Indlela Yekukhetsa Kutijabulisa Lokukahle

1, 2. Ngukuphi kukhetsa lekufanele sikwente ngalokuphatselene nekutijabulisa?

TICABANGE ulungele kudla sitselo lesivutisa ematse, kepha nawutsi uyasibukisisa ubone kutsi sinendzawana lebolile. Bewungenta njani? Mhlawumbe, ungakhetsa kusidla sonkhe lesitselo nalendzawana lebolile; ungakhetsa kuvele usilahle sonkhe, nobe ungakhetsa kusika lendzawo lebolile uyilahle, bese udla lencenye lengakaboli. Wena bewungakhetsani?

² Ngandlelatsite, kutijabulisa kuyafanana nesitselo. Ngaletinye tikhatsi uyafuna kutijabulisa, kepha uyacaphela kutsi kutijabulisa lokunyenti lamuhla kugcwele kutiphatsa lokubi, futsi kunjengalesitselo lesibolile. Ngako-ke, yini lokufanele uyente? Labanye bangahle bakubeketelele lokubi baze bemukele nobe ngabe nguluphi luhlobo lwekutijabulisa kwalelive. Labanye bona bangahle bakhetse kutigwema tonkhe tinhlobo tekutijabulisa, besaba kutsi bangase balimale. Ngalokufananako, labanye bangase bakugweme kutijabulisa lokulimatako, kepha ngaletinye tikhatsi bahlanganyele ekutijabuliseni lokubonakala kukahle. Ngukuphi kukhetsa lekufanele ukwente kute utigcine elutsandvweni lwaNkulunkulu?

 3. Yini nyalo lesitawucoca ngayo?

³ Linyenti letfu lingase likhetse loku kwesitsatfu. Siyacaphela kutsi siyakudzinga kutijabulisa, kepha ngesikhatsi lesifananako kudzingeka silinganisele, sikhetse loko lokuhlantekile kuphela. Ngako-ke, kufanele sicabange ngetindlela lesingakwati ngato kwehlukanisa emkhatsini wekutijabulisa lokukahle nalokulimatako. Kwekucala, asesicoce ngendlela luhlobo lwekutijubulisa lesilukhetsako lolungakutsintsa ngayo kukhonta kwetfu Jehova.

 4. Kutinikela kwetfu kufanele kutitsintse njani tinhlobo tekutijabulisa lesitikhetsako?

⁴ Eminyakeni letsite leyengcile, Fakazi losakhulile lowabhajatiswa nga-1946 watsi: “Bengihlale njalo ngicikelela kutsi ngiba khona kuto tonkhe tinkhulumo telubhabhatiso, futsi ngilalela ngekunakisisa, njengekungatsi bekulilanga lami lekubhajatiswa.” Kungani abenta kanjalo? Wachaza: “Kugcina kutinikela kwami, bekusolo kuyintfo lebalulekile kute ngihlale ngetsembekile.” Ngalokungangabateki, nawe uyavumelana nalendlela abetiva ngayo. Kuhlala njalo utikhumbuta kutsi wawente setsembiso kuJehova sekumkhonta kuphila kwakho konkhe, kukusita kutsi ukhutsatele. (Fundza Umshumayeli 5:4; Hebheru 10:7) Ecinisweni, kuhlala njalo uzindla ngekutinikela kwakho kungawutsintsa umbono wakho, hhayi wenkonzo yebuKhristu kuphela, kepha newaletinye tincenye tekuphila, njengekutijabulisa. Umphostoli Pawula wakugcizelela loku lapho abhalela emaKhristu esikhatsi sakhe: “Nome niyadla, nome niyanatsa, nome nentani-ke lokunye, konkhe akwentelwe ludvumo lwaNkulunkulu.”​—1 Khorinte 10:31.

 5. Incwadzi yaLevithikhusi 22:18-20 isisita njani kutsi sibone secwayiso lesifihlekile lesikumaRoma 12:1?

⁵ Yonkhe intfo loyentako ekuphileni iyakutsintsa kukhonta kwakho Jehova. Encwadzini yakhe leyayiya kubaseRoma, Pawula wasebentisa emagama lacinile kute agcizelele leliciniso kubazalwane labekanye nabo. Wabancenga watsi: “Nikelani imitimba yenu ibe ngumnikelo lophilako, nalongcwele, nalowemukeleka kuNkulunkulu; leyo-ke nguyona nkonzo yenu sibili.” (Roma 12:1) Umtimba wakho uhlanganisa ingcondvo, inhlitiyo, kanye nemandla akho onkhe. Konkhe loku, kutintfo lotisebentisako kute ukhonte Nkulunkulu. (Makho 12:30) Pawula ukhuluma ngalenkonzo yemphefumulo wonkhe ngekutsi ingumnikelo. Ligama lelitsi ‘umnikelo’ linesecwayiso lesifihlekile. Ngephansi kweMtsetfo waMosi, umnikelo lonesici wawungemukeleki kuNkulunkulu. (Levithikhusi 22:18-20) Ngalokufananako, nangabe inkonzo umKhristu layinikelako inesici, nayo angeke yemukeleke kuNkulunkulu. Kungenteka njani loko?

6, 7. UmKhristu angawungcolisa njani umtimba wakhe, futsi loko kungaba namiphi imiphumela lebuhlungu?

⁶ Pawula weluleka emaKhristu aseRoma watsi: “Akusafanele kutsi ninikele titfo tenu esonweni.” Waphindze wawatjela nekutsi ‘nangabe abulala imisebenti yenyama ngamoya, atawuphila.’ (Roma 6:12-14; 8:13) Ekucaleni kwalencwadzi, Pawula waveta tibonelo ‘temisebenti yenyama.’ Ngalokuphatselene nebantfu labanesono siyafundza: “Imilomo yabo igcwele ticalekiso.” “Tinyawo tabo tiyashesha kuya ekucitseni ingati.” “Abamesabi Nkulunkulu.” (Roma 3:13-18) UmKhristu angabe uyawungcolisa umtimba wakhe nakangasebentisa “titfo” takhe temtimba etintfweni letinjalo. Sibonelo saloko kutsi nangabe umKhristu abukela ngemabomu tintfo letinjengetitfombe letingcolile nobe budlova lobukhombisa lunya, usuke akhombisa kutsi ‘akamesabi Nkulunkulu,’ futsi uyawungcolisa umtimba wakhe. Yonkhe inkonzo layentako itawuba ngumnikelo longasingcwele futsi longemukeleki kuNkulunkulu. (Dutheronomi 15:21; 1 Phetro 1:14-16; 2 Phetro 3:11) Ubhekana nemiphumela lemibi kakhulu ngenca nje yekukhetsa kutijabulisa lokulimatako.

⁷ Kuyacaca-ke kutsi indlela umKhristu lakhetsa ngayo endzabeni yekutijabulisa ingaba nemiphumela lemihle nobe lemibi. Sifuna kukhetsa kutijabulisa lokutawukwenta iminikelo yetfu leya kuNkulunkulu iphile nakakhulu, ingabi ngulengcolile. Ngako kwanyalo asesicoce ngendlela lesingakwati ngayo kwehlukanisa emkhatsini wekutijabulisa lokuhle nalokubi.

8, 9. (a) Tekutijabulisa tingehlukaniswa ngatiphi tinhlobo letimbili? (b) Ngutiphi tinhlobo tekutijabulisa lesitilahlako, futsi ngani?

⁸ Ngalokuvamile tekutijabulisa tingehlukaniswa tibe tinhlobo letimbili. Lenye yato ihlanganisa kutijabulisa emaKhristu lakugwema ngalokuphelele; kantsi lenye ihlanganisa kutijabulisa emaKhristu langase akhetse kukwemukela nobe kungakwemukeli. Ase sicale ngekuhlola loluhlobo lwekucala​—kutijabulisa emaKhristu lakugwemako.

⁹ Njengobe kuvetiwe eSehlukweni sekucala, letinye tinhlobo tekutijabulisa ticuketse tintfo liBhayibheli lelitilahla ngalokuphelele. Ase ucabange nje nge-Internet nemabhayisikobho, tinhlelo te-TV, kanye netingoma letikhuluma ngekuphatsa kabi labanye nobe ngebudimoni, letinetitfombe letingcolile nobe letikhutsata kutiphatsa lokubi. Njengobe tinhlobo letinjalo tekutijabulisa tiveta imikhuba leyephula timiso nobe imitsetfo yeliBhayibheli, emaKhristu eliciniso kufanele atigweme. (Imisebenti 15:28, 29; 1 Khorinte 6:9, 10; Sembulo 21:8) Ngekulahla kutijabulisa lokufanana naloku, ukhombisa Jehova kutsi ‘uyakutondza lokubi’ futsi ‘uyakhwesha kuko.’ Ngekwenta kanjalo, usuke ubonisa kutsi ‘unelukholo lolute kutentisa.’​—Roma 12:9; Tihlabelelo 34:14; 1 Thimothi 1:5.

10. Nguluphi luhlobo lwekucabanga ngetekutijabulisa loluyingoti, futsi ngani?

¹⁰ Labanye bangase babe nemuva wekutsi kubukela tintfo letinekutiphatsa lokubi, akusiyo ingoti. Bangase batsi: ‘Ngingakubukela kumabhayisikobho nobe ku-TV, kepha mine angeke ngikwente.’ Kucabanga lokunjalo kuyayengana futsi kuyingoti. (Fundza Jeremiya 17:9.) Nangabe sibukela tintfo Jehova latilahlako, sisuke ‘sikutondza yini vele lokubi’? Kuhlale sibukela, sifundza nobe silalela imikhuba lemibi, kutawuyilimata ingcondvo yetfu. (Tihlabelelo 119:70; 1 Thimothi 4:1, 2) Imikhuba lenjalo ingakutsintsa lesikwentako kanye nendlela lesiyibheka ngayo imikhuba lemibi leyentiwa ngulabanye.

11. Incwadzi yebaseGalathiya 6:7 ibe liciniso njani ngalokuphatselene nekutijabulisa?

¹¹ Loku kuke kwenteka mbamba. Lamanye emaKhristu angene ekutiphatseni lokubi ngenca yekutsi abehungwe kutijabulisa labehlale akubukela. Bakufundze kabuhlungu kutsi ‘nobe yini umuntfu layihlanyelako uyawuvuna yona futsi.’ (Galathiya 6:7) Kepha umphumela lonjalo ungagwemeka. Nangabe engcondvweni yakho uhlanyela lokuhle, uyawuvuna lokuhle ekugcineni.​—Fundza libhokisi lelitsi “Nguluphi luhlobo lwekutijabulisa lokufanele ngilukhetse?”

12. Incwadzi yebaseGalathiya 6:5 ihlobana njani nekutijabulisa, futsi ngusiphi sicondziso lesinaso sekwenta tincumo?

¹² Nyalo-ke ase sihlole luhlobo lwesibili​—kutijabulisa lokunemikhuba lengalahlwa futsi lengavunyelwa ngalokucondzile liVi laNkulunkulu. Lapho akhetsa kutijabulisa lokunjalo, umKhristu ngamunye kufanele atincumele yena kutsi yini layibona iyinhle. (Fundza Galathiya 6:5.) Nobe kunjalo, lapho kufanele sente lesincumo, sinaso sicondziso. LiBhayibheli linetimiso nobe emaciniso lasisekelo, lasenta sikhone kucondza indlela yaJehova yekucabanga. Ngekunaka timiso letinjalo, siyawukhona kucondza kutsi ‘iyini intsandvo yaJehova’ kuto tonkhe tintfo, kuhlanganise nekutijabulisa lesikukhetsako.​—Efesu 5:17.

13. Yini letawusenta sigweme kutijabulisa lokungenteka kungamjabulisi Jehova?

¹³ Kuyacondzakala kutsi akusiwo onkhe emaKhristu lanelizinga lekucondza lelilinganako. (Filiphi 1:9) Ngetulu kwaloko, emaKhristu ayacondza kutsi etindzabeni tekutijabulisa, loko lakutsandzako nalangakutsandzi kuyehlukahluka. Ngako-ke, angeke silindzele kutsi onkhe emaKhristu ancume ngendlela lefananako. Nobe kunjalo, nangabe sivumela timiso taNkulunkulu ticondzise tingcondvo netinhlitiyo tetfu, sifiso setfu sekugwema kutijabulisa lokungamjabulisi Jehova sitawukhula.​—Tihlabelelo 119:11, 129; 1 Phetro 2:16.

14. (a) Yini lokufanele siyicabangele nasikhetsa tekutijabulisa? (b) Singatigcina njani tintfo letiphatselene nekukhonta Nkulunkulu tita kucala ekuphileni kwetfu?

¹⁴ Nasikhetsa tekutijabulisa, kunalokunye lokubalulekile lokufanele sikucabangele: Sikhatsi setfu. Njengobe kutijabulisa lokukhetsako kuveta kutsi yini loyibona yemukeleka, sikhatsi losicitsa kuko sona siveta kutsi yini loyibona ibalulekile. KumaKhristu, tindzaba letiphatselene nekukhonta Nkulunkulu ngito letibaluleke kakhulu. (Fundza Matewu 6:33.) Yini-ke lokufanele uyente kute uciniseke kutsi letindzaba letiphatselene nekukhonta Nkulunkulu tihlala tita kucala ekuphileni kwakho? Umphostoli Pawula watsi: “Ngako-ke caphelani kutsi nitiphatsa njani. Ningatiphatsisi kwebantfu labangakahlakaniphi, kepha njengalabahlakaniphile. Nibambisise ematfuba ngobe emalanga mabi.” (Efesu 5:15, 16) Kutibekela imincele ngalokuphatselene nesikhatsi lesisibekela kutijabulisa, kutawusisita ekutseni sibe nesikhatsi lesenele ‘setintfo letibaluleke kakhulu’​—lokuyimisebenti letfutfukisa buhlobo betfu naJehova.​—Filiphi 1:10.

15. Kungani kukuhlakanipha kutibeka eluhlangotsini lokuphephile lapho ukhetsa tekutijabulisa?

¹⁵ Kukuhlakanipha kutsi utibeke eluhlangotsini loluphephile lapho ukhetsa tekutijabulisa. Kusho kutsini loku? Ase uphindze ucabange futsi ngesibonelo sesitselo. Kute ungagcini sewudla nendzawo lebolile, awususi nje kuphela leyo ndzawo lebolile kepha nendzawana leyitungeletile. Ngalokufananako-ke, kukuhlakanipha kwenta kanjalo nasendzabeni yekukhetsa tekutijabulisa. UmKhristu lohlakaniphile akagwemi nje kuphela kutijabulisa lokutephula ngalokucondzile timiso teliBhayibheli kepha uphindze agweme netinhlobo letisolisako nobe letibonakala tingalimata buhlobo bakhe naJehova. (Taga 4:25-27) Kunamatsela eselulekweni lesiseVini laNkulunkulu kutawukusita kutsi wente kanjalo.

16. (a) Singabonisa njani kutsi sinembono waJehova ngekutiphatsa? (b) Kusebentisa timiso teliBhayibheli kungaba njani yindlela yakho yekuphila?

¹⁶ Lapho akhetsa indlela yekutijabulisa, kwekucala nje emaKhristu eliciniso acabangela indlela Jehova lakubheka ngayo. LiBhayibheli lembula imiva kanye netimiso taJehova. Cabanga nganasi sibonelo: INkhosi Solomoni ibala tintfo letinyenti Jehova latitondzako, ‘letinjengelulwimi lolucala emanga, nembulali walote licala, nengcondvo lebumba emacebo ebubi, nemuntfu lotsandza lokubi.’ (Taga 6:16-19) Umbono waJehova kufanele uwutsintse njani umbono wakho ngaloku? “Nine lenitsandza Simakadze, tondzani konkhe lokubi.” (Tihlabelelo 97:10) Indlela lokhetsa ngayo tekutijabulisa kudzingeka ikhombise kutsi ukutondza sibili loko Jehova lakutondzako. (Galathiya 5:19-21) Naku lokunye lekufanele ukugcine engcondvweni: Nguloko lokwenta endzaweni lesitsekile, kunaloko lokwenta ebaleni, lokuveta luhlobo lwemuntfu longilo. (Tihlabelelo 11:4; 16:8) Ngako-ke, nangabe unesifiso lesicotfo sekubonisa ngendlela lophila ngayo kutsi Jehova utiva njani ngekutiphatsa lokubi, ngaso sonkhe sikhatsi utawukwenta tincumo letivumelana netimiso teliBhayibheli. Kwenta kanjalo kuyawuhlala njalo kuyindlela yakho yekuphila.​—2 Khorinte 3:18.

17. Ngembi kwekukhetsa luhlobo lwekutijabulisa, ngumiphi imibuto lekufanele sitibute yona?

¹⁷ Yini lenye longayenta kute uciniseke kutsi ngaso sonkhe sikhatsi lapho ukhetsa tekutijabulisa wenta ngekuvumelana nendlela yaJehova yekucabanga? Asewucabange ngalombuto: ‘Loku kutawungitsintsa njani mine kanye nebuhlobo bami naNkulunkulu?’ Sibonelo saloko kutsi ngembi kwekuncuma kutsi utawulibukela yini lifilimu lelitsite, kufanele utibute nangu umbuto: ‘Konkhe lokutawudlalwa kulelifilimu kutawutsintsa njani nembeza wami?’ Asesicabange ngekutsi ngusiphi simiso lesisebentako kulendzaba.

18, 19. (a) Simiso lesisencwadzini yebaseFiliphi 4:8 singasisita njani kutsi sikhetse kutijabulisa lokuhle? (b) Ngutiphi letinye timiso letingakusita kutsi ukhetse kutijabulisa lokuhle? (Fundza umbhalo longentasi.)

¹⁸ Simiso lesibaluleke nakakhulu sitfolakala encwadzini yebaseFiliphi 4:8, letsi: ‘Gcwalisani tingcondvo tenu ngako konkhe lokuliciniso, nangako konkhe lokuhloniphekako, nangako konkhe lokulungile, nangako konkhe lokuhlobile, nangako konkhe lokutsandzekako, nangako konkhe lokutusekako. Nome ngabe kukhona lokuhle, nome ngabe kukhona lokubongekako, cabangani ngaloko.’ Kuyavunywa, Pawula abengakhulumi ngekutijabulisa, kepha abekhuluma ngemizindlo yenhlitiyo lekufanele inamatsele etintfweni letitsandvwa nguNkulunkulu. (Tihlabelelo 19:14) Lamavi aPawula angasetjentiswa njani njengesimiso kulendzaba yekutijabulisa?

¹⁹ Tibute naku: ‘Emafilimu lengiwakhetsako, imidlalo yema-video, umculo, kanye naletinye tinhlobo tekutijabulisa tiyayigcwalisa yini ingcondvo yami ‘ngetintfo letihlantekile’?’ Cabanga nganasi sibonelo: Ngemuva kwekubukela lifilimu, ngutiphi titfombe letisala engcondvweni yakho? Nangabe titinhle, nobe timsulwa, futsi tikujabulisa, utawukwati-ke kutsi lokutijabulisa kwakho bekukuhle kakhulu. Kepha-ke, nangabe lelifilimu lolibukele likwenta usale ucabanga ngetintfo letingcolile, loko kusho kutsi indlela yakho yekutijabulisa beyingasiyinhle nani, futsi iyingoti. (Matewu 12:33; Makho 7:20-23) Kungani sisho njalo? Ngobe kucabanga ngetintfo letingcolile kuphatamisa kuthula kwakho kwangekhatsi, kulimate nanembeza wakho loceceshwe liBhayibheli, futsi kone nebuhlobo bakho naNkulunkulu. (Efesu 5:5; 1 Thimothi 1:5, 19) Njengobe kutijabulisa lokunjalo kukulimata wena ngekwakho, timisela kukugwema.a (Roma 12:2) Lingisa umhlabeleli lowathandaza kuJehova, watsi: “Fulatselisa emehlo ami ekubukeni tintfo letingenamsebenti.”​—Tihlabelelo 119:37.

20, 21. Incwadzi yekucala yebaseKhorinte 10:23, 24 ihlobana njani nendzaba yekukhetsa kutijabulisa lokuhle?

²⁰ Pawula wakhuluma ngesimiso lesibalulekile seliBhayibheli, lekufanele sicatjangelwe lapho senta tincumo letitsintsa umuntfu ngekwakhe. Watsi: “Kuvumelekile konkhe, kodvwa akwakhi konkhe. Akubete lotifunela kwakhe, akube ngulowo nalowo afunele lomunye.” (1 Khorinte 10:23, 24) Lesimiso sihlobana njani nekukhetsa kutijabulisa lokuhle? Kufanele utibute: ‘Kutijabulisa lengikukhetsako kutawubatsintsa njani labanye?’

²¹ Nembeza wakho ungakuvumela kutsi uhlanganyele eluhlotjeni lolutsite lwekutijabulisa, locabanga kutsi ‘luvumelekile’ nobe lwemukelekile. Nobe kunjalo, nangabe uyabona kutsi lamanye emaKhristu lananembeza lowavimbelako kutsi ente lolohlobo lwekutijabulisa ayakhubeka, ungase ukhetse kuluyekela. Kungani ungakhetsa kwenta njalo? Kungenca yekutsi awufuni ‘kona bazalwane’​—nobe ‘kona Khristu,’ njengobe Pawula asho. Loko kwenta kube lukhuni nakakhulu ngalamanye emaKhristu kutsi agcine kwetsembeka kwawo kuNkulunkulu. Usemukela ngebucotfo seluleko sakhe lesitsi: ‘Ningabi sikhubekiso kulabanye.’ (1 Khorinte 8:12; 10:32) EmaKhristu eliciniso lamuhla alalela leseluleko saPawula ngekugwema kutijabulisa lokungenteka “kuvumelekile” kepha ‘lokungakhi.’​—Roma 14:1; 15:1.

22. Kungani emaKhristu ayemukela imibono leyehlukile yalabanye etindzabeni temuntfu ngekwakhe?

²² Kodvwa kunalesinye sici lekufanele sisikhumbule nasifuna kuba ngulabacabangela labanye. UmKhristu lonanembeza lomvimbelako akukafanele aphocelele lamanye emaKhristu kutsi nawo abanembono lofanana newakhe ngaloko lakubheka njengekutijabulisa lokukahle. Nangabe enta njalo, utawufanana nemshayeli lohamba emgwacweni lomkhulu, lofuna kutsi bonkhe bashayeli labasebentisa lomgwaco bashayele ngelitubane lelilingana nalelo lelitsandvwa nguye. Kwenta njalo akukubonisi kucabangela labanye. Ngenca yelutsandvo lwebuKhristu, lona lonanembeza lomvimbelako kufanele ahloniphe lamanye emaKhristu lanemibono leyehlukile embonweni wakhe kulendzaba yekutijabulisa, kepha lesolo ivumelana netimiso tebuKhristu. Ngaleyo ndlela wenta ‘kucabangela kwakhe kwatiwe ngibo bonkhe bantfu.’​—Filiphi 4:5; Umshumayeli 7:16.

23. Ungacinisekisa njani kutsi ukhetsa kutijabulisa lokuhle?

²³ Kafishane nje, ungacinisekisa njani kutsi ukhetsa kutijabulisa lokuhle? Gwema nobe ngabe ngukuphi kutijabulisa lokuveta kutiphatsa lokubi, lokulahlwa ngalokucinile eVini laNkulunkulu. Landzela timiso teliBhayibheli letingasetjentiswa kunobe ngabe ngutiphi tinhlobo tekutijabulisa lokungakhulunywa ngato ngalokucondzile eBhayibhelini. Gwema kutijabulisa lokulimata nembeza wakho, futsi utimisele kuyekela nobe ngabe ngukuphi kutijabulisa lokungase kukhube labanye, ikakhulukati emaKhristu lokanye nawo. Shengatsi sincumo sakho lesicinile sekwenta njalo singaletsa ludvumo kuNkulunkulu, futsi sigcine wena nemndeni wakho niselutsandvweni lwakhe.