Shengatsi Sonkhe Singaba Nebunye Njengobe Jehova NaJesu Bamunye

1, 2. (a) Yini Jesu layicela nakathantaza kwekugcina nebaphostoli bakhe? (b) Kungani Jesu bekakhatsatekile ngebunye?

NGEBUSUKU bekugcina ngesikhatsi adla nebaphostoli bakhe, Jesu bekakhatsateke ngekutsi bete bunye. Ngesikhatsi athantaza nabo, wathantazela kutsi babe munye njengobe yena naBabe wakhe bamunye. (Fundza Johane 17:20, 21.) Nangabe bebanebunye, bantfu bebatawubona kutsi vele Jehova watfuma Jesu emhlabeni kutsi ente intsandvo yaNkulunkulu. Bafundzi baJesu sibili bebatawubonakala ngekutsi batsandzane futsi babe nebunye.​—Joh. 13:34, 35.

² Ngalobo busuku, Jesu wagcizelela kutsi bafundzi bakhe kufanele babe nebunye ngoba bekabonile kutsi bebete bunye. Bafundzi bakhe baphindze baphikisana ngekutsi “ngubani lotaba mkhulu kunabo bonkhe.” (Luk. 22:24-27; Mak. 9:33, 34) Ngalelinye lilanga, Jakobe naJohane bacela kutsi Jesu abanikete tikhundla letiphakeme eMbusweni wakhe futsi bahlale eceleni kwakhe.​—Mak. 10:35-40.

 3. Ngutiphi tintfo lokungenteka tabangela baphostoli baJesu kutsi bangabi nebunye, futsi ngumiphi imibuto lesitawucoca ngayo?

³ Kufuna kuba sesikhundleni lesiphakeme bekungasiko kuphela lobekwenta baphostoli baJesu bangabi nebunye. Bantfu lebebaphila nabo bebenyanyana futsi banelubandlululo. Bafundzi baJesu bekufanele bangafanani nabo. Kulesihloko sitawuphendvula nayi imibuto lelandzelako: Yini Jesu layenta ngelubandlululo? Wabasita njani bafundzi bakhe kutsi bangakhetsi baphindze babe nebunye? Loko lasifundzisa kona kungasisita njani kutsi sihlale sinebunye?

 4. Shano tibonelo letikhombisa kutsi Jesu bekabandlululwa.

⁴ Ngisho naJesu bekabandlululwa. Ngesikhatsi Filiphi atjela Nathanayeli kutsi umtfolile Mesiya, Nathanayeli waphendvula watsi: “Kukhona yini lokuhle lokungavela eNazaretha?” (Joh. 1:46) Nathanayeli bekati kutsi Mesiya bekatawutalelwa eBhethlehema njengoba bekusho siphrofetho lesikuMikha 5:2. Kungenteka bekacabanga kutsi iNazaretha beyilidolobha lelingakabaluleki kutsi Mesiya angatalelwa kulo, futsi emaJuda labesetikhundleni letiphakeme bekambukela phasi Jesu ngobe bekawaseGalile. (Joh. 7:52) EmaJuda lamanyenti bekababukela phasi bantfu baseGalile. Lamanye emaJuda beketfuka Jesu ngekutsi ambite ngekutsi ungumSamariya. (Joh. 8:48) EmaSamariya bekasive lesehlukile futsi anenkholo leyehlukile kuyemaJuda. EmaJuda nebantfu baseGalile bebangawahloniphi kangako emaSamariya futsi bekangatihlanganisi nawo.​—Joh. 4:9.

 5. Bafundzi baJesu babandlululwa njani?

⁵ Baholi labangemaJuda bebahlekisa ngebalandzeli baJesu. BaFarisi bebatsi ‘babantfu labacalekisiwe’ (Joh. 7:47-49) BaFarisi bebababukela phasi bantfu labangakafundzi etikolweni tenkholo yebuJuda noma labangalandzeli emasiko abo. (Imis. 4:13) Jesu kanye nebaphostoli bakhe babandlululwa ngenca yekutsi bantfu bangaleso sikhatsi bebatigcabha ngenkholo yabo, tikhundla labanato kanye nangebuve babo. Bafundzi baJesu bebanalo lubandlululo. Kuze bahlale banebunye, bekufanele bashintje indlela labacabanga ngayo.

 6. Shano tibonelo tekutsi lubandlululo lungasitsintsa njani.

⁶ Lamuhla kugcwele kubandlululana. Kungenteka siyabandlululwa noma tsine sibandlulula labanye. Lomunye dzadze lolihlahlandlela e-Australia litsi: “Ngacala kubenyanya kakhulu bantfu labamhlophe nangibona indlela labebaphatsa ngayo bantfu bemdzabu base-Australia. Lesinye sizatfu lebesingenta ngibenyanye kakhulu kutsi nami bake bangiphatsa kabi.” Lomunye umzalwane wase-Canada watsi: “Bengicabanga kutsi bantfu labakhuluma siFrech babaluleke kakhulu. Ngako bengibenyanya bantfu labakhuluma siNgisi.”

 7. Yini Jesu layenta ngelubandlululo?

⁷ Njengobe bekwenteka ngesikhatsi saJesu, nalamuhla bantfu banelubandlululo futsi bakutfola kumatima kutsi bashintje. Yini Jesu layenta? Kwekucala, bekakwenyanya kubandlulula futsi bekangakhetsi. Bekashumayela bantfu labanjingile nalabaphuyile, baFarisi nemaSamariya, ngisho nebatselisi kanye netoni. Kwesibili, timfundziso takhe kanye nesibonelo sakhe sakhombisa baphostoli bakhe kutsi kufanele babetsembe labanye futsi bangababandlululi.

 8. Ngusiphi simiso lesibalulekile lesisenta sibe nebunye? Chaza.

⁸ Jesu wafundzisa balandzeli bakhe simiso lesibalulekile lesisenta sibe nebunye. Wabatjela kutsi bonkhe ‘babazalwane.’ (Fundza Matewu 23:8, 9.) Jesu waphindze wachazela bafundzi bakhe kutsi bebabazalwane nabodzadze ngoba bonkhe bebakhonta Babe wabo wasezulwini Jehova. (Mat. 12:50) Ngetulu kwaloko, bayincenye yemndeni lomkhulu waJehova futsi banebunye nelutsandvo. Kungako baphostoli nababhalela bafundzi tincwadzi bebababita ngekutsi ‘bazalwane nabodzadze.’​—Rom. 1:13; 1 Phet. 2:17; 1 Joh. 3:13.a

9, 10. (a) Kungani emaJuda bekete sizatfu sekutigcabha ngenca yebuve bawo? (b) Jesu wawafundzisa njani kutsi kukabi kubandlulula labanye ngenca yekutsi basive lesehlukile? (Buka sitfombe lesisekucaleni kwalesihloko.)

⁹ Nakacedza kucacisa kutsi kufanele siphatsane njengabobhuti nabosisi, Jesu wagcizelela sidzingo sekutsi sitfobeke. (Fundza Matewu 23:11, 12.) Njengoba sibonile, kutigcabha kwenta baphostoli bangabi nebunye. Kungenteka kutsi lenye inkinga kwaba kutsi bebatigcabha kakhulu ngebuve babo. Bekufanele yini emaJuda atigcabhe ngekutsi asitukulwane sa-Abrahama? EmaJuda lamanyenti bekaciniseka kutsi vele kufanele atigcabhe. Kodvwa Johane uMbhabhatisi wawatjela kutsi: “Nkulunkulu angakwati kuvetela Abrahama bantfwana kulamatje.”​—Luk. 3:8.

¹⁰ Jesu watsi kubi kutsi bantfu batigcabhe ngenca yebuve babo. Loko wakwenta kwacaca ngesikhatsi lesinye sati semtsetfo simbuta kutsi: “Ngubani vele longumakhelwane wami?” Jesu waphendvula lombuto ngekutsi asho umfanekiso wemSamariya lowasita umJuda lobekashaywe tigebengu. EmaJuda lebekengca akazange amnake, kodvwa umSamariya wamvela futsi wamnakekela. Jesu wephetsa lomfanekiso ngekutsi atjele lesati semtsetfo kutsi kufanele silingise lomSamariya. (Luk. 10:25-37) Jesu wakhombisa kutsi emaSamariya angafundzisa emaJuda kutsi kusho kutsini kutsandza makhelwane.

11. Kungani bafundzi baJesu bekufanele bangababandlululi bantfu betive, futsi Jesu wabasita njani kutsi bakucondze loko?

¹¹ Kuze bakhone kwenta umsebenti labanikwe wona, bafundzi baJesu bekufanele bancobe lubandlululo futsi bayekele kutigcabha. Ngaphambi kwekutsi enyukele ezulwini, Jesu watsi kufanele bashumayele “kuyo yonkhe iJudiya neSamariya, nakuto tonkhe tincenye temhlaba.” (Imis. 1:8) Kuze abasite balungele kwenta lomsebenti, Jesu wakhuluma ngebuntfu lobuhle lobukhonjiswa bantfu betive. Wancoma indvuna yemasotja ngenca yekutsi beyinekukholwa lokucinile. (Mat. 8:5-10) Nakasedolobheni lakubo laseNazaretha, Jesu wakhuluma ngendlela Jehova lakhombisa ngayo umusa kubantfu betive lokufaka ekhatsi umfelokati waseSarefathi longumFenisiya kanye naNahamani, indvodza yaseSiriya lebeyinebulephelo. (Luk. 4:25-27) Jesu washumayela umfati longumSamariya futsi wahlala edolobheni laseSamariya emalanga lamabili ngobe bantfu bakhona bebawutsandza umlayeto labewushumayela.​—Joh. 4:21-24, 40.

12, 13. (a) Yini leyentiwa baphostoli baJesu nabambona ashumayela umfati longumSamariya? (Buka sitfombe lesisekucaleni kwalesihloko.) (b) Yini lekhombisa kutsi Jakobe naJohane abazange basicondze lesifundvo lesibalulekile?

¹² Bekumatima kutsi baphostoli bayekele kubandlulula labanye. Bamangala nababona kutsi Jesu bekatimisele kufundzisa umfati longumSamariya. (Joh. 4:9, 27) Baholi benkholo labangemaJuda bebangeke bashumayele umfati embikwebantfu, ingasaphatfwa-ke yekutsi lomfati bekangumSamariya lowatiwa kabi. Baphostoli bancenga Jesu kutsi adle. Kodvwa imphendvulo yaJesu yakhombisa kutsi bekakujabulela kakhulu kucoca ngetintfo letimayelana naNkulunkulu kangangekutsi bekangayinaki indlala. Nkulunkulu bekafuna kutsi Jesu ashumayele, futsi kwenta intsandvo yaBabe wakhe lokufaka ekhatsi kushumayela umfati longumSamariya bekufana nekudla kuye.​—Joh. 4:31-34.

¹³ Jakobe naJohane abazange basicondze lesifundvo lesibalulekile. Nabahamba naJesu eSamariya, bafundzi bakhe base bafuna indzawo yekulala kulelidolobha. Bantfu baseSamariya abazange babemukele, ngako Jakobe naJohane batfukutsela base bacela kutsi kubitwe umlilo lovela ezulwini utobhubhisa lonkhe lelidolobha. Jesu wabekhuta kamatima. (Luk. 9:51-56) Kube bekubantfu basedolobheni lakubo eGalile labangazange babemukele, kungenteka boJakobe naJohane bebangeke bente ngendlela lefanako. Kubonakala ngatsi lubandlululo lolwabenta baba nenzondo. Ngekuhamba kwesikhatsi bakujabulela kushumayela kulelidolobha laseSamariya, futsi kungenteka umphostoli Johane watisola ngenca ngesento sakhe.​—Imis. 8:14, 25.

14. Yalungiswa njani inkinga lebekungenteka yabangelwa kukhuluma tilwimi letingafani?

¹⁴ Kusesele sikhashana kutsi kufike liPhentekhoste la-33 C.E., kwavela inkinga yekubandlululana ebandleni lebuKhristu. Nakwabiwa kudla kwebantfu labeswele, bafelokati labebakhuluma siGriki bebangakutfoli kudla. (Imis. 6:1) Kungenteka loko kwabangelwa kutsi bebabandlululwa ngenca yelulwimi lebebalukhuluma. Ngekushesha baphostoli bayilungisa lenkinga ngekutsi bebeke emadvodza lafanelekako kutsi abe kudla. Onkhe lamadvodza labekwa bekanemagama esiGriki futsi loku kungenteka kwabadvudvuta labafelokati.

15. Yini leyafundzisa Phetro kutsi angakhetsi? (Buka sitfombe lesisekucaleni.)

¹⁵ Ngemnyaka wa-36 C.E., umsebenti wekwenta bafundzi besewentiwa nakulamanye emave. Umphostoli Phetro bekavame kutihlanganisa nemaJuda kuphela. Kodvwa ngemuva kwekutsi Jehova asho ngalokucacile kutsi emaKhristu kufanele angakhetsi, Phetro washumayela Khoneliyu lobekalisotja lelingumRoma. (Fundza Imisebenti 10:28, 34, 35.) Ngemuva kwaloko, Phetro besekadla futsi atihlanganisa nebantfu betive labangemaKhristu. Kodvwa ngekuhamba kwesikhatsi Phetro wayekela kudla nemaKhristu langasiwo emaJuda, edolobheni lase-Antiyokhi. (Gal. 2:11-14) Pawula waniketa Phetro seluleko lesifanele, futsi Phetro wasemukela. Sikwati njani loko? Ngesikhatsi Phetro abhala incwadzi yakhe yekucala leya e-Asia Minor kumaKhristu langemaJuda nalangesiwo, watsi kubalulekile kutsi sitsandze bonkhe bazalwane betfu.​—1 Phet. 1:1; 2:17.

16. Bekatiwa ngani emaKhristu asendvulo?

¹⁶ Kuyacaca kutsi baphostoli bafundza lokunyenti esibonelweni saJesu sekutsandza “tonkhe tinhlobo tebantfu.” (Joh. 12:32; 1 Thim. 4:10) Bakhona kushintja indlela labebacabanga ngayo ngisho noma loko kwatsatsa sikhatsi. EmaKhristu asendvulo bekatiwa ngekutsi ayatsandzana. Tertullian lebekangumbhali wangelikhulu lesibili leminyaka watsi, bantfu lebebangasiwo emaKhristu bebabona kutsi emaKhristu ayatsandzana futsi akulungele kutsi afe esikhundleni salamanye emaKhristu. EmaKhristu asendvulo akhona kubona bantfu ngendlela Jehova labebabuka ngayo, ngobe abegcoke “buntfu lobusha.”​—Khol. 3:10, 11.

17. Yini lesingayenta kute siyekele kubandlulula labanye? Shano tibonelo.

¹⁷ Natsi lamuhla kungatsatsa sikhatsi kutsi siyekele kubandlulula labanye. Lomunye dzadze waseFrance utsi: “Jehova ungifundzisile kutsi kusho kutsini kutsandza labanye, kwephana kanye nekutsandza tonkhe tinhlobo tebantfu. Kodvwa solo ngilwisana nekubandlulula labanye, futsi ngaletinye tikhatsi loku akusiko melula. Ngako ngiyachubeka ngithantaza ngalendzaba.” Lomunye dzadze wase-Spain unenkinga lefanako. Utsi: “Ngaletinye tikhatsi ngikutfola kumatima kutsi ngingasibandlululi sive lesitsite. Esikhatsini lesinyenti ngiyaphumelela, kodvwa ngiyati kutsi kufanele ngichubeke ngilwisana nemiva lenjalo. Ngiyambonga Jehova futsi ngiyajabula kutsi ngiyincenye yemndeni wakhe lonebunye.” Ngamunye wetfu kufanele atihlole ngekwetsembeka. Natsi kungadzingeka siyekele kubandlulula labanye njengobe kwenta labodzadze lababili.

18, 19. (a) Kungani kufanele semukele bonkhe bantfu? (b) Singakwenta njani loko?

¹⁸ Kufanele sihlale sikhumbula kutsi sonkhe sake saba tihambi ngobe besite buhlobo lobuhle naNkulunkulu. (Ef. 2:12) Kodvwa Jehova wasisondzeta kuye ngoba uyasitsandza (Hos. 11:4; Joh. 6:44) Khristu wasemukela. Wasivulela umnyango wekutsi sibe yincenye yemndeni waNkulunkulu. (Fundza Roma 15:7.) Njengobe Jesu asemukele ngemusa ngisho noma sinesono, natsi kufanele semukele labanye.

¹⁹ Asingabati kutsi njengobe kuphela kwalelive kusondzela, bantfu batawutodzana kakhulu, babandlululane futsi ngeke babe nebunye. (Gal. 5:19-21; 2 Thim. 3:13) Kodvwa njengebantfu baJehova sifuna kutfola kuhlakanipha lokuvela kuye lokutasisita kutsi singakhetsi futsi sibe nebunye. (Jak. 3:17, 18) Kuyasijabulisa kuba nebangani labavela kulamanye emave, kwemukela indlela labenta ngayo tintfo kanye nekufundza lulwimi lwabo. Nasenta njalo kuthula kwetfu kutawugeleta njengemfula futsi kulunga kwetfu kube njengemagagasi aselwandle.​—Isa. 48:17, 18.

20. Uba yini umphumela nangabe lutsandvo lushintja indlela lesicabanga ngayo nalesitiva ngayo?

²⁰ Ngesikhatsi lomunye dzadze wase-Australia adadisha liBhayibheli, kancane kancane wayekela kubandlulula labanye kanye nekubazonda. Lutsandvo lwashintja indlela labecabanga ngayo nalebekativa ngayo. Lomunye umzalwane waseCanada lokhuluma siFrench utsi: “Nyalo sengiyabona kutsi bantfu bavamise kutondza labanye ngenca yekutsi ababati. Ngifundzile nekutsi buntfu abukasekelwa endzaweni umuntfu latalelwa kuyo.” Lomzalwane waze washada nadzadze lokhuluma siNgisi! Letibonelo tikhombisa kutsi lutsandvo lungasisita sincobe lubandlululo. Lutsandvo lusibopho lesiphelele sebunye.​—Khol. 3:14.