Hlonipha “Loko Nkulunkulu Lakuhlanganisile”

1, 2. Umbhalo waHebheru 13:4 usikhutsata kutsi senteni?

SONKHE sifuna kuhlonipha Jehova. Kufanele simhloniphe futsi naye wetsembisa kwenta lokufanako kitsi. (1 Sam. 2:30; Taga 3:9; Semb. 4:11) Ufuna sibahloniphe nalabanye bantfu, labafaka ekhatsi tiphatsimandla. (Rom. 12:10; 13:7) Kodvwa Jehova ulindzele nekutsi siwuhloniphe kakhulu umshado.

² Umphostoli Pawula watsi: “Umshado awuhlonishwe ngibo bonkhe bantfu, futsi ungangcoliswa.” (Heb. 13:4) Pawula bekangasho emavi lavamile mayelana nemshado kodvwa bekatjela emaKhristu kutsi kufanele awuhloniphe umshado futsi awutsatse njengaloligugu. Uwutsatsa ngaleyo ndlela yini umshado, ikakhulukati wakho nangabe ushadile?

 3. Ngusiphi seluleko lesibalulekile lesashiwo nguJesu ngemshado? (Buka sitfombe lesisekucaleni kwalesihloko.)

³ Nangabe umshado uwutsatsa njengaloligugu, usuke ulandzela sibonelo lesihle saJesu. Jesu bekawuhlonipha umshado. Ngesikhatsi baFarisi bambuta ngedivosi, wakhuluma ngaloko Nkulunkulu lakusho nakacalisa umshado, watsi: “Ngaleso sizatfu, indvodza itawushiya uyise nenina, futsi laba lababili bayawuba nyamanye.” Jesu waphindze watsi: “Loko Nkulunkulu lakuhlanganisile, akungehlukaniswa ngumuntfu.”—Fundza Makho 10:2-12; Gen. 2:24.

 4. Beyiyini injongo yaNkulunkulu ngemshado?

⁴ Jesu wavuma kutsi umshado wacaliswa nguNkulunkulu futsi bantfu labashadile bekufanele bangehlukani. Nakacalisa umshado, Nkulunkulu akazange atjele bo-Adamu na-Eva kutsi bangadivosa ngekuhamba kwesikhatsi. Kunaloko, injongo yakhe beyikutsi “laba lababili” babe nyamanye kuze kube phakadze.

 5. Kufa kwaba namuphi umphumela emshadweni?

⁵ Siyati kutsi kona kwa-Adamu kwashintja tintfo letinyenti. Bantfu babese bayafa futsi loko kwaba nemiphumela lebuhlungu emshadweni. Umphostoli Pawula wachazela emaKhristu kutsi kufa kwehlukanisa bantfu labashadene futsi umlingani wemshado losele ukhululekile kutsi angaphindze ashade.—Rom. 7:1-3.

 6. UMtsetfo waMosi usifundzisa kutsi Jehova uwutsatsa njani umshado?

⁶ Nkulunkulu waniketa ema-Israyeli imitsetfo lemayelana nemshado. Sibonelo saloko kutsi indvodza lengumIsrayeli beyivumelekile kutsi ibe nebafati labanyenti. Lomkhuba bewuvele ukhona ngisho Nkulunkulu asengakawaniketi ema-Israyeli uMtsetfo. LoMtsetfo bewuvikela bafati kanye nebantfwana kutsi bangahlukunyetwa. Nasi sibonelo, nangabe indvodza lengumIsrayeli beyishade nesigcila bese ngekuhamba kwesikhatsi itsatsa umfati wesibili, bekufanele ichubeke itinakekela tidzingo temfati wekucala. Nkulunkulu bekafuna ichubeke imvikela futsi imnakekela. (Eks. 21:9, 10) Nanobe sesingekho ngephasi kweMtsetfo waMosi, lomtsetfo usifundzisa kutsi umshado uligugu kangakanani kuJehova. Loko kuyasisita kutsi siwuhloniphe kakhulu umshado.

7, 8. (a) Ngekusho kwembhalo waDutheronomi 24:1, uMtsetfo bewutsini ngedivosi? (b) Uyini umbono waNkulunkulu ngedivosi?

⁷ Bewutsini uMtsetfo waMosi ngedivosi? Jehova bekafuna bantfu labashadile bangehlukani, kodvwa uMtsetfo bewuyivumela indvodza lengumIsrayeli kutsi idivose umkayo. (Fundza Dutheronomi 24:1.) Loko beyingakwenta nangabe itfole “sici lesitsite” kumkayo. UMtsetfo bewungachazi kutsi ngusiphi “lesici lesitsite.” Kungenteka bekusono lesikhulu noma intfo letsite lelihlazo, hhayi nje kungevani lokuncane. (Dut. 23:14) Lokubuhlungu kutsi ngesikhatsi Jesu asemhlabeni, emaJuda lamanyenti bekadivosa “nganobe ngusiphi sizatfu.” (Mat. 19:3) Sitimisele kungawulandzeli lomkhuba.

⁸ Umphrofethi Malakhi wachaza umbono waNkulunkulu mayelana nekudivosa. Ngesikhatsi sakhe, bekuvamile kutsi indvodza lengaketsembeki idivose ‘umfati webusha bayo’ ngenca yekutsi ifuna kushada nentfombi lengamkhonti Jehova. Malakhi wakwenta kwacaca kutsi Jehova unamuphi umbono ngedivosi, watsi: “Ngiyakutondza kwehlukana kwalabashadile.” (Mal. 2:14-16) Loko bekuhambisana nalokushiwo liBhayibheli mayelana nemshado wekucala: “[Indvodza] iyawushiya uyise nenina inamatsele kumfati wayo.” (Gen. 2:24) Jesu bekanembono waBabe wakhe mayelana nemshado futsi watsi: “Loko Nkulunkulu lakuhlanganisile akungehlukaniswa ngumuntfu.”—Mat. 19:6.

 9. Kufanele siwacondze njani emavi aJesu lakuMakho 10:11, 12?

⁹ Lomunye angahle atibute: ‘Sikhona yini sizatfu lesingenta umKhristu adivose aphindze ashade nalomunye umuntfu?’ Naka kutsi Jesu watsi: “Nobe ngubani lodivosa umkakhe bese ushada nalomunye, uyaphinga, futsi nangabe umfati adivosa indvodza yakhe bese ushada nalenye, uyaphinga.” (Mak. 10:11, 12; Luk. 16:18) Kuyacaca kutsi Jesu bekawuhlonipha umshado futsi bekafuna nalabanye bawuhloniphe. Indvodza ledivosa umkayo lowetsembekile (noma umfati lodivosa umyeni wakhe lowetsembekile) iphindze ishade nalomunye bekufana nekutsi iyaphinga. Kuliciniso loku ngoba kushiya umuntfu loshade naye akuwucedzi umshado. KuNkulunkulu bantfu labashadile solo ‘banyamanye’ ngisho noma badivosile. Kwenteka njani loko? Endvulo, umfati lodivosiwe bekangahle ative aphocelelekile kutsi aphindze ashade ngenca yetinkinga tetimali. Kwenta loko bekufanana nekuphinga.

10. Ngusiphi sizatfu lesingenta umKhristu adivose aphindze ashade nalomunye?

¹⁰ Jesu wasisho sizatfu lesingenta bantfu labashadile badivose, watsi: “Ngitsi kini, nobe ngubani lodivosa umkakhe ngaphandle kwanakente budlundlulu [ngesiGriki, por·neiʹa], bese ushada nalomunye, uyaphinga.” (Mat. 19:9) Jesu wakhuluma ngendzaba lefanako eNshumayelweni yakhe yaseNtsabeni. (Mat. 5:31, 32) Kuyo yomibili lemibhalo, Jesu wakhuluma ngekutiphatsa kabi ngekwelicasi. Loko kufaka ekhatsi tonkhe tono tekutiphatsa kabi ngekwelicasi, lokuhlanganisa kuphinga, kutsengisa ngemtimba, kuya ecasini nemuntfu longakashadi naye, butabani kanye nekulala nesilwane. Nangabe indvodza itiphatsa kabi ngekwelicasi, umkayo angakhetsa kuyidivosa noma ayicolele. Nangabe ayidivosa, Nkulunkulu angeke asabatsatsa njengebantfu labashadile.

11. Yini lengenta umKhristu akhetse kungamdivosi lashade naye ngisho noma imiBhalo imvumela?

¹¹ Naka kutsi Jesu akazange atsi bantfu labashadile kufanele badivose nangabe lomunye wabo atiphetse kabi ngekwelicasi (por·neiʹa). Sibonelo saloko kutsi, umfati angahle akhetse kuchubeka ahlala nendvodza yakhe ngisho noma itiphetse kabi ngekwelicasi. Kungenteka usachubeka ayitsandza, utimisele kuyicolela kanye nekuyisita bacinise umshado wabo. Kuliciniso kutsi utawubhekana netinkinga nangabe akhetsa kuyidivosa kepha angashadi. Nasi sibonelo, kutsiwani ngetidzingo takhe tekuphila noma letimayelana nekuya ecasini? Utawusibeketelela njani situnge? Bakhona yini bantfwana lokufanele bakhuliswe? Kuyidivosa kutawenta kube matima yini kutsi bantfwana bafundziswe liciniso? (1 Khor. 7:14) Kuyacaca kutsi umlingani lowetsembekile utawubhekana netinkinga letimatima nangabe akhetsa kudivosa lashade naye.

12, 13. (a) Yini leyenteka kuHoseya nemkakhe Gomeri? (b) Kungani Hoseya aphindze walandza Gomeri, futsi yini lesiyifundzako ngemshado?

¹² Lokwenteka kumphrofethi Hoseya kusifundzisa lokunyenti ngembono waNkulunkulu ngemshado. Nkulunkulu watjela Hoseya kutsi ashade naGomeri lebekatawuba ‘ngumfati loyingwadla lonebantfwana labatelwe ngebugwadla.’ Gomeri watetfwala, watalela [Hoseya] indvodzana. (Hos. 1:2, 3) Ngekuhamba kwesikhatsi, Gomeri waba nebantfwana lebekabatfole kulenye indvodza lebekangakashadi nayo. Ngisho noma Gomeri aphinga tikhatsi letinyenti, Hoseya wachubeka ahlala naye. Gomeri wagcine amshiyile Hoseya futsi waba sigcila. Nome kunjalo, Hoseya wamlandza. (Hos. 3:1, 2) Jehova wasebentisa Hoseya kute akhombise indlela labewacolela ngayo ema-Israyeli ngenca yekungetsembeki kuye ngekutsi akhonte labanye bonkulunkulu. Ngusiphi sifundvo lesisitfolako?

¹³ Nangabe umKhristu loshadile atiphatsa kabi ngekwelicasi, loyo lashade naye kungadzingeka ente sincumo. Jesu watsi utawuba nesizatfu lesicinile sekutsi adivose futsi ukhululekile kutsi aphindze ashade. Kodvwa angaphindze akhetse kutsi amcolele umuntfu lashade naye. Loko kuyintfo lenhle. Hoseya wamcolela Gomeri. Ngesikhatsi Gomeri sekabuyele kuHoseya, bekungakafaneli aphindze alale nalenye indvodza. Kwaphela sikhashana lesitsite Hoseya angayi ecasini naGomeri. (Hos. 3:3) Kodvwa ngekuhamba kwesikhatsi, kungenteka Hoseya waphindze waya ecasini nemkakhe. Loko kusikhombisa kutsi Jehova ukulungele kucolela bantfu bakhe aphindze abanakekele. (Hos. 1:11; 3:3-5) Loku kubafundzisani bantfu labashadile lamuhla? Nangabe umlingani wemshado lowetsembekile akhetsa kungamdivosi umlingani wakhe longaketsembeki futsi achubeke aya naye ecasini, kusho kutsi sewumcolele. (1 Khor. 7:3, 5) Ngekwenta kanjalo sewute sizatfu lesisekelwe emiBhalweni sekudivosa. Ngemuva kwaloko bobabili kufanele balwele kuba nembono waNkulunkulu ngemshado.

14. Ngekusho kwa-1 Khorinte 7:10, 11, yini lengenteka kubantfu labashadile?

¹⁴ Onkhe emaKhristu kufanele alwele kuwuhlonipha umshado njengoba Jehova naJesu bawuhlonipha. Nanobe kunjalo labanye bayehluleka kuwuhlonipha ngobe sibantfu labanesono. (Rom. 7:18-23) Ngako akukafaneli kusimangalise kutsi lamanye emaKhristu angelikhulu lekucala bekanetinkinga tawo. Pawula wabhala: “Umfati akukafaneli ehlukane nendvodza yakhe,” kodvwa ngaletinye tikhatsi loko bekwenteka.—Fundza 1 Khorinte 7:10, 11.

15, 16. (a) Kufanele ube yini umgomo webantfu labashadile ngisho noma umshado wabo unetinkinga, futsi leni? (b) Loko kusebenta kanjani nangabe ushade nemuntfu longasiye Fakazi?

¹⁵ Pawula akazange achaze kutsi yini lebeyenta kutsi bantfu behlukane. Kodvwa siyati kutsi inkinga beyingasiko kutsi indvodza itiphetse kabi ngekwelicasi, ngobe kube beyitiphetse kabi, loko bekungaba sizatfu lesicinile sekutsi umkayo ayidivose aphindze ashade nalenye indvodza. Pawula wabhala kutsi umfati longahlali nendvodza yakhe kufanele “ahlale angakashadi nobe aphindze abuyisane nayo.” Bobabili basuke solo banyamanye emehlweni aNkulunkulu. Pawula waphindze wabakhutsata kutsi noma ngabe banatiphi tinkinga, nangabe loshade naye angakaphingi umgomo wenu kufanele ube kubuyisana. Bobabili bangacela lusito lwemiBhalo kulabadzala belibandla. Labadzala akukafaneli batsatse luhlangotsi, kunaloko kufanele babanike sicondziso lesivela eBhayibhelini.

¹⁶ Nanobe kunjalo, kutsiwani nangabe umKhristu ashade nemuntfu longamkhonti Jehova? Nangabe banetinkinga, kuhlala ngekwehlukana kungaba sincumo lesihle yini? Njengobe sibonile, imiBhalo itsi kuphela kwesizatfu sedivosi kulapho loshade naye aphingile. Kepha liBhayibheli alitisho tizatfu letingabenta bahlale ngekwehlukana. Pawula wabhala: “Nangabe umfati anendvodza lengakholwa kodvwa ivuma kuhlala naye, akangayishiyi.” (1 Khor. 7:12, 13) Loko kuyasebenta nalamuhla.

17, 18. Kungani lamanye emaKhristu achubeke ahlala emshadweni lonetinkinga?

¹⁷ Nanobe kunjalo, kuba khona tikhatsi lapho ‘indvodza lengakholwa ingavumi kuhlala nemkayo.’ Ingahle imhlukumete kakhulu aze abone ngatsi kuphila kwakhe kusengotini. Ingayekela kumnakekela yena kanye nemndeni wayo noma ibeke buhlobo bakhe naJehova engotini. Etimeni letinjalo lamanye emaKhristu ancume kutsi ahlale ngekwehlukana ngenca yekutsi lendvodza ayivumi kuhlala naye. Kodvwa lamanye emaKhristu lasesimeni lesifanako ancume kusibeketelela simo futsi etama kusilungisa. Kungani?

¹⁸ Esimeni lesinjalo, bobabili basuke baseshadile. Nangabe bahlala ngekwehlukana batawuba netinkinga lesike sacoca ngato. Umphostoli Pawula washo lesinye sizatfu sekutsi bantfu labashadile bahlale ndzawonye. Wabhala: “Indvodza lengakholwa ingcwelisiwe ngenca yemfati wayo, nemfati longakholwa ungcwelisiwe ngenca yendvodza yakhe lekholwako; kube akusinjalo, ngabe bantfwana benu bangcolile, kodvwa nyalo bangcwele.” (1 Khor. 7:14) EmaKhristu lamanyenti latsembekile achubeka ahlala nebantfu lashade nabo labangasibo boFakazi ngisho nasetimeni letimatima. Kuwajabulise kakhulu kutsi kutidzela kwawo kwente bantfu labashade nabo baba BoFakazi BaJehova.—Fundza 1 Khorinte 7:16; 1 Phet. 3:1, 2.

19. Kungani ebandleni lebuKhristu kunebazalwane nabodzadze labajabulako emishadweni yabo?

¹⁹ Jesu wakhuluma ngedivosi futsi umphostoli Pawula wasiniketa seluleko lesimayelana nekuhlala ngekwehlukana. Bobabili bebafuna tinceku taNkulunkulu tiwuhloniphe umshado. Emhlabeni wonkhe, BoFakazi BaJehova bayajabula emishadweni yabo lephumelelako. Ngisho nasebandleni lokulo bakhona bazalwane nabodzadze labajabulako emishadweni yabo. Labazalwane labetsembekile bayabatsandza bafati babo futsi labafati bayabatsandza futsi bayabahlonipha bayeni babo. Bonkhe bayakhombisa kutsi umshado ungahlonishwa. Siyajabula nasibona kutsi tigidzi temadvodza nebafati tikhombisa kutsi aliciniso emavi aJehova latsi: “Ngenca yaloko indvodza iyawushiya uyise nenina ihlale nemkayo, futsi laba lababili bayawuba nyamanye.”—Ef. 5:31, 33.