Litsatse Njengalelibalulekile Lilungelo Lakho Lekushumayela
1. Bantfu labanyenti kulelive bawutsatsa njani umsebenti wetfu wekushumayela?
1 Bantfu labanyenti kulelive laSathane batsatsa umsebenti wetfu wekushumayela ‘njengebulima.’ (1 Khor. 1:18-21) Nasingakanaki, loko kungasicedza emandla futsi kusente sinciphise nenshisekelo lesinayo ngalomsebenti. (Taga 24:10; Isa. 5:20) Ngutiphi tizatfu lesinato tekulitsatsa njengalelibalulekile lelilungelo lekuba boFakazi BaJehova?—Isa. 43:10.
2. Kungani umsebenti wekushumayela kutsiwa ‘ungcwele’?
2 “Umsebenti Longcwele”: Umphostoli Pawula watsi umsebenti wekushumayela ‘ungcwele.’ (Rom. 15:15, 16, NW) ‘Lomsebenti ungcwele’ ngayiphi indlela? Kuwenta lomsebenti kusenta sibe tisebenti “letibambisene” naLoyo ‘Longcwele,’ Jehova, futsi kufaka sandla ekungcwelisweni kwelibito lakhe. (1 Khor. 3:9; 1 Phet. 1:15) Jehova utsatsa kushumayela kwetfu ‘njengemnikelo wekumdvumisa.’ Ngako-ke, lomsebenti wekushumayela uyincenye lebaluleke kakhulu yekukhonta kwetfu.—Heb. 13:15.
3. Yini leyenta kushumayela tindzaba letinhle kube lilungelo lelikhulu?
3 Kushumayela tindzaba letinhle kulilungelo lelikhulu lelingakanikwa nobe ngabe ngubani. Tingilosi betingawenta ngenjabulo umsebenti lonjengalona futsi tiwente kahle kakhulu. (1 Phet. 1:12) Nanobe kunjalo, Jehova ukhetse tsine bantfu labanesono, ‘titja telubumba,’ kutsi sente lomsebenti lobaluleke kangaka!—2 Khor. 4:7.
4. Singakhombisa njani kutsi siwutsatsa njengalobalulekile umsebenti wekushumayela?
4 Umsebenti Lota Kucala: Ngesizatfu sekutsi silitsatsa njengalelibalulekile lelilungelo, umsebenti wekushumayela siwutsatsa ‘njengalobaluleke kakhulu’ ekuphileni kwetfu. (Fil. 1:10, NW) Ngako-ke, sihlela sikhatsi sekuwenta njalo ngeliviki. Umhlabeleli lolitsatsa njengalelibalulekile lilungelo lakhe lekudlala umculo we-orchestra lotsandvwako emhlabeni, angatilungiselela ngaso sonkhe sikhatsi nangabe kukhona lapho ayawudlala khona futsi angalwela nekutfutfukisa likhono lakhe. Ngendlela lefananako, natsi sitawulungiselela ngembikwekutsi siyewushumayela kute ‘siliphakele kahle livi leliciniso,’ futsi sitawulwela kutfutfukisa likhono letfu ‘lekufundzisa.’—2 Thim. 2:15; 4:2.
5. Ngubani lojabulako nasenta umsebenti wekushumayela?
5 Ungavumeli kunganaki kwebantfu labanyenti kukucedze emandla. Khumbula kutsi basebanyenti bantfu ensimini yetfu labakujabulelako kutsi sibavakashele. Nanobe kunjalo, asifuni kudvunyiswa bantfu. Lokubaluleke kakhulu yindlela Jehova lativa ngayo nasenta lomsebenti ngekutimisela.—Isa. 52:7.