Siniketwa Emandla Ekuncoba Tilingo Kanye Nekubeketelela Kudvumateka
‘Nitawugcwaliswa ngemandla, nasewufikile kini umoya longcwele.’—IMIS. 1:8.
1, 2. Nguluphi lusito Jesu lalwetsembisa bafundzi bakhe, futsi kungani bebatawuludzinga?
JESU bekati kutsi bafundzi bakhe bebangeke bakhone kulalela yonkhe imiyalo yakhe ngemandla abo kuphela. Ngesizatfu sebukhulu besabelo sabo sekushumayela, emandla etitsa tabo, kanye nebutsakatsaka benyama yabo, kwacaca kutsi bebadzinga emandla langetulu kwalavamile. Ngako-ke, ngembikwekutsi enyukele ezulwini, Jesu wacinisekisa bafundzi bakhe: ‘Nine nitawugcwaliswa ngemandla, nasewufikile kini umoya longcwele, niyawuba bofakazi bami eJerusalema, naseJudiya lonkhe, naseSamariya, kuze kube ngusekugcineni kwemhlaba.’—Imis. 1:8.
2 Lesetsembiso sacala kugcwaliseka ngeliPhentekhoste la-33 C.E. ngesikhatsi umoya longcwele uniketa balandzeli baJesu Khristu emandla ekushumayela kulo lonkhe liJerusalema. Kute kuphikiswa lokwakwati kuwumisa lomsebenti. (Imis. 4:20) Balandzeli baJesu labetsembekile, lokufaka ekhatsi natsi, bebatawuwadzinga kakhulu emandla lavela kuNkulunkulu, kuwo “onkhe emalanga, kuze kube ngusekupheleni kwetikhatsi.”—Mat. 28:20.
3. (a) Chaza umehluko lokhona emkhatsini wemoya longcwele kanye nemandla. (b) Emandla lavela kuJehova angasisita kutsi senteni?
3 Jesu wetsembisa bafundzi bakhe kutsi ‘bebatawugcwaliswa ngemandla, nasewufikile kubo umoya longcwele.’ Ligama lelitsi ‘emandla’ kanye nalelitsi “umoya” anetinchazelo letingafanani. Umoya waNkulunkulu, lokungemandla lawasebentisa ekwenteni tintfo, usho emandla lasebenta kubantfu nobe etintfweni letitsite kute kufezwe intsandvo yakhe. Ngakulokunye, emandla, asho ‘likhono lekwenta nobe lekubangela kutsi kwenteke lokutsite.’ Angahlala angasebenti kumuntfu nobe entfweni letsite kute kube ngulapho adzingeka kute kwentiwe lokutsite. Ngako-ke, umoya longcwele ungafananiswa nagezi lovuselela ibhetri, bese emandla wona afananiswe nalamandla langasebenti lagcinwa kulebhetri. Emandla Jehova lasiniketa wona ngemoya longcwele asenta sikwati kuphila ngekutinikela kwetfu kwebuKhristu, futsi nakudzingeka, asisita kutsi simelane netimo letimbi lesihlangabetana nato.—Fundza Mikha 3:8; Kholose 1:29.
4. Yini lesitawucoca ngayo kulesihloko, futsi kungani?
4 Emandla lesiwaniketwa ngemoya longcwele abonakala njani? Ngutiphi tento kanye nemiva lesingayiveta nangabe lomoya usebenta kitsi? Njengobe setama kukhonta Nkulunkulu ngekwetsembeka, sihlangabetana nebumatima lobunyenti—lobubangelwa nguSathane, live lakhe, nobe inyama yetfu lenesono. Kubalulekile kutsi sibuncobe lobumatima kute sikwati kubeketela njengemaKhristu, siye njalo ensimini, futsi silondvolote buhlobo lobuhle naJehova. Asesihlole indlela umoya longcwele losisita ngayo kutsi sincobe tilingo futsi sibeketelele kuphelelwa ngemandla nekudvumateka.
Siniketwa Emandla Ekuncoba Tilingo
5. Umthandazo ungasiniketa njani emandla?
5 Jesu wafundzisa balandzeli bakhe kutsi bathandaze batsi: ‘Ungasingenisi ekulingweni, kodvwa usisindzise kulomubi.’ (Mat. 6:13) Jehova angeke atishiye tikhonti takhe letetsembekile letenta lesicelo. Ngalesinye sikhatsi, Jesu watsi: ‘Babe losezulwini uyawubanika umoya longcwele labo labawucelako.’ (Luk. 11:13) Kuyasikhutsata kwati kutsi Jehova wetsembisa kusipha umoya wakhe losisita kutsi sente lokuhle. Nanobe kunjalo, loko akusho kutsi Jehova utawusivimba kutsi singalingwa. (1 Khor. 10:13) Nasilingwa, leso kusuke kusikhatsi sekutsi sithandaze kakhulu.—Mat. 26:42.
6. Jesu watisekela kuphi timphendvulo takhe ngesikhatsi alingwa nguSathane?
6 Ngesikhatsi aphendvula tilingo taDeveli, Jesu wacaphuna imibhalo. Jesu abecabanga ngeliVi laNkulunkulu ngesikhatsi aphendvula atsi: “Kubhaliwe kutsi . . . Kantsi kubhaliwe futsi nekutsi . . . Suka, Sathane, ngobe kubhaliwe kutsi: ‘Ubokhonta iNkhosi, Nkulunkulu wakho, umkhotsamele yena yedvwa!’” Lutsandvo ngaJehova kanye nangeliVi lakhe lwenta Jesu wangatemukeli tonkhe tintfo uMlingi labemlinga ngato. (Mat. 4:1-10) Ngemuva kwekutsi Jesu amelane naletilingo, Sathane wamshiya.
7. LiBhayibheli lisisita njani kutsi simelane netilingo?
7 Njengobe Jesu etsembela emiBhalweni kute amelane netilingo taDeveli, natsi sinesizatfu lesikhulu kakhulu sekwenta njalo. Kute sikwati kumelana naDeveli kanye nebameleli bakhe, kufanele sicale sitimisele kwati timiso taNkulunkulu futsi siphile ngato ngalokuphelele. Bantfu labanyenti bakhutsateka kutsi baphile ngetimiso letiseBhayibhelini lapho bacala kutadisha imiBhalo futsi bacaphela kuhlakanipha kanye nekulunga kwaNkulunkulu. Kuyabonakala-ke kutsi “livi laNkulunkulu” linemandla lakwati kucondza “imicabango netifiso tenhlitiyo.” (Heb. 4:12) Nasichubeka sifundza futsi sizindla ngemiBhalo, sitawukwati kunaka ‘ngekucophelela liciniso laJehova.’ (Dan. 9:13) Ngaleso sizatfu, kuhle kutsi sizindle ngemibhalo lekhuluma ngalokucondzile ngebutsakatsaka betfu.
8. Umoya longcwele singawutfola ngatiphi tindlela?
8 Ngetulu kwekwati imiBhalo, Jesu wakwati kumelana netilingo, ngobe ‘abegcwele umoya longcwele.’ (Luk. 4:1) Kute natsi sibe nemandla kanye nelikhono lelifananako, kudzingeka sisondzelane naJehova ngekutisebentisa ngalokugcwele tonkhe tintfo latihlelile tekutfola umoya wakhe. (Jak. 4:7, 8) Loku kufaka ekhatsi kutadisha liBhayibheli, umthandazo, kanye nebudlelwane betfu nalesikholwa nabo. Labanyenti baticaphele tinzuzo tekuba matasatasa ngemisebenti yebuKhristu lesisita kutsi sihlale sicabanga ngetintfo takamoya letakhako.
9, 10. (a) Ngutiphi tilingo letivamile endzaweni yakini? (b) Kuzindla kanye nekuthandaza kungakusita njani kutsi uncobe tilingo ngisho nalapho uphelelwa ngemandla?
9 Ngutiphi tilingo lokufanele umelane nato? Wake walingeka yini kutsi udlale ngelutsandvo nemuntfu longakashadi naye? Nangabe ungakashadi, wake waba naso yini sifiso sekutsandzana nemuntfu longasiye umKhristu? Nakabukela i-TV nobe asebentisa i-Internet, emaKhristu angase alingeke kutsi abuke tintfo letingcolile. Kuke kwenteka yini loko kuwe, futsi nangabe kunjalo wasabela njani? Kungaba kuhlakanipha kuzindla ngekutsi liphutsa linye lingaholela njani kulelinye bese kuphumela esonweni lesibi kakhulu. (Jak. 1:14, 15) Cabanga ngekutsi sento sekungetsembeki singamvisa buhlungu kangakanani Jehova, libandla, kanye nemndeni wakho. Ngakulokunye, nembeza lomsulwa utfolakala ngekuhlale ucotfo etimisweni taNkulunkulu. (Fundza Tihlabelelo 119:37; Taga 22:3.) Ngaso sonkhe sikhatsi nawuhlangabetana naleto tilingo, timisele kuthandazela emandla ekumelana nato.
10 Kunalokunye lokufanele sikukhumbule ngetilingo taDeveli. Sathane waya kuJesu ngemuva kwekutsi asazile kudla emalanga langu-40 ehlane. Akungabateki kutsi Develi bekati kutsi lesi ‘sikhatsi lesikahle’ sekuvivinya bucotfo baJesu. (Luk. 4:13, NW.) Sathane ulindza sikhatsi lesikahle kute avivinye bucotfo betfu. Ngako-ke, kubalulekile kutsi sihlale sicinile ngekwakamoya. Sathane uvame kusihlasela nakabona kutsi sibutsakatsaka. Ngako-ke, nangabe utiva uphelelwa ngemandla futsi udvumele, kufanele utimisele kakhulu kucela Jehova kutsi akuvikele ngemoya wakhe longcwele.—2 Khor. 12:8-10.
Siniketwa Emandla Ekubeketelela Kuphelelwa Ngemandla Kanye Nekudvumateka
11, 12. (a) Kungani bantfu labanyenti lamuhla bativa badvumatekile? (b) Yini lengasinika emandla ekumelana nekudvumateka?
11 Njengebantfu labanesono, siyadvumateka tikhatsi letinyenti. Loku kuliciniso kakhulu lamuhla, ngobe sikhatsi lesiphila kuso siyacindzetela. Sisetikhatsini letimatima, bantfu labangakaze baphile ngaphansi kwato. (2 Thim. 3:1-5) Njengobe i-Amagedoni isondzela, kucindzeteleka ngekwemnotfo, ngekwemivelo, kanye nangaletinye tindlela kuyandza. Akukafaneli kusimangalise kutsi labanye bakutfola kumatima kufeza imitfwalo yekunakekela kanye nekondla imindeni yabo. Bativa badziniwe, bacindzetelekile, futsi bete emandla. Nangabe nawe utiva ngalendlela, yini longayenta kute ukwati kubeketelela lokucindzeteleka?
12 Khumbula, Jesu wacinisekisa bafundzi bakhe kutsi abetawubanika umsiti—umoya longcwele waNkulunkulu. (Fundza Johane 14:16, 17.) Umoya longcwele ungemandla lamakhulu endzaweni yonkhe. Ngawo, Jehova ‘angenta lokukhulu kunako konkhe,’ ngekutsi asinike emandla lesiwadzingako kute sikwati kubeketelela nanobe nguluphi luvivinyo. (Ef. 3:20) Umphostoli Pawula watsi nasetsembela kuwo sitawutfola ‘emandla lamakhulu,’ nanobe nje “sicindzetelwa ndzawo tonkhe.” (2 Khor. 4:7, 8) Jehova aketsembisi kukususa lokucindzeteleka, kodvwa usicinisekisa ngekutsi ngemoya wakhe utawusinika emandla ekukubeketelela.—Fil. 4:13.
13. (a) Lomunye losemusha waniketwa njani emandla ekubeketelela simo lesimatima? (b) Tikhona yini tibonelo letifanana nalesi lotatiko?
13 Asewucabange ngesibonelo saStephanie, dzadze lolihlahlandlela lelivamile lelineminyaka lengu-19 budzala. Ngesikhatsi aneminyaka lengu-12, wafa luhlangotsi futsi waba nesimila ebuchosheni. Kusukela ngaleso sikhatsi, wahlindvwa kabili, welashwa ngemisebe yekushisa (radiation), futsi waphindze wafa luhlangotsi kabili. Loko kwabangela kutsi lungasasebenti luhlangotsi lwakhe lwesancele futsi wangasaboni kahle. Besekufanele onge emandla akhe kute awasebentise etintfweni letibalulekile, letifaka ekhatsi imihlangano yebuKhristu kanye nemsebenti wekushumayela. Nanobe kunjalo, uyabona kutsi umoya waJehova uyamsita kutsi akwati kubeketela ngetindlela letinyenti. Tincwadzi letisekelwe eBhayibhelini letinalokuhlangenwe nako kwalamanye emaKhristu tiye tamkhutsata nakativa advumele. Bazalwane kanye nabodzadze baye bamkhutsata ngekumtfumelela tincwadzi nobe ngekukhuluma naye ngendlela ledvudvutako ngembikwekutsi imihlangano icale nalapho seyiphelile. Bantfu labanenshisekelo nabo baveta kutsi bayakujabulela loko Stephanie labafundzisa kona ngekutsi baye ekhaya kubo kute abachubele sifundvo seliBhayibheli. Stephanie ubonga Jehova kakhulu ngako konkhe loku. Utsandza umbhalo weTihlabelelo 41:3, ngobe utsi uyagcwaliseka kuye.
14. Yini lokufanele siyibalekele nangabe sitiva sidvumatekile, futsi kungani?
14 Nasitiva siphelelwa ngemandla nobe sicindzetelekile, akukafaneli sicabange kutsi singakwati kukucedza ngekutsi sehlise lizinga lesenta ngalo imisebenti yakamoya. Leyo yintfo lembi kakhulu lesingayenta. Kungani? Kungobe imisebenti lenjengesifundvo lotichubela sona, sifundvo seliBhayibheli semndeni, umsebenti wekushumayela, kanye nekuba khona emihlanganweni itindlela lesiniketwa ngato umoya longcwele. Imisebenti yebuKhristu iniketa imiphefumulo yetfu kuphumula. (Fundza Matewu 11:28, 29.) Etikhatsini letinyenti bazalwane nabodzadze bafika emihlanganweni badziniwe, kodvwa nasekufika sikhatsi sekubuyela emakhaya, kuba shengatsi emandla abo entiwe aba masha, nobe emabhetri abo akamoya avuselelwe!
15. (a) Jehova wetsembisa kutsi utawukwenta kuphila kwemaKhristu kube melula yini? Chaza usebentisa imiBhalo. (b) Yini Nkulunkulu lasetsembisa yona, futsi iholela kumuphi umbuto?
15 Loku akusho kutsi umtfwalo wemaKhristu wekuba bafundzi umelula. Kudzingeka imetamo kute ube ngumKhristu lowetsembekile. (Mat. 16:24-26; Luk. 13:24) Nanobe kunjalo, Jehova ubaniketa emandla labo labadvumatekile asebentisa umoya wakhe longcwele. Umphrofethi Isaya wabhala: “Labo labetsembela kuSimakadze batfola emandla lamasha. Bayawukhuphuka ngemaphiko njengetinsweti, bayawugijima bangadzinwa, bayawuhamba bangaphelelwa ngemandla.” (Isa. 40:29-31) Sicabanga ngaloku, senta kahle kutibuta nangumbuto: ‘Yini lesenta sitsatse imisebenti yebuKhristu njengalesindzako?’
16. Yini lesingayenta kute siyekele letinye tintfo letisenta siphelelwe ngemandla nobe sitive sidvumele?
16 LiVi laJehova lisikhutsata kutsi ‘sikwati kwehlukanisa lokuncono.’ (Fil. 1:10) Afananisa imphilo yemaKhristu nemjako welibanga lelidze, umphostoli Pawula waphefumulelwa kutsi abhale nasi sikhutsato: ‘Asilahle konkhe lokusindzako . . . , sigijime ngekucinisela kulomncintiswano losembikwetfu.’ (Heb. 12:1) Kulamavi, abeveta liphuzu lekutsi sikubalekele kuphishanekela tintfo letingakabaluleki, nemitfwalo lengakadzingeki letawusenta sidzinwe. Kungenteka kutsi labanye betfu betama kwenta tintfo letinyenti ekuphileni kwabo. Nangabe uvame kutiva uphelelwa ngemandla futsi ucindzetelekile, utawuzuza ngekuhlola kutsi angakanani emandla lowasebentisako nawenta umsebenti wekutiphilisa, nawuhamba uyewutijabulisa, kanye nalawo lowasebentisa emidlalweni nobe kulokunye kutijabulisa. Kungecisi kanye nekuba ngulabazitsile kutawusenta sicaphele kulinganiselwa kwetfu futsi sinciphise leminye imisebenti lengakabaluleki kangako.
17. Kungani labanye bativa badvumele, kodvwa ngusiphi sicinisekiso Jehova lasiniketa sona mayelana naloku?
17 Kungenteka labanye badvunyatwa kutsi kuphela kwalelive solo akufiki ngekushesha njengobe bebakulindzele. (Taga 13:12) Nanobe ngubani lotiva ngalendlela, angatfola sikhutsato emavini latfolakala kuHabakhuki 2:3: “Ngobe lesembulo silindzele sikhatsi lesimisiwe; sikhuluma ngesiphetfo lesiphutfumako, futsi ngeke sibonakale singemanga. Nome sephutisa nje, silindzele, sona sitawufika nome kanjani, futsi ngeke sephute.” Sinesicinisekiso saJehova sekutsi kuphela kwalelive kutawufika ngelilanga lalibekile!
18. (a) Ngutiphi tetsembiso letikunika emandla? (b) Sihloko lesilandzelako sitawusisita njani?
18 Kuliciniso kutsi tonkhe tinceku taJehova letetsembekile tilangatelela lilanga lapho kuphelelwa ngemandla kanye nekudvumateka kungeke kusaba khona, futsi bonkhe labaphilako batawujabulela kubuyiselwa esimeni ‘sekuba basha.’ (Jobe 33:25) Ngisho nanyalo singaba nawo emandla ngelusito lwemoya longcwele njengobe sichubeka senta imisebenti yakamoya lesivuselelako. (2 Khor. 4:16; Ef. 3:16) Ungakuvumeli kuphelelwa ngemandla kukuvimbele ekutfoleni tibusiso letingapheli. Bonkhe bumatima lobubangelwa tilingo, kuphelelwa ngemandla nobe kudvumateka, butawendlula—kungaba nyalo nobe emhlabeni lomusha waNkulunkulu. Esihlokweni lesilandzelako, sitawuhlola indlela umoya longcwele lowaniketa ngayo emaKhristu emandla ekuncoba lushushiso, ekumelana nekucindzetelwa bontsanga, kanye nekubeketelela tinkinga letehlukehlukene.
Ungaphendvula Njani?
• Kufundza liBhayibheli kusinika njani emandla?
• Kuthandaza kanye nekuzindla kusinika njani emandla?
• Ungatibalekela njani tintfo letingakwenta udvumateke?
[Sitfombe ekhasini 26]
Imihlangano yebuKhristu ingasinika emandla ngekwakamoya