“Labafile Batawuvuswa Njani?”

1-2. Kungani onkhe emaKhristu kufanele afundze ngekuvuselwa ezulwini?

BANTFU labanyenti labakhonta Jehova nyalo banelitsemba lekuphila phakadze emhlabeni. Kodvwa emaKhristu lambalwa lagcotjwe nguJehova anelitsemba lekuvuselwa ezulwini. Laba labagcotjiwe bafisa kwati kutsi kuphila kwabo kutawuba njani ezulwini, kodvwa kutsiwani ngalabo labanelitsemba lekuphila phakadze emhlabeni? Njengobe sitawubona, kuvuselwa ezulwini kutawubaletsela tibusiso nalabo labanelitsemba lekuphila phakadze emhlabeni. Ngako ngisho sinelitsemba lekuphila ezulwini nobe emhlabeni, kufanele sati ngekuvuselwa ezulwini.

² Nkulunkulu waphefumulela labanye bafundzi baJesu bekucala kutsi babhale ngekuvuselwa ezulwini. Umphostoli Johane watsi: “Nyalo sibantfwana baNkulunkulu kodvwa kusengakabonakali loko lesitawuba ngiko. Siyati nekutsi nasekabonakaliswa sitawuba njengaye.” (1 Joh. 3:2) Ngako emaKhristu lagcotjiwe akati kutsi kuphila kutawuba njani nasekavuselwe ezulwini futsi sekanemitimba yemoya. Nobe kunjalo, batambona Jehova nasebatfola umvuzo wabo. LiBhayibheli alisitjeli konkhe mayelana nekuvuswa kwalabafile, kodvwa umphostoli Pawula wasiniketa leminye imininingwane lemayelana nako. Labagcotjiwe batawube banaKhristu ‘nasekabhubhisa bonkhe bohulumende nawo onkhe emagunya kanye nemandla.’ Loku kufaka ekhatsi “sitsa sekugcina . . . , kufa.” Ekugcineni, Jesu nalabo latawube abusa nabo, batawubeka tonkhe tintfo ngephansi kwaJehova. (1 Khor. 15:24-28) Leso kutawuba sikhatsi lesimnandzi!b

 3. Njengobe kuvetiwe ku-1 KubaseKhorinte 15:30-32, kukholelwa kwaPawula ekuvusweni kwalabafile kwamsita kutsi enteni?

³ Kukholelwa kwaPawula ekuvusweni kwalabafile kwamsita kutsi acinisele nakabhekana netinkinga letinyenti. (Fundza 1 KubaseKhorinte 15:30-32.) Watjela bantfu baseKhorinte watsi: “Malanga onkhe ngibhekana nekufa.” Pawula waphindze watsi: “Ngilwe netilwane tesiganga e-Efesu.” Mhlawumbe bekakhuluma nekulwa netilwane mbamba enkhundleni lebeyise-Efesu. (2 Khor. 1:8; 4:10; 11:23) Kungenteka nekutsi bekakhuluma ngekuphikiswa ngemaJuda kanye nalabanye lebebafana “netilwane tesiganga.” (Imis. 19:26-34; 1 Khor. 16:9) Kunobe ngukuphi, Pawula wabhekana netinkinga letimatima, kodvwa wachubeka etsemba kutsi utawuba nelikusasa lelihle.—2 Khor. 4:16-18.

 4. Litsemba lekuvuswa kwalabafile, liwacinise njani emaKhristu lamuhla? (Buka sitfombe lesisekhasini lekucala.)

⁴ Siphila etikhatsini letiyingoti. Labanye bazalwane betfu bake bahlaselwa tigebengu. Labanye bahlala etindzaweni lapho kunemphi khona futsi bativa bangakaphephi. Labanye bakhonta Jehova emaveni lapho umsebenti wekushumayela uvinjelwe khona, futsi bayachubeka bamkhonta ngisho nobe bangaboshwa nobe babulawe. Nobe kunjalo, bonkhe labazalwane nabodzadze bayachubeka bakhonta Jehova, futsi basibonelo lesihle kakhulu kitsi. Bayati kutsi nobe bangafa nyalo, Jehova wetsembisa kubanika lokuncono kakhulu esikhatsini lesitako.

 5. Ngumuphi umbono loyingoti longasenta singasabi nekukholwa lokucinile ekuvusweni kwalabafile?

⁵ Pawula wecwayisa bazalwane bakhe ngembono loyingoti labanye lebebanawo lotsi: “Nangabe labafile bangeke bavuswe, ‘asidleni sinatse ngoba kusasa sitawufa.’” Labanye bantfu bebanawo lombono asengakabi khona Pawula. Kungenteka bekacaphuna Isaya 22:13, lokhuluma ngesimo sengcondvo sema-Israyeli. Kunekutsi asondzele kuNkulunkulu, afuna kutijabulisa. Kalula nje, ema-Israyeli bekanesimo sengcondvo lesitsi kufanele akujabulele kuphila ngobe kungaphela nobe nini lokungumbono lovamile nalamuhla. Nobe kunjalo, liBhayibheli liyakhuluma ngemphumela lobuhlungu lowaba khona ngenca yesimo sawo sengcondvo.—2 Khr. 36:15-20.

 6. Litsemba lesinalo lekuvuswa kwalabafile, kufanele liyitsintse njani indlela lesikhetsa ngayo bangani?

⁶ Siyati kutsi Jehova utawuvusa labafile, ngako loko kufanele kuyitsintse indlela lesikhetsa ngayo bangani. Bazalwane baseKhorinte bekufanele bangatihlanganisi nalabo labangakholelwa ekuvusweni kwalabafile. Natsi kukhona lesikufundzako lamuhla: Nasicitsa sikhatsi lesinyenti nebangani labanganendzaba naloko lokutawenteka esikhatsini lesitako futsi labacanga kuphela ngekuphila nyalo, batawusenta kutsi sibe nembono lokabi. Nangabe umKhristu weliciniso acitsa sikhatsi lesinyenti nemuntfu lonjalo, simo sakhe sengcondvo lesihle singashintja. Labantfu bangase bamente kutsi ente tintfo Nkulunkulu latenyanyako. Kungako Pawula wasikhutsata watsi: “Sangulukani, nente lokulungile futsi ningachubeki nenta tono.”—1 Khor. 15:33, 34.

 7. Ngekusho kwa-1 KubaseKhorinte 15:35-38, ngumuphi umbuto labanye lokungenteka bebawubuta mayelana nekuvuswa kwalabafile?

⁷ Fundza 1 KubaseKhorinte 15:35-38. Umuntfu lofuna labanye bangabate ngekuvuswa kwalabafile, bekungenteka abute kutsi: “Labafile batawuvuswa njani?” Kuhle kucabanga ngemphendvulo yaPawula ngobe bantfu labanyenti lamuhla banemibono leyehlukene ngaloko lokwentekako kumuntfu nakafa. Kodvwa lifundzisani liBhayibheli?

 8. Ngumuphi umfanekiso longasisita sikucondze kahle kuvuselwa ezulwini?

⁸ Nangabe umuntfu afa, umtimba wakhe uyabola. Kodvwa Loyo lowadala indzawo yonkhe angamvusa loyo muntfu futsi amnike umtimba lokahle. (Gen. 1:1; 2:7) Pawula wasebentisa umfanekiso kuze akhombise kutsi Nkulunkulu angeke kudzingeke amnikete umtimba lofanako loyo muntfu. Cabanga ngenhlanyelo. Nangabe lenhlanyelo ihlanyelwa, iyamila futsi ibe sihlahla lesisha. Lesihlahla lesisha lesimilile asifani nalenhlanyelo. Pawula wasebentisa lomfanekiso kuze akhombise kutsi uMdali wetfu angasiniketa umtimba “ngendlela latsandza ngayo.”

 9. Umbhalo wa-1 KubaseKhorinte 15:39-41, utsini mayelana nemitimba lengafani?

⁹ Fundza 1 KubaseKhorinte 15:39-41. Pawula utsi Nkulunkulu wadala imitimba yangafanani. Nasi sibonelo, umtimba wetinkhomo, wetinyoni newetinhlanti awufani. Watsi nasesibhakabhakeni kunemehluko emkhatsini welilanga nenyanga. Washo nekutsi “inkhatimulo yenkhanyeti ngayinye ayifani neyalenye.” Loko kuliciniso ngisho nobe singeke sikubone ngemehlo etfu. Bososayensi basitjela kutsi kunetinhlobonhlobo tetinkhanyenti, letinye tinkhulu, letinye tincane, letinye tibovu, letinye timhlophe futsi letinye timtfubi njengelilanga. Pawula waphindze watsi “kunemitimba yasezulwini nemitimba yasemhlabeni.” Bekasho kutsini? Emhlabeni sinemitimba yenyama, kodvwa ezulwini kunemitimba yemoya, njengeyetingilosi.

10. Labo labatawuvuselwa ezulwini batawuba namuphi umtimba?

¹⁰ Naka naku Pawula lase uyakusho, watsi: “Kunjalo nangekuvuswa kwalabafile. Umtimba uhlanyelwa unekonakala, uvuswe sewute konakala.” Siyati kutsi nangabe umuntfu afa umtimba wakhe uyabola futsi ubuyele elutfulini. (Gen. 3:19) Ngako kungenteka njani kutsi umtimba “uvuswe sewute konakala?” Pawula bekangakhulumi ngemuntfu lovuselwa emhlabeni, njengalabo labavuswa ngu-Elija, Elisha naJesu. Pawula bekakhuluma ngemuntfu lovuswe anemtimba wekuphila ezulwini, ‘lokungumtimba wemoya.’—1 Khor. 15:42-44.

11-12. Nguluphi lushintjo Jesu lalubona ngesikhatsi avuswa, futsi labagcotjiwe balubona njani lushintjo lolufanako?

¹¹ Ngesikhatsi Jesu alapha emhlabeni, bekanemtimba wenyama kodvwa ngesikhatsi avuswa “waba ngumoya lonika kuphila” futsi wabuyela ezulwini. Ngendlela lefanako, emaKhristu lagcotjiwe atawuvuswa anemtimba lotawukhona kuphila ezulwini. Pawula wachaza watsi: “Njengobe sifana naloyo lowentiwe ngelutfuli, sitawuphindze sifane naloyo wasezulwini.”—1 Khor. 15:45-49.

¹² Pawula besekatayephetsa indzaba yakhe lemayelana nekuvuswa kwalabafile. Kubalulekile kunaka kutsi Jesu akazange avuswe anemtimba wenyama. Pawula watsi: “Inyama nengati ngeke kuwutfole uMbuso waNkulunkulu” ezulwini. (1 Khor. 15:50) Umphostoli Pawula kanye nalabanye labagcotjiwe bebangeke bavuselwe ezulwini banemtimba lowonakalako wenyama nengati. Bebatawuvuswa nini? Pawula washo kutsi bebatawuvuswa esikhatsini lesitako, hhayi ngekushesha nje nabafa. Ngesikhatsi Pawula abhala 1 KubaseKhorinte, labanye bafundzi besebavele ‘bafile’ njengemphostoli Jakobe. (Imis. 12:1, 2) Labanye baphostoli nalabagcotjiwe ‘besebatawukufa.’—1 Khor. 15:6.

13. Kutawentekani ‘ngesikhatsi sekuba khona kwaJesu’?

¹³ Jesu naPawula baphrofetha ngesikhatsi lesibalulekile lebesiseta, lokusikhatsi sekuba khona kwaKhristu. Lesikhatsi sekuba khona kwaKhristu besitawubonakala ngekuba khona kwetimphi, kutamatama kwemhlaba, tifo kanye naletinye tintfo letimbi letentekako emhlabeni. Sisibonile lesiphrofetho seliBhayibheli sigcwaliseka kusukela nga-1914. Bekutawuba khona nalokunye lokubalulekile lebesitawubona ngako kutsi sesikhatsi sekuba khona kwaKhristu. Jesu washo kutsi tindzaba letimnandzi tekutsi uMbuso waNkulunkulu uyabusa betitawushunyayelwa “emhlabeni wonkhe, kuze tiviwe ngito tonkhe tive, bese-ke kuphela kuyefika.” (Mat. 24:3, 7-14) Pawula washo kutsi ‘sikhatsi sekuba khona kweNkhosi’ bekutawuphindze kube sikhatsi sekuvuswa kwemaKhristu lagcotjiwe ‘lebekafile.’—1 Thes. 4:14-16; 1 Khor. 15:23.

14. Yini leyentekako kumaKhristu lagcotjiwe lafa kulesikhatsi sekuba khona kwaKhristu?

¹⁴ EmaKhristu lagcotjiwe lafako nyalo, avele avuselwe ezulwini ngekushesha. Emavi aPawula laku-1 KubaseKhorinte 15:51, 52 ayakucinisekisa loku, atsi: “Akusibo bonkhe kitsi labatawulala ekufeni, kodvwa sonkhe sitawuguculwa, ngekushesha nangekucwabita kweliso ngelicilongo lekugcina.” Lamavi aPawula sekayagcwaliseka! Nabavuswa, labomnakaboKhristu batawujabula kakhulu futsi batawuba “neNkhosi . . . ngaso sonkhe sikhatsi.”—1 Thes. 4:17.

15. Labo labatawushintjwa ‘ngekucwabita kweliso’ balindzelwe ngumuphi umsebenti?

¹⁵ LiBhayibheli lisitjela ngemsebenti lotawentiwa ngulabo labashintjwe “ngekucwabita kweliso” ezulwini. Jesu watsi kubo: “Loncobako nalolingisa loko lengikwentako kuze kube sekupheleni ngitamnika ligunya etikwetive, futsi utawelusa bantfu ngentfonga yensimbi kuze batophihlika babe ticucu njengesitja selubumba, njengobe nje nami ngemukele leligunya kuBabe.” (Semb. 2:26, 27) Batawulandzela Jesu futsi beluse tive ngentfonga yensimbi.—Semb. 19:11-15.

16. Bantfu labanyenti batakuncoba njani kufa?

¹⁶ Kuyacaca kutsi labagcotjiwe batakuncoba kufa. (1 Khor. 15:54-57) Kuvuswa kwabo kutawubenta bakhone kusita nakususwa bubi ngesikhatsi se-Armagedoni. Tigidzi talamanye emaKhristu titawuphuma “ekuhluphekeni lokukhulu” futsi tiphile eveni lelisha. (Semb. 7:14) Labo labatawusindza emhlabeni batawutibonela ngewabo nakuncotjwa kufa futsi kuvuswa tigidzigidzi tebantfu labafa esikhatsini lesendlulile. Cabanga kutsi sitawujabula kangakanani nakwenteka loko! (Imis. 24:15) Bonkhe labatsembekile kuJehova batakuncoba kufa lesakutfola njengelifa ku-Adamu. Batawuphila phakadze.

17. UmBhalo wa-1 KubaseKhorinte 15:58, usikhutsata kutsi senteni nyalo?

¹⁷ Onkhe emaKhristu laphilako nyalo kufanele advudvuteke ngemavi aPawula lamayelana nekuvuswa kwalabafile lawabhalela bantfu baseKhorinte. Sinetizatfu letinhle tekulalela emavi aPawula ngekutsi sente konkhe lesingakwenta nyalo “emsebentini weNkhosi.” (Fundza 1 KubaseKhorinte 15:58.) Nangabe sihlale siwenta lomsebenti, singakubuka ngalabovu kujabulela kuphila esikhatsini lesitako. Kuphila esikhatsini lesitako kutawujabulisa kakhulu. Loko kutasicinisekisa kutsi umsebenti wetfu awukabi lite eNkhosini.