15, 16. (a) Chaza indlela ingilosi yaJehova leyamkhulula ngayo Phetro ejele. (Buka sitfombe lesingentansi.) (b) Kungani kudvudvuta kucabanga ngendlela Jehova lakhulula ngayo Phetro?

¹⁵ Tamhambela njani tintfo Phetro? Ngebusuku bekugcina asejele, ngesikhatsi akulobudze butfongo, asemkhatsini wabogadzi lababili, wehlelwa tintfo letimangalisako. (Fundza Imisebenti 12:7-11.) Asewucabange ngaloko lokwenteka: Ngekushesha, kukhanya kwagcwala sitokisi labekakuso. Embikwakhe, bekume ingilosi lebeyingabonakali kubogadzi, futsi yamvusa ngekushesha. Tinketane lebekaboshwe ngato tawa. Lengilosi yase ihamba naye, yamkhokha esitokisini embikwalabogadzi labebeme ngephandle, futsi wendlula nasesangweni lelikhulu lensimbi, lelavele ‘lativulekela.’ Ngemuva kwekumkhiphela ngaphandle kwelijele, lengilosi yanyamalala. Phetro bese kakhululekile.

BAFAKAZA NGALOKUPHELELE NANGETULU KWETIPHATAMISO

17. Pawula wasibekela njani sibonelo lesihamba embili endzabeni yekushumayela ngenkhutsalo kanye nekuba nemuva wekuphutfuma?

¹⁷ Sifundvo sesitsatfu lesimayelana nekuhlala silindzile lesingasifundza kubaphostoli, kutsi: Bachubeka bafakaza ngalokuphelele nangetulu kwetiphatamiso. Kushumayela ngenkhutsalo futsi sinemuva wekuphutfuma kubalulekile kute sihlale silindzile. Umphostoli Pawula usibonelo lesihamba embili kuloku. Washumayela ngenkhutsalo, wahamba tindzawo letehlukehlukene futsi wasungula emabandla lamanyenti. Wakhutsatelela bumatima lobunyenti, kodvwa akazange alahlekelwe yinkhutsalo nobe ngumuva wekuphutfuma.—2 Khor. 11:23-29.