Ungehluleli Labanye Ngendlela Lababukeka Ngayo

 1. Yini Isaya layisho mayelana naJesu, futsi kungani loko kusikhutsata?

SIPHROFETHO sa-Isaya lesimayelana neNkhosi yetfu Jesu Khristu siyasikhutsata futsi sisiniketa litsemba. Isaya watsi Jesu “angeke ehlulele ngalakubona ngemehlo akhe, nome ente sincumo ngalakuve ngetindlebe takhe kodvwa labeswele uyawubehlulela ngekwemtsetfocotfo.” (Isa. 11:3, 4) Kungani loku kusikhutsata? Kungobe siphila eveni leligcwele lubandlululo futsi bantfu behlulela labanye ngaloko labakubonako. Sonkhe silangatelela kuba nemehluleli lote sono, longeke asehlulele ngalakubona ngemehlo.

 2. Jesu wasiyala kutsi senteni, futsi sitawucoca ngani kulesihloko?

² Onkhe malanga, siba nemibono letsite ngalabanye. Kodvwa njengoba sinesono, asikhoni kuba nemibono lekahle ngebantfu njengobe kwenta Jesu. Tintfo lesitibonako tingasenta sehlulele labanye. Ngesikhatsi Jesu alamhlabeni, watsi: “Yekelani kwehlulela ngalenikubona ngaphandle, kodvwa yehlulelani ngendlela lelungile.” (Joh. 7:24) Kuyacaca kutsi Jesu ufuna sifane naye, singabehluleli labanye ngalesibonako. Kulesihloko, sitawucoca ngetintfo letintsatfu bantfu labanyenti labavame kwehlulela labanye ngato: buve, umcebo, kanye neminyaka umuntfu lanayo. Esimeni ngasinye, sitawufundza ngetindlela lesingalalela ngato umtsetfo waKhristu wekutsi singabehluleli labanye ngaloko lesikubonako.

3, 4. (a) Yini leyenta umphostoli Phetro washintja umbono labenawo ngebantfu labebangesiwo emaJuda? (Buka sitfombe lesisekucaleni kwalesihloko.) (b) Nguliphi liciniso lelisha Jehova lasita Phetro kutsi alicondze?

³ Cabanga kutsi umphostoli Phetro wativa njani ngesikhatsi acelwa kutsi aye eKhesariya ekhaya laKhoneliyuse lobekangesuye umJuda. (Imis. 10:17-29) Njengalamanye emaJuda angesikhatsi sakhe, Phetro wakhula ati kutsi bantfu labangesiwo emaJuda bangcolile. Kodvwa kwenteka tintfo letashintja indlela labecabanga ngayo. Nasi sibonelo, Phetro wabona umbono. (Imis. 10:9-16) Yini Phetro layibona? Wabona indvwangu lebeyinetilwane lebetingcolile yehliselwa kuye futsi weva livi lelivela ezulwini litsi: “Phetro, sukuma uhlabe udle!” Phetro akazange avume. Ngemuva kwaloko lelivi lelivela ezulwini latsi: “Yekela kubita loko Nkulunkulu lakuhlantile ngekutsi kungcolile.” Nakavuka, Phetro bekangakucondzi loko lelivi belimtjela kona. Kwatsi kusenjalo, kwefika titfunywa letibuya kuKhoneliyuse. Umoya longcwele wacondzisa Phetro kutsi aye ekhaya laKhoneliyuse, futsi wenta njalo.

⁴ Phetro bekangeke aye ekhaya laKhoneliyuse kube bekehlulela ngalakubona ngemehlo. EmaJuda bekangayi emakhaya ebantfu betive. Kungani Phetro aya ekhaya laKhoneliyuse ngisho noma lubandlululo belusenhlitiyweni yakhe? Phetro watsintfwa ngulombono lawubona kanye nesicinisekiso lasitfola ngemoya longcwele. Ngemuva kwekulalela lebekushiwo nguKhoneliyuse, Phetro wawasho ngekuciniseka emavi laphefumulelwe latsi: “Nyalo sengiyacondza kutsi Nkulunkulu akakhetsi, kodvwa etiveni tonkhe wonkhe umuntfu lomesabako nalowenta lokulungile uyemukeleka kuye.” (Imis. 10:34, 35) Lokucondza lokusha kwamjabulisa Phetro futsi bekutawatsintsa onkhe emaKhristu. Kanjani?

 5. (a) Yini Jehova lafuna onkhe emaKhristu ayicondze? (b) Yini lesingayenta ngisho noma silati liciniso?

⁵ Jehova wasebentisa Phetro kuze asite onkhe emaKhristu acondze kutsi akakhetsi. Akanendzaba nekutsi umuntfu usive sini noma nguluphi lulwimi lalukhulumako. Nkulunkulu wemukela noma ngubani lomesabako nalowenta intsandvo yakhe. (Gal. 3:26-28; Semb. 7:9, 10) Siyaciniseka kutsi uyati kutsi loko kuliciniso. Kutsiwani nangabe ukhulele endzaweni lapho khona kugcwele lubandlululo? Ngisho noma ungacabanga kutsi awukhetsi, kungenteka usababandlulula labanye enhlitiyweni yakho. Ngekuhamba kwesikhatsi, Phetro wababandlulula labanye ngisho noma aba nelilungelo lekukhombisa kutsi Jehova akakhetsi. (Gal. 2:11-14) Yini lesingayenta kuze silalele Jesu futsi siyekele kwehlulela labanye ngaloko lesikubonako?

 6. (a) Yini lengasisita sisuse lubandlululo etinhlitiyweni tetfu? (b) Lomunye umbiko lowabhalwa ngulomunye umzalwane lonemalungelo uveta kutsini ngaye?

⁶ Kuze sitihlole kutsi asibabandlululi yini labanye, kufanele sicatsanise indlela lesitiva ngayo naloko lesikufundza eVini laNkulunkulu. (Hla. 119:105) Ngalesinye sikhatsi singaludzinga nelusito lwalabanye, ngoba bona bangabona kutsi sinelubandlululo ngisho noma tsine singatiboni. (Gal. 2:11, 14) Kungenteka sesitayele kakhulu kutiva ngalendlela kangangekutsi asisanaki kutsi siyababandlulula labanye. Loko kwenteka kulomunye umzalwane lonemalungelo lamanyenti enhlanganweni yaJehova. Wabhala umbiko ngalomunye umndeni lobewusemsebentini wasikhatsi sonkhe. Lenhloko yalomndeni beyivela esiveni bantfu labanyenti labasibukela phasi. Lomzalwane wabhala tintfo letinhle ngalenhloko yalomndeni kodvwa waphindze watsi: “Ngisho noma awalesive lesi, indlela latiphatsa ngayo nendlela laphila ngayo isita labanye bacondze kutsi kuba walesive akusho kutsi kufanele utibukele phasi futsi utenyanye njengoba bantfu balesive benta.” Yini lesiyifundzako? Ngisho noma sinemalungelo lamanyenti enhlanganweni yaJehova, kufanele sitfobeke futsi sivumele labanye basisite sitihlole kutsi siyababandlulula yini labanye. Yini lenye lesingayenta?

 7. Singakhombisa njani kutsi siyativula tinhlitiyo tetfu?

⁷ Nangabe sivula tinhlitiyo tetfu, sitawuba nelutsandvo kunekutsi sibe nelubandlululo. (2 Khor. 6:11-13) Uvame kutihlanganisa nebantfu bebuve bakho kuphela yini? Nangabe kunjalo, yetama kutihlanganisa nabo bonkhe bantfu. Mema bazalwane nabodzadze labehlukahlukene kutsi basebente nawe ensimini noma ubamemele ekhaya lakho kuze udle nabo. (Imis. 16:14, 15) Nangabe wenta njalo, utabatsandza kakhulu futsi ngeke ubabandlulule. Manje asesicoce ngalokunye lokungasenta sehlulele labanye ngendlela lababukeka ngayo.

 8. Umbhalo waLevithikhusi 19:15 utsini ngekwehlulela umuntfu ngenca yekutsi unjingile noma uphuyile?

⁸ Ngalesinye sikhatsi singabehlulela labanye ngenca yekutsi baphuyile noma banjingile. Umbhalo waLevithikhusi 19:15 utsi: ‘Ungalahli lomphofu ngelicala uvune lomkhulu, kodvwa mehlulele ngekulunga makhelwane wakho.’ Singamehlulela njani umuntfu ngekutsi uphuyile noma unjingile?

 9. Nguliphi liciniso lelibuhlungu lelashiwo nguSolomoni, futsi lisifundzisani?

⁹ Umoya longcwele wenta Solomoni wabhala liciniso lelibuhlungu mayelana nebantfu labanesono. KuTaga 14:20 watsi: “Luphuya alutsandvwa ngisho nangumakhelwane walo; kodvwa sicebi sitsandvwa bantfu labanyenti.” Yini lesiyifundza kulombhalo? Nangabe singakacapheli, singafuna kuba bangani bebazalwane labanjingile, singasabanaki nekubanaka bazalwane betfu labaphuyile. Kungani kuyingoti kutsi sicatsanise labanye ngenca yetintfo labanato?

10. Nguyiphi inkinga Jakobe lasecwayisa ngayo?

¹⁰ Libandla lingehlukana nangabe sehlulela bantfu ngenca yekutsi banjingile noma baphuyile. Loko bekwenteka emabandleni angelikhulu lekucala futsi umfundzi Jakobe wecwayisa emaKhristu ngako. (Fundza Jakobe 2:1-4.) Akukafaneli sente tintfo letingehlukanisa emabandla lesikuwo. Singakubalekela njani kwehlulela labanye ngetintfo labanato?

11. ImiBhalo ibafundzisani bantfu labanjingile nalabaphuyile?

¹¹ Kufanele sibuke bazalwane betfu ngendlela Jehova lababuka ngayo. Jehova akabatsatsi bantfu njengalababalulekile ngenca yekutsi banjingile noma baphuyile. Singaba nebuhlobo lobuhle naJehova ngisho sinjingile noma siphuyile. Kuliciniso kutsi Jesu watsi “kutawuba matima ngemuntfu lonjingile kungena eMbusweni welizulu,” kodvwa akazange atsi angeke sekwenteke. (Mat. 19:23) Jesu waphindze watsi: “Niyajabula nine leneswele, ngobe uMbuso waNkulunkulu wenu.” (Luk. 6:20) Loko akusho kutsi bonkhe bantfu labaphuyile bebabusiswe ngalokukhetsekile futsi bonkhe bebatilalela timfundziso taJesu. Bantfu labanyenti labaphuyile bebangamlaleli. Liphuzu lelibalulekile kutsi akukafaneli sehlulele umuntfu ngenca yetintfo lanato.

12. Ngutiphi ticondziso imiBhalo letiniketa bantfu labanjingile nalabaphuyile?

¹² Kusibusiso kuba nebazalwane labanyenti labaphuyile nalabanjingile labatsandza Jehova futsi labamkhonta ngenhlitiyo yabo yonkhe. ImiBhalo itjela bantfu labanjingile kutsi ‘bangabeki litsemba labo emcebeni longatsembakali, kodvwa balibeke kuNkulunkulu.’ (Fundza 1 Thimothi 6:17-19.) LiBhayibheli liphindze liyale bonkhe bantfu baNkulunkulu labanjingile nalabaphuyile kutsi bangayitsandzi imali. (1 Thim. 6:9, 10) Nangabe sibona bazalwane betfu ngendlela Jehova lababona ngayo, angeke sibehlulelele ngetintfo labanato. Kodvwa kukahle yini kwehlulela umuntfu ngeminyaka yakhe?

13. ImiBhalo isifundzisani ngekuhlonipha bantfu lasebakhulile?

¹³ ImiBhalo isiyala njalo kutsi sihloniphe bantfu lesebakhulile. Umbhalo waLevithikhusi 19:32 utsi: “Niyawutitfoba embikwalasebakhulile, nibahloniphe, nidvumise Nkulunkulu wenu.” Sifike sitfole sicondziso lesifanako embhalweni weTaga 16:31 lotsi: “Budzala bungumvuzo wemphilo yekulunga timvu tingumchele walabalungile.” Nemphostoli Pawula wayala Thimothi kutsi angawakhahlameti emadvodza lasakhulile kodvwa awaphatse njengabobabe wakhe. (1 Thim. 5:1, 2) Thimothi bekufanele abavele futsi abahloniphe labakhulile ngisho noma bekaneligunya lelingetulu kwelabo.

14. Ngusiphi simo lesingenta kudzingeke seluleke umuntfu lomdzala kunatsi?

¹⁴ Yini lokufanele siyente nangabe umuntfu losakhulile ona ngemabomu noma asekela intfo lengamjabulisi Jehova? Jehova akambeketeleli umuntfu lowona ngemabomu, ngisho noma asakhulile futsi ahlonishwa. Naka simiso lesitfolakala embhalweni wa-Isaya 65:20 [NW] lotsi: “Soni sitawucalekiswa ngisho noma sineminyaka lelikhulu budzala.” Umbono waHezekeli uphindze ukhulume ngesimiso lesifanako. (Hez. 9:5-7) Ngako kufanele sinake kakhulu kuhlonipha Jehova Nkulunkulu Lophila Phakadze Naphakadze. (Dan. 7:9, 10, 13, 14) Nasenta njalo angeke sesabe kweluleka umuntfu lodzinga seluleko ngisho noma asakhulile ngemnyaka.​—Gal. 6:1.

15. Ngusiphi sifundvo lesisitfola kumphostoli Pawula ngekuhlonipha bazalwane labasebasha?

¹⁵ Kutsiwani ngebazalwane labasebasha? Kufanele yini sibahloniphe? Umphostoli Pawula wabhalela Thimothi losemusha watsi: “Ungavumeli muntfu kutsi edzelele busha bakho. Kodvwa ngekukhuluma, ngekutiphatsa, ngelutsandvo, ngekukholwa nangekuba msulwa, bani sibonelo kulabetsembekile.” (1 Thim. 4:12) Ngesikhatsi Pawula abhala lencwadzi, kungenteka Thimothi bekaseminyakeni yabo-30. Noma kunjalo, Pawula wamniketa imisebenti lebalulekile. Ngusiphi sifundvo lesisitfolako? Akukafaneli sibabukele phasi bazalwane labasebasha. Cabanga ngato tonkhe tintfo iNkhosi yetfu Jesu leyatenta nayineminyaka lengu-33 nje kuphela!

16, 17. (a) Labadzala belibandla bancuma njani kutsi umzalwane uyafaneleka kutsi abe yinceku lesebentako noma abe ngulomdzala welibandla? (b) Imibono kanye nemasiko etfu kungaphambana njani naloko lokushiwo liBhayibheli?

¹⁶ Kungenteka endzaweni lesikhulele kuyo abukelwa phasi emadvodza lasemasha. Nangabe kunjalo kungenteka emadvodza lamadzala angabate kuwabeka kutsi abe tinceku letisebentako noma labadzala belibandla. Bonkhe labadzala kufanele bakhumbule kutsi imibhalo ayisho kutsi umuntfu kufanele abe neminyaka lemingakhi kuze abe yinceku lesebentako noma lomdzala welibandla. (1 Thim. 3:1-10, 12, 13; Thit. 1:5-9) Imibhalo ayivumi kutsi labadzala babeke imitsetfo lesekelwe emasikweni abo. Labadzala akukafaneli behlulele emadvodza lasemasha basebentisa imibono yabo, kodvwa kufanele basebentise liVi laNkulunkulu.​—2 Thim. 3:16, 17.

¹⁷ Nangabe labadzala belibandla bangatisebentisi timiso letiseVini laNkulunkulu letimayelana nekubekwa kwetinceku letisebentako nemadvodza lamadzala, bangavimbela bazalwane labafanelekako kutsi batuswe. Kulelinye live, lenye inceku lesebentako beyiyenta kahle yonkhe imisebenti lebalulekile lebeyinikwe yona. Labadzala bavumelana kutsi ikwenta konkhe lokushiwo liBhayibheli kuze ikufanelekele kuba ngulomdzala. Nobe kunjalo, lamanye emadvodza lamadzala lasakhulile atsi lomzalwane ubonakala amncane kakhulu kutsi angaba ngulomdzala. Lokubuhlungu kutsi lomzalwane akazange abekwe kutsi abe ngulomdzala ngenca yendlela labebukeka ngayo. Imibiko iveta kutsi loku kuyenteka ngisho nakulamanye emave. Kubaluleke kakhulu kutsi setsembele eBhayibhelini hhayi emasikweni noma emibonweni yetfu. Nasenta njalo sitawube silalela Jesu futsi ngeke sehlulele labanye ngendlela lababukeka ngayo.

18, 19. Yini lokudzingeka siyente kuze sibone bazalwane betfu ngendlela Jehova lababona ngayo?

¹⁸ Ngisho nobe sibantfu labanesono, singakhona kubona bantfu ngendlela Jehova lababona ngayo futsi singababandlululi. (Imis. 10:34, 35) Kodvwa kufanele sichubeke sitimisela futsi sisebentise tikhumbuto lesitifola eVini LaNkulunkulu. Nasenta njalo sitawube silalela umyalo waJesu lotsi singabehluleli labanye ngendlela lababukeka ngayo.​—Joh. 7:24.

¹⁹ Ngekushesha iNkhosi yetfu Jesu Khristu itawehlulela bonkhe bantfu, ngeke yehlulele ngalekubonako nobe lekuvako kodvwa itakwehlulela ngekulunga. (Isa. 11:3, 4) Loko kutawujabulisa kakhulu!