Umlayeto Lokufanele Siwumemetele

ESIKHATSINI lesidze ngembikwekutsi kube sikhatsi sebuKhristu, Jehova watjela Abrahama lowetsembekile ngelilungiselelo lekutsi “tive tonkhe temhlaba” titibusise. (Gen. 22:18) Waphindze waphefumulela Solomoni kutsi abhale mayelana nentfo lebalulekile ledzingekako kubo bonkhe bantfu. Watsi: “Yesaba Nkulunkulu, ugcine imiyalo yakhe, kute lokunye lokungetulu kwaloko lokudzingekako kumuntfu.” (Shu. 12:13) Kodvwa-ke bantfu labakuto tonkhe tive bebatawutifundza njani letintfo?

Nanobe bebasolo bakhona bantfu labalikholelwako livi laNkulunkulu, liBhayibheli liveta kutsi lobufakazi bemhlaba wonkhe lobebutawufinyelela bantfu bato tonkhe tive ngetindzaba letimnandzi bebugcinelwe ‘lilanga leNkhosi.’ Lelilanga lacala nga-1914. (Semb. 1:10) Mayelana nalesikhatsi, Sembulo 14:6, 7 sabiketela kutsi ngephansi kwesicondziso setingilosi, bekutawuniketwa bufakazi lobubalulekile “kuto tonkhe tive, tinhlanga, tilwimi, nebantfu.” Naku lebebatawukhutsatwa kutsi bakwente: “Mesabeni Nkulunkulu nimnike inkhatimulo, ngobe sikhatsi sakhe sekwehlulela sesifikile, ngako khontani Loyo lowadala lizulu, umhlaba, lwandle, kanye nemitfombo yemanti.” Kuyintsandvo yaNkulunkulu kutsi lomlayeto umenyetelwe. Sinelilungelo leliligugu lekuhlanganyela kulomsebenti.

‘Nkulunkulu Weliciniso.’ Ngesikhatsi Jehova atsi: “Nibofakazi bami,” kwakunekuphikisana mayelana nekuba kwakhe nguNkulunkulu. (Isa. 43:10) Umlayeto lokufanele siwumemetele akusiko nje kutsi bantfu kufanele babe nenkholo letsite nobe bakholelwe kunkulunkulu lotsite. Kunaloko, kufanele baniketwe litfuba lekufundza kutsi uMdali welizulu nemhlaba nguye kuphela longuNkulunkulu weliciniso. (Isa. 45:5, 18, 21, 22; Joh. 17:3) NguNkulunkulu weliciniso kuphela longabiketela tintfo letitawukwenteka esikhatsini lesitako. Kulilungelo letfu kuchazela bantfu kutsi kugcwaliseka kwelivi laJehova esikhatsini sasendvulo kuniketa sizatfu lesicinile sekwetsemba kutsi tonkhe tintfo letsembise kutsi titawukwenteka esikhatsini lesitako titawufezeka mbamba.​—Josh. 23:14; Isa. 55:10, 11.

Kuliciniso kutsi linyenti lebantfu lesishumayela kubo likhonta labanye bonkulunkulu nobe litsi kute nkulunkulu lelimkhontako. Kute bantfu labanjalo basilalele, kufanele sicale ngekukhuluma ngentfo nabo labayitsandzako. Singazuza esibonelweni lesikuMisebenti 17:22-31. Nanobe umphostoli Pawula abengabakhubi labanye nakakhuluma, wakuveta ngalokucacile kutsi bonkhe bantfu bayawutilandzisela kuNkulunkulu longuMdali welizulu nemhlaba.

Kwenta Libito LaNkulunkulu Latiwe. Akukafaneli wehluleke kwenta Nkulunkulu weliciniso atiwe ngelibito lakhe. Jehova uyalitsandza libito lakhe. (Eks. 3:15; Isa. 42:8, NW) Ufuna kutsi bantfu balati. Wenta kutsi lelibito lakhe lelingcwele lifakwe eBhayibhelini tikhatsi letingetulu kwa-7 000. Ngako-ke kungumsebenti wetfu kwenta bantfu balati.​—Dut. 4:35.

Likusasa labo bonkhe bantfu lisekelwe ekwatini Jehova kanye nasekumbiteni ngekukholwa. (Jow. 2:32; Mal. 3:16; 2 Thes. 1:8) Nanobe kunjalo, bantfu labanyenti abamati Jehova. Loku kuhlanganisa linani lelikhulu lebantfu labatsi bakhonta Nkulunkulu lokukhulunywa ngaye eBhayibhelini. Ngisho nobe banalo liBhayibheli futsi balifundza, kungenteka bangalati libito laNkulunkulu ngobe likhishiwe emahumushweni lamanyenti lamuhla. Kuphela kwentfo labayatiko ngelibito laJehova kutsi bafundisi babo babatjela kutsi bangalisebentisi.

Singabasita njani bantfu kutsi balati libito laNkulunkulu? Kute intfo lephumelela kwendlula kubakhombisa lona eBhayibhelini​—nakungenteka kufanele sibakhombise emaBhayibhelini abo. Kulamanye emahumusho, lelibito livela tikhatsi letinyenti. Kulamanye, lingase livele kuphela kuTihlabelelo 83:18 nobe ku-Eksodusi 6:3-6, kantsi kulamanye lingase litfolakale embhalweni longentansi wa-Eksodusi 3:14, 15 nobe 6:3. E-Bhayibhelini Lelingcwele [liBhayibheli lesiSwati] lelibito lelitsi Jehova litfolakala kuphela ekugcineni, esihlokweni lesitsi “Luhla Lwemagama Nenchazelo Yawo.” Emahumushweni lamanyenti, kusetjentiswe ticu letinjengalesitsi “Nkhosi” kanye nalesitsi “Nkulunkulu” letibhalwe ngendlela leyehlukile lapho kuvela khona libito laNkulunkulu emibhalweni yelulwimi lwekucala. Nangabe bahumushi balamuhla balikhiphe ngalokuphelele lelibito laNkulunkulu, kungase kudzingeke kutsi usebentise lihumusho leliBhayibheli lelidzala kute ukhombise bantfu lokhuluma nabo loko lokwentiwe. Kuletinye tindzawo ungase ubakhombise lelibito laNkulunkulu emaculweni elisontfo nobe embhalweni losesakhiweni sendzawo.

Ngisho nakulabo labakhonta labanye bonkulunkulu, Jeremiya 10:10-13 lotfolakala e-“Nguqulweni Yezwe Elisha” angasetjentiswa ngalokuphumelelako. Lombhalo awuveti libito laNkulunkulu nje kuphela, kodvwa uphindze uchaze ngalokucacile kutsi ungubani.

Ungalenti lifihleke libito laJehova ngekusebentisa ticu letitsi “Nkulunkulu” kanye nalesitsi “Nkhosi,” njengobe kwenta Tinkholo Letitsi TebuKhristu. Loku akusho kutsi kufanele silisebentise ngaso sonkhe sikhatsi nasicala kukhuluma. Ngesizatfu sekungalitsandzi, labanye bantfu bangase bangasachubeki nekucoca natsi. Kodvwa-ke nasewusibekile sisekelo saloko lenivumelana ngako, ungesabi kulisebentisa lelibito laNkulunkulu.

Kuyamangalisa kutsi liBhayibheli lisebentisa lelibito laNkulunkulu tikhatsi letinyenti kwendlula tikhatsi letihlanganisiwe lelisebentisa ngato ticu letitsi “Nkhosi” nalesitsi “Nkulunkulu.” Nanobe kunjalo, labo labasetjentiswa ekubhaleni liBhayibheli abazange bafake lelibito laNkulunkulu emushweni ngamunye. Balisebentisa ngendlela levamile, ngekukhululeka, kanye nangenhlonipho. Leso sibonelo lesihle lokufanele sisilandzele.

Umuntfu Lobitwa Ngalelibito. Nanobe kubaluleke kakhulu kwati kutsi Nkulunkulu unelibito, loko kumane nje kusinyatselo sekucala sekumati.

Kute bantfu bamtsandze Jehova futsi bambite ngekukholwa, kudzingeka kutsi bamati kutsi unguNkulunkulu lonjani. Ngesikhatsi Jehova atjela Mosi libito lakhe eNtsabeni iSinayi, wenta lokungetulu kwekumane nje aphindzaphindze lelibito lelitsi “Jehova.” Wagcizelela bunguye baKhe lobuhamba embili. (Eks. 34:6, 7, NW) Leso sibonelo lesihle natsi lokufanele sisilandzele.

Ngisho nobe ufakaza kubantfu labasandza kukhombisa inshisekelo nobe wetfula tinkhulumo ebandleni, nawukhuluma ngetibusiso letitawuletfwa nguMbuso, shano kutsi loko kuvetani ngaNkulunkulu lowetsembise leto tintfo. Nawukhuluma ngemiyalo yakhe, gcizelela kuhlakanipha kanye nelutsandvo lwaNkulunkulu lolubonakala kuleyo miyalo. Kwente kucace kutsi loko Nkulunkulu lakufunako kitsi akusiwo umtfwalo, kodvwa kwentelwe kuzuzisa tsine. (Isa. 48:17, 18; Mik. 6:8) Shano kutsi kusebentisa kwaJehova emandla akhe kuveta lokutsite ngebunguye bakhe, ngetimiso takhe, kanye nangenjongo yakhe. Gcizelela kutsi Jehova nakaveta bunguye bakhe ukwenta ngendlela lefanele. Bantfu kufanele bakuve nawe uveta indlela lotiva ngayo ngaJehova. Lutsandvo lwakho ngaJehova lungabasita nabo kutsi bamtsandze.

Umlayeto lophutfumako lesiwumemetelako lamuhla ukhutsata bonkhe bantfu kutsi besabe Nkulunkulu. Kufanele sente bantfu bamesabe Nkulunkulu ngaloko lesikushoko. Loko kukwesaba lokufanele, kutfutfumela, kanye nekuhlonipha Jehova lokujulile. (Hla. 89:7) Loku kuhlanganisa kwati kutsi Jehova unguMehluleli lomkhulu kanye nekutsi likusasa letfu lisekelwe ekwemukelweni nguye. (Luk. 12:5; Rom. 14:12) Ngako-ke, kwesaba lokunjalo kuhambisana nelutsandvo lwetfu lolujulile ngaye kanye nesifiso lesikhulu sekufuna kumjabulisa. (Dut. 10:12, 13) Kwesaba Nkulunkulu kuphindze kusente sitondze lokubi, silalele imiyalo yaNkulunkulu, futsi simkhonte ngenhlitiyo lephelele. (Dut. 5:29; 1 Khr. 28:9; Taga 8:13) Kuyasivikela ekwetameni kukhonta Nkulunkulu kodvwa sibe sitsandza tintfo talelive.​—1 Joh. 2:15-17.

Libito LaNkulunkulu ‘Liyincaba Lecinile.’ Bantfu labamati mbamba Jehova bayavikeleka. Loko akwentiwa nje kutsi basebentisa libito lakhe nobe kutsi bangakhona kusho letinye tintfo letichaza bunguye bakhe. Kwentiwa kutsi babeke litsemba labo kuJehova kuphela. Mayelana nabo, Taga 18:10 titsi: ‘Libito laJehova, liyincaba lecinile, lapho kungabalekela khona bantfu labalungile basindze.’

Wasebentise kahle ematfuba lavelako kute ukhutsate labanye kutsi betsembele kuJehova. (Hla. 37:3; Taga 3:5, 6) Kumetsemba lokunjalo kukhombisa kutsi sinekukholwa kuJehova kanye nasetetsembisweni takhe. (Heb. 11:6) Nangabe bantfu ‘babita libito laJehova’ ngobe bati kutsi unguMbusi Wendalo Yonkhe, nobe ngesizatfu sekutsi batsandza tindlela takhe, futsi bakholelwa ngalokucinile kutsi insindziso lenguyonayona ivela kuye kuphela, liVi laNkulunkulu lisicinisekisa kutsi bantfu labanjalo batawusindziswa. (Rom. 10:13, 14) Nawufundzisa labanye, basite kutsi babe nekukholwa lokunjalo kuko konkhe kuphila kwabo.

Linyenti lebantfu lihlangabetana netinkinga letinkhulu. Bangase bangasiboni sisombululo saleto tinkinga. Bakhutsate kutsi bafundze tindlela taJehova, bafundze kumetsemba, kanye nekusebentisa loko labakufundzako. (Hla. 25:5) Phindze ubakhutsate kutsi bathantaze ngebucotfo kuNkulunkulu, bacele lusito futsi bambonge ngetibusiso labanikete tona. (Fil. 4:6, 7) Nangabe bantfu sebamati Jehova, hhayi nje ngekumane bafundze lokutsite eBhayibhelini, kodvwa ngekutsi batibonele bona kugcwaliseka kwetetsembiso takhe ekuphileni kwabo, batawujabulela kulondzeka lokutfolakala ngekukucondza kahle loko lokushiwo libito laJehova.​—Hla. 34:8; Jer. 17:7, 8.

Wasebentise kahle onkhe ematfuba lavelako kute usite bantfu bacondze tinzuzo tekwesaba Nkulunkulu weliciniso, Jehova, kanye nekugcina imiyalo yakhe.

NGEMUVA kwekuvuswa kwakhe kodvwa ngembikwekutsi abuyele ezulwini, Jesu Khristu waniketa bafundzi bakhe lomyalo: “Nitawuba bofakazi bami . . . nakuto tonkhe tincenye temhlaba.” (Imi. 1:8) Lamuhla, tinceku taNkulunkulu leticotfo tichazwa ngekutsi ‘tinemsebenti wekufakaza ngaJesu.’ (Semb. 12:17) Uwenta ngekutimisela lokungakanani lomsebenti wekufakaza?

Bantfu labanyenti labatsi bakholwa nguJesu abati lutfo ngekuphila kwakhe asengaketi emhlabeni. Abati kutsi abengumuntfu mbamba nakalapha emhlabeni. Abacondzi kutsi kusho kutsini kutsi Jesu uyiNdvodzana yaNkulunkulu. Kuncane kakhulu labakwatiko ngendzima yakhe ekugcwalisekeni kwenjongo yaNkulunkulu. Abati kutsi Jesu wentani nyalo, futsi abacondzi kutsi loko latawukwenta esikhatsini letitako kutakutsintsa njani kuphila kwabo. Bangase bente neliphutsa lekucabanga kutsi BoFakazi BaJehova abakholelwa kuJesu. Kungumsebenti wetfu kutsi sitimisele kuze bantfu bawati lamaciniso lamayelana naletintfo.

Nobe kunjalo, labanye bantfu abakholelwa kutsi loJesu lokukhulunywa ngaye eBhayibhelini vele wake waphila. Labanye bamtsatsa njengendvodza nje leyayidvumile. Labanyenti bayakuphika kutsi uyiNdvodzana yaNkulunkulu. ‘Kufakaza ngaJesu’ kubantfu labanjalo kudzinga kutsi sitikhandle, sibeketele, futsi sibe nelikhono lekungacasuli.

Ngisho nobe bantfu lokhuluma nabo banamuphi umbono, kudzingeka bamati Jesu Khristu nangabe bafuna kuzuza ekuphileni lokuphakadze, loko Nkulunkulu labalungisele kona. (Joh. 17:3) Intsandvo yaNkulunkulu ikutsi bonkhe bantfu ‘bavume kutsi Jesu Khristu uyiNkhosi,’ futsi kufanele batfobele ligunya lakhe. (Fil. 2:9-11) Ngako-ke, angeke sikubalekele kukhuluma ngaloku nasihlangana nebantfu labanemibono lecinile kodvwa leliphutsa nobe labo labaphikisako. Kodvwa ngaletinye tikhatsi singakhuluma ngekukhululeka nalabanye ngaJesu Khristu, ngisho nobe sifika kubo kwekucala. Kungadzingeka sikhulume ngekuhlakanipha kute sibasite kutsi babe nembono lofanele ngaJesu. Kungase kudzingeke nekutsi sicabange ngetindlela tekuveta lamanye emaciniso lamayelana nalendzaba nasiphindze sibuya. Nanobe kunjalo, ngeke sikhone kukhuluma ngako konkhe lokumayelana nalendzaba kuze kube ngulapho simchubela sifundvo seliBhayibheli loyo muntfu.​—1 Thim. 2:3-7.

Indzima YaJesu Lebalulekile Enjongweni YaNkulunkulu. Kudzingeka sisite bantfu bacondze kutsi njengobe Jesu ‘ayindlela’ futsi ‘kute umuntfu lota kuBabe ngaphandle kwekutsi ete ngaye,’ ngeke sikhone kuba nebuhlobo lobuhle naNkulunkulu nangabe singakholwa nguJesu Khristu. (Joh. 14:6) Ngaphandle kwekutsi umuntfu ati ngendzima lebalulekile Jehova layinikete iNdvodzana yakhe lelitibulo, angeke alicondze liBhayibheli. Kungani? Kungobe Jehova wenta leNdvodzana yakhe yaba nendzima lebalulekile ekugcwalisekeni kwetinjongo taKhe. (Khol. 1:17-20) Tiphrofetho teliBhayibheli tisekelwe kuloko. (Semb. 19:10) Jesu Khristu ukuphela kwemuntfu lotawucatulula tonkhe tinkinga letabangelwa kuhlubuka kwaSathane kanye nesono sa-Adamu.​—Heb. 2:5-9, 14, 15.

Kute umuntfu acondze indzima yaKhristu, kufanele ati kutsi bantfu basesimeni lesidzabukisako, labangeke bakwati kutikhulula kuso. Sonkhe sitalelwe esonweni. Loko kungasitsintsa ngetindlela letehlukehlukene ekuphileni kwetfu. Ngekuhamba kwesikhatsi, sigcine sifile. (Rom. 3:23; 5:12) Bonisana nalabo lofakaza kubo ngalawo maciniso. Ngemuva kwaloko, gcizelela kutsi ngemhlatjelo wenhlawulo waJesu Khristu, Jehova wente kutsi labo labakhombisa kukholwa kuwo bakhululwe esonweni kanye nasekufeni. (Mak. 10:45; Heb. 2:9) Loku kubavulela indlela yekutfola kuphila lokuphakadze lapho sebete sono. (Joh. 3:16, 36) Ayikho lenye indlela yekukutfola. (Imis. 4:12) Nawufundzisa, kungaba sebandleni nobe kulenye indzawo, kufanele wente lokungetulu kwekumane usho lamaciniso. Ngemusa nangekubeketela, yenta labo labakulalele bakhombise kubonga ngendzima yaKhristu njengobe anguMsindzisi wetfu. Kubonga ngalesipho kungasitsintsa kakhulu simo sengcondvo semuntfu, kutiphatsa kwakhe, kanye nemigomo latibekela yona.​—2 Khor. 5:14, 15.

Jesu wanikela ngekuphila kwakhe kanye kuphela. (Heb. 9:28) Kodvwa-ke, nyalo sewungumPhristi Lophakeme. Sita bantfu bacondze kutsi loko kusho kutsini. Bacindzetelekile yini, badvumatekile, bayahlupheka, nobe banetinkinga letibangelwa kutsi bantfu labaphila nabo bete umusa? Ngesikhatsi Jesu aselapha emhlabeni, wahlangabetana nako konkhe loku. Yena uyayati indlela lesitiva ngayo. Ngesizatfu sekutsi sinesono, siyasibona yini sidzingo sekutfola umusa waNkulunkulu? Nangabe sithantaza kuNkulunkulu sicele kutsi asitsetselele ngesisekelo semhlatjelo waJesu, Jesu uba ‘ngumsiti kuBabe.’ ‘Usincengela’ ngemusa. (1 Joh. 2:1, 2; Rom. 8:34) Ngemhlatjelo waJesu kanye nangemsebenti wakhe wekuba ngumPhristi Lophakeme, siyakhona kusondzela “esihlalweni sebukhosi semusa waNkulunkulu” kute sitfole lusito ngesikhatsi lesifanele. (Heb. 4:15, 16) Nanobe sinesono, lusito lesilutfola kuJesu njengobe angumPhristi Lophakeme lusenta kutsi sikhonte Nkulunkulu nganembeza lohlantekile.​—Heb. 9:13, 14.

Ngetulu kwaloko, Jesu usebentisa ligunya lelikhulu laliniketwe nguNkulunkulu lekutsi abe yiNhloko yelibandla lebuKhristu. (Mat. 28:18; Ef. 1:22, 23) Njengobe analeligunya, usiniketa sicondziso lesisidzingako ngekuvumelana nentsandvo yaNkulunkulu. Nawufundzisa labanye, basite bacondze kutsi nguJesu Khristu loyiNhloko yelibandla lebuKhristu hhayi lomunye umuntfu. (Mat. 23:10) Nawufakaza kwekucala kubantfu labakhombise inshisekelo, bamemele emihlanganweni yelibandla, lapho sifundza khona liBhayibheli ngekusitwa tincwadzi lesitilungiselelwe ‘sisebenti lesetsembekile nalesihlakaniphile.’ Ungabachazeli nje kuphela kutsi singubani ‘lesisebenti,’ kodvwa bachazele nekutsi ingubani iNkhosi yaso kute batewukwati kutsi nguJesu loyinhloko. (Mat. 24:45-47) Betfule kulabadzala belibandla, uphindze ubachazele ngebuntfu lobuchazwa emiBhalweni lokufanele labadzala babe nabo. (1 Thim. 3:1-7; Thit. 1:5-9) Bachazele nekutsi libandla alisilo lalabadzala kodvwa bona bayasisita kutsi sihambe etinyatselweni taJesu Khristu. (Imis. 20:28; Ef. 4:16; 1 Phet. 5:2, 3) Sita bantfu labanenshisekelo babone kutsi kunenhlangano lehlelekile yemhlaba wonkhe lecondziswa nguKhristu.

EmaVangelini, sifundza kutsi Jesu nakangena eJerusalema ngembikwekutsi afe, bafundzi bakhe bamdvumisa ngobe ‘abenguLoyo lota njengeNkhosi ngeligama laJehova.’ (Luk. 19:38) Nabachubeka nekutadisha liBhayibheli, bantfu bayafundza kutsi nyalo Jehova unikete Jesu emandla ekubusa, lokutsintsa bantfu bato tonkhe tive. (Dan. 7:13, 14) Nawetfula tinkhulumo emihlanganweni nobe uchuba tifundvo teliBhayibheli, sita bantfu bakujabulele futsi bakucondze kutsi kusho kutsini kubusa kwaJesu kitsi sisonkhe.

Gcizelela kutsi indlela yetfu yekuphila iyakhombisa kutsi sikholelwa mbamba yini kutsi Jesu Khristu uyiNkhosi nekutsi sititfoba ngekutitsandzela kuye. Gcizelela umsebenti lawuniketa bafundzi bakhe ngemuva kwekugcotjwa kwakhe kutsi abe yiNkhosi. (Mat. 24:14; 28:18-20) Coca ngaloko Jesu, longuMeluleki Lomangalisako, latsi kufanele kute kucala ekuphileni kwetfu. (Isa. 9:6, 7; Mat. 6:19-34) Khuluma nangaloko iNkhosi Yekuthula leyatsi balandzeli bayo bayawubonakala ngako. (Mat. 20:25-27; Joh. 13:35) Caphela kutsi ungabehluleli labanye ngekutsi benta konkhe lokufanele bakwente yini, kodvwa bakhutsate bacabange ngekutsi loko labakwentako kukhombisani ngekutitfoba kwabo ekubuseni kwaKhristu. Nawenta njalo, khumbula kutsi nawe kufanele wente loko lokushoko.

Kubeka Sisekelo LesinguKhristu. LiBhayibheli lifananisa umsebenti wekwenta bafundzi nekwakhela etikwesisekelo lesinguJesu Khristu. (1 Khor. 3:10-15) Kute sikufeze loku, kufanele sisite bantfu bamati Jesu ngendlela lachazwa ngayo eBhayibhelini. Kodvwa-ke caphela kutsi bangatsatsi wena njengemuntfu lokufanele bamlandzele. (1 Khor. 3:4-7) Bente banake Jesu Khristu.

Nangabe leso sisekelo sesibekiwe, bafundzi batawubona kutsi Khristu wasishiyela sibonelo sekutsi ‘silandzele tinyatselo takhe edvute.’ (1 Phet. 2:21) Kute wengete kuloko, khutsata bafundzi kutsi nabafundza loko lokusemaVangelini bangakutsatsi njengemlandvo, kunaloko bakutsatse njengesibonelo lokufanele basilingise. Basite bakhumbule futsi banake buntfu baJesu kanye nesimo sakhe sengcondvo. Bakhutsate kutsi banake indlela Jesu labetiva ngayo ngeYise, indlela labhekana ngayo netinkinga kanye netilingo, indlela latitfoba ngayo kuNkulunkulu, kanye nendlela labaphatsa ngayo bantfu labebasetimeni letehlukehlukene. Gcizelela umsebenti lobalulekile Jesu labewenta ekuphileni kwakhe. Ngako-ke, umfundzi nakahlangabetana netilingo futsi kufanele ente tincumo, utawutibuta: ‘Jesu abengenta njani nakakulesimo? Loku lengifuna kukwenta kutawukhombisa yini kutsi ngiyajabula ngaloko langentela kona?’

Nawukhuluma nelibandla, ungaphetsi ngekutsi njengobe bazalwane sebavele banekukholwa kuJesu, asisekho sidzingo sekukhuluma kabanti ngaye. Loko lokushoko kutawuba lusito kakhulu nangabe kusekelwe kuloko lesebavele bakukholelwa. Nawukhuluma ngemihlangano, shano kutsi ihlangana njani nendzima yaJesu njengobe ayiNhloko yelibandla. Nawukhuluma ngemsebenti wekushumayela, gcizelela indlela Jesu lawenta ngayo lomsebenti, futsi uvete loko Khristu lakwentako njengobe ayiNkhosi kute abutsele ndzawonye bantfu labatawusindza bangene emhlabeni lomusha.

Kuyacaca kutsi kunyenti lokudzingekako kunekufundza nje emaciniso lasisekelo ngaJesu. Kute babe ngemaKhristu eliciniso, bantfu kufanele bakhombise kukholwa kuye futsi bamtsandze mbamba. Lutsandvo lolunjalo lutawubenta bamlalele ngekwetsembeka. (Joh. 14:15, 21) Lusita bantfu kutsi bachubeka banekukholwa lokucinile nabashushiswa, futsi bachubeke bahamba etinyatselweni taKhristu kuphila kwabo konkhe, baphindze bakhombise kutsi bangemaKhristu lavutsiwe ‘lacinile futsi lasime kulesisekelo.’ (Ef. 3:17) Kwenta njalo kudvumisa Jehova, longuNkulunkulu kanye neYise waJesu Khristu.

NGESIKHATSI aniketa imininingwane yesibonakaliso sekuba khona kwakhe kanye nesekuphela kwalelive, Jesu wabiketela: “Letindzaba letimnandzi teMbuso tiyawushunyayelwa emhlabeni wonkhe, kuze kube bufakazi etiveni tonkhe, bese-ke kuphela kuyefika.”​—Mat. 24:14.

Mbambambamba uyini lomlayeto lokufanele umenyetelwe emhlabeni wonkhe? Umayelana neMbuso waNkulunkulu, Jesu lasifundzisa kutsi siwuthantazele, sitsi: “UMbuso wakho awute.” (Mat. 6:10) Sembulo 11:15 siwuchaza ngekutsi “sewunguMbuso weNkhosi yetfu [Jehova] newaKhristu wayo,” ngesizatfu sekutsi ligunya lekubusa laJehova futsi ulinike Khristu kutsi abe yiNkhosi. Kodvwa-ke naka kutsi umlayeto Jesu latsi uyawumenyetelwa emalangeni etfu awugcini ngaloko balandzeli bakhe labashumayela ngako ekhulwini lekucala leminyaka. Bebatjela bantfu kutsi: “UMbuso waNkulunkulu sewusondzele.” (Luk. 10:9) Ngaleso sikhatsi, Jesu labegcotjelwe kutsi abe yiNkhosi abephila nabo. Kodvwa njengobe kubhaliwe kuMatewu 24:14, Jesu wabiketela kutsi emhlabeni wonkhe bekutawumenyetelwa lokunye lokubalulekile ekugcwalisekeni kwenjongo yaNkulunkulu.

Umphrofethi Danyela waniketwa umbono ngaloko. Wabona “umuntfu labenjengendvodzana yemuntfu,” Jesu Khristu, emukela “kuloLophila Phakadze Naphakadze,” Nkulunkulu Jehova, “emandla ekubusa, nenkhatimulo, nebukhosi. Bonkhe bantfu, netive, nebantfu bato tonkhe tilwimi bakhotsama kuye bamkhonta.” (Dan. 7:13, 14) Lentfo lebalulekile endzaweni yonkhe yenteka ezulwini ngemnyaka wa-1914. Ngemuva kwaloko, Develi kanye nemadimoni akhe balahlelwa phansi emhlabeni. (Semb. 12:7-10) Lelive lelibi beselingene emalangeni alo ekugcina. Kodvwa ngembikwekutsi lisuswe ngalokuphelele, kufanele kumenyetelwe emhlabeni wonkhe kutsi iNkhosi lenguMesiya lebekwe nguJehova seyiyabusa ezulwini. Bantfu kuyo yonkhe indzawo bayatjelwa ngaloku. Indlela labakwemukela ngayo loku ikhombisa simo sabo sengcondvo ngeMbusi Longetulu Kwako Konkhe lowengamele “imibuso yebantfu.”​—Dan. 4:32.

Kuliciniso kutsi kunyenti kakhulu lokusetawenteka! Sisathantaza sitsi “uMbuso wakho awute,” kodvwa loko akusho kutsi uMbuso waNkulunkulu ngukhona usetawubekwa esikhatsini lesitako. Kunaloko, kusho kutsi uMbuso wasezulwini utawutsatsa sinyatselo lesicinile kute ugcwalise tiphrofetho letinjengaDanyela 2:44 kanye neSembulo 21:2-4. Utawugucula lomhlaba ube lipharadisi leligcwele bantfu labatsandza Nkulunkulu kanye nalabatsandzanako. Njengobe sishumayela “letindzaba letimnandzi teMbuso,” sikhuluma ngalawo matsemba esikhatsi lesitako. Siphindze satise bantfu ngekuciniseka kutsi Jehova sewuvele uyinikile iNdvodzana yakhe ligunya leliphelele lekubusa. Uyatigcizelela yini letindzaba letimnandzi nawushumayela ngeMbuso?

Kuchaza UMbuso. Singawufeza njani lomsebenti lesitfunywe wona wekumemetela ngeMbuso waNkulunkulu? Singabenta bantfu babe nenshisekelo ngekutsi sicale sikhulume ngetintfo letehlukehlukene, kodvwa kufanele kusheshe kucace kutsi lomlayeto umayelana neMbuso waNkulunkulu.

Incenye lebalulekile yalomsebenti ihlanganisa kufundza nobe kucaphuna imibhalo lekhuluma ngeMbuso. Nawukhuluma ngeMbuso, ciniseka kutsi bantfu lokhuluma nabo bayawucondza kutsi uyini. Kungase kudzingeke lokungetulu kwekumane utsi uMbuso waNkulunkulu unguhulumende. Labanye bantfu bangase bakutfole kumatima kucabanga ngentfo lengabonakali kutsi inguhulumende. Ungabachazela ngetindlela letehlukehlukene. Nasi sibonelo: Emandla ladvonsela phansi akabonakali, kodvwa ayakutsintsa kuphila kwetfu. Angeke sikwati kumbona Loyo lowawadala, kodvwa kuyacaca kutsi unemandla lamakhulu. LiBhayibheli limbita ngekutsi ‘yiNkhosi yaphakadze.’ (1 Thim. 1:17) Nobe ungase uvete kutsi bantfu labanyenti eveni lelikhulu abakake baye enhlokodolobha yalo nobe babone umbusi wabo. Loku bakuva etindzabeni. Ngalokufanako, liBhayibheli lelishicilelwe ngetilwimi letingetulu kwaletingu-2 200, lisitjela ngeMbuso waNkulunkulu. Lisatisa ngekutsi ngubani loniketwe emandla ekubusa, kanye nangaloko loMbuso lokwentako. Sicongosekulindza, lesishicilelwa ngetilwimi letinyenti kunaletinye tincwadzi, “Simemetela UMbuso WaJehova,” njengobe kuvetiwe ekhasini laso lekucala.

Kute usite bantfu bacondze kutsi uyini uMbuso, ungabala letinye tetintfo labafuna bohulumende babentele tona, njengekulondzeka kutemnotfo, kuthula, kukhululeka ebugebengwini, kungabandlululwa kwato tonkhe tive, imfundvo, kanye netemphilo. Veta kutsi nguMbuso waNkulunkulu kuphela longenetisa letifiso ngalokugcwele.​—Hla. 145:16.

Yetama kwakha sifiso kubantfu sekuba tikhonti taloMbuso Jesu Khristu labusa kuwo njengeNkhosi. Veta kutsi timangaliso latenta tikhombisa loko latawukwenta njengeNkhosi ezulwini. Khuluma njalo ngebunguye bakhe lobukhangako. (Mat. 8:2, 3; 11:28-30) Chaza kutsi wasifela futsi ngemuva kwaloko Nkulunkulu wamvusela ekuphileni lokute kufa ezulwini, lapho abusa khona njengeNkhosi.​—Imis. 2:29-35.

Gcizelela kutsi uMbuso waNkulunkulu nyalo uyabusa ezulwini. Kodvwa-ke, khumbula kutsi bantfu labanyenti abatiboni timo labacabanga kutsi tingaba bufakazi bekubusa kwawo. Kucondze loko, futsi ubabute kutsi bayakwati yini loko Jesu Khristu latsi kuyoba sibonakaliso sekubusa kwakhe. Gcizelela letinye tincenye talesibonakaliso lesitfolakala kuMatewu sehluko 24, kuMakho sehluko 13, nobe kuLukha sehluko 21. Babute kutsi kungani kubusa kwaKhristu ezulwini kubangele timo letinjena emhlabeni. Gcizelela loko lokushiwo Sembulo 12:7-10, 12.

Kute uvete sibonelo lesiphatsekako saloko uMbuso waNkulunkulu lokwentako, fundza Matewu 24:14, futsi uchaze luhlelo lwemfundvo yeliBhayibheli loluchutjwa emhlabeni wonkhe. (Isa. 54:13) Tjela bantfu ngetikolwa letehlukehlukene BoFakazi BaJehova labazuza kuto​—tonkhe letisekelwe eBhayibhelini, futsi letitfolakala mahhala. Chaza kutsi ngetulu kwemsebenti wetfu wekushumayela emtini ngemuti, sifundza liBhayibheli mahhala nebantfu kanye nemindeni emaveni langetulu kwa-230. Ukhona yini hulumende longaniketa bantfu imfundvo lenjalo, unganiketi kuphela bantfu bawo kodvwa nabo bonkhe bantfu emhlabeni wonkhe? Memela bantfu eHholweni LeMbuso, emihlanganweni lemikhulu kanye nalemincane yaBoFakazi BaJehova, kute batibonele indlela lemfundvo lekugucula ngayo kuphila kwebantfu.​—Isa. 2:2-4; 32:1, 17; Joh. 13:35.

Umnikati welikhaya utawubona yini kutsi kuphila kwakhe kutsintseka njani? Ngekuhlakanipha ungamchazela kutsi injongo yekumvakashela kutsi nikhulume ngelitfuba lelivulekele bonkhe bantfu lekukhetsa kuphila njengetikhonti teMbuso waNkulunkulu. Angakwenta njani loko? Ngekufundza ngaloko Nkulunkulu lakufunako kanye nekuphila ngekuvumelana nako nyalo.​—Dut. 30:19, 20; Semb. 22:17.

Kusita Labanye Kutsi Bafune UMbuso Kucala. Ngisho nangemuva kwekutsi umuntfu awemukele umlayeto weMbuso, kunetincumo lokufanele atente. UMbuso waNkulunkulu utawuba yintfo lebaluleke kangakanani ekuphileni kwakhe? Jesu wakhutsata bafundzi bakhe kutsi ‘bafune uMbuso kucala.’ (Mat. 6:33) Singawasita njani emaKhristu lesikanye nawo kutsi ente njalo? Ngekuba sibonelo lesihle nangekukhuluma ngematfuba lasivulekele. Ngaletinye tikhatsi, loku singakwenta ngekubuta umuntfu kutsi uke wacabanga yini ngaletinye tintfo langatenta kanye nangekumcocela lokuhlangenwe nako kute umkhombise loko labanye labakwentako. Ngekukhuluma ngetindzaba letiseBhayibhelini ngendlela letawujulisa lutsandvo ngaJehova kumuntfu. Ngekugcizelela kutsi uMbuso waNkulunkulu ukhona mbamba kanye nangekuchaza indlela umsebenti wekumemetela ngeMbuso lobaluleke ngayo. Imiphumela ivame kuba mihle nangabe bantfu singabatjeli loko lokufanele bakwente, kodvwa sibenta babe nesifiso sekwenta leyontfo.

Asingabati kutsi umlayeto lobalulekile sonkhe lokufanele siwumemetele ngalokuyinhloko ukhuluma ngaJehova Nkulunkulu, ngaJesu Khristu kanye nangeMbuso. Lamaciniso labalulekile lamayelana nalomlayeto kufanele siwagcizelele nasishumayela, nalapho sisebandleni, futsi loku kufanele kubonakale nasekuphileni kwetfu. Nasenta njalo, sikhombisa kutsi sizuza mbamba emfundvweni yeSikolwa Semsebenti WemaKhristu.