlungu nangendlela lelihlazo. Ngekutfobeka, Jesu wachubeka enta intsandvo yaNkulunkulu ngisho noma bekaphatfwa kabuhlungu futsi acindzetelekile. Siyaciniseka kutsi Jesu wasibekela sibonelo lesihle kakhulu sekutfobeka ngisho noma acindzetelekile!—Fundza Isaya 53:7, 10.

16-17. (a) Yini baphostoli labayenta leyabangela kutsi kube lukhuni kutsi Jesu ahlale atfobekile? (b) Singamlingisa njani Jesu?

¹⁶ Ngebusuku Jesu lafa ngabo, bangani bakhe labakhulu benta intfo lebeyingenta kube matima kutsi atfobeke. Cabanga nje kutsi Jesu wacindzeteleka kangakanani ngalobo busuku. Bekatawuhlala etsembekile aze afe yini? Kute bekatawuba nelitsemba lekuphila phakadze kube Jesu akachubekanga etsembekile kuJehova. (Roma 5:18, 19) Lokubaluleke kakhulu kutsi loko labekatawukwenta bekutawuhlambalata noma kungcwelise ligama laJehova. (Jobe 2:4) Ngesikhatsi adla kwekugcina nebangani bakhe labakhulu lokubaphostoli, labaphostoli baphikisana ngekutsi “ngubani lomkhulu kunabo bonkhe.” Jesu beseketame kanyenti kubasita futsi nangaleyo ntsambama bekakhulumile nabo ngalendzaba. Nanobe kunjalo, Jesu akazange abatsetsise, kodvwa wachubeka abaphendvula ngemusa. Ngemusa nangesibindzi wabachazela indlela lebekufanele bacabange ngayo. Waphindze wancoma bangani bakhe ngekuchubeka bamsekela ngekwetsembeka.—Luk. 22:24-28; Joh. 13:1-5, 12-15.

¹⁷ Yini lobewungayenta kube bewusesimeni lesifanako? Singakhona kumlingisa Jesu ngekutsi sibe nemusa ngisho noma sicindzetelekile. Ngekutfobeka, lalela umyalo waJehova lotsi: “Chubekani nibeketelelana.” (Khol. 3:13) Sitawukhona kulalela lomyalo nangabe sikhumbula kutsi sonkhe kuyenteka sikhulume nome sente tintfo letitawuvisa labanye buhlungu. (Taga 12:18; Jak. 3:2, 5) Yetama kuncoma labanye ngebuntfu babo lobuhle.—Ef. 4:29.

18. Jehova ubasita njani bantfu labatfobekile kutsi bente tincumo letikahle, kodvwa yini lokufanele bayente?

¹⁸ Nangabe sitfobekile sitawenta tincumo letikahle. Nangabe kumatima kwenta tincumo, Jehova utasisita sente tincumo letikahle nasitfobekile. Wetsembisa kutsi utativa “tifiso talabacotfo.” (Hla. 10:17) Jehova wenta lokungetulu kwekuva ticelo tetfu. LiBhayibheli lisetsembisa kutsi: “Labatfobekile ubaholela kulokulungile; labatfobekile ubafundzisa indlela yakhe.” (Hla. 25:9) Jehova usicondzisa asebentisa liBhayibheli, tincwadzi tebuKhristu,d kanye naletinye tinhlelo lesitentelwa “sisebenti lesetsembekile nalesihlakaniphile.” (Mat. 24:45-47) Kufanele silwemukele lusito lwaJehova ngekutsi sitfobeke, sivume kutsi siyaludzinga, sidadishe tincwadzi lasiniketa tona, futsi sikusebentise ngekutitsandzela loko lesikufundzako.

19-21. Nguliphi liphutsa Mosi lalenta eKhadeshi, futsi ngutiphi tifundvo lesititfolako?

¹⁹ Nasitfobekile sitakubalekela kwenta emaphutsa. Ase uphindze ucabange ngaMosi. Kwaphela iminyaka leminyenti atfobekile futsi ajabulisa Jehova. Kodvwa ngemuva kwekutsi ema-Israyeli ahambahambe ehlane iminyaka lengu-40, Mosi wehluleka kukhombisa kutsi utfobekile. Kungenteka kutsi sisi wakhe lowamsindzisa eGibhithe bekasandza kushona, futsi wangcwatjwa eKhadeshi. Ema-Israyeli besekaphindze akhonona ngekutsi awanakekelwa kahle. Ema-Israyeli ‘alwa naMosi’ ngenca yekutsi bekute emanti. Achubeka akhonona ngisho noma Jehova bekanikete Mosi emandla ekwenta timangaliso letinyenti, futsi angumholi lote bugovu. Akagcinanga ngekukhonona ngekuba bete emanti, kodvwa aphindze akhonona ngaMosi kwaba ngatsi nguye lowente kutsi kube bete emanti.—Num. 20:1-5, 9-11.

²⁰ Mosi watfukutsela kakhulu futsi akazange abe nemusa. Ngisho noma Jehova bekamyale kutsi akhulume nelidvwala, Mosi watsetsisa ema-Israyeli futsi watsi utawenta simangaliso. Wabese ushaya lelidvwala kabili, futsi kwaphuma emanti lamanyenti kakhulu. Wenta liphutsa lelikhulu ngobe bekatigcabha futsi atfukutsele. (Hla. 106:32, 33) Ngenca yekutsi akazange atfobeke kwesikhashana, Mosi akavunyelwanga kutsi angene eVeni Lesetsembiso.—Num. 20:12.

²¹ Kulesibonelo sitfola tifundvo letibalulekile. Kwekucala, kufanele silwe kamatima kute sihlale sitfobekile. Nangabe singakatfobeki, ngekushesha singatigcabha futsi loko kungasenta sikhulume kabi noma sente tintfo letimbi. Kwesibili, kungahle kube matima kuhlala sitfobekile nangabe sicindzetelekile, ngako kufanele sitimisele kuhlala sitfobekile.

22-23. (a) Kungani kufanele sihlale sitfobekile? (b) Asho kutsini emavi lakuZefaniya 2:3?

²² Nangabe sitfobekile sitawuvikeleka. Masinyane Jehova utawubhubhisa bonkhe bantfu lababi, futsi kutawusala bantfu labatfobekile kuphela emhlabeni. Umhlaba wonkhe utawuba nekuthula. (Hla. 37:10, 11) Utawuba ngulomunye webantfu labatfobekile yini? Ungakhona kuhlale utfobekile nangabe wemukela simemo saJehova semusa lesabhalwa ngumphrofethi Zefaniya.—Fundza Zefaniya 2:3.

²³ Kungani umBhalo waZefaniya 2:3 utsi: “Mhlawumbe ningahle nivikeleke”? Lamavi awasho kutsi Jehova angeke akhone kuvikela bantfu labafuna kumjabulisa nalabamtsandzako. Esikhundleni saloko, asho kutsi kufanele sente lokutsite kute sivikeleke. Sinelitfuba lekusindza “ngelilanga lentfukutselo yaSimakadze” futsi sitawuphila phakadze nangabe sitimisela kuba bantfu labatfobekile futsi sijabulise Jehova.