Lalela Belusi BaJehova

1, 2. Kungani Jehova aticatsanisa nemelusi?

JEHOVA uticatsanisa nemelusi. (Hez 34:11-14) Loku kusisita sicondze kutsi Jehova unjani. Umelusi lonelutsandvo uyati kutsi kungumtfwalo wakhe kunakekela kuphila kwetimvu letingephansi kwakhe. Utiyisa emadlelweni nasemitfonjeni yemanti (Hla. 23:1, 2); utigadza imini nebusuku (Luk. 2:8); ativikele etilwaneni letiyingoti (1 Sam. 17:34, 35); ugona emazinyane ngemikhono yakhe (Isa. 40:11); ufuna letedukile aphindze anakekele naletilimele.—Hez. 34:16.

² Endvulo ngenca yekutsi bantfu baJehova bebabelusi futsi babalimi, bebakucondza kuticatsanisa kwaJehova Nkulunkulu nemelusi lonelutsandvo. Bebati kutsi timvu tidzinga kunakekelwa kute tiphile. Ngendlela lefanako, bantfu badzinga kunakekelwa. (Mak. 6:34) Ngaphandle kwekunakekelwa nekuholwa nguJehova, bantfu bangasokola. Abakwati lokulungile nalokubi futsi abanaye longabavikela. ‘Banjengetimvu letite umelusi’ futsi letihlakatekile. (1 Khos. 22:17) Nome kunjalo, Jehova utinakekela ngelutsandvo tidzingo tebantfu bakhe.

 3. Sitawucoca ngani kulesihloko?

³ Lokufaniswa kwaJehova nemelusi kusasebenta nalamuhla. Jehova usachubeka nekubanakekela bantfu bakhe labanjengetimvu. Asesibone indlela lacondzisa ngayo timvu takhe lamuhla nendlela lenetisa ngayo tidzingo tato. Sitawuphindze sicoce ngekutsi yini timvu letingayenta nangabe Jehova aticondzisa.

 4. Jesu udlala yiphi indzima ekunakekeleni timvu taJehova?

⁴ Jehova ubeke Jesu kutsi abe yiNhloko yelibandla lebuKhristu. (Ef. 1:22, 23) ‘Njengobe angumelusi lokahle,’ Jesu ukhombisa bunguye baBabe wakhe, injongo yakhe kanye naloko lakutsandzako. Jesu waze ‘wanikela ngemphefumulo wakhe ngenca yetimvu.’ (Joh. 10:11, 15) Inhlawulo yaKhristu isibusiso lesikhulu kubantfu. (Mat. 20:28) Kungako kuyinjongo yaJehova kutsi ‘nome ngubani lokholwa nguJesu angabhubhi, kodvwa abe nekuphila lokuphakadze.’—Joh. 3:16.

5, 6. (a) Ngubani Jesu lamkhetsile kute anakekele timvu takhe, futsi yini timvu letingayenta kute tizuze kulelilungiselelo? (b) Ngusiphi sizatfu lesiyinhloko sekufuna kulalela labadzala ebandleni?

⁵ Timvu tikhombisa njani kutsi Jesu Khristu unguMelusi wato Lokahle? Jesu watsi: “Timvu tami tiyalilalela livi lami, nami ngiyatati, futsi tiyangilandzela.” (Joh. 10:27) Kulalela livi leMelusi Lokahle kusho kulandzela ticondziso takhe ngaso sonkhe sikhatsi. Loku kuhlanganisa kulalela labo lababekile kute beluse umhlambi. Jesu washo kutsi baphostoli kanye nebafundzi bakhe bebatawuchubeka benta lomsebenti lebekawucalile. Kwakufanele ‘bafundzise’ futsi ‘bondle emawundlu akhe.’ (Mat. 28:20; fundza Johane 21:15-17.) Njengobe tindzaba letimnandzi tatichubeka tishunyayelwa, linani lebafundzi landza, ngako Jesu wahlela kutsi emaKhrsitu lavutsiwe eluse emabandla.—Ef. 4:11, 12.

⁶ Nakakhuluma nalabadzala belibandla ngelikhulu lekucala e-Efesu, umphostoli Pawulu wabatjela kutsi umoya longcwele ubabekile kute babe babonisi, ‘beluse libandla laNkulunkulu.’ (Imis. 20:28) Nalamuhla babonisi labangemaKhristu babekwa ngumoya longcwele ngekuvumelana naloko lokushiwo yimiBhalo lephefumulelwe. Kungako uma silalela babonisi labangemaKhristu sisuke sikhombisa kutsi siyamhlonipha Jehova kanye naJesu, Belusi labakhulu kakhulu. (Luk. 10:16) Lesi sizatfu lesiyinhloko sekutitfoba ngekutitsandzela kulabadzala. Nome kunjalo, kunaletinye tizatfu letenta kutsi silandzele kucondzisa kwabo.

 7. Labadzala bakusita njani kute uhlale unebuhlobo lobuhle naJehova?

⁷ Labadzala nabaniketa sicondziso, sikhutsato nesiyalo kumaKhristu basisekela emiBhalweni nobe etimisweni temiBhalo. Inhloso yabo nabaniketa sicondziso akusho kutsi bakhetsela bazalwane babo indlela lekufanele baphile ngayo. (2 Khor. 1:24) Kunaloko, nawaniketa emaKhristu lakanye nawo ticondziso letisemiBhalweni, loko kuwasita kutsi atsatse tincumo letikahle kute kutfutfuke kuhleleka nebunye ebandleni. (1 Khor. 14:33, 40) Labadzala ‘balindza imiphefumulo’ ngemcondvo wekutsi banesifiso sekusita lilunga ngalinye lelibandla kutsi lihlale linebuhlobo lobuhle naJehova. Kungako bashesha kusita umzalwane nobe dzadze lobonakala nobe losavele “atsatse sinyatselo lesingasiso.” (Gal. 6:1, 2; Juda 22) Leti akusito yini tizatfu letinhle ‘tekulalela labo labasiholako’?—Fundza Hebheru 13:17.

 8. Labadzala bawuvikela njani umhlambi waNkulunkulu?

⁸ Umphostoli Pawula, umelusi lonakekelako wabhalela bazalwane baseKholose watsi: “Cinisekani kutsi kubete umuntfu lonitfumba ngekuhlakanipha kwebantfu, nekuyenga lokulite ngemasiko ebantfu, ngetintfo letitsatfwa njengaletibalulekile eveni kodvwa hhayi kuKhristu.” (Khol. 2:8) Lesecwayiso sisikhombisa lesinye sizatfu lesihle sekulalela seluleko semBhalo lesisiniketwa ngulabadzala. Bavikela umhlambi kunobe ngabe yini lengase ibalahlekisele kukholwa kwabo. Umphostoli Phetro wecwayisa ‘ngebaphrofethi bemanga’ “nebafundzisi bemanga” labebatawetama ‘kuholela labo lababutsakatsaka’ ekwenteni lokubi. (2 Phet. 2:1, 14) Nalamuhla labadzala kufanele banikete tecwayiso letifana naleti nakunesidzingo. Njengobe bangemadvodza langemaKhristu lavutsiwe, banalokuhlanganwe nako ekuphileni. Ngetulu kwaloko ngaphambi kwekutsi babekwe, bakhombise kutsi bayicondza kahle imiBhalo futsi kuyabafanela kufundzisa emaciniso eliBhayibheli. (1 Thim. 3:2; Thit. 1:9) Kuvutfwa kwabo, kwenta tintfo ngekucondza, nekuhlakanipha lokusekelwe eBhayibhelini, kubasita kutsi bawucondzise kahle umhlambi.

 9. Jesu ulicondzisa futsi alondle njani libandla lebuKhristu lamuhla?

⁹ Jehova usebentisa inhlangano yakhe kute awaphe kudla kwakamoya onkhe emaKhristu emhlabeni wonkhe. Teluleko letinyenti temiBhalo sititfola etincwadzini tetfu. Ngetulu kwaloko, ngaletinye tikhatsi inhlangano iniketa ticondziso ngalokucondzile kulabadzala emabandleni, kungaba ngetincwadzi nobe ngebabonisi labajikeletako. Ngaletindlela, timvu titfola ticondziso leticacile.

10. Ngumuphi umtfwalo belusi labanakekelako labanawo nangabe imvu seyitehlukanisile nemhlambi?

¹⁰ Belusi labakahle banemtfwalo wekuvikela nekunakekela timvu. Labadzala labangemaKhristu banaka ngalokukhetsekile labo lababutsakatsaka ekukholweni nobe labo labagulako emoyeni. (Fundza Jakobe 5:14, 15.) Labanye kulaba kungenteka sebatehlukanisile nemhlambi futsi bayekela nekwenta imisebenti yebuKhristu. Nakunjalo, angeke yini lomdzala lonakekelako ente konkhe langakwenta kute afune imvu ngayinye lelahlekile futsi ayicele kutsi ibuyele emhlambini, lokulibandla? Nakanjani, angakwenta loko! Jesu watsi: “Babe losezulwini akafisi kutsi kubhubhe ngisho namunye kulaba labanjengebantfwana.”—Mat. 18:12-14.

11. Kungani kungahle kuvivinye kulabanye kulandzela kucondzisa kwalabadzala?

¹¹ Jehova naJesu baBelusi labete sono kantsi belusi labababekile kutsi banakekele emabandla banesono. Ngenca yaloko, kuyavivinya kulabanye kutsi balandzele kucondzisa kwalabadzala. Labanye bangahle bacabange batsi: ‘Banesono njengatsi. Kungani kufanele silalele teluleko tabo?’ Kuliciniso kutsi labadzala banesono, kodvwa kufanele sibe nembono lokahle ngemaphutsa nangebutsakatsaka babo.

12, 13. (a) Endvulo, ngumaphi emaphutsa lentiwa tinceku taJehova lebetiniketwe imisebenti lemikhulu? (b) Kungani emaphutsa emadvodza lebekaniketwe imisebenti lemikhulu abhalwa eBhayibhelini?

¹² ImiBhalo iwaveta ngalokucondzile emaphutsa alabo Jehova labasebentisa kutsi bahole bantfu esikhatsini lesendlulile. Nasi sibonelo: Davide abegcotjwe kutsi abe yinkhosi futsi angumholi wema-Israyeli. Kodvwa wawela esilingweni waba nelicala lekuphinga nelekubulala. (2 Sam. 12:7-9) Asewucabange nangemphostoli Phetro. Nanobe abeniketwe imisebenti lemikhulu ebandleni lebuKhristu ngelikhulu lekucala, wenta emaphutsa lamakhulu. (Mat. 16:18, 19; Joh. 13:38; 18:27; Gal. 2:11-14) Ngaphandle kwaJesu, kute bantfu kusukela ku-Adamu na-Eva labete sono.

¹³ Kungani Jehova avumela babhali beliBhayibheli kutsi babhale ngemaphutsa etinceku takhe lebekatisebentisa? Letinye tizatfu taloko, abekhombisa kutsi angamsebentisa umuntfu lonesono kutsi ahole bantfu bakhe. Ecinisweni nguloko lahlale akwenta. Ngako-ke, akukafaneli kutsi sisebentise emaphutsa alabo labaholako emkhatsini wetfu lamuhla njengetaba tekukhonona ngabo nobe kungabi nendzaba nendzima yabo. Jehova ufuna kutsi sibahloniphe futsi sibalalele labazalwane.—Fundza Eksodusi 16:2, 8.

14, 15. Yini lesingayifundza endleleni Jehova lakhuluma ngayo nebantfu bakhe endvulo?

¹⁴ Kubalulekile kulalela labo labaholako emkhatsini wetfu lamuhla. Asewucabange ngendlela Jehova lakhuluma ngayo nebantfu bakhe ngesikhatsi babhekene nebumatima endvulo. Ngesikhatsi bantfu baka-Israyeli baphuma eGibhithe yasendvulo, Nkulunkulu wasebentisa Mosi na-Aroni kute anikete bantfu bakhe ticondziso. Kute asindze esishayweni selishumi, ema-Israyeli bekufanele alalele sicondziso sekutsi abe nesidlo lesikhetsekile futsi ingati yemvu lebulewe ibhocwe etinsikeni temnyango nangetulu kwawo kuleyondlu lekuyawube kudlelwa kuyo. Leso sicondziso asizange site ngelivi lelivela ezulwini. Esikhundleni saloko, bekufanele balalele emadvodza lamadzala aka-Israyeli, nawo labetfola ticondziso kuMosi. (Eks. 12:1-7, 21-23, 29) Kuleto timo, Mosi kanye nemadvodza lamadzala ngibo labaniketa umyalo waJehova kubantfu bakhe. Lamuhla Jehova usebentisa labadzala labangemaKhristu kutsi banikete imiyalo yakhe.

¹⁵ Mhlawumbe ungacabanga ngaletinye tikhatsi letinyenti emlandvweni weliBhayibheli ngesikhatsi Jehova aniketa ticondziso letisindzisa kuphila asebentisa bantfu nome tingilosi. Kuto tonkhe letikhatsi, Nkulunkulu wabona kufanele kusebentisa labanye kute bamkhulumele. Letitfunywa takhuluma egameni lakhe futsi tatjela bantfu loko lobekufanele bakwente kute basindze ngetikhatsi letimatima. Ngeke yini sesicabange kutsi Jehova angahle ente intfo lefana nalena nge-Amagedoni? Lamuhla labadzala labaniketwe umsebenti wekumelela Jehova nobe inhlangano yakhe, kufanele bacikelele kutsi bangalisebentisi kabi ligunya labaniketwe lona.

16. Nguliphi “livi” lokufanele sililalele?

¹⁶ Bantfu baJehova ‘bangumhlambi munye’ ngephansi ‘kwemelusi munye,’ Jesu Khristu. (Joh. 10:16) Jesu wetsembisa kutsi utawuba nebafundzi bakhe “onkhe emalanga kute kube sekupheleni kwalelive.” (Mat. 28:20) Njengobe ayiNkhosi yasezulwini, nguye locondzisa tonkhe tintfo letitawenteka ngaphambi kwekutsi ete atewubhubhisa live laSathane. Kute sihlale simunye futsi sivikelekile ekhatsi kwemhlambi waNkulunkulu, sidzinga ‘kulalela livi lelisemvakwetfu’ lelisikhombisa indlela lokufanele sihambe ngayo. ‘Lelivi’ lifaka ekhatsi loko lokushiwo ngumoya longcwele waNkulunkulu njengobe sikutfola eBhayibhelini kanye naloko Jehova naJesu labakushoko basebentisa labo labababeke kutsi babe belusi.—Fundza Isaya 30:21; Sembulo 3:22.

17, 18. (a) Nguyiphi ingoti lengavelela umhlambi, kodvwa yini lesingaciniseka ngayo? (b) Kutawucocwa ngani esihlokweni lesilandzelako?

¹⁷ LiBhayibheli litsi Sathane ‘uhambahamba njengelibhubesi lelibhodlako, lelifuna lotsite lelingamshwabadzela.’ (1 Phet. 5:8) Njengesilwane sasendle lesilambile, unyonyobela umhlambi alindze sikhatsi lesikahle kute ahlasele imvu lengakanaki nome ledukile. Lesi ngulesinye sizatfu lesisibangela kutsi sihlale sisedvute kakhulu nawo wonkhe umhlambi kanye ‘nemelusi nembonisi wemiphefumulo yetfu.’ (1 Phet. 2:25) Kulabo labatawusindza ekuhluphekeni lokukhulu, Sembulo 7:17 sitsi: “LiWundlu [Jesu] . . . litawubelusa, libaholele emitfonjeni yemanti ekuphila. NaNkulunkulu utakwesula tonkhe tinyembeti emehlweni abo.” Ngusiphi nje setsembiso lebesingaba ncono kwendlula lesi?

¹⁸ Njengobe sesicoce ngendzima lebalulekile yalabadzala labangemaKhristu lababelusi lababekiwe, lomdzala ngamunye wenta kahle ngekutibuta kutsi: Ngingaciniseka njani kutsi ngitiphatsa ngendlela lefanele timvu taJesu? Imphendvulo yalombuto kutawucocwa ngayo esihlokweni lesilandzelako.