Nkulunkulu Uyayikhumbula Indvodzana Yakhe

JESU wakhala ngesikhatsi umngani wakhe Lazaro afile. Ucabanga kutsi Jehova weva buhlungu yini ngesikhatsi Jesu ahlupheka futsi afa?— LiBhayibheli litsi Nkulunkulu ‘uyadzabuka’ futsi ‘eve buhlungu’ ngetintfo letentekako.​—Tihlabelelo 78:40, 41; Johane 11:35.

Ucabanga kutsi Jehova weva buhlungu lobungakanani ngesikhatsi abuka INdvodzana yakhe layitsandzako ifa?— Jesu bekaciniseka kutsi Nkulunkulu bekangeke amkhohlwe. Kungako emavi akhe ekugcina ngembikwekutsi afe atsi: ‘Babe, ngibeka [kuphila] kwami etandleni takho.’​—Lukha 23:46.

Jesu bekati kutsi nakanjani utawuvuswa nekutsi bekangeke ashiywe ethuneni. Ngemuva kwekutsi Jesu avuswe ethuneni umphostoli Phetro wacaphuna loko bekubhalwe eBhayibhelini ngaJesu, nakatsi: “Abengeke ashiywe eThuneni, nekutsi inyama yakhe beyingeke ibole.” (Imisebenti 2:31, Tihlabelelo 16:10) Sidvumbu saJesu asizange sonakale ethuneni, nobe lokusho kutsi asizange sibole siphindze sinuke.

Ngesikhatsi Jesu asemhlabeni watjela ngisho nebafundzi bakhe kutsi bekangeke afe sikhatsi lesidze. Wabachazela kutsi ‘utawubulawa bese uyavuswa ngelilanga lesitsatfu.’ (Lukha 9:22) Loko kusho kutsi bafundzi baJesu bekungakafaneli bamangale ngesikhatsi Jesu avuswa. Bamangala yini?— Ase sicoce ngaloko.

Bekucishe kube yinsimbi yesitsatfu ntsambama ngaLesihlanu ngalesikhatsi Umfundzisi Lomuhle Kakhulu afa elugodvweni. Josefa, ulilunga leSanhedrini lelinjingile futsi bekangakuveti ebaleni kutsi uyakholwa kuJesu. Ngesikhatsi eva kutsi Jesu ufile, uyahamba aye kuPilatu umbusi wemaRoma. Uyacela kutsi atsatse sidvumbu saJesu lesiselugodvweni ayewusingcwaba. Ngemuva kwaloko, Josefa wetfwala sidvumbu saJesu waya naso ensimini lapho kunelithuna khona, lokuyindzawo lokungcwatjwa khona bantfu labafile.

Ngemuva kwekutsi lesidvumbu sifakwe ethuneni, kugicitelwa litje lelikhulu emnyango walo. Ngaleyondlela lelithuna liyavalwa. Manje Lisontfo, lilanga lesitsatfu. Lisengakaphumi lilanga lokusho kutsi kusesemnyama. Kunemandvodza lagadze lithuna. Baphristi labakhulu ngibo labatfume lamadvodza kutsi ente loko. Uyati yini kutsi kungani?—

Baphristi nabo beva kutsi Jesu watsi utawuvuswa. Kuze bavimbele bafundzi baJesu kutsi bangebi sidvumbu saJesu bese batsi uvusiwe, baphristi babeka bogadzi kutsi bagadze lelithuna. Kungakalindzeleki umhlaba ucala kutamatama. Ebumnyameni kuvela kukhanya. Yingilosi yaJehova. Emasotja etfuke kangangekutsi awakhoni ngisho nekunyakata. Ingilosi iya kulelithuna ifike ikhweshise lelitje. Lelithuna alinalutfo.

Kunjengobe umphostoli Phetro asho ngemuva kwesikhatsi kwentekile loko, nakatsi: “Nkulunkulu wamvusa Jesu.” (Imisebenti 2:32) Nkulunkulu wavusa Jesu kulabafile wamniketa umtimba lofanana naloyo bekanawo nakasezulwini. Ngesikhatsi avuswa waniketwa umtimba wemoya lofanana nemtimba wetingilosi. (1 Phetro 3:18) Kuze bantfu bakhone kubona Jesu bekufanele atentele umtimba wenyama. Wenta loko yini Jesu?— Ase sicoce ngaloko.

Nyalo lilanga seliyaphuma. Emasotja sekahambile. Mariya waseMagdala kanye nalabanye bafundzi baJesu lababafati basendleleni baya kulelithuna. Batsi kulomunye nalomunye: “Ngubani lotasigicitela lelitje lelivale umnyango welithuna?” (Makho 16:3) Nabefika kulelithuna batfola kutsi lelitje selivele ligicitiwe. Lelithuna alisanalutfo. Sidvumbu saJesu asisekho. Ngaso leso sikhatsi, Mariya waseMagdala uyagijima ayofuna labanye baphostoli baJesu.

Lalabanye bafati bona bahlala eceleni kwalelithuna. Bayatibuta: ‘Sikuphi vele sidvumbu saJesu?’ Bangakalindzeli kuchamuka emadvodza lamabili agcoke timphahla letikhatimulako. Atingilosi. Letingilosi titsi kulabafati: ‘Nimfunelani Jesu lapha? Uvusiwe. Hambani ngekushesha futsi nitjele bafundzi bakhe.’ Ungase ucabange kutsi labafati bagijima kakhulu kangakanani. Nabasendleleni bahlangana nendvodza. Uyati kutsi ingubani lendvodza?—

NguJesu, futsi unemtimba wenyama. Naye utsi kulabafati: ‘Hambani masinyane, niyobikela bafundzi bami.’ Labafati bajabule kakhulu. Bayabatfola labafundzi futsi bayabatjela kutsi: ‘Jesu uvusiwe! Simbonile!’ Mariya abesavele amtjelile Phetro naJohane ngalelithuna lelingenalutfo. Nyalo bete kulo njengobe ubona kulesitfombe. Babuka letindvwangu lebetigocotele Jesu, kodvwa abati kutsi kwentekeni. Bayafuna kukholwa kutsi Jesu uyaphila, kodvwa leto tindzaba letimnandzi kakhulu kangangekutsi kulukhuni kutikholwa.

Kamuva ngaleloSontfo, Jesu uvela kubafundzi bakhe lababili labahamba emgwacweni loya edolobheni i-Emawusi. Jesu ukhuluma aphindze ahambe nabo, kodvwa ababoni kutsi nguye ngobe akekho emtimbeni labamati ngawo. Baze bambona ngesikhatsi athantaza futsi aba nesidlo nabo. Labafundzi bajabule kakhulu kangangekutsi bayashesha bahambe indzawo lendze babuyele eJerusalema. Kungenteka kutsi kwakungemuva kwesikhashana kwenteke loko lapho Jesu wativeta kuPhetro kuze amkhombise kutsi uyaphila.

Kamuva ngaleloSontfo ntsambama, bafundzi baJesu labanyenti bahlangana ndzawonye ekamelweni lelitsite. Iminyango ikhiyiwe. Kungakalindzeleki, babona Jesu sewunabo kulelikamelo. Nyalo sebayati kutsi Umfundzisi Lomuhle Kakhulu uvusiwe. Cabanga indlela labajabule kakhulu ngayo!​—Matewu 28:1-15; Lukha 24:1-49; Johane 19:38–20:21.

Emalangeni langu-40 avusiwe, Jesu wavela ngemitimba leyehlukahlukene kuze akhombise bafundzi bakhe kutsi sewuyaphila. Ngemuva kwaloko uyahamba emhlabeni futsi ubuyela kuBabe wakhe ezulwini. (Imisebenti 1:9-11) Ngekushesha bafundzi batjela wonkhe umuntfu kutsi Nkulunkulu umvusile Jesu kulabafile. Ngisho nome baphristi bashaya labafundzi baphindze babulala labanye babo, bayachubeka nekushumayela. Bayati kutsi noma bangafa Nkulunkulu utabakhumbula njengobe ayikhumbula neNdvodzana yakhe.

Labafundzi baJesu bekucala bebehluke kakhulu kubantfu labanyenti balamuhla. Labantfu balamuhla bacabanga kuphela ngabologwaja nemacandza lanemibalabala ema-Easter ngesikhatsi semnyaka Jesu lavuswa ngaso. Kute liBhayibheli lelikushoko ngabologwaja nangemacandza ema-Easter. LiBhayibheli likhuluma ngekukhonta Nkulunkulu.

Singalingisa bafundzi baJesu ngekutjela bantfu kutsi Nkulunkulu wenta intfo lenhle ngekuvusa iNdvodzana yakhe. Akudzingeki sesabe ngisho nobe bantfu bangatsi batasibulala. Nakwenteka sifa, Jehova utasikhumbula aphindze asivuse njengobe enta kuJesu.

Asijabuli yini ngekwati kutsi Nkulunkulu uyabakhumbula labo labamkhontako futsi utabavusa kulabafile?— Kwati loko kufanele kusente sifune kwati kutsi singamjabulisa njani Nkulunkulu. Bewati yini kutsi singakhona kujabulisa Nkulunkulu?— Ase sicoce ngaloku ngalokulandzelako.