Nguliphi Litsemba Lelikhona Ngabokhokho Bami?

ESIKHATSINI lesitsite lesendlulile, kwavela sihloko ephephandzabeni laseKorea, i-“The Chosun Ilbo.” Lesihloko besitsi: “‘Shim Cheong Lolungile’ Lobekangati Lutfo NgaJesu Waya Esihogweni Yini?”

Lesihloko savusa intfukutselo ngobe Shim Cheong bekayintfombatana letsandzekako lengumdlali enganekwaneni yaseKorea, futsi wadzela kuphila kwakhe kute asite babe wakhe lobekayimphumphutse. Kuyo yonkhe leminyaka leyendlulile, lunyenti ludvumo laniketwe lona. EKorea, Shim Cheong usibonelo sekutsi indvodzakati leyetsembekile kufanele ibe njani.

Kulabanyenti, kucabanga kutsi umuntfu lonjalo angajeziswa esihogweni semlilo ngenca yekutsi bekangasiye umKhristu lobhajatisiwe kubonakala kuyintfo lengakalungi futsi lekhubako. Lenganekwane kutsiwa yenteka esikhatsini lesidze ngaphambi kwekutsi kufike livangeli lelimayelana naKhristu endzaweni yakubo.

Lesihloko salendzaba besifaka ekhatsi incociswano nemfundisi. Wabutwa kutsi bonkhe labafa bangazange balitfole litfuba lekufundza ngaJesu, bebatawujeziswa yini esihogweni semlilo. Waphendvula watsi: “Asati, kodvwa sicabanga kutsi likhona litsemba lelitsite Nkulunkulu lababekele lona.”

I-“The New Catholic Encyclopedia” itsi: “Kuze umuntfu asindziswe kumelwe abhajatiswe. Kunjengobe naKhristu asho, ngaphandle kwekutsi umuntfu atalwe kabusha, ngemanti nangeMoya Longcwele ngeke awubone uMbuso waNkulunkulu. (Jn 3.5)” Ngenca yaloko, labanye bantfu bakholelwa kutsi labo labafa bangakabhajatiswa bayiswa esihogweni semlilo nome bahlushwe nasebafile.

Nome kunjalo kunalabanye labanyenti labatsi leyonkholelo ayinangcondvo. Tigidzi tebantfu tiye tafa tingenalo lwati lweliBhayibheli. Kuyabafanela yini kutsi bahlushwe phakadze? Litsini liBhayibheli ngalendzaba?

LiBhayibheli lisikhombisa ngalokucacile kutsi Nkulunkulu akabakhohlwa bantfu lebebaphila bangenalo lwati ngaloko lakulindzele kubo. Imisebenti 17:30 isicinisekisa ngekutsi: “Nkulunkulu akatinakanga tikhatsi lapho bantfu bebenta ngekungati khona.” Nguliphi-ke litsemba leliseBhayibhelini, lelimayelana nalabo labafa bangakalitfoli litfuba lekufundza ngaNkulunkulu?

Imphendvulo ingatfolakala kuloko Jesu lakutjela lesinye sigelekece lebesibetselwe naye. Lesigelekece satsi kuJesu: “Ungikhumbule nawufika eMbusweni wakho.” Waphendvula watsini Jesu? Watsi: “Lamuhla ngiyakutjela ngitsi: Utawuba nami ePharadisi.”​—Lukha 23:39-43.

Jesu bekatsembisa lendvodza kutsi itawuya ezulwini yini? Cha, ngobe lendvodza ‘beyingakatalwa kabusha’ ngemanti nangemoya, lokwakulindzelekile kute umuntfu angene eMbusweni waNkulunkulu. (Johane 3:3-6) Kunaloko, Jesu abetsembisa lesigelekece kutsi sitawuphindze siphile, ePharadisi. Njengobe lendvodza yayingumJuda, beyetayelene neliPharadisi lasemhlabeni, kanye nensimu yase-Edeni, njengobe ichazwa encwadzini yekucala yeliBhayibheli. (Genesisi 2:8) Setsembiso saJesu sayiniketa litsemba lekutsi itawuvuselwa ePharadisi naliphindze libuyiselwa emhlabeni.

Ecinisweni, liBhayibheli letsembisa kutsi “kutawuba neluvuko lwalabalungile nalabangakalungi.” (Imisebenti 24:15) ‘Labangakalungi’ ngulabo labangazange sebaphile ngekuvumelana netimiso taNkulunkulu tekulunga ngobe bebangayati intsandvo yaNkulunkulu. Jesu utawuvusa lesigelekece ‘lesingakalungi’ lesakhuluma naye, kanye netigidzi, mhlawumbe netigidzigidzi tebantfu labafa bangati ngaNkulunkulu. Ngemuva kwekuvuselwa kwabo emhlabeni loliPharadisi, batawufundziswa ngaloko lokufunwa nguNkulunkulu futsi batawuba nelitfuba lekukhombisa indlela labamtsandza ngayo, ngekulalela imiyalo yakhe.

Nakuvuswa bantfu labangakalungi, batawehlulelwa ngekwaloko labakwenta nabasaphila yini? Chake, ngobe umbhalo waRoma 6:7 utsi: “Ngobe umuntfu lofile ukhululiwe esonweni sakhe.” Laba labangakalungi bayobe sebatibhadele tono tabo ngekufa. Kungako bayowehlulelwa ngekwaloko labatakwenta ngemuva kwekuvuswa kwabo, hhayi ngaloko labakwenta bangati, ngaphambi kwekufa kwabo. Bayawutfola ini?

Ngemuva kwekuvuswa kwabo, laba labangakalungi batawuba nelitfuba lekufundza ngemitsetfo yaNkulunkulu, leyokwembulwa nakuvulwa imiculu lengekwemifanekiso. Batawubese behlulelwa “ngekwetento tabo,” kungakhatsaliseki kutsi bayawulalela umtsetfo waNkulunkulu nome abawulaleli. (Sembulo 20:12, 13) Kulabanyenti labangakalungi, leli ngeke kube litfuba lesibili kodvwa kuyawuba litfuba labo lekucala lekutfola kuphila lokuphakadze emhlabeni ngekufundza nangekwenta intsandvo yaNkulunkulu.

Lemfundziso yeliBhayibheli seyisite bantfu labanyenti kutsi babe nekukholwa kuNkulunkulu. Yeong Sug ungulomunye wabo. Wakhuliswa angumKatolika lotinikele. Emalunga emndeni wakubo abebapristi. Wahamba wayohlala nemasisitela ngobe abenelitsemba lekuba lisisitela. Ngekuhamba kwesikhatsi, wahamba lapho ngobe abedvunyatwe ngulokwakwenteka khona. Nangetulu kwaloko, abengayemukeli imfundziso yesihogo ngobe abecabanga kutsi kuhlupha bantfu esihogweni akukalungi futsi akukhombisi lutsandvo.

Lomunye waBoFakazi BaJehova wakhombisa Yeong Sug lamavi eBhayibhelini, latsi: “Labaphilako bayati kutsi batakufa, kodvwa labafile abati lutfo; sebate umvuzo, abasakhunjulwa ngisho nekukhunjulwa.” (Umshumayeli 9:5) LoFakazi wamsita wabona kutsi bokhokho bakhe abahlushwa esihogweni, kunaloko balele emathuneni balindzele kuvuswa.

Ngenca yekutsi Yeong Sug bekati kutsi bantfu labanyenti abakaze balive leliciniso leliBhayibheli, wacabangisisa ngemavi aJesu lakuMatewu 24:14 latsi: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.” Nyalo sewushumayela tindzaba letimnandzi futsi ucocela labanye ngelitsemba lakhe lelimangalisako leliseBhayibhelini.

LiBhayibheli lisitjela kutsi: “Nkulunkulu akakhetsi libala lemuntfu, kodvwa lowo lomesabako ente lokulungile uyemukeleka kuye.” (Imisebenti 10:34, 35) Nguloko lebesingakulindzela kuNkulunkulu ngobe “utsandza kulunga nebumsulwa.”​—Tihlabelelo 33:5.