Shumayela Tindzaba Letimnandzi Temusa Lomkhulu

1, 2. Umphostoli Pawula wakhombisa njani kutsi uyabonga ngemusa waNkulunkulu?

NGEKWETSEMBEKA, umphostoli Pawula watsi: “Kimi umusa [waNkulunkulu] wawungasilo lite.” (Fundza 1 Khorinte 15:9, 10.) Pawula bekati kutsi kute lakwentile kute atfole umusa lomkhulu waNkulunkulu futsi bekungakafaneli awutfole ngobe esikhatsini lesendlulile abehlupha emaKhristu.

² Nasekatawufa, Pawula wabhalela Thimothi incwadzi watsi: “Ngiyambonga Khristu Jesu iNkhosi yetfu longinike emandla, ngobe ungibone ngetsembekile ngekunginika umsebenti.” (1 Thim. 1:12-14) Bewuyini lomsebenti? Watjela labadzala basebandleni lase-Efesu kutsi lomsebenti bewufaka ekhatsi ini. Watsi: “Umphefumulo wami awusilutfo kimi, yingci nje nangingacedza indzima yami nemsebenti lengiwunikwe yiNkhosi Jesu, lokukufakaza ngetindzaba letimnandzi temusa waNkulunkulu.”​—Imis. 20:24.

 3. Ngumuphi umsebenti lokhetsekile Pawula laniketwa wona? (Buka sitfombe lesisekucaleni kwalesihloko.)

³ Ngutiphi ‘letindzaba letimnandzi’ lebetishunyayelwa nguPawula lebetibonisa umusa waJehova? Watsi kumaKhristu ase-Efesu: “Nivile ngemsebenti wemusa waNkulunkulu lengiphatsiswe wona ngenca yenu.” (Ef. 3:1, 2) Pawula abephatsiswe umsebenti wekushumayela tindzaba letimnandzi kubantfu betive kutsi nabo bebatawuhlanganiswa nalabo labatawuba kanye naKhristu uMbusweni webuMesiya. (Fundza Efesu 3:5-8.) Njengoba abeshumayela ngemdlandla, Pawula wawabekela sibonelo lesihle kakhulu emaKhristu alamuhla futsi wakhombisa kutsi umusa waNkulunkulu “wawungasilo lite” kuye.

4, 5. Kungani singatsi “letindzaba letimnandzi teMbuso” tiyafana netindzaba letimnandzi “temusa waNkulunkulu”?

⁴ Kulesikhatsi sekuphela, bantfu baJehova baniketwe umyalo wekushumayela “letindzaba letimnandzi teMbuso . . . emhlabeni wonkhe, kuze kube bufakazi etiveni tonkhe.” (Mat. 24:14) Lomlayeto lesiwushumayelako uphindze ubitwe ngekutsi “tindzaba letimnandzi temusa waNkulunkulu,” ngesizatfu sekutsi tonkhe tibusiso lesinelitsemba lekutitfola ngeMbuso tita ngemusa waJehova loboniswa ngaKhristu. (Ef. 1:3) Uyashumayela yini ngenkhutsalo kute ukhombise kubonga ngemusa waJehova njengoba Pawula enta?​—Fundza Roma 1:14-16.

⁵ Esihlokweni lesisuka kuso, sifundzile kutsi sisitakala njani ngetindlela letehlukehlukene emseni waJehova njengobe sitoni. Ngako, kufanele sitjele bonkhe bantfu ngendlela Jehova lasikhombisa ngayo lutsandvo lwakhe nekutsi umuntfu ngamunye angasitakala njani kulo. Ngutiphi nje tici temusa waNkulunkulu lokufanele sisite labanye kutsi nabo batijabulele?

6, 7. Nasichazela bantfu ngenhlawulo, sisuke sitishumayela njani tindzaba letimnandzi temusa waNkulunkulu?

⁶ Kulelive lelikhululeke kakhulu, bantfu abasasitsatsi sono njengentfo lelihlazo, kangangekutsi labanye babo abasiboni nesidzingo sekukhululwa kuso. Ngesikhatsi lesifanako, labanyenti bayabona kutsi imphilo yekukhululeka kakhulu ayiyiletsi injabulo sibili. Labanye babo abacondzi kutsi siyini sono, sisitsintsa njani kanye nekutsi yini lesiyidzingako kute sikhululwe kuso, kuze kube ngulapho bacoca naBoFakazi BaJehova. Bantfu labetsembekile bayakhululeka nabafundza kutsi ngemusa wakhe lomkhulu nelutsandvo lwakhe, Jehova watfumela iNdvodzana yakhe kutsi isihlawule esonweni kanye nemphumela waso lokufa.​—1 Joh. 4:9, 10.

⁷ Mayelana neNdvodzana yaJehova letsandzekako, umphostoli Pawula wabhala watsi: “Ngaye [Jesu], siyakhululwa ngenhlawulo leyentiwa ngengati yakhe, lokusho kutsetselelwa kwetiphambeko tetfu ngekuvumelana nebukhulu bemusa waNkulunkulu.” (Ef. 1:7) Inhlawulo yaKhristu ibufakazi bendlela Nkulunkulu lasitsandza ngayo futsi ibonisa bukhulu bemusa wakhe. Kuyasijabulisa kufundza kutsi nangabe sibonisa kukholwa engatini yaJesu leyacitseka, tono tetfu titawutsetselelwa futsi nanembeza wetfu utawuhlantwa. (Heb. 9:14) Leto tindzaba letimnandzi sibili lesingatitjela labanye.

 8. Kungani bantfu labanesono badzinga kubuyisana naNkulunkulu?

⁸ Sinemsebenti wekutjela labanye bantfu kutsi bangaba nebudlelwane lobuhle neMdali wabo. Ngaphambikwekutsi bantfu babonise kukholwa emhlatjelweni waJesu, Nkulunkulu usuke abatsatsa njengetitsa takhe. Umphostoli Johane wabhala watsi: “Lokholwa yiNdvodzana utawutfola kuphila lokuphakadze; longayilaleli iNdvodzana ngeke akutfole kuphila, kodvwa lulaka lwaNkulunkulu lusetikwakhe.” (Joh. 3:36) Kuyajabulisa kutsi umhlatjelo waKhristu wenta kube melula kutsi bantfu babuyisane naNkulunkulu. Pawula wachaza watsi: “Nine lebenehlukanisiwe naNkulunkulu futsi nititsa naye ngobe tingcondvo tenu betinake imisebenti lemibi, sewunente nabuyisana naye ngemtimba wenyama waloyo lowafa.”​—Khol. 1:21, 22.

9, 10. (a) Ngumuphi umsebenti Khristu lawuniketa bomnakabo labagcotjiwe? (b) “Letinye timvu” tibasita njani bazalwane bato labagcotjiwe?

⁹ Khristu unikete bomnakabo labagcotjiwe labasemhlabeni loko Pawula lakubita ngekutsi ‘ngumsebenti wekubuyisana.’ Nakachaza loku, Pawula wabhalela emaKhristu lagcotjiwe angelikhulu lekucala leminyaka watsi: “Kodvwa tonkhe tintfo tivela kuNkulunkulu, lowasenta sabuyisana naye ngaKhristu, nalowasinika lomsebenti wekubuyisana, lokukutsi ngaKhristu, Nkulunkulu wenta live labuyisana naye, wangalibaleli tono talo, futsi wasiphatsisa umlayeto wekubuyisana. Ngako singemancusa lamelele Khristu, kube shengatsi Nkulunkulu uncenga ngatsi. Njengobe simelele Khristu siyancenga sitsi: ‘Buyisanani naNkulunkulu.’”​—2 Khor. 5:18-20.

¹⁰ “Letinye timvu” tikutsatsa njengelilungelo kusita bazalwane bato labagcotjiwe kulomsebenti. (Joh. 10:16) Njengobe tititfunywa taKhristu, tinencenye lenkhulu ekufundziseni bantfu emaciniso laphatselene naNkulunkulu nekubasita bakhe buhlobo naye. Lona ngumsebenti lobalulekile wekufakaza ngetindzaba letimnandzi temusa waNkulunkulu.

11, 12. Kungani kutindzaba letimnandzi kubantfu kwati kutsi bangathantaza kuJehova?

¹¹ Bantfu labanyenti bayathantaza ngobe loko kubenta bative bancono, kodvwa abakholelwa mbamba kutsi Nkulunkulu uyayiva imithantazo yabo. Ngako kufanele bati kutsi Jehova ‘uva imithandazo ayiphendvule.’ Umhlabeleli Davide wabhala watsi: “Wena uva imithandazo uyiphendvule; bonkhe bantfu bafanele kuta kuwe ngenca yetono tabo. Ngesikhatsi tiphambuko tetfu tisehlula nguwe lositsetselelako.”​—Hla. 65:2, 3.

¹² Jesu watsi kubafundzi bakhe: “Nanicela nobe yini egameni lami, ngitawuyenta.” (Joh. 14:14) Kusebaleni-ke kutsi emagama latsi “nobe yini” asho nobe yini lehambisana nentsandvo yaJehova. Johane uyasicinisekisa: “Naku kuciniseka lesinako kuye, kutsi kunobe yini lesiyicela ngekwentsandvo yakhe, uyasiva.” (1 Joh. 5:14) Kuyintfo lenhle kufundzisa labanye kutsi umthantazo awusiyo intfo lesisita kutsi sicabange, kodvwa umthantazo uyindlela lemangalisako yekusondzela “esihlalweni sebukhosi semusa waNkulunkulu.” (Heb. 4:16) Ngekubafundzisa kutsi bathantaze ngendlela lekahle, kuMuntfu lofanele, futsi bathantazele tintfo letifanele, singabasita kutsi basondzelane naJehova futsi batfole kulondzeka ngetikhatsi tekucindzeteleka.​—Hla. 4:1; 145:18.

13, 14. (a) Nguliphi lilungelo lelimangalisako labagcotjiwe labatawuba nalo esikhatsini lesitako? (b) Ngumuphi umsebenti lomuhle labagcotjiwe labatawentela bantfu?

¹³ Umusa waJehova utawuchubeka usebenta ngisho nobe sekwendlule lelive lelibi. Abhekisela kulelilungelo lelingamangalisako Nkulunkulu lalinikete labangu-144 000, lababitelwa kutsi babuse naKhristu eMbusweni wakhe losezulwini, Pawula wabhala watsi: “Sihawu saNkulunkulu sikhulu, futsi ngenca yelutsandvo lwakhe lolukhulu lasitsandze ngalo, usente saphila kanye naKhristu nanobe besifile ngenca yetiphambeko​—nine nisindzisiwe ngenca yemusa waNkulunkulu. Ngetulu kwaloko, usivuse kanye kanye, wasihlalisa kanye kanye etindzaweni tasezulwini simunye naKhristu Jesu, kuze kutsi eveni lelitako asikhombise bukhulu bemusa wakhe ngebubele lanabo kitsi ebunyeni naKhristu Jesu.”​—Ef. 2:4-7.

¹⁴ Kulukhuni kucabanga ngetintfo letinhle Jehova latibekele emaKhristu lagcotjiwe latatitfola nasahleli etihlalweni tebukhosi abusa naKhristu ezulwini. (Luk. 22:28-30; Fil. 3:20, 21; 1 Joh. 3:2) Jehova ‘utawakhombisa bukhulu bemusa wakhe’ ngalokukhetsekile. Atawakha ‘liJerusalema lelisha,’ lokungumakoti waKhristu. (Semb. 3:12; 17:14; 21:2, 9, 10) Akanye naJesu ‘atawuphilisa tive,’ asite labalungile kutsi bakhululeke ekucindzetelweni sono nekufa.​—Fundza Sembulo 22:1, 2, 17.

15, 16. Esikhatsini lesitako, Jehova utawukhombisa njani umusa wakhe lomkhulu ‘kuletinye timvu’?

¹⁵ Ku-Efesu 2:7, sifundza kutsi kuboniswa kwemusa waNkulunkulu kutawenteka “esikhatsini lesitako.” Ngako, asingabati kutsi emhlabeni lomusha sitawubona “bukhulu bemusa wakhe.” (Luk. 18:29, 30) Lenye indlela lenhle Jehova latawukhombisa ngayo umusa wakhe emhlabeni, kuvuswa kwebantfu ‘emathuneni.’ (Jobe 14:13-15; Joh. 5:28, 29) Emadvodza nebafati labetsembekile labafa ngaphambi kwekutsi Khristu afe njengemhlatjelo, kanye ‘naletinye timvu’ letifa tetsembekile kulamalanga ekugcina, bonkhe batawuvuswa futsi bachubeke bakhonta Jehova.

¹⁶ Tigidzi letafa tingamati Nkulunkulu nato titawuvuswa. Titawuniketwa litfuba lekutitfoba ebukhosini baJehova. Johane wabhala watsi: “Ngabona nalabafile, labakhulu nalabancane beme embikwalesihlalo sebukhosi, nemiculu yavulwa. Kwavulwa lomunye umculu, lokungumculu wekuphila. Labafile behlulelwa ngekwaletintfo lebetibhalwe kulemiculu kuye ngetento tabo. Lwandle lwakhipha labafile lebebakulo, kufa neliThuna nako kwakhipha labafile lebebakuko, futsi behlulelwa ngamunye ngamunye ngekwetento tabo.” (Semb. 20:12, 13) Ngako-ke, labo labatawuvuswa kufanele bafundze kusebentisa timiso taNkulunkulu letitfolakala eBhayibhelini. Ngetulu kwaloko, kutawudzingeka balandzele ticondziso letizuzisako letitakwembulwa ‘emiculwini,’ letichaza loko Jehova lakufunako kulabo labatawube bahlala emhlabeni lomusha. Kwembulwa kwaloko lokutawube kucuketfwe kulemiculu, kutawube kungulenye indlela Jehova lakhombisa ngayo umusa wakhe lomkhulu.

17. Yini lokufanele ihlale isetingcondvweni tetfu nasifakaza kulabanye?

¹⁷ Umsebenti wetfu ukushumayela tindzaba letimnandzi teMbuso kakhulu kunakucala, njengobe kuphela kusondzela. (Mak. 13:10) Akungabateki kutsi letindzaba letimnandzi tibonisa umusa waJehova lomkhulu. Ngako kufanele loko kuhlale kusetingcondvweni tetfu nasenta umsebenti wekufakaza kulabanye. Injongo yetfu nasishumayela kudvumisa Jehova. Singakwenta loku ngekukhombisa bantfu kutsi tonkhe tetsembiso temhlaba lomusha tiyindlela Jehova lakhombisa ngayo umusa wakhe lomkhulu.

18, 19. Siwudvumisa njani umusa waJehova lomkhulu?

¹⁸ Njengobe sifakaza kulabanye, singabachazela kutsi ngaphansi kweMbuso waKhristu, bantfu batawuzuza ngalokugcwele emhlatjelweni wesihlengo futsi kancane kancane batawuba bete sono. LiBhayibheli litsi: “[Indalo] ikhululwe ekugcilatweni konakala, bese itfola inkhululeko lekhatimulako yebantfwana baNkulunkulu.” (Rom. 8:21) Loko kutawenteka ngemusa waJehova lomangalisako kuphela.

¹⁹ Sinelilungelo lekutjela labo labasilalelako lesetsembiso lesikhutsako lesitfolakala kuSembulo 21:4, 5, lesitsi: “[Nkulunkulu] utawesula tonkhe tinyembeti emehlweni abo, kufa ngeke kusaba khona, nekulila, nekukhala kanye nebuhlungu, ngeke kusaba khona. Tintfo letindzala setendlulile.” Jehova, lohleli esihlalweni sebukhosi utsi: “Buka, ngenta tonkhe tintfo tibe tinsha.” Uphindze atsi: “Bhala ngobe lamavi etsembekile futsi aliciniso.” Nangabe sishumayela letindzaba letimnandzi ngenkhutsalo, sisuke siwudvumisa mbamba lomusa waJehova lomkhulu.