Uyafinyelela Yini Ekuvutfweni Lokufana NekwaKhristu?

1, 2. Ngumuphi umgomo onkhe emaKhristu lanawo? Shano sibonelo.

YINI lebukwa ngumake welikhaya nakakhetsa sitselo emakethe? Akabuki kutsi sikhulu kangakanani nobe kutsi sishiphile. Esikhundleni saloko, ubuka sitselo lesinuka kahle, lesingakabuni nalesilungele kudliwa. Ukhetsa sitselo lesivutsiwe.

² Ngemuva kwekutsi umuntfu afundze ngaJehova futsi ancume kubhajatiswa, buhlobo bakhe naNkulunkulu buchubeka bukhula. Uba nemgomo wekuba ngumKhristu lovutsiwe. Lokuvutfwa lesikhuluma ngako akusho kubamdzala ngeminyaka. Kodvwa kusho kuba nebudlelwane lobuhle naJehova. Umphostoli Pawula abefuna kutsi emaKhristu ase-Efesu abe bantfu labavutsiwe. Wawakhutsata kutsi abenebunye ekukholweni futsi achubeke afundza ngaJesu kute abe ‘njengemadvodza lakhule ngalokwenele, futsi avutfwe ngelizinga leliphelele njengaKhristu.’​—Efesu 4:13.

 3. Libandla lase-Efesu lifanana njani nebantfu baJehova lamuhla?

³ Libandla lase-Efesu bese lineminyaka likhona ngalesikhatsi Pawula alibhalela incwadzi. Labanyenti kulelibandla besebavele banesikhatsi lesidze bangemaKhristu lavutsiwe. Nobe kunjalo, bekakhona lamanye labekasadzinga kucinisa buhlobo bawo naJehova. Nalamuhla, bazalwane nabodzadze labanyenti sebakhonte Jehova sikhatsi lesidze futsi solo bangemaKhristu lavutsiwe. Kodvwa labanye ebandleni basengakafinyeleli kulelo zinga. Sibonelo saloko kutsi tinkhulungwane tebantfu tiyabhajatiswa umnyaka nemnyaka, ngako-ke labanye kubo kusadzingeka kutsi bavutfwe. Kutsiwani ngawe?​—Kholose 2:6, 7.

4, 5. Ngutiphi tindlela emaKhristu lavutsiwe lehluke ngato kulomunye nalomunye, kodvwa yini onkhe lafanana ngayo? (Buka sitfombe lesisekucaleni kwalesihloko.)

⁴ Nawubuka titselo letivutsiwe emakethe, uyabona kutsi atifanani ncamashi. Nobe kunjalo, kukhona letifanana ngako lokwenta tibonakale kutsi tivutsiwe. Kuyafanana nangemaKhristu lavutsiwe, nawo awafanani ncamashi. Aphuma emaveni lehlukene futsi akhule ngetindlela letingafani. Awalingani ngemnyaka futsi awatsandzi tintfo letifanako. Nobe kunjalo, onkhe emaKhritsu lavutsiwe anebuntfu lobutsite lobufanako lobuwenta abonakale kutsi avutsiwe. Ngubuphi lobuntfu?

⁵ UmKhristu lovutsiwe ulingisa Jesu futsi ulandzela “tinyatselo takhe edvute.” (1 Phetro 2:21) Jesu watsi kubaluleke kakhulu kutsi umuntfu atsandze Jehova ngenhlitiyo yakhe yonkhe, umphefumulo nengcondvo yakhe yonkhe futsi atsandze makhelwane wakhe njengobe atitsandza yena. (Matewu 22:37-39) UmKhristu lovutsiwe wenta konkhe lokusemandleni akhe kute awulalele lomyalo. Indlela laphila ngayo iyakhombisa kutsi bubaluleke kakhulu buhlobo bakhe naJehova kanye nelutsandvo lolujulile lanalo ngalabanye.

6, 7. (a) Ngutiphi tinhlobo tebuntfu UmKhristu lovutsiwe labonakala ngato? (b) Yini lesingatibuta yona?

⁶ Lutsandvo lungulobunye bebuntfu umKhristu lovutsiwe labukhombisako. (Galathiya 5:22, 23) Uphindze abe nemoya lomuhle, atibambe futsi abeketele. Lobuntfu bungamsita kutsi abeketelele timo letimatima ngaphandle kwekucansuka, futsi abeketelele kudvumateka ngaphandle kwekuphelelwa litsemba. Esifundvweni latichubela sona, umKhristu lovutsiwe uchubeka acwaninga timiso teliBhayibheli letimsita kutsi akwati kwehlukanisa lokuhle nalokubi. Ngako-ke, nakalandzela nembeza loceceshwe ngeliBhayibheli, utawukhona kutsatsa tincumo letihlakaniphile. UmKhristu lovutsiwe utfobekile, ngako ukholelwa kutsi ngaso sonkhe sikhatsi ticondziso taJehova netimiso takhe tincono kunaloko lakucabangako.a (Fundza umbhalo longentansi.) Ukhutsele ekushumayeleni tindzaba letimnandzi futsi wenta konkhe lokusemandleni akhe kute asite libandla lihlale linebunye.

⁷ Nanobe sesimkhonte sikhatsi lesingakanani Jehova, singase sitibute: ‘Lukhona yini lushintjo lengingalwenta kute ngilingise Jesu? Tikhona yini tindlela lengingatfutfukisa ngato?’

 8. Jesu abelicondza futsi alati kahle kangakanani liBhayibheli?

⁸ Jesu Khristu abeyati futsi ayicondza kahle imiBhalo. Ngisho nangesikhatsi aneminyaka lengu-12 budzala, abesebentisa imiBhalo nakakhuluma nebafundzisi ethempelini. “Bonkhe labo lebebamlalele bamangaliswa kucondza kwakhe kanye netimphendvulo takhe.” (Lukha 2:46, 47) Ngekuhamba kwesikhatsi, nakashumayela abelisebentisa ngelikhono liVi laNkulunkulu kute athulise titsa takhe.​—Matewu 22:41-46.

 9. (a) UmKhristu lovutsiwe uba naluphi luhlelo lwekudadisha? (b) Kungani sifundza liBhayibheli?

⁹ Umuntfu lofuna kuba ngumKhristu lovutsiwe ulingisa sibonelo saJesu futsi ufuna kulicondza kahle liBhayibheli. Uyihlolisisa njalo imiBhalo kute atfole timfundziso letijulile, ngobe uyati kutsi “kudla lokucinile kwebantfu labavutsiwe.” (Hebheru 5:14) UmKhristu lovutsiwe ufuna kuba ‘nelwati lolungulonalona’ ngeliBhayibheli. (Efesu 4:13) Ngako-ke tibute: ‘Ngilifundza onkhe emalanga yini liBhayibheli? Nginalo yini luhlelo lwesifundvo lengitichubela sona? Ngiba nako yini kukhonta kwemndeni maviki onkhe?’ Nawufundza liBhayibheli, hlolisisa timiso letingakusita kutsi wati indlela Jehova lacabanga futsi ative ngayo. Ngemuva kwaloko, sebentisa leto timiso nawutsatsa tincumo. Loko kutakusita kutsi usondzele kakhulu kuJehova.

10. UmKhristu lovutsiwe utiva njani ngeseluleko kanye netimiso taNkulunkulu?

¹⁰ UmKhristu lovutsiwe kufanele ente lokungetulu kwekumane nje ati kutsi litsini liBhayibheli. Kufanele asitsandze seluleko saNkulunkulu netimiso takhe. Ukhombisa lolutsandvo ngekutsi abe nesifiso sekwenta intsandvo yaJehova esikhundleni sekwenta yakhe. Wenta ngisho nelushintjo endleleni laphila ngayo, lacabanga ngayo nalenta ngayo tintfo. Ulingisa Jesu ngekuba nebuntfu lobusha, “lobentiwa ngekuvumelana nentsandvo yaNkulunkulu ngekulunga nangebucotfo lobungibo.” (Fundza Efesu 4:22-24.) Kubalulekile kukhumbula kutsi Nkulunkulu wasebentisa umoya wakhe longcwele kute ucondzise babhali beliBhayibheli. Ngako-ke, nangabe umKhristu afundza liBhayibheli, umoya waNkulunkulu longcwele uyamsita kutsi akhulise lwati, lutsandvo nebuhlobo bakhe naJehova.

11. Ngusiphi simo Jesu labhekana naso ngalesikhatsi alamhlabeni?

¹¹ Jesu abete sono. Nobe kunjalo, nakalamhlabeni abephila nebantfu labanesono. Batali bakhe nebantfwabakubo bebanesono. Ngisho nebalandzeli bakhe labekasondzelene nabo bakhombisa kutigcabha nebugovu. Nasi sibonelo: Ngebusuku bangaphambi kwekutsi abulawe, bafundzi bakhe bebaphikisana “mayelana nekutsi ngubani lomkhulu kunabo bonkhe.” (Lukha 22:24) Nanobe bebacabanga ngendlela lengakalungi, Jesu bekati kutsi ngekushesha balandzeli bakhe batawuba ngemaKhristu lavutsiwe futsi bakhe libandla lelinebunye. Ngalobo busuku, Jesu wathantazela kutsi babe nebunye. Wacela kuBabe wakhe wasezulwini kutsi babe munye, watsi: “Njengobe nawe Babe umunye nami, nami ngimunye nawe.” Wengeta watsi: “Kuze nabo babe munye njengobe natsi simunye.”​—Johane 17:21, 22.

12, 13. (a) Njengobe singemaKhristu, sinamuphi umgomo? (b) Lomunye umzalwane wakufundza njani kutfutfukisa bunye?

¹² UmKhristu lovutsiwe utfutfukisa bunye ebandleni. (Fundza Efesu 4:1-6, 15, 16.) Njengobe singemaKhritsu, umgomo wetfu kutsi ‘sihlanganiswe ngekuvumelana,’ lokusho kusebenta ngebunye. Kuze umKhristu abe nebunye lobunjalo, kufanele atfobeke. Ngisho nobe aphatanyiswa ngemaphutsa alabanye, umKhristu lovutsiwe wenta konkhe lokusemandleni akhe kute agcine libandla linebunye. Ngako-ke, tibute: ‘Ngenta njani nangabe umzalwane nobe dzadze enta liphutsa? Ngitiva njani nangabe lotsite angivisa buhlungu? Ngiyayekela yini kumkhulumisa? Nobe ngiyetama yini kwakha kuthula naye?’ UmKhristu lovutsiwe ulwela kuncoba inkinga kunekutsi abe yinkinga kulabanye.

¹³ Cabanga ngesibonelo sa-Uwe. Esikhatsini lesendlulile, abecansulwa ngemaphutsa lentiwa bazalwane nabodzadze. Ngemuva kwaloko wancuma kusebentisa liBhayibheli ne-“Insight on the Scriptures” kute afundze ngendzaba yaDavide. Kungani akhetsa kufundza ngalendzaba? Kungobe naDavide wake wahishana naletinye tinceku taNkulunkulu. Nasi sibonelo: INkhosi Sawula yetama kumbulala, labanye bantfu bebafuna kumgcoba ngematje, ngisho nemfati wakhe imbala wamhleka. (1 Samuweli 19:9-11; 30:1-6; 2 Samuweli 6:14-22) Kodvwa ngisho benta loko kuye, abemtsandza Jehova futsi ametsemba. Wakhombisa umusa. Uwe wavuma kutsi naye bekufanele ente lokufanako. Nakafundza liBhayibheli, wabona kutsi kufanele ente lushintjo endleleni lativa ngayo ngemaphutsa lentiwa bazalwane bakhe. Kwadzingeka kutsi akhohlwe ngemaphutsa abo futsi atfutfukise bunye ebandleni. Unaloyo mgomo yini nawe?

14. Jesu wabakhetsa njani bangani bakhe?

¹⁴ Jesu Khristu abebatsandza bantfu. Emadvodza nebafati, labasha nalabadzala ngisho nebantfwana imbala bebakujabulela kuba naye. Nanobe kunjalo, wabakhetsa ngekuhlakanipha bangani bakhe. Watjela baphostoli bakhe watsi: “Nangabe nigcina imiyalo yami nitawuba bangani bami.” (Johane 15:14) Wakhetsa bangani sibili kubantfu labebamlandzela ngekwetsembeka, nalabebatsandza futsi bakhonta Jehova. Ukhetsa bangani labatsandza Jehova ngenhlitiyo yabo yonkhe yini? Kungani loko kubalulekile?

15. Labasebasha bangazuza njani ngekwakha bungani nemaKhristu lavutsiwe?

¹⁵ Tinhlobo letinyenti tetitselo tivutfwa kahle endzaweni lefutfumele. Ngendlela lefanako, lutsandvo bazalwane nabodzadze labanalo ngawe lungakusita kutsi ube ngumKhristu lovutsiwe. Ungumuntfu losemusha yini losacabanga kutsi utawentani ngekuphila kwakho? Nangabe kunjalo, kukuhlakanipha kukhetsa bangani lasebakhonte Jehova iminyaka futsi labatfutfukisa bunye ebandleni. Kungenteka bake babanetinkinga ekuphileni kwabo nobe babeketelele tinsayeya letitsite basakhonta Jehova. Bangakusita kutsi ukhetse imphilo lekahle. Nawucitsa sikhatsi nabo, bangakusita kutsi utsatse tincumo letihlakaniphile futsi ube ngumKhristu lovutsiwe.​—Fundza Hebheru 5:14.

16. EmaKhristu lasakhulile ebandleni amsita njani lomunye dzadze losemusha?

¹⁶ Helga ukhumbula kutsi ngesikhatsi enta libanga lakhe lekugcina esikolweni, linyenti lalebekafundza nabo bebakhuluma ngemigomo yabo ngelikusasa. Labanyenti babo bebafuna kuya enyuvesi kute batfole umsebenti loholela kahle. Nobe kunjalo, Helga wakhuluma nebangani bakhe basebandleni labavutsiwe ngalendzaba. Utsi: “Labanyenti babo bebabadzala kimi futsi bangisita kakhulu. Bangikhutsata kutsi ngingenele umsebenti wasikhatsi sonkhe. Ngemuva kwaloko, ngacitsa iminyaka lesihlanu ngilihlahlandlela. Nyalo, njengobe sekwendlule iminyaka leminyenti ngatsatsa lesincumo, kuyangijabulisa kutsi ngasebentisa iminyaka yebusha bami ngenta umsebenti waJehova. Angitisoli ngaloko lengakwenta.”

17, 18. Singamkhonta njani Jehova ngendlela lencono?

¹⁷ Nangabe silingisa Jesu, sitawuba ngemaKhristu lavutsiwe. Sitawusondzelana naJehova futsi nesifiso setfu sekumkhonta sitawukhula. Umuntfu ukhonta Jehova kahle nangabe avutsiwe. Jesu wakhutsata balandzeli bakhe watsi: “Yentani kukhanya kwenu kukhanye kubantfu, khona batewubona lokuhle lenikwentako bese badvumisa Babe wenu losezulwini.”​—Matewu 5:16.

¹⁸ Sifundze ngendlela umKhristu lovutsiwe langalisekela kahle ngayo libandla. UmKhristu uphindze akhombise kuvutfwa ngendlela lasebentisa ngayo nembeza wakhe. Nembeza wetfu ungasisita njani kutsi sitsatse tincumo letihlakaniphile? Singabahlonipha njani bonembeza balabanye? Lemibuto sitayiphendvula esihlokweni lesilandzelako.