Siyaciniseka Kutsi Bantfu Labafile Batawuvuswa!

1-2. Tikhonti taJehova tinaliphi litsemba lelihle?

KUBALULEKILE kuba nelitsemba. Labanye bantfu banelitsemba lekuba nemshado lophumelelako, lekukhulisa bantfwana labaphilile emtimbeni, nobe lekwelulama ekuguleni. Natsi njengemaKhristu singatilangatelela tintfo letifana naleti. Kodvwa tsine sinelitsemba lelingetulu kwaleli. Sinelitsemba lekuphila phakadze nelekubona tihlobo tetfu letafa setivusiwe.

² Umphostoli Pawula watsi: “Nginelitsemba kuNkulunkulu . . . lekutsi labalungile nalabangakalungi batawuvuswa ekufeni.” (Imis. 24:15) Pawula bekangasiye wekucala kukhuluma ngekuvuswa kwalabafile. NaJobe wakhuluma ngako. Bekaciniseka kutsi Nkulunkulu utamkhumbula futsi amvuse ekufeni.—Jobe 14:7-10, 12-15.

 3. Singazuza njani ngekufundza 1 KubaseKhorinte sehluko 15?

³ “Kuvuswa kwalabafile” kuyincenye ‘yetimfundziso letisisekelo’ temaKhristu. (Heb. 6:1, 2) Loko Pawula lakusho ngekuvuswa kwalabafile kubhalwe ku-1 KubaseKhorinte sehluko 15. Loko lakubhala kungenteka kwawakhutsata emaKhristu ekucala. Lesehluko singasikhutsata natsi futsi sicinise litsemba lesesinesikhatsi lesidze sinalo.

 4. Yini lesenta siciniseke kutsi tihlobo tetfu letifile titawuvuswa?

⁴ Kuvuswa kwaJesu kusenta siciniseke kutsi tihlobo tetfu letifile titawuvuswa. Kuvuswa kwaJesu Khristu kwaba yincenye yetindzaba letimnandzi Pawula latibhalela baseKhorinte. (1 Khor. 15:1, 2) Ecinisweni, watsi nangabe umKhristu angakholelwa kutsi Jesu wavuswa, kukholwa kwakhe kulite. (1 Khor. 15:17) Kukholwa kutsi Jesu wavuswa kusiniketa sizatfu sekutsi sikholwe kutsi nalabanye batawuvuswa.

5-6. Asho kutsini kitsi emavi laku-1 KubaseKhorinte 15:3, 4?

⁵ Ngesikhatsi Pawula acala kubhala ngekuvuswa kwalabafile, wakhuluma ngemaciniso lamatsatfu: (1) “Khristu wafela tono tetfu.” (2) “Wangcwatjwa.” (3) “Wavuswa ngelilanga lesitsatfu njengobe imiBhalo isho.”—Fundza 1 KubaseKhorinte 15:3, 4.

⁶ Kufa kwaJesu, kungcwatjwa kwakhe nekuvuswa kwakhe, kusho kutsini kitsi? Umphrofethi Isaya wabiketela kutsi Mesiya ‘bekatawuncunywa eveni lalabaphilako’ futsi ‘anikwe indzawo yekungcwatjwa kanye nalababi.’ Kodvwa bekunalokunye lobekutawenteka. Isaya waphindze washo kutsi Mesiya bekatawetfwala “sono sebantfu labanyenti.” Jesu wakwenta loko ngekutsi abe yinhlawulo. (Isa. 53:8, 9, 12; Mat. 20:28; Rom. 5:8) Jesu usinikete tizatfu letinhle tekuciniseka kutsi singakhululeka esonweni nasekufeni futsi siphindze sihlangane netihlobo tetfu lesetafa.

7-8. Yini leyenta emaKhristu aciniseke kutsi Jesu wavuswa?

⁷ Kuze sikholwe kutsi labafile batawuvuswa, kufanele sicale sikholwe kutsi Jesu wavuswa. Yini lengasenta siciniseke kutsi Jehova wamvusa Jesu?

⁸ Banyenti bantfu labambona Jesu nasavusiwe futsi batjela labanye ngako. (1 Khor. 15:5-7) Umuntfu wekucala Pawula lakhuluma ngaye ngumphostoli Phetro (Khefase). Sicumbi sebafundzi sasho kutsi Phetro umbonile Jesu lovusiwe. (Luk. 24:33, 34) Ngetulu kwaloko, ‘baphostoli labangu-12’ bambona Jesu nasavusiwe. Ngemuva kwaloko, Khristu “wabonakala ngesikhatsi sinye kubazalwane labangetulu kwa-500,” lokungenteka emhlanganweni lobewuseGalile, lokukhulunywa ngawo kuMatewu 28:16-20. Jesu waphindze “wabonakala kuJakobe,” lokungenteka bekungumnakaboJesu, lowacale wangakholwa kutsi Jesu unguMesiya. (Joh. 7:5) Ngemuva kwekubona Jesu lovusiwe, Jakobe wabese uyakholwa. Nga-55 C.E. ngesikhatsi Pawula abhala lencwadzi, labanyenti lababona Jesu ngemuva kwekuvuswa kwakhe bebasaphila. Ngako nobe ngubani lobekangabata kutsi Jesu uvusiwe, bekangakhuluma nalabo bantfu.

 9. Ngekusho kweMisebenti 9:3-5, yini lekhombisa kutsi Pawula bekangabuniketa bufakazi bekutsi Jesu wavuswa?

⁹ Ngekuhamba kwesikhatsi, Jesu wabonakala kuPawula. (1 Khor. 15:8) Pawula (Sawula) bekasendleleni leya eDamaseko ngesikhatsi eva livi laJesu lovusiwe futsi wambona embonweni asenkhatimulweni yasezulwini. (Fundza Imisebenti 9:3-5.) Lokwenteka kuPawula kwaba ngulobunye bufakazi bekutsi Jesu wavuswa mbamba.—Imis. 26:12-15.

10. Yini leyentiwa nguPawula ngenca yekutsi bekakholwa kutsi Jesu wavuswa kulabafile?

¹⁰ Labanye bantfu bebatakujabulela loko lokwashiwo nguPawula, ngobe ngaphambi kwekutsi Jesu abonakale kuye bekake wahlupha emaKhristu. Ngemuva kwekuba Pawula sekaciniseka kutsi Jesu uvusiwe, wenta konkhe langakwenta kuze ente labanye baletsembe leliciniso. Wabeketelela kushaywa, kuboshwa, futsi wephukelwa ngumkhumbi njengobe bekashumayela liciniso lekutsi Jesu wafa waphindze wavuka. (1 Khor. 15:9-11; 2 Khor. 11:23-27) Pawula bekaciniseka kutsi Jesu uvusiwe, kangangekutsi bekakulungele kufa avikela leliciniso. Bufakazi bemaKhristu ekucala, lebekati kutsi Jesu uvusiwe, busisita kutsi natsi sikholwe kutsi Jesu wavuswa. Lobukazi busenta natsi siciniseke kutsi labafile batawuvuswa.

11. Kungani kungenteka kutsi labanye baseKhorinte bebanemibono lengemanga mayelana nekuvuswa kwalabafile?

¹¹ Labanye baseKhorinte, edolobheni lemaGriki, bebanemibono lengemanga ngekuvuswa kwalabafile, labanye bebaze batsi “labafile ngeke bavuswe.” Kungani? (1 Khor. 15:12) Tati temafilosofi tase-Athene betitsi ingemanga lendzaba yekutsi Jesu wavuswa. Kungenteka nalabanye eKhorinte besebacabanga ngendlela lefanako. (Imis. 17:18, 31, 32) Kungenteka nalabanye bebacabanga kutsi kuvuswa kwalabafile akusiyo intfo leyenteka mbamba. Kunaloko bebacabanga kutsi kutsiwa bantfu bafile ngemcondvo wekutsi batoni, futsi bebatsi nangabe umuntfu aba ngumKhristu uyaphila, ngemcondvo wekutsi uyatsetselelwa. Ngisho nobe bebanasiphi sizatfu sekungakholwa ekuvusweni kwebantfu labafile, loko bekusho kutsi kukholwa kwabo kulite. Nangabe Nkulunkulu angazange amvuse Jesu, loko kusho kutsi kwaba bete inhlawulo futsi netono tabo atizange titsetselelwe. Ngako-ke labo lebebaphika kuvuswa kwalabafile bebete litsemba.—1 Khor. 15:13-19; Heb. 9:12, 14.

12. Ngekusho kwa-1 Phetro 3:18, 22, kuvuswa kwaJesu bekwehluke njani kulokunye lokwake kwenteka ngaphambi kwekuvuswa kwakhe?

¹² Pawula bekati kutsi “Khristu uvusiwe kulabafile.” Kuvuswa kwaJesu bekuncono kakhulu kunekwalabanye bantfu labake bavuswa ngaphambi kwakhe, ngobe bona baphindze bafa. Pawula watsi Jesu “waba wekucala kutsi avuswe ekufeni.” Jesu waba wekucala ngamuphi umcondvo? Waba wekucala kutsi avuswe njengesidalwa semoya futsi waba wekucala kutsi enyukele ezulwini.—1 Khor. 15:20; Imis. 26:23; fundza 1 Phetro 3:18, 22.

13. Pawula waveta muphi umehluko emkhatsini wa-Adamu naJesu?

¹³ Kungenteka njani kutsi umuntfu munye asindzise tigidzi tebantfu? Pawula wawuphendvula kahle lombuto. Wachaza loko lokwenteka kubantfu ngenca yaloko lokwentiwa ngu-Adamu naloko lokungenteka kitsi ngenca yenhlawulo yaKhristu. Mayelana na-Adamu, Pawula wabhala watsi: “Kufa kwavela ngemuntfu.” Ngesikhatsi Adamu ona, watiletsela kufa, yena netitukulwane takhe. Nalamuhla, solo siyayiva imiphumela lebuhlungu yekungalaleli kwakhe. Kodvwa ngenca yekutsi Nkulunkulu wavusa indvodzana yakhe, singaba nelikusasa lelihle. “Nekuvuswa kwalabafile nako kuvela ngemuntfu,” lokunguJesu. Pawula watsi: “Njengobe ku-Adamu bonkhe bayafa, nakuKhristu bonkhe batawutfola kuphila.”—1 Khor. 15:21, 22.

14. Chaza kutsi Adamu utawuvuswa yini?

¹⁴ Pawula bekasho kutsini nakatsi “ku-Adamu bonkhe bayafa”? Pawula bekakhuluma ngabo bonkhe bantfu labatfola sono ngenca ya-Adamu futsi bayafa ngenca yaso. (Rom. 5:12) Adamu akekho emkhatsini walabo ‘labatawutfola kuphila.’ Inhlawulo yaKhristu ayimhlengi Adamu ngobe bekete sono futsi watikhetsela yena kungamlaleli Nkulunkulu. Loko lokwenteka ku-Adamu, kutawufana naloko lokutakwenteka kulabo “iNdvodzana yemuntfu” letawubehlulela ‘njengetimbuti’ lokungulabo ‘labatawubhujiswa ngalokuphelele.’—Mat. 25:31-33, 46; Heb. 5:9.

15. Kukhulunywa ngabobani nakutsiwa “bonkhe batawutfola kuphila”?

¹⁵ Naka kutsi Pawula watsi “kuKhristu bonkhe batawutfola kuphila.” (1 Khor. 15:22) Incwadzi yaPawula beyibhalelwe emaKhristu lagcotjiwe aseKhorinte lebekatawuvuselwa ezulwini. LamaKhristu ‘bekangcwelisiwe ebunyeni naKhristu Jesu, futsi wawabita kutsi abe ngulabangcwele.’ Pawula wakhuluma ‘ngalabo labafe basebunyeni naKhristu.’ (1 Khor. 1:2; 15:18; 2 Khor. 5:17) Kulenye incwadzi yakhe, Pawula wabhala kutsi labo ‘labamunye [naJesu] ekufeni batawuba munye naye ekuvusweni lokufana nekwakhe.’ (Rom. 6:3-5) Jesu wavuswa angumoya futsi waya ezulwini. Nguloko lokutawenteka kulabo ‘labasebunyeni naKhristu,’ lokungibo bonkhe labagcotjiwe.

16. Bekasho kutsini Pawula nakatsi Jesu “waba wekucala”?

¹⁶ Pawula wabhala kutsi Khristu “waba wekucala kutsi avuswe ekufeni.” Khumbula kutsi labanye labanjengaLazaro bavuselwa emhlabeni, kodvwa Jesu waba wekucala kuvuswa asidalwa semoya futsi watfola kuphila lokuphakadze. Angafananiswa nesivuno sekucala, leso ema-Israyeli lebekasinikela kuNkulunkulu. Ngetulu kwaloko, ngekutsi Pawula atsi Jesu “waba wekucala” kutsi avuswe, bekasho kutsi ngemuva kwaloko bakhona labanye lebebatawuvuselwa ezulwini. Ngekuhamba kwesikhatsi, baphostoli kanye nalabanye ‘lebebamunye naKhristu’ bebatawuvuselwa ezulwini njengaJesu.

17. Labo ‘labamunye naKhristu’ batawuvuselwa nini ezulwini?

¹⁷ Kuvuselwa ezulwini kwalabo ‘labamunye naKhristu’ bekusengakacali ngesikhatsi Pawula abhalela baseKhorinte. Kunaloko, Pawula watsi bekutawenteka esikhatsini lesitako, watsi: “Nguloyo naloyo ngekulandzelana kwabo: Kucala Khristu, bese kutsi ngesikhatsi sekuba khona kwakhe kulandzele labo lababakhe.” (1 Khor. 15:23; 1 Thes. 4:15, 16) Lamuhla, siphila kuleso ‘sikhatsi sekuba khona’ kwaKhristu. Ngako baphostoli kanye nalamanye emaKhristu lebekagcotjwe ngemoya lebekafile, kwadzingeka kutsi alindzele ‘sikhatsi sekuba khona’ kwaKhristu kuze atfole umvuzo wawo wekuphila ezulwini futsi ‘abe munye [naJesu] ekuvusweni lokufana nekwakhe.’

18. (a) Kungani singatsi kunalabanye labatawuvuswa ngemuva kwalabo labatawuvuselwa ezulwini? (b) UmBhalo wa-1 KubaseKhorinte 15:24-26, utsi yini letawenteka ezulwini?

¹⁸ Kutawentekani kuwo onkhe emaKhristu letsembekile lete litsemba lekuyophila ezulwini naKhristu? Nawo ayetsemba kutsi atawuvuswa. LiBhayibheli litsi Pawula kanye nalabanye labaya ezulwini ‘batawuvuswa kucala.’ (Fil. 3:11) Loku kukhombisa kutsi kutawuba nalokunye kuvuswa kwalabafile lokutawulandzela. Loku kuyavumelana naloko Jobe lebekakholwa kutsi kutawenteka kuye esikhatsini lesitako. (Jobe 14:15) ‘Labo lababaKhristu ngesikhatsi sekuba khona kwakhe’ batawube banaye ezulwini nakabhubhisa yonkhe imibuso lekhona. Ngisho ‘nesitsa sekugcina, kufa’ sitawucedvwa. Labo labatawuvuselwa ezulwini angeke baphindze bafe. Kutakwentekani kulabanye?—Fundza 1 KubaseKhorinte 15:24-26.

19. Yini lokufanele ilindzelwe ngulabo labanelitsemba lekuphila emhlabeni?

¹⁹ Yini lokufanele ilindzelwe ngulabo labanelitsemba lekuphila emhlabeni? Emavi aPawula nabo angabanika litsemba, atsi: “Nginelitsemba . . . lekutsi labalungile nalabangakalungi batawuvuswa ekufeni.” (Imis. 24:15) Kuyacaca kutsi kute umuntfu longakalungi lotawungena ezulwini, ngako lamavi akhombisa kutsi bakhona bantfu labatawuvuswa emhlabeni.

20. Litsemba lonalo lekutsi bantfu batawuvuswa ekufeni liciniswe njani?

²⁰ Siyaciniseka kutsi labafile “batawuvuswa ekufeni”! Labo labatawuvuswa emhlabeni batawuba nelitsemba lekuphila kuwo kuze kube phakadze. Kufanele uciniseke kutsi lesetsembiso sitawugcwaliseka. Lelitsemba lingakudvudvuta nawucabanga ngetihlobo takho letashona. Batawuvuswa ngesikhatsi Khristu kanye nalabanye ‘sebangemakhosi . . . iminyaka lengu-1 000.’ (Semb. 20:6) Ngako ciniseka kutsi nakungenteka ufe ngaphambi kwekubusa KwaKhristu Kweminyaka Leyinkhulungwane, utawuvuswa. ‘Lelitsemba lesinalo alisidvumati.’ (Rom. 5:5) Litasicinisa nyalo futsi lisente sikhonte Nkulunkulu sijabulile. Sihloko lesilandzelako sitawukhombisa kutsi kunyenti lesingakufundza ku-1 KubaseKhorinte sehluko 15.