Nakhululwa Ngenca Yemusa WaNkulunkulu

1, 2. BoFakazi baJehova bawusebentisa kangakanani umBhalo waRoma 5:12?

ASESITSI ufuna kwenta luhla lwemiBhalo BoFakazi baJehova labayati kahle futsi labavame kuyisebentisa. UmBhalo wamaRoma 5:12 ungaba khona yini kuloluhla lwakho? Ase ucabange nje kutsi kukangakhi ufundza emavi latsi: “Ngemuntfu munye sono sangena eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.”

² LomBhalo usetjentiswa kakhulu encwadzini letsi Lifundzisani Mbambambamba LiBhayibheli? Njengoba ufundza lencwadzi nebantfwana bakho nome labanye bantfu, manyenti ematfuba ekutsi uwufundze lomBhalo wamaRoma 5:12 nawukhuluma ngenjongo yaNkulunkulu ngemhlaba, sihlengo kanye nangesimo sebantfu labafile—lokucocwa ngako etahlukweni 3, 5 na-6 talencwadzi. Kodwva uyaye ucabange yini ngalomBhalo wemaRoma 5:12 nawucabanga ngebuhlobo bakho naNkulunkulu, tento takho kanye nangelikusasa lakho?

 3. Nguliphi liciniso sonkhe lokufanele silivume?

³ Sonkhe kufanele sivume kutsi sinesono. Onkhe malanga senta emaphutsa. Nanobe kunjalo, siyaciniseka kutsi Nkulunkulu uyati kutsi sibunjwe ngelutfuli futsi ukulungele kusibonisa umusa. (Hla. 103:13, 14) Jesu nakenta umthantazo losibonelo watsi kuNkulunkulu: “Usitsetselele tono tetfu.” (Luk. 11:2-4) Ngako, site sizatfu sekuhlale sicabanga ngemaphutsa lesawenta kadzeni ngobe Nkulunkulu usuke asitsetselele. Kodvwa kungasisita kucabanga ngekutsi Nkulunkulu usitsetselele njani nekutsi utasitsetselela njani.

4, 5. (a) Yini lengasenta siwucondze kahle umBhalo waRoma 5:12? (b) Uyini ‘lomusa lomkhulu’ waNkulunkulu lokukhulunywa ngawo kuRoma 3:24?

⁴ Kunyenti lesingakufundza etahlukweni letidvutane nemavi aPawula lakuRoma 5:12, ikakhulukati loko lokushiwo sahluko 6. Kufundza letahluko kutasisita sibone kutsi Nkulunkulu angasitsetselela njani. Esahlukweni 3 sitfola emavi latsi: “Bonkhe bonile . . . , kunjengesipho kubo kutsi kutsiwe balungile ngemusa wakhe lomkhulu ngenca yekukhululwa yinhlawulo leyakhokhwa nguKhristu Jesu.” (Rom. 3:23, 24) Bekasho kutsini Pawula nakakhuluma “ngemusa wakhe lomkhulu”? Wasebentisa ligama lesiGriki lelisho “kwentela lotsite intfo letsite ngemoya lovumako, ungagadzi kutsi loyo muntfu utakwentela lokutsite.” Lomusa asiwutfoli ngenca nje yekutsi kukhona lesikwentile, lokusenta siwufanele.

⁵ Lomunye umfundzi weliBhayibheli watsi: “Leligama lesiGriki nalikhuluma ngaNkulunkulu nobe ngaKhristu liyaye lisetjentiswe kuze lichaze kutsi banemusa lomkhulu futsi bakulungele kuhlawulela tono tebantfu futsi babasindzise.” Kungako lamavi latsi “umusa wakhe lomkhulu” lasetjentisiwe kulelivesi afaneleka. Kodvwa Nkulunkulu uwukhombise njani lomusa? Lomusa waNkulunkulu ulitsintsa njani litsemba lakho ngelikusasa kanye nebuhlobo bakho naye? Asesicoce ngaloku.

 6. Umusa waNkulunkulu ubasita njani bantfu?

⁶ Adamu ‘ungulomuntfu munye’ sono kanye nekufa lokwangena ngaye “eveni.” Ngako, “ngesono semuntfu munye kufa kwabusa njengenkhosi.” Pawula waphindze watsi “umusa waNkulunkulu nesipho sekulunga” kweta “ngemuntfu munye, Jesu Khristu.” (Rom. 5:12, 15, 17) Lomusa waNkulunkulu ubasite kakhulu bantfu lamuhla. LiVi laNkulunkulu litsi: “Ngekulalela kwemuntfu munye, bantfu labanyenti kutawutsiwa balungile.” Empeleni, umusa waNkulunkulu ungaholela bantfu “ekuphileni lokuphakadze ngaJesu Khristu.”​—Rom. 5:19, 21.

 7. Kungani lilungiselelo laNkulunkulu lesihlengo likhombisa kutsi unemusa?

⁷ Jehova abengakaphoceleleki kutsi atfumele Jesu emhlabeni kuze atawufela bantfu. Ngetulu kwaloko bantfu labanesono bebangakufanele loko Nkulunkulu naJesu lababentela kona ngekutsi balungiselele sihlengo lebesitawusita bantfu batsetselelwe tono tabo. Ngako, kutsetselelwa kwetono tetfu kanye nematsemba lesinawo ekuphila phakadze kungumusa waNkulunkulu. Kufanele siwatise lomusa waNkulunkulu futsi siwuvumele utsintse indlela lesiphila ngayo.

 8. Ngumuphi umbono loliphutsa bantfu labanawo ngetono labatentako?

⁸ Ngenca yekutsi siyintalelwane ya-Adamu lenesono, nakanjani sitawenta emaphutsa. Nanobe kunjalo, kungaba liphutsa ngatsi kucabanga kutsi vele Nkulunkulu kufanele asibonise umusa nangabe sonile, size sitsi: ‘Akukafanele ngikhatsateke nangabe ngenta intfo lembi. Jehova utangicolela.’ Lokubi nakakhulu kutsi lamanye emaKhristu bekativa ngaleyondlela ngisho nangesikhatsi labanye baphostoli basaphila. (Fundza Juda 4.) Kungenteka natsi imicabango lenjalo sibe nayo kodvwa singayiveti ngemavi etfu.

9, 10. Pawula akanye nalabanye bakhululwa kanjani esonweni nasekufeni?

⁹ Pawula wagcizelela kutsi kufanele singavumelani nembono lotsi: ‘Nkulunkulu uyati kutsi nginesono. Akanendzaba netento tami letimbi.’ Kungani? Kungenca yekutsi Pawula watsi emaKhristu ‘akhululekile esonweni.’ (Fundza Roma 6:1, 2.) Kungani Pawula atsi lamaKhristu ‘akhululekile esonweni’ abe asaphila emhlabeni?

¹⁰ Nkulunkulu wasebentisa sihlengo kuPawula nakulabanye lebebaphila ngesikhatsi sakhe. Ngako Jehova watitsetselela tono tabo, wabagcoba ngemoya longcwele futsi wababita ngekutsi bangemadvodzana akhe emoya. Kungako baba nelitsemba lekuyophila ezulwini. Nangabe bahlala betsembekile kuNkulunkulu, bebatawuphila ezulwini babuse kanye naJesu. Kodvwa Pawula nakakhuluma ngabo watsi “bafile esonweni” nanobe bebasaphila futsi basakhonta Nkulunkulu lamhlabeni. Wasebentisa sibonelo saJesu, loyo lowafa njengemuntfu futsi wavuselwa ezulwini njengesidalwa semoya. Kufa besekungasabusi njengenkhosi kuJesu. Bekuyintfo lefanako nakumaKhristu lagcotjiwe njengoba nawo bekatibheka “njengalafile esonweni, kodvwa njengalaphilako kuNkulunkulu, ngaKhristu Jesu.” (Rom. 6:9, 11) Indlela yabo yekuphila beseyishintjile. Besebangasabuswa tifiso tesono. Ngako besebafile endleleni yabo yekuphila yangaphambili.

11. Tsine lesinelitsemba lekuphila phakadze epharadisi, “sesikhululekile esonweni” ngamuphi umcondvo?

¹¹ Kutsiwani ngatsi? Sisengakabi ngemaKhristu besivame kwenta tintfo letimbi, mhlawumbe singati nekwati kutsi loko lesikwentako kubi kanganani emehlweni aNkulunkulu. Besifana ‘netigcili tekungcola nebubi.’ Kungashiwo kutsi ‘besitigcili tesono.’ (Rom. 6:19, 20) Kepha lapho sesilati liciniso leliBhayibheli, sayishintja indlela lebesiphila ngayo, satinikela kuNkulunkulu futsi sabhajatiswa. Kusukela ngaleso sikhatsi, bekusolo kusifiso setfu kulalela timfundziso taNkulunkulu kanye netimiso takhe “ngalokusuka enhlitiyweni.” Nanobe kungenteki ngendlela lefanako neyemaKhristu lagcotjiwe, natsi ‘sakhululwa esonweni sabese siba tigcili tekulunga.’ (Rom. 6:17, 18) Ngako natsi singasho kutsi “sesikhululekile esonweni.”

12. Nguliphi lilungelo lekutikhetsela sonkhe lesinalo?

¹² Asewuticabange sewuphila ngekuvumelana nalamavi aPawula latsi: “Ningasasivumeli sono kutsi sichubeke sibusa njengenkhosi emitimbeni yenu lefako, ngekwenta tifiso tayo.” (Rom. 6:12) ‘Singasivumela sono kutsi sichubeke sibusa’ ngekutsi sente loko lokufunwa yimitimba yetfu lenesono. Kodvwa ngenca yekutsi sinelilungelo lekukhetsa kuvumela kubuswa sono nome singasivumeli, kungaba kuhle kutibuta kutsi, Yini mbambambamba lengiyifunako? Leminye imibuto lesingatibuta yona ngunayi letsi: ‘Ngiyawuvumela yini umtimba wami lonesono kutsi ungentise tintfo letimbi? Sengikhululiwe yini esonweni? Nginjengalabaphilako yini kuNkulunkulu, ngaKhristu Jesu?’ Konkhe loku kuya ngekutsi sibonga kanganani ngemusa Nkulunkulu lasikhombise wona ngekutsi asitsetselele tono tetfu.

13. Ngubuphi bufakazi lesinabo bekutsi umuntfu lowenta sono angashintja?

¹³ Tinceku taJehova tiwuyekele ‘umvuzo lebetiwutfola’ tisengakamkhonti. Indlela lebetiphila ngayo ngaphambi kwekuba ngemaKhristu kungenteka beyifaka ekhatsi ‘tintfo lesetinemahloni ngato’ futsi lebetingatenta tifanelwe kufa. (Rom. 6:21) Ngako tashintja. Nguloko kanye lokwentiwa ngemaKhristu aseKhorinte Pawula lakhuluma ngawo. Labanye bebakhonta titfombe, batiphingi, bangemadvodza lalala nalamanye emadvodza, bangemasela futsi batidzakwa. Nome kunjalo, ‘sebahlantiwe’ futsi ‘sebangcwelisiwe.’ (1 Khor. 6:9-11) Bekunebantfu labanjalo nasebandleni laseRoma. Pawula waphefumulelwa kutsi ababhalele atsi: “Ningayinikeli imitimba yenu esonweni njengetikhali tekungalungi, kodvwa tinikeleni kuNkulunkulu njengalabo labavuswe ekufeni, ninikele nemitimba yenu kuye njengetikhali tekulunga.” (Rom. 6:13) Pawula bekaciniseka kutsi bebangahlala bahlantekile ebuhlotjeni babo naNkulunkulu futsi batfole umusa wakhe.

14, 15. Ngumiphi imibuto lokufanele sitibute yona mayelana nekuba “ngulabalalela ngalokusuka enhlitiyweni”?

¹⁴ Sisesimeni lesifanako nalamuhla. Labanye bazalwane nabodzadze kungenteka bebaphila ngendlela lefana neyebazalwane baseKhorinte. Kodvwa nabo bashintjile. Bayiyekele indlela yabo yekuphila lenesono futsi ‘bahlantwa.’ Kungenteka kube nawe bewunjalo, kodvwa kunjani kuma kwakho naNkulunkulu nyalo? Njengobe umusa waNkulunkulu utfolakala futsi awusebentisa kuze asitsetselele tono tetfu, utimisele yini ‘kungasawunikeli umtimba wakho esonweni’? ‘Utawutinikela yini kuNkulunkulu njengalovusiwe ekufeni’?

¹⁵ Nangabe sifuna kwenta kanjalo, kufanele singatenti letintfo letimbi lebetentiwa ngulabanye eKhorinte. Loku kubalulekile nangabe sitsi sesiwemukele umusa waNkulunkulu futsi nesono asisabusi njengenkhosi etikwetfu. Nanobe kunjalo, sitimisele yini ‘kulalela ngalokusuka enhlitiyweni’ ngekutsi sente konkhe lesingakwenta kuze singatenti tintfo letimbi, ngisho naleto labanye labatsi atisito letimbi kakhulu?​—Rom. 6:14, 17.

16. Sati njani kutsi kuba ngumKhristu kusho lokungetulu kwekuyekela tono letinkhulu.

¹⁶ Ase sicabange ngalokwenteka kumphostoli Pawula. Siyaciniseka kutsi bekangahlanganyeli kuletono letinkhulu lokukhulunywa ngato ku-1 Khorinte 6:9-11. Nanobe kunjalo, wavuma kutsi bekahle awenta emaphutsa. Wabhala watsi: “Mine ngiyinyama, futsi ngitsengiswe esonweni. Angikucondzi kahle loko lengikwentako. Ngobe loko lengifisa kukwenta angikwenti, kodvwa loko lengikutondzako ngiko lengikwentako.” (Rom. 7:14, 15) Loku kukhombisa kutsi kukhona tintfo Pawula lebekatenta lebekatibuka njengaletimbi futsi lebekalwa matima kuze atiyekele. (Fundza Roma 7:21-23.) Shengatsi natsi singamlingisa umphostoli Pawula njengobe silwela kuba “ngulabalalela ngalokusuka enhlitiyweni.”

17. Kungani kufanele setsembeke?

¹⁷ Ase ucabange nje ngekwetsembeka. Onkhe emaKhristu kufanele etsembeke. (Fundza Taga 14:5; Efesu 4:25.) Sathane ‘unguyise wemanga.’ Ananiyase nemfati wakhe bafa ngenca yekutsi bakhuluma emanga. Asifuni kubalingisa, ngako kufanele singawakhulumi emanga. (Joh. 8:44; Imis. 5:1-11) Kwetsembeka kusho kungakhulumi emanga kuphela yini? Ecinisweni, kwetsembeka kwetfu kufanele kukhombise kutsi siyabonga ngemusa waNkulunkulu.

18, 19. Kungani sitsi kwetsembeka kusho lokungetulu nje kwekukhuluma emanga?

¹⁸ Kucamba emanga kusho kukhuluma intfo lengasilo liciniso. Nobe kunjalo, Jehova ufuna kutsi tinceku takhe tente lokungetulu nje kwekungakhulumi emanga. Akhuluma nema-Israyeli, watsi: “Banini ngcwele, ngobe mine Simakadze, Nkulunkulu wenu, ngingcwele.” Ngemuva kwaloko wase ubaniketa tibonelo tekuba ngcwele. Nkulunkulu watsi: “Ningebi, ningakhohlisani. Ningacalelani emanga.” (Lev. 19:2, 11) Kuyadzabukisa kutsi umuntfu lotimisele kungakhulumi emanga angahle abakhohlise labanye bantfu.

¹⁹ Nasi sibonelo, sisebenti singase sitjele umcashi waso nobe lesisebenta nabo kutsi ngeke sibekhona emsebentini ngakusasa nobe sitawusheshe sishayise ngobe ‘siyobona dokotela.’ Ecinisweni kubona kwaso dokotela kungenteka kusho kuya ekhemisi nobe kuyobhadala tindleko tekwelashwa ngudokotela. Sizatfu saso mbamba sekungayi emsebentini simane nje sikutsi silungiselele luhambo lwekuvakasha nemndeni waso. Kungenteka kutsi besicinisile nasitsi besiyobona dokotela, kepha singasho yini kutsi setsembekile? Nobe besibakhohlisa? Kungenteka nawe uyatikhumbula tikhatsi lapho wabakhohlisa khona labanye. Mhlawumbe labanye bakhohlisa labanye kuze bangajeziswa nobe kuze baphumelele. Ngisho nobe umuntfu angakawakhulumi emanga, kutsiwani ngalomyalo waNkulunkulu lotsi: “Ningakhohlisani”? Cabanga nangemBhalo wemaRoma 6:19, lotsi: “Nikelani ngemitimba yenu kutsi ibe tigcili tekulunga lokuholela ekubeni ngcwele.”

20, 21. Umusa waNkulunkulu kufanele usishukumisele kutsi senteni?

²⁰ Kubonga kwetfu kuNkulunkulu ngemusa wakhe kusho lokungetulu nje kwekungaphingi, kudzakwa nobe kwenta leminye imikhuba lemibi lebeyentiwa ngulabanye eKhorinte. Kwemukela umusa waNkulunkulu akusho nje kungatiphatsi kabi ngekwelicansi kuphela, kodvwa kusho kulwisana nekutsandza imidlalo lenekutiphatsa lokubi. Kunikela ngemitimba yetfu kutsi ibe tigcili tekulunga ngeke nje kusente kutsi singadzakwa kuphela, kodvwa sitawuphindze sikubalekele kunatsa kakhulu tjwala. Kungenteka kudzingeke kutsi silwe matima kuze siyekele lemikhuba lemibi, nanobe kunjalo, lena yimphi lesingayincoba.

²¹ Umgomo wetfu kufanele kube kubalekela tonkhe tono kanye nemikhuba lebonakala ingasiyo lemibi kangako. Kuliciniso kutsi ngasikhatsi sitawenta emaphutsa. Nobe kunjalo kufanele sente konkhe lesingakwenta kuze silingise Pawula. Wancenga bazalwane labekanye nabo watsi: “Ningasasivumeli sono kutsi sichubeke sibusa njengenkhosi emitimbeni yenu lefako, ngekwenta tifiso tayo.” (Rom. 6:12; 7:18-20) Nangabe silwisana nesono ngato tonkhe tindlela, sitawube sikhombisa kutsi siyambonga Nkulunkulu ngemusa wakhe lasibonise wona ngaKhristu.

22. Labo lababongako ngemusa waNkulunkulu batawutfola muphi umvuzo?

²² Ngenca yemusa waNkulunkulu, siye satsetselelwa tono tetfu futsi tingachubeka titsetselelwa. Kuze sikhombise kutsi siyabonga, sonkhe kufanele silwisane nanobe ngabe ngumuphi umkhuba lomubi labanye labawubheka njengalongasiwo lomubi kangako. Agcizelela umvuzo lesitawutfola, Pawula watsi: “Njengobe senikhululiwe esonweni futsi senitigcili taNkulunkulu, nitfola umvuzo wekuba ngcwele, bese kutsi ekugcineni nitfole kuphila lokuphakadze.”​—Rom. 6:22.