Ungadukiswa “Kuhlakanipha Kwalelive”

 1. LiVi laNkulunkulu lisifundzisa ini?

SINGAKHONA kuncoba nobe ngabe nguyiphi inkinga ngobe Jehova unguMfundzisi wetfu Lomkhulu. (Isa. 30:20, 21) LiVi lakhe lisinika konkhe lesikudzingako kute ‘sikulungele ngalokuphelele’ futsi ‘sikufanele kahle kwenta yonkhe imisebenti lemihle.’ (2 Thim. 3:17) Nasisebentisa lesikufundziswa liBhayibheli ekuphileni kwetfu, sihlakanipha kakhulu kunebantfu labakhutsata “kuhlakanipha kwalelive.”—1 Khor. 3:19; Hla. 119:97-100.

 2. Sitawucoca ngani kulesihloko?

² Njengobe sitawufundza, kuhlakanipha kwalelive kuvame kwenetisa tifiso tetfu tebugovu. Ngako singakutfola kumatima kubalekela kucabanga njengebantfu balelive kanye nekubalingisa. Kungako liBhayibheli litsi: “Cinisekani kutsi kubete umuntfu lonitfumba ngekuhlakanipha kwebantfu, nekuyenga lokulite ngemasiko ebantfu.” (Khol. 2:8) Kulesihloko sitawucoca ngekutsi bantfu bacala njani kukholelwa emanga lamabili lafundziswa nguSathane. Njengobe sicoca ngalamanga, sitawubona kutsi kungani kuhlakanipha kwalelive kubulima kanye nekutsi kuhlakanipha kwaNkulunkulu kuncono ngani kunetintfo live lelingasiniketa tona.

3-4. Nguluphi lushintjo lolukhulu lolwaba khona endleleni bantfu lebebatiphatsa ngayo ngelikhulu lesi-20 leminyaka?

³ Ngelikhulu lesi-20 leminyaka, umbono webantfu baseMelika mayelana nekutiphatsa lokubi washintja kakhulu. Esikhatsini lesendlulile bebakholelwa kutsi bantfu labashadile kuphela lebekufanele baye ecasini, futsi tindzaba temacasi bekungakafaneli tikhulunywe esiveni. Kodvwa loko kwaphela, futsi kwandza imibono lekhutsata loko lebekungemukeleki kubantfu.

⁴ Kusukela nga-1920 kuya ku-1929, kwaba netingucuko letinkhulu endleleni bantfu lebebatiphatsa ngayo kanye nembono bantfu lebebanawo ngekuya ecasini. Lomunye umcwaningi watsi: “Emafilimu, emadrama, tingoma, tincwadzi, kanye netekukhangisa betigcwele kutiphatsa lokubi.” Ngaleyo minyaka, bantfu bebajayiva ngendlela lebeyenta bantfu bacabange ngekuya ecasini, futsi bebagcoka timphahla letite sizotsa. LiBhayibheli lasho kutsi emalangeni ekugcina, bantfu ‘bebatawutsandza injabulo.’ 2 Thim. 3:4.

 5. Kusukela ngabo-1960, yini leyentekile endleleni bantfu balelive labatiphatsa ngayo?

⁵ Ngabo-1960, kuhlala ndzawonye kwebantfu labangakashadi, butabani, kanye nekudivosa besekuyintfo levamile. Tinhlobo letinyenti tekutijabulisa betikhombisa kuya ecasini. Emashumini eminyaka lesandza kwengca, kube nemiphumela leminyenti lebuhlungu lebangelwa kutiphatsa kabi. Lomunye umbhali watsi kutiphatsa lokubi ngekwelicasi kubangele kutsi imindeni ibhidlike, kube nemindeni lenemtali munye, kucindzeteleka, kuba ngumlutsa wetitfombe letikhombisa kungcola, kanye naletinye tinkinga letinyenti. Kwandza kwetifo letfolakala ngekuya ecasini njengesifo se-AIDS, kungulolunye luphawu lolukhumbisa kutsi kuhlakanipha kwalelive kubulima.—2 Phet. 2:19.

 6. Umbono bantfu balelive labanawo ngekuya ecasini uyifeza njani injongo yaSathane?

⁶ Umbono bantfu balelive labanawo ngekuya ecasini ufeza loko lokufunwa nguSathane. Asingabati kutsi Sathane uyajabula nakabona bantfu basisebentisa kabi sipho sekushada nekuya ecasini Nkulunkulu lasinike bantfu. (Ef. 2:2) Kutiphatsa lokubi ngekwelicasi akugcini nje ngekukhombisa kungasihloniphi sipho Jehova lasinike bantfu sekuba nebantfwana, kodvwa kungaphindze kuvimbele bantfu kutsi batfole kuphila lokuphakadze.—1 Khor. 6:9, 10.

7-8. Kungani umbono weliBhayibheli ngekuya ecasini uncono kakhulu kunembono webantfu balelive?

⁷ Bantfu labalandzela kuhlakanipha kwalelive bahlekisa ngetimiso letiseBhayibhelini tekutiphatsa, futsi batsi tite ingcondvo. Bantfu labanjalo bangahle babute: ‘Nkulunkulu wasidalelani saba nesifiso sekuya ecasini kodvwa abe afuna sitibambe?’ Lombuto usekelwe embonweni lokabi wekutsi bantfu kufanele bente konkhe labakufunako. LiBhayibheli lisho lokwehlukile. Lisifundzisa kutsi akudzingeki sente tonkhe tintfo lesifisa kutenta, futsi singakhona kulwa netifiso tekwenta lokubi. (Khol. 3:5) Ngetulu kwaloko, Jehova usiphe sipho semshado, lapho khona tifiso tekuya ecasini tingenetiswa khona. (1 Khor. 7:8, 9) Ngalesipho, indvodza nemfati bangajabulela kuya ecasini ngephandle kwekutisola nekucindzeteleka lokubangelwa kutiphatsa kabi ngekwelicasi.

⁸ Ngalokwehlukile kubantfu balelive, liBhayibheli likhutsata umbono lokahle ngekuya ecasini. Liyavuma kutsi kuya ecasini kungaba ngumtfombo wenjabulo. (Taga 5:18, 19) Nanobe kunjalo, liBhayibheli litsi: “Ngamunye wenu kufanele akwati kulawula umtimba wakhe ngebungcwele nangeludvumo, hhayi ngekuba nenkhanuko lenemandla njengetive letingamati Nkulunkulu.”—1 Thes. 4:4, 5.

 9. (a) Bantfu baJehova bangelikhulu lesi-20 leminyaka, bakhutsatwa njani kutsi basebentise kuhlakanipha kwaJehova lokuseBhayibhelini? (b) Ngusiphi seluleko lesihlakaniphile lesisitfola embhalweni wa-1 Johane 2:15, 16? (c) Ngekusho kwaRoma 1:24-27, ngutiphi tintfo lokufanele sitibalekele?

⁹ Ngelikhulu lesi-20 leminyaka, bantfu baJehova abazange bayengwe bantfu ‘labangasadliwa ngunembeza.’ (Ef. 4:19) Betama kuphila ngetimiso taJehova. Sicongosekulindza saMay 15, 1926, satsi: “Emadvodza noma besifazane kufanele bahlanteke, babe msulwa endleleni labacabanga ngayo kanye nasetintfweni labatentako, ikakhulukati nabanebantfu bebulili lobehlukile.” Ngisho noma bantfu lebebaphila nabo bebatiphasa kabi ngekwelicasi, bantfu baJehova bebasebentisa kuhlakanipha lokutfolakala eVini lakhe liBhayibheli. (Fundza 1 Johane 2:15, 16.) Sijabula kakhulu ngekuba neliVi laNkulunkulu! Siyabonga ngekutsi Jehova usiniketa kudla lokufika ngesikhatsi lesifanele lokusisita kutsi singadukiswa kuhlakanipha kwalelive endzabeni yekutiphatsa kabi.b—Fundza Roma 1:24-27.

10-11. LiBhayibheli lasecwayisa kutsi kutawentekani emalangeni ekugcina?

¹⁰ LiBhayibheli lasecwayisa kutsi emalangeni ekugcina bantfu ‘bebatawutitsandza bona.’ (2 Thim. 3:1, 2) Asimangali nasibona live likhutsata umoya webugovu. Lenye i-encyclopedia itsi ngabo-1970 bekunetincwadzi letiniketa teluleko letimayelana nekuphumelela ekuphileni. Letinye tincwadzi “takhutsata labatifundzako kutsi batati futsi bemukele kutsi kute labangakushintja endleleni labangiyo.” Cabanga nganaku lokushiwo ngulenye incwadzi: “Kufanele utitsandze ngoba kute umuntfu lomuhle nalokujabulisako kuba naye kwendlula wena.” Iphindze itsi: “Umuntfu kufanele atincumele yena kutsi ufuna kuphila njani futsi kufanele ente yonkhe intfo layifunako.”

¹¹ Wake wawuva yini umbono lonjalo? Sathane wakhutsata Eva kutsi ente intfo lefanako. Watsi Eva ‘abengafana naNkulunkulu akwati lokuhle nalokubi.’ (Gen. 3:5) Lamuhla, labanyenti batibona babaluleke kakhulu kangangekutsi kute umuntfu longabatjela kutsi yini lelungile nalengakalungi, ngisho naNkulunkulu imbala. Nasi sibonelo, indlela labenta ngayo tintfo iwukhombisa ngalokucacile umbono labanawo ngemshado.

12. Ngumuphi umbono lokhutsatwa live mayelana nemshado?

¹² LiBhayibheli liyala emadvodza nebafati kutsi bahloniphane baphindze bahloniphe tifungo temshado. Likhutsata bantfu labashadile kutsi batimisele kuhlala ndzawonye, litsi: “Indvodza iyawushiya uyise nenina inamatsele kumfati wayo, bese baba nyamanye.” (Gen. 2:24) Ngalokwehlukile, bantfu labanekuhlakanipha kwalelive bakhutsata umbono lowehlukile ngoba batsi nguloyo naloyo kufanele anake tidzingo takhe. Lenye incwadzi lekhuluma ngedivosi itsi: “Kuleminye imikhosi, bantfu abasasho kutsi, ‘size sehlukaniswe kufa,’ kodvwa sebatsi ‘yingci nje nasisatsandzana.’” Ngesizatfu sekutsi bantfu sebatsatsa umshado njengentfo lengaphela noma ngabe kunini, imindeni iyehlukana futsi loko kubangela buhlungu lobukhulu. Asingabati kutsi umbono welive mayelana nemshado ubulima.

13. Ngusiphi lesinye sizatfu lesenta Jehova abenyanye bantfu labatigcabhako?

¹³ LiBhayibheli litsi: “Umuntfu lotiphakamisako usinengiso kuSimakadze.” (Taga 16:5) Kungani Jehova abenyanya bantfu labatigcabhako? Lesinye sizatfu kutsi bantfu labakhutsata kutitsandza bona bakhombisa kutsi bayatigcabha njengaSathane. Cabanga ngaloku, Jesu wasetjentiswa nguJehova ekudaleni tonkhe tintfo. Nanobe kunjalo, Sathane bekacabanga kutsi Jesu bekufanele amkhotsamele futsi amkhonte. (Mat. 4:8, 9; Khol. 1:15, 16) Bantfu labatibona babaluleke kakhulu baniketa bufakazi bekutsi kuhlakanipha kwalelive kubulima kuNkulunkulu.

14. Umbhalo waRoma 12:3 usisita njani kutsi sibe nembono lofanele mayelana nendlela lesitibona sibaluleke ngayo?

¹⁴ LiBhayibheli lisisita kutsi sibe nembono lofanele ngendlela lesitibona sibaluleke ngayo. Litsi kufanele sititsandze ngelizinga lelifanele. Jesu watsi: “Kufanele utsandze makhelwane wakho njengobe utitsandza wena.” Loku kusho kutsi kufanele sititsandze futsi sinakekele tidzingo tetfu ngelizinga lelifanele. (Mat. 19:19) Nanobe kunjalo, liBhayibheli lisifundzisa kutsi akukafaneli sicabange kutsi sibaluleke kakhulu kunalabanye. Kunaloko litsi: “Ningenti lutfo ngekubanga nome ngekutati, kodvwa ngekutfobeka nitsatse labanye njengalabakhulu kunani.”—Fil. 2:3; fundza Roma 12:3.

15. Yini lekwenta ucabange kutsi kukahle kusebentisa seluleko seliBhayibheli mayelana nekutibona ubalulekile?

¹⁵ Lamuhla, bantfu labanyenti labatsatfwa njengebantfu labahlakaniphile bahlekisa ngeseluleko lesiseBhayibhelini lesimayelana nekutibona ubalulekile. Batsi labo labatsatsa labanye njengalabakhulu kunabo kutawubenta babe butsakatsaka futsi labanye bantfu batawudlala ngabo. Ibe yini imiphumela yekutiphatsa lokukhutsatwa live laSathane? Yini loyibonile? Bantfu labaticabangela bona bodvwa bayajabula yini? Imindeni yabo iyajabula yini? Banabo yini bangani beliciniso? Banabo yini buhlobo lobuhle naJehova? Kuloko losewukubonile, ngukuphi lokunemiphumela lemihle—kulandzela kuhlakanipha kwalelive yini noma kuhlakanipha lokuseVini laNkulunkulu?

16-17. Yini lesimbonga ngayo Jehova, futsi leni?

¹⁶ Bantfu labafuna seluleko kubantfu labatsatfwa njengalabahlakaniphile bafanana nesivakashi lesibuta indlela kulesinye sivakashi naso lesilahlekile. Mayelana nebantfu lebebatsatfwa njengalabahlakaniphile ngesikhatsi sakhe, Jesu watsi: “Babaholi labatimphumphutse. Nangabe imphumphutse ihola imphumphutse, totimbili titawugcumukela emgodzini.” (Mat. 15:14) Kuliciniso kutsi kuhlakanipha kwalelive kubulima kuNkulunkulu.

¹⁷ Seluleko lesiseBhayibhelini sihlale silusito “ekufundziseni, ekukhalimeni, ekulungiseni, nasekuyaleni ngekulunga.” (2 Thim. 3:16) Simbonga kakhulu Jehova ngekusivikela ekuhlakanipheni kwalelive asebentisa inhlangano yakhe. (Ef. 4:14) Imfundvo levela kuNkulunkulu isiniketa emandla lesiwadzingako kute sichubeke silandzela timiso letiseBhayibhelini. Kulilungelo lelikhulu kucondziswa nguletimiso letihlakaniphile nalesingatetsemba letitfolakala eBhayibhelini.