“Nanyalo Usakhuluma Ngekukholwa Kwakhe Nome Sekadze Afa”

ABELA abebuka umhlambi wetimvu takhe udla ngekuthula entsabeni. Mhlawumbe bekabuka nakhashane abona lokutsite lokumanyatelako. Bekati kutsi kunenkemba lenelilangabi lephendvuphendvukako levale indlela leya ensimini yase-Edeni. Batali bakhe bebake bahlala khona kodvwa wonkhe lomndeni bewungasakhoni kuphindze ungene khona. Cabanga kusentsambama, umoya lopholile uphephetelisa tinwele ta-Abela njengobe abuke etulu acabanga ngeMdali wakhe. Bebutawulungiswa njani buhlobo lebesebonakele emkhatsini wemuntfu naNkulunkulu? Nguloko Abela labekafuna kukwenta.

Abela ukhuluma nawe lamuhla. Asewumlalele. Ungatitjela kutsi intfo lenjalo ngeke seyenteke ngobe lendvodzana yesibili ya-Adamu yafa kadzeni. Seyagucuka yaba ngumhlabatsi ngobe sekwendlule cishe iminyaka lengu-6 000 yafa. Nalikhuluma ngalabafile, liBhayibheli litsi: “Abati lutfo.” (Umshumayeli 9:5, 10) Ngetulu kwaloko, kute ngisho kunye lokwashiwo ngu-Abela lokwabhalwa eBhayibhelini. Pho, angakhuluma kanjani natsi?

Umphostoli Pawula waphefumulelwa kutsi abhale loku nga-Abela: “Nanyalo usakhuluma ngekukholwa kwakhe nome sekadze afa.” (Hebheru 11:4) Ukhuluma kanjani Abela? Ngekukholwa kwakhe. Abela ngumuntfu wekucala lowaveta kutsi uyakholwa. Waba nekukholwa lokucinile lokusibonelo sendlela yekuphila lokufanele siyilandzele lamuhla. Nasilingisa kukholwa kwakhe, kufana nekutsi Abela siyamuva akhuluma natsi.

Singafundza njani nga-Abela nekukholwa kwakhe njengobe kukuncane kakhulu liBhayibheli lelikushoko ngaye? Asesibone.

Bekusandza kuba nebantfu emhlabeni ngalesikhatsi kutalwa Abela. Ngekuhamba kwesikhatsi, Jesu wahlobanisa Abela ‘nekusekelwa kwemhlaba.’ (Lukha 11:50, 51) Jesu bekasho bantfu labanelitsemba lekuhlawulelwa sono. Nanobe Abela aba ngumuntfu wesine lowaphila emhlabeni, kubonakala shengatsi waba ngumuntfu wekucala Nkulunkulu lambona afanelwe kuhlawulelwa sono.a Kuyacaca kutsi Abela akakhulelanga kubantfu labasibonelo lesihle langasilingisa.

Nanobe bebangakaphili sikhatsi lesidze futsi babancane ngelinani, bo-Adamu nebantfwababo besekufanele batfole imiphumela lebuhlungu leyase itfolwa ngibo bonkhe bantfu. Batali ba-Abela, Adamu na-Eva bebanemakhono lamahle banemandla kodvwa benta liphutsa lelikhulu futsi bebakwati loko. Bebake baba bete sono banelitsemba lekuphila phakadze. Bavukela Nkulunkulu Jehova base bayacoshwa ekhaya labo lebeliliPharadisi ensimini yase-Edeni. Kuticabangela bona kuphela kunekucabangela labanye, ngisho nebantfwababo, kwabenta balahlekelwa kuphila lokute sono nekuphila phakadze.—Genesisi 2:15–3:24.

Kucoshwa ensimini kwenta kuphila kwa-Adamu na-Eva kwaba matima. Nobe kunjalo, ngalesikhatsi umntfwanabo wekucala atalwa bametsa batsi nguKhayini nobe “Lokutelwe” futsi Eva watsi: “Ngitfole indvodzana ngekusitwa nguSimakadze.” Emavi akhe aveta kutsi kungenteka abecabanga ngesetsembiso Jehova lasenta ensimini ngalesikhatsi atsi umfati utawuveta “intalo” lokuyakutsi ngalelinye lilanga ibhubhise lomubi lowakhohlisa yena nendvodza yakhe. (Genesisi 3:15; 4:1) Kungenteka yini kutsi Eva abecabanga kutsi ungulomfati lokukhulunywa ngaye kulesiphrofetho nekutsi Khayini ‘ungulentalo’ leyetsenjisiwe?

Nangabe kunjalo, bekenta liphutsa. Nakungenteka kutsi bamtjela loko Khayini nakakhula, loko akumsitanga ngalutfo. Ngekuhamba kwesikhatsi, Eva watala indvodzana yesibili kodvwa kute lokuhle lakusho ngayo. Bayetsa ngekutsi ngu-Abela lokusho “Umoya lophuma emakhaleni” nobe “Intfo lengenamsebenti.” (Genesisi 4:2) Kumetsa lelogama kuveta kutsi kuncane yini lebebakugadze ku-Abela kunaloko lebebakugadze kuKhayini? Asiciniseki.

Kunome ngukuphi, kukhona batali labangakufundza lamuhla ku-Adamu na-Eva. Ngemavi nangetento takho, utawufundzisa bantfwabakho kutsi batigcabhe yini, babe nesifiso sekuphatsa labanye nemkhuba wekuticabangela bona kuphela? Nobe utabafundzisa kutsi batsandze Nkulunkulu Jehova baphindze babe bangani bakhe? Kuyadzabukisa kutsi bo-Adamu na-Eva behluleka kwenta umsebenti wabo njengebatali. Nobe kunjalo, belikhona litsemba ngesitukulwane sabo.

Njengobe labafana lababili bakhula, kungenteka kutsi Adamu wabafundzisa umsebenti wekunakekela likhaya lakubo. Khayini bekangumlimi kantsi Abela abengumelusi.

Kuyaphawuleka kutsi Abela wenta intfo lebaluleke kakhulu. Njengobe iminyaka ihamba, waba nekukholwa kuNkulunkulu, lokuyintfo lenhle Pawula labhala ngayo ngekuhamba kwesikhatsi. Ase ucabange ngekutsi bekute sibonelo lesingumuntfu wasemhlabeni Abela lebekangasilingisa. Yini leyamsita kutsi abe nekukholwa kuNkulunkulu Jehova? Cabanga ngalokutsatfu lokwasita Abela waba nekukholwa kuNkulunkulu.

Indalo yaJehova.

Kuliciniso kutsi Jehova bekawucalekisile umhlabatsi, wawenta kutsi uvete emanyeva kanye nelukhula, lokwenta kwaba matima kuwulima. Nome kunjalo, umhlabatsi bewukukhicita kudla lokudzingwa ngumndeni wakhabo-Abela. Tilwane lokufaka ekhatsi tinyoni netinhlanti; tintsaba, emachibi, imifula nelwandle, ngisho nesibhakabhaka, emafu, lilanga, inyeti kanye netinkhanyeti kona akuzange kucalekiswe. Konkhe lebekakubona bekumniketa bufakazi bekutsi Nkulunkulu Jehova lowadala tonkhe tintfo unelutsandvo lolujulile, uhlakaniphile futsi muhle. (Roma 1:20) Kuzindla ngendalo nebuhle baNkulunkulu kwakucinisa kukholwa kwakhe.

Kuyacaca kutsi Abela abetinika sikhatsi sekuzindla ngaJehova. Mbone ngeliso lengcondvo anakekela umhlambi. Umsebenti wemelusi bewudzinga kutsi ahambe sigaba lesidze. Abehola umhlambi wakhe emagcumeni, etihosheni, emifuleni, ngaso sonkhe sikhatsi awufunela emadlelo laluhlata, imitfombo yemanti lekahle kanye netindzawo tekuphumula letinemtfunti. Kuto tonkhe tilwane Nkulunkulu latidalile, imvu ibonakala ingakhoni kutisita, shengatsi yadalelwa kutsi icondziswe iphindze ivikelwe ngumuntfu. Abela watibona akudzinga yini kucondziswa, kuvikelwa kanye nekunakekelwa nguNkulunkulu lohlakaniphile nalonemandla lamakhulu kwendlula nobe ngabe ngumuphi umuntfu? Asingabati kutsi wakuveta loko nakathantaza futsi loko kwacinisa kukholwa kwakhe.

Tetsembiso taJehova.

Adamu na-Eva bawatjela emadvodzana abo ngaloko lokwenteka ensimini yase-Edeni lokwaholela ekutseni bacoshwe. Ngako, betitinyenti tintfo Abela lebekangazindla ngato.

Jehova bekatsite umhlabatsi utawucalekiswa. Abela wawabona lamanyeva nelukhula njengobe Jehova abeshito. Jehova waphindze watjela Eva kutsi utawuva tinhlungu nakatetfwele nangesikhatsi abeleka. Akungabateki kutsi Abela wakubona loko ngesikhatsi kutalwa bantfwabakubo. Jehova wakubona kusengakenteki kutsi Eva bekatativa ingasamtsandzi indvodza yakhe njengasekucaleni futsi ingasamnaki iphindze imbuse. Abela wakubona loko kwenteka kubatali bakhe. Kuko konkhe loku, Abela wabona kutsi livi laJehova letsembekile. Ngako, Abela bekanetizatfu letiphatsekako tekuba nekukholwa esetsembisweni saNkulunkulu lesimayelana ‘nentalo’ lebeyitawulungisa umonakalo lowacala e-Edeni.—Genesisi 3:15-19.

Tinceku taJehova. Abela akasitfolanga sibonelo lesihle lesingumuntfu emhlabeni kodvwa betikhona tingilosi lebetiphila emhlabeni labekangalingisa kukholwa kwato. Ngalesikhatsi Adamu na-Eva bacoshwa ensimini, Jehova wenta siciniseko sekutsi bona nentalo yabo ababuyeli kulengadze. Kuze agadze bangangeni kuyo, Jehova wabeka emakherubhi, lokutingilosi letisesikhundleni lesisetulu kanye nenkemba lenelilangabi lephendvuphendvukako.—Genesisi 3:24.

Mbone ngeliso lengcondvo Abela asengumfana abona lamakherubhi. Njengobe lamakherubhi bekabonakala ngemitimba yenyama, Abela bekakhona kubona kutsi anemandla lamakhulu. ‘Lenkemba’ lebeyihlale imanyatela futsi iphendvuphendvuka beyimmangalisa. Ekukhuleni kwakhe, wake weva yini kutsi lamakherubhi sekadzinekile ayekela kwenta umsebenti wawo? Chake. Busuku nemini, umnyaka ngemnyaka, letidalwa letihlakaniphile naletinemandla betisolo tisemsebentini wato. Abela wafundza kutsi Nkulunkulu Jehova unetinceku letilungile naletetsembekile kuye. Kulamakherubhi, Abela wabona kwetsembeka nekulalela Jehova lobekungekho emndenini wakubo. Akungabateki kutsi sibonelo lesabekwa tingilosi sakucinisa kukholwa kwakhe.

Kuzindla ngendlela Jehova latembula ngayo ngendalo, ngetetsembiso takhe kanye nangetibonelo tetinceku takhe, kwakucinisa kukholwa kwa-Abela. Uyabona yini kutsi Abela ukhuluma natsi ngesibonelo sakhe? Ikakhulukati bantfu labasha, kungabakhutsata kwati kutsi bangaba nekukholwa lokucinile kuNkulunkulu Jehova ngisho nome ngabe emalunga emindeni yakubo angababekeli sibonelo lesihle. Sinalokunyenti lokungasisita sicinise kukholwa kwetfu lamuhla lokufaka ekhatsi timangaliso tendalo yaNkulunkulu, liBhayibheli kanye netibonelo letibantfu labanekukholwa kuye.

Njengobe kukholwa kwa-Abela bekutfutfuka, wafuna indlela yekukuveta ngetento. Nome kunjalo, yini umuntfu labekangayiniketa uMdali wendzawo yonkhe? Asingabati kutsi Nkulunkulu bekangasidzingi sipho nobe kusitwa bantfu. Ngekuhamba kwesikhatsi, Abela amkhanyela lamaciniso latsi: Nangabe anenhloso lenhle yekunikela kuJehova ngalokuhle lanako, loko bekutamjabulisa Jehova, Babe wakhe losezulwini lonelutsandvo.

Abela walungiselela kunikela ngaletinye tetimvu emhlambini wakhe. Wakhetsa letinhle kakhulu, ematubulo etimvu takhe letikhuluphele. Kusenjalo, naKhayini wafuna sibusiso saNkulunkulu ngekulungiselela kunikela ngetilimo takhe. Kepha inhloso yakhe beyingafani neya-Abela. Loko kwabonakala ngalesikhatsi banikela.

Omabili emadvodzana a-Adamu kungenteka asebentisa lilati kanye nemlilo nakanikela, mhlawumbe abebabona emakherubhi lebekungiwo kuphela emancusa aJehova emhlabeni ngaleso sikhatsi. Jehova wakunaka lebebakwenta. LiBhayibheli litsi: “Simakadze wanaka Abela nemnikelo wakhe.” (Genesisi 4:4) Lokulandzisa akuchazi kutsi yini leyentiwa nguJehova kuze akhombise kutsi uyawemukela lomnikelo. Nakunjalo, yini leyabangela kutsi umnikelo wa-Abela wemukelwe?

Bekungumnikelo wakhe kuphela yini lowamenta wemukeleka kuNkulunkulu? Abela wanikela ngesilwane lesiphilako, lesiphefumulako wacitsa ingati yaso leligugu. Abela wabubona yini bumcoka bemnikelo wakhe? Sekuphele iminyaka leminyenti Abela afa, Nkulunkulu wasebentisa umnikelo welizinyane lelite sici kuze umelelele umhlatjelo wendvodzana yakhe lebeyite sono “liWundlu laNkulunkulu” lebekutawucitfwa ingati yalo lete licala. (Johane 1:29; Eksodusi 12:5-7) Asiciniseki kutsi Abela bekakucondza yini kutsi Jehova bekatayisebentisa njani iminikelo ngekuhamba kwesikhatsi.

Lesiciniseka ngako kutsi Abela wanikela ngalokuhle kakhulu lebekanako. Jehova akagcinanga ngekwemukela umnikelo wakhe kodvwa naye wamemukela. Sento sa-Abela sabangelwa lutsandvo lebekanalo ngaJehova nekukholwa lokungiko.

Kwaba simo lesehlukile kuKhayini. LiBhayibheli litsi: “Khayini nemnikelo wakhe akazange amnake.” (Genesisi 4:5) Liphutsa belingekho emnikelweni lowentiwa nguKhayini ngobe ngemuva kwesikhatsi uMtsetfo waNkulunkulu wakuvumela kunikela ngalokulinywako. (Levithikhusi 6:14, 15) LiBhayibheli litsi: “Imisebenti yakhe yayimibi.” (1 Johane 3:12) Kusukela ngesikhatsi saKhayini kuze kube ngulamuhla, bantfu labanyenti balingisa yena ngekucabanga kutsi kwenele kumane nje utinikele kuNkulunkulu. Kungabi nekukholwa lokungiko nobe lutsandvo ngaJehova kwabonakala ngekushesha ngetento takhe.

Ngesikhatsi Khayini abona kutsi akawutfoli umusa waNkulunkulu, wafuna yini kufundza esibonelweni sa-Abela? Chake. Wamfukamelela emavundvo umnakabo. Jehova wakubona lebekwenteka enhlitiyweni yaKhayini futsi ngemusa wabonisana naye. Wecwayisa Khayini kutsi labekakucabanga bekungamholela esonweni futsi Jehova wamniketa litsemba lekwemukelwa nguye nangabe ashintja kucabanga kwakhe.—Genesisi 4:6, 7.

Khayini akasilalelanga secwayiso lesivela kuNkulunkulu, esikhundleni saloko wacela umnakabo kutsi bahambe kanyekanye baye etsafeni. Nasebafikile kuleyo ndzawo, Khayini wahlasela Abela wambulala. (Genesisi 4:8) Ngaleyo ndlela, Abela waba ngumuntfu wekucala lowafela kukholwa. Wafa kodvwa lakwenta solo kukhulunywa ngako.

Nasibekisa, ingati ya-Abela yakhala icela imphindziselo levela kuJehova. Nkulunkulu wamphindziselela Abela ngekujezisa Khayini ngebucala labenta. (Genesisi 4:9-12) Lokubaluleke kakhulu kutsi umlandvo wekukholwa kwa-Abela ukhuluma natsi lamuhla. Waphila iminyaka lecishe ibe likhulu leyaba mifishane nayicatsaniswa nekuphila kwalabanye bantfu labaphila ngesikhatsi sakhe, kodvwa waphila ngendlela lejabulisa Nkulunkulu. Wafa ati kutsi bekatsandvwa futsi emukelwa nguBabe wakhe losezulwini Jehova. (Hebheru 11:4) Singaciniseka kutsi ukhona enkhumbulweni yaJehova lengenamkhawulo ulindzele kuvuselwa emhlabeni lolipharadisi. (Johane 5:28, 29) Wena, utambona yini lapho? Ungambona nawutimisela kulalela njengobe Abela akhuluma uphindze ulingise kukholwa kwakhe lokuyingcayizivele.