SIFUNDVO 49
Yini Lengenta Umndeni Wakho Ujabule?—Incenye 1
Bantfu labasandza kushada bafisa shengatsi injabulo lababanayo nabashada ingahlala kuze kube phakadze, futsi loko kungenteka. EmaKhristu lasanesikhatsi lesidze ashadile futsi lalwe kamatima kuze asebentise seluleko seliBhayibheli emishadweni yawo, ayati kutsi loku kungenteka.
1. Ngusiphi seluleko liBhayibheli lelisiniketa emadvodza?
Jehova unikete indvodza umsebenti wekutsi ihole emndenini. (Fundza Kubase-Efesu 5:23.) Jehova ulindzele kutsi yente tincumo letitawusita umndeni wayo. LiBhayibheli leluleka emadvodza: “Chubekani nitsandza bafati benu.” (Kubase-Efesu 5:25) Kusho kutsini loku? Indvodza lenelutsandvo imphatsa ngemusa umfati wayo, nababodvwa nobe banalabanye bantfu. Iyamvikela, imente ajabule futsi imnikete loko lakudzingako. (1 KuThimothi 5:8) Lokubaluleke kakhulu kutsi imsite abe nebuhlobo lobuhle naJehova. (Matewu 4:4) Sibonelo nje, ingathantaza nemfati wayo iphindze ifundze naye liBhayibheli. Indvodza lenelutsandvo, iba nebuhlobo lobuhle naJehova nayinakekela umfati wayo.—Fundza 1 Phetro 3:7.
2. Ngusiphi seluleko liBhayibheli lelisiniketa bafati?
LiVi laNkulunkulu litsi “nemfati kufanele abe nenhlonipho lenkhulu ngendvodza yakhe.” (Kubase-Efesu 5:33) Angakwenta njani loko? Angakwenta ngekutsi acabange ngebuntfu lobuhle bendvodza yakhe nangemetamo leyentako kuze inakekele yena nebantfwana babo. Angakhombisa kutsi uyayihlonipha ngekusekela tincumo tayo, futsi akhulume nayo ngemusa ngisho nobe ingasuye Fakazi.
3. Bantfu labashadene bangawucinisa njani umshado wabo?
Nalikhuluma ngebantfu labashadene liBhayibheli litsi: “Laba lababili batawuba nyamanye.” (Matewu 19:5) Loku kusho kutsi kufanele bangavumeli lutfo lubehlukanise. Loku bangakwenta ngekutsi bacitse sikhatsi lesinyenti ndzawonye futsi ngekwetsembeka batjelane loko labakucabangako nendlela labativa ngayo. Abavumeli lutfo nobe lomunye umuntfu ngaphandle kwaJehova kutsi abaluleke kwendlula loyo labashade naye. Bayacaphela kutsi bangabi nebuhlobo lobusedvute kakhulu nalomunye umuntfu ngaphandle kwaloyo labashade naye.
CHUBEKA UFUNISISA
Tfola kutsi ngutiphi timiso teliBhayibheli letingacinisa umshado wakho.
4. Madvodza—batsandzeni futsi nibaphatse kahle bafati benu
LiBhayibheli litsi “emadvodza kufanele atsandze bomkawo njengobe atsandza imitimba yawo.” (Kubase-Efesu 5:28, 29) Kusho kutsini loko? Dlala le-VIDEO, bese nicoca ngalombuto lolandzelako.
Ngutiphi letinye tindlela indvodza lengakhombisa ngato kutsi iyamtsandza umkayo futsi inendzaba naye?
Fundza KubaseKholose 3:12, bese nicoca ngalombuto:
Indvodza ingabukhombisa njani lobuntfu emshadweni wayo?
5. Bafati—tsandzani emadvodza enu niphindze niwahloniphe
LiBhayibheli likhutsata bafati kutsi bahloniphe emadvodza abo ngisho akhonta Jehova nobe angamkhonti. Fundza 1 Phetro 3:1, 2, bese nicoca ngalemibuto:
Nawunendvodza lengasuye Fakazi, siyaciniseka kutsi uyafuna kutsi ibe sikhonti saJehova. Ucabanga kutsi yini lengaphumelela, kuyishumayela njalo nobe kutiphatsa kahle uphindze uyihloniphe? Yini lekwenta usho kanjalo?
Emadvodza nebafati bangenta tincumo letinhle nababambisene. Nanobe kunjalo, ngaletinye tikhatsi umfati angahle angavumelani nendvodza yakhe. Angabese uveta umbono wakhe ngemoya lophansi nangenhlonipho, kodvwa kufanele ati kutsi Jehova unikete indvodza umsebenti wekwenta tincumo letitawusita umndeni. Kufanele ente konkhe lokusemandleni akhe kutsi asekele sincumo sayo. Ngekwenta kanjalo, utawenta kutsi kube nenjabulo ekhaya. Fundza 1 Phetro 3:3-5, bese nicoca ngalombuto:
Jehova utiva njani nangabe umfati ahlonipha indvodza yakhe?
6. Ungatincoba tinkinga emshadweni wakho
Kute umshado lote emaphutsa. Ngako-ke, labashadene kufanele basebente ngekubambisana kuze bancobe tinkinga. Dlala le-VIDEO, bese nicoca ngalemibuto lelandzelako.
Kule-video, ngutiphi timphawu letikhombisa kutsi laba labashadene besebakhweshelana?
Ngutiphi tinyatselo labatitsatsa kuze bacinise umshado wabo?
Fundza 1 KubaseKhorinte 10:24 naKubaseKholose 3:13. Ngemuva kwekufundza umbhalo ngamunye, cocani ngalombuto:
Kusebentisa leseluleko kungawucinisa njani umshado?
LiBhayibheli litsi kufanele sihloniphane. Kuhlonipha kusho kuphatsa lomunye umuntfu ngemusa nangenhlonipho. Fundza KubaseRoma 12:10, bese nicoca ngalemibuto:
Kufanele yini kutsi indvodza nobe umfati alindzele kutsi loyo lashade naye kube nguye lokhombisa inhlonipho kucala? Yini lekwenta usho kanjalo?
LABANYE BANTFU BATSI: “Indlela lengisondzelene ngayo nalengishade naye ayisafani nasekucaleni.”
Ungabachazela njani kutsi liBhayibheli lingabasita?
LOKO LESICOCE NGAKO
Indvodza nemkayo bangajabula nangabe batsandzana, bahloniphana futsi basebentisa timiso teliBhayibheli.
Yini Loyifundzile?
Yini lengentiwa yindvodza kuze umshado ujabulise?
Yini lengentiwa ngumfati kuze umshado ujabulise?
Nawushadile, ngusiphi simiso seliBhayibheli lesingakusita ucinise umshado wakho?
LOKUNYE LONGAKUHLOLA
Fundza ngaletinye tintfo letingakusita kutsi ube nemndeni lojabulako.
Bukela i-video yemculo leveta tibusiso tekusebentisa seluleko lesivela kuNkulunkulu emshadweni wakho.
Indvodza ngiyo leniketwe umsebenti wekuhola emndenini. Hlola kutsi kusho kutsini kuhlonipha loko.
“Bafati, Kungani Kufanele Nititfobe Kulabo Labatinhloko Tenu?” (Sicongosekulindza, saMay 1, 2010)
Buka indlela seluleko seliBhayibheli ngemshado lesingabasita ngayo bantfu labashadene.