Kulalela Kuyakuvikela

UNGATSANDZA yini kwenta nobe ngabe yini loyifunako? Kuke kwenteke yini kube netikhatsi lapho ufisa shengatsi kungaba bete lokutjelako kutsi kufanele wenteni? Ngicela ukhulume liciniso, ungitjele kutsi ucabangani ngaloko.—

Ngukuphi lokutsandzako wena? Kukuhlakanipha yini kwenta tintfo letitsandvwa nguwe? Akusiyo yini intfo lenhle kulalela babe namake wakho?— Nkulunkulu utsi kufanele ulalele batali bakho, lokusho kutsi kunesizatfu lesihle sekwenta loko. Asesicoce ngaleso sizatfu.

Unangakhi weminyaka?— Babe wakho unangakhi weminyaka?— Unangakhi iminyaka make wakho, nobe gogo wakho nobe mkhulu wakho?— Sebaphile iminyaka leminyenti kunawe. Umuntfu nakachubeka aphila, kwengeteka sikhatsi sekutsi afundze tintfo letinyenti. Kunyenti lakuvako, kunyenti nalakubonako futsi wenta lokunyenti umnyaka nemnyaka. Ngaleso sizatfu, bantfwana bangafundza kubantfu labadzala.

Ukhona yini umuntfu lomatiko lomncane kunawe?— Wena wati tintfo letinyenti yini kunaye?— Yini lebangela kutsi wati tintfo letinyenti kunaye?— Kungobe wena umdzala kunaye. Ube nesikhatsi lesinyenti sekufundza tintfo kwendlula umuntfu lomncane kunawe.

Ngubani lophile sikhatsi lesidze kwendlula mine, nawe nobe lomunye umuntfu?— NguJehova Nkulunkulu. Wati lokunyenti kwendlula wena nami. Nakasitjela kutsi sente lokutsite kufanele singangabati kutsi loko yintfo lenhle, ngisho nobe kungase kube lukhuni kuyenta. Bewati yini kutsi ngisho neMfundzisi Lomuhle Kakhulu ngalesinye sikhatsi wakutfola kumatima kulalela?—

Nkulunkulu wake wacela Jesu kutsi ente intfo lelukhuni. Jesu wathantaza, njengobe simbona kulesitfombe. Wathantaza watsi: “Nangabe utsandza, yendlulise lendzebe kimi.” Ngalomthantazo, Jesu wakhombisa kutsi bekungasimelula ngaso sonkhe sikhatsi kwenta intsandvo yaNkulunkulu. Yini leyashiwo nguJesu ngasekupheleni kwalomthantazo wakhe? Wena ucabanga kutsi watsini?—

Jesu waphetsa lomthantazo ngekutsi atsi: “Akwenteke intsandvo yakho, hhayi intsandvo yami.” (Lukha 22:41, 42) Bekafisa kutsi kwenteke intsandvo yaNkulunkulu, hhayi yakhe. Ngemuva kwaloko, wenta loko lebekufunwa nguNkulunkulu kunekutsi ente loko labekucabanga.

Yini lesingayifundza kulendzaba?— Sifundza kutsi kukuhlakanipha kuhlale silalela loko Nkulunkulu lakushoko, ngisho nobe kungase kubonakale kungasimelula kwenta njalo. Kukhona nalokunye lesikufundzako. Ucabanga kutsi sifundzani?— Sifundza kutsi Nkulunkulu naJesu abasiye umuntfu umunye njengobe labanye bantfu bacabanga. Jehova Nkulunkulu mdzala futsi wati lokunyenti kuneNdvodzana yakhe, Jesu.

Nasilalela Nkulunkulu sisuke sikhombisa kutsi siyamtsandza. LiBhayibheli litsi: “Nguloku lokushiwo kutsandza Nkulunkulu, kutsi sigcine imiyalo yakhe.” (1 Johane 5:3) Uyabona-ke kutsi sonkhe kudzingeka simlalele Nkulunkulu. Uyafisa yini kumlalela?—

Asesivule emaBhayibheli etfu sifundze loko Nkulunkulu latjela bantfwana kutsi bakwente. Sitawufundza loko lokushiwo liBhayibheli ku-Efesu sehluko 6, emavesi 1 kuya ku-3. Lamavesi atsi: “Bantfwana, lalelani batali benu eNkhosini, ngobe loku kulungile: ‘Hlonipha uyihlo nenyoko’; lona ngumyalo wekucala lonesetsembiso lesitsi: ‘Kuze kukuhambele kahle, futsi uphile sikhatsi lesidze emhlabeni.’”

Uyabona-ke, nguJehova Nkulunkulu lotsi kufanele ulalele babe namake wakho. Kusho kutsini ‘kubahlonipha’? Kusho kubalalela. Nkulunkulu wetsembisa kutsi nawulalela batali bakho ‘kutakuhambela kahle.’

Asengikucocele indzaba lemayelana nebantfu labasindza ngobe balalela. Labantfu bebaphila kadzeni, edolobheni lelikhulu eJerusalema. Bantfu labanyenti lebebahlala kulelo dolobha bebangamlaleli Nkulunkulu, kungako Jesu abecwayisa ngekutsi Nkulunkulu bekatalibhubhisa lelo dolobha. Jesu waphindze wabatjela indlela lebebangasindza ngayo nangabe bebakutsandza lokulungile. Watsi: ‘Nanibona emasotja atungeleta iJerusalema, nitakwati kutsi kubhujiswa kwayo sekusondzele. Leso kuyawuba sikhatsi sekutsi labo labaseJerusalema baphume, babalekele etintsabeni.’​—Lukha 21:20-22.

Njengobe Jesu bekashito, emasotja efika kutohlasela liJerusalema. Emasotja emaRoma atungeleta lelidolobha. Ngemuva kwaloko, ngesizatfu lesingatiwa, abuyela emuva. Bantfu labanyenti bebacabanga kutsi ingoti seyendlulile. Ngaleso sizatfu, bahlala. Yini Jesu labetsite kufanele bayente?— Wena bewutakwentani kube bewuphila eJerusalema ngaleso sikhatsi?— Bantfu labawakholelwa emavi aJesu bashiya emakhaya abo babalekela etintsabeni letikhashane neJerusalema.

Kwaphela umnyaka kungakenteki lutfo eJerusalema. Nangemnyaka wesibili, akwentekanga lutfo. Kwaba ngulokufanako nangemnyaka wesitsatfu. Kungenteka kutsi labanye bantfu bebacabanga kutsi labo lebebashiye lelidolobha bebangakahlakaniphi. Kodvwa ngemnyaka wesine, emasotja emaRoma aphindze abuya. Afike atungeleta lonkhe liJerusalema. Ngaleso sikhatsi, besekwephutile kutsi bangabaleka. Emasotja alibhubhisa lonkhe lidolobha. Bantfu labanyenti lebebalapho bafa, kantsi labangafanga bentiwa tigcili.

Kwentekani kubantfu lebebalalele Jesu?— Bebaphephile. Bebakhashane neliJerusalema. Kungaleso sizatfu bangazange balimale. Kulalela kwabavikela.

Nangabe nawe ulalela, kutakuvikela yini loko?— Batali bakho bangase bakutjele kutsi ungadlali emgwacweni. Kungani basho loko?— Kungobe kungenteka ushayiswe yimoto. Kodvwa ngalesinye sikhatsi ungase utsi: ‘Kute timoto letihamba emgwacweni. Angeke ngilimale. Nalabanye bantfwana bayadlala emgwacweni, kodvwa angikaze ngibabone tibashayisa.’

Nguloko lebekucatjangwa bantfu labanyenti lebebahlala eJerusalema. Ngemuva kwekutsi emasotja emaRoma ahambe, kwabonakala shengatsi kuphephile. Labanye balabantfu bebahlala kulelidolobha. Ngako bachubeka bahleti khona. Bebacwayisiwe, kodvwa abalalelanga. Umphumela waba kutsi bafe.

Asesicoce ngalesinye sibonelo. Uke wadlala yini ngemetjiso?— Kungase kubonakale kumnandzi kubona umlilo nawulayida lutsi lwemetjiso. Kodvwa kudlala ngemetjiso kungaba yingoti. Indlu yonkhe ingasha, futsi nawe ungafa.

Ungakhohlwa kutsi nawuhle nje ulalela akukeneli. Kodvwa nawuhlale ulalela, loko kutakuvikela. Ngubani lona lotsi “bantfwana, lalelani batali benu”?— NguNkulunkulu. Khumbula kutsi usho loko ngobe uyakutsandza.