Incociswano Namakhelwane—Jesu UnguNkulunkulu Yini?

BOFAKAZI BAJEHOVA bayakujabulela kucoca ngeliBhayibheli nabomakhelwane babo. Ukhona yini umbuto lotsite ngeliBhayibheli lowake watibuta wona? Uyafisa yini kwati ngetinkholelo tabo nobe tintfo labatentako enkholweni yabo? Nangabe kunjalo, ungangabati kubabuta ngato esikhatsini lesitako nawuhlangana nabo. Bangakujabulela kucoca nawe ngato.

Kulencociswano lelandzelako, kunaletinye tetintfo Fakazi waJehova langase acoce ngato namakhelwane wakhe. Asesitsi Thembi longulomunye waboFakazi uvakashele ekhaya laSibongile.

Kuliciniso Yini Kutsi Nine Anikholelwa KuJesu?

Sibongile: Umfundisi wetfu utsi boFakazi BaJehova abakholelwa kuJesu. Kuliciniso yini loko?

Thembi: Ngicela kukucinisekisa kutsi siyakholelwa kuJesu. Ecinisweni, siyakholelwa kutsi kukholwa nguJesu kubalulekile kute sisindziswe.

Sibongile: Nami ngiyakukholelwa loko.

Thembi: Lokusho kutsi sikholelwa intfo lefananako. Ngisengakaluli kakhulu, mine libito lami nginguThembi. Wena ungubani?

Sibongile: Mine nginguSibongile. Ngiyajabula kukwati.

Thembi: Nami ngiyajabula kukwati Sibongile. Kungenteka uyatibuta kutsi, ‘nangabe boFakazi BaJehova bayakholwa nguJesu, kwentiwa yini kutsi bantfu batsi abakholwa nguye?’

Sibongile: Yebo, ngingatsandza kukwati loko.

Thembi: Kafishane nje wena Sibongile, siyakholwa kakhulu kuJesu, kepha akusiko konkhe bantfu labakushoko ngaye lesikukholelwako.

Sibongile: Ungangibekisela yini?

Thembi: Yebo sisi. Labanye bantfu batsi Jesu bekamane nje angumuntfu lolungile kodwa tsine asivemelani nalowo mbono.

Sibongile: Nami futsi angivumelani nawo.

Thembi: Lokusho kutsi siyavumelana nakuloko. Sibonelo sesibili kutsi boFakazi BaJehova abavumelani netimfundziso letiphambene naloko Jesu lakufundzisa mayelana nebuhlobo bakhe neYise.

Sibongile: Usho kutsini?

Thembi: Tinkholo letinyenti tifundzisa kutsi Jesu unguNkulunkulu. Mhlawumbe nawe ufundziswe loko.

Sibongile: Yebo sisi, umfundisi wami utsi Nkulunkulu naJesu bangumuntfu munye.

Thembi: Awucabangi yini kutsi indlela lencono yekufundza liciniso ngaJesu kuhlola loko yena lakusho ngaye?

Sibongile: Ngiyavumelana naloko.

Watsini Jesu?

Thembi: Asesifundze nali livesi leliBhayibheli leliyicacisa kahle lendzaba. Ngicela unake naku lesitakufundza ku-Johane 6:38. Jesu watsi: “Ngobe kwehla kwami ezulwini akusiko kutsi ngetela kutakwenta intsandvo yami, kepha kutakwenta intsandvo yalowo longitfumile.” Lamavi, abetasidida kancane kube Jesu abenguNkulunkulu.

Sibongile: Usho kutsini?

Thembi: Naka kutsi Jesu utsini; utsi nakehla ezulwini, aketelanga kutowenta intsandvo yakhe.

Sibongile: Vele, utsi yena wetela kutakwenta intsandvo yaLoyo lobekamtfumile.

Thembi: Kepha kube Jesu unguNkulunkulu, ngabe ngubani-ke lowamtfuma kutsi ete emhlabeni? Kungani Jesu avuma kwenta intsandvo yaNkulunkulu?

Sibongile: Sengiyakuva loku lokushoko. Kepha angiciniseki kutsi sesingasima evesini linye nje lelitsi Jesu akasiye Nkulunkulu.

Thembi: Asewuphindze ucabangisise ngalokwashiwo nguJesu ngalelinye lilanga. Washo emavi lafananako esehlukweni lesilandzelako salencwadzi yaJohane. Ngicela ufundze Johane 7:16.

Sibongile: Lombhalo utsi, “Jesu wabaphendvula watsi: ‘Loku lengikufundzisako akusiyo imfundziso yami, kodvwa yalongitfumile.’”

Thembi: Ufundze kahle. Kulolokushiwo ngulelivesi, Jesu abefundzisa imibono yakhe yini?

Sibongile: Chake, utsi bekafundzisa tintfo taLowamtfuma.

Thembi: Ucinisile. Kufanele sitibute nekutsi: ‘Ngubani lowatfuma Jesu? Ngubani lowamtjela emaciniso labewafundzisa?’ Awucabangi yini kutsi Mkhulu kunaJesu? Kuyacaca-ke kutsi sitfunywa singephansi kwalositfumile.

Sibongile: Ngiyamangala. Ngiyacala-ke kukuva loku. Angikase ngiwubone lombhalo.

Thembi: Phindze ucabange futsi nganankha emavi aJesu laku-Johane 14:28: “Ningivile ngitsi kini: ‘Ngiyahamba, kodvwa ngitawubuya ngite kini.’ Kube beningitsandza, ngabe niyajabula kutsi ngiya kuBabe, ngobe Babe mkhulu kunami.” Ngekusho kwalelivesi, ucabanga kutsi Jesu watibeka kusiphi sigaba nakaticatsanisa neYise?

Sibongile: Utsi Babe mkhulu kunaye. Ngicabanga kutsi abetibona amncane kunaNkulunkulu.

Thembi: Kunjalo sisi. Kulesinye sibonelo, asewunake kutsi Jesu watsini kubafundzi bakhe njengobe kusho Matewu 28:18. Lelivesi litsi: “Ngiphiwe emandla onkhe ezulwini nasemhlabeni.” Jesu washo yini kutsi abehlale anawo onkhe emandla?

Sibongile: Chake, watsi uphiwe emandla.

Thembi: Kepha-ke nangabe Jesu anguNkulunkulu, kungenteka njani kutsi aphiwe emandla? Bekawaphiwe ngubani-ke lamandla?

Sibongile: Ngisetawucabanga ngaloko.

Bekakhuluma Nabani?

Thembi: Kukhona lokunye nako lokumangalisako nangabe sitsi vele Jesu unguNkulunkulu.

Sibongile: Kuyini loko?

Thembi: Nguloko lesifundza ngako ngekubhajatiswa kwaJesu. Asewunake kutsi lokulandzisa lokuku-Lukha 3:21, 22, kutsini. Ngicela uwafundze lamavesi.

Sibongile: ‘Kwatsi nase babhajatiswe bonkhe, kwase kubhajatiswa naJesu. Watsi asathandaza kwavuleka lizulu, umoya longcwele wehlela kuye ufana nelituba. Kwevakala livi liphuma ezulwini litsi: “Wena uyiNdvodzana yami letsandzekako. Ngitfokotile ngawe.”’

Thembi: Ubonile yini kutsi Jesu abentani ngalesikhatsi abhajatiswa.

Sibongile: Abethandaza.

Thembi: Kunjalo. Manje singatibuta kutsi, ‘Nangabe Jesu anguNkulunkulu abethandaza kubani?’

Sibongile: Ngumbuto lomuhle-ke lowo. Ngitawubuta umfundisi wami.

Thembi: Siselapho nje sisi, ngicela unake kutsi Jesu watsi nakaphuma emantini kwaba nalosezulwini lokhuluma naye. Uvile yini kutsi watsini Lona lobekakhuluma naJesu?

Sibongile: Watsi Jesu uyiNdvodzana yaKhe, uyamtsandza futsi utfokotile ngaye.

Thembi: Ucinisile. Nangabe Jesu anguNkulunkulu, ngubani lowasho lamavi asezulwini?

Sibongile: Angikase ngiyicabange ngalendlela lendzaba.

Kungani Kutsiwa “Babe” ‘neNdvodzana’?

Thembi: Naku lokunye lokufanele sicabange ngako: Sifundze kutsi Jesu wakhuluma ngaNkulunkulu watsi unguBabe wakhe losezulwini. Nangalesikhatsi Jesu abhajatiswa kwevakala livi lichamuka ezulwini litsi Jesu uyiNdvodzana yaKhe. Ecinisweni, Jesu watibita yena ngekutsi uyiNdvodzana yaNkulunkulu. Ngako-ke, nangabe ufuna kungifundzisa kutsi bantfu lababili bayalingana, ungangibekisela ngamaphi emalunga emndeni?

Sibongile: Ngingakubekisela ngebafana bandzawonye.

Thembi: Kunjalo—mhlawumbe bewungabekisa ngemaphahla lafananako. Jesu wabita Nkulunkulu ngekutsi ungu-Babe, kepha yena watibita ngekutsi uyiNdvodzana. Manje ucabanga kutsi abesho kutsini Jesu?

Sibongile: Sengiyabona. Jesu utsi lomunye mdzala futsi unemandla kunalomunye.

Thembi: Vele kunjalo. Asewucabange ngaloku: Wena ubekise ngemaphahla lafananako, kute ukhombise kulingana. Awucabangi yini kutsi kube Jesu abenguNkulunkulu futsi anguMfundzisi Lomkhulu, abetawubekisa ngemaphahla njengatsi nome asebentise sibonelo lesincono kunalesi?

Sibongile: Kunjalo sisi.

Thembi: Esikhundleni saloko, wasebentisa sicu lesitsi “Babe” nalesitsi “iNdvodzana” kute achaze buhlobo bakhe naNkulunkulu.

Sibongile: Uta nendzaba-ke nyalo.

Yini Leyashiwo Balandzeli BaJesu Bekucala?

Thembi: Ngisengakahambi-nje, ngingatsandza sikhulume ngalokutsite mayelana nalendzaba nangabe usenaso sikhashana.

Sibongile: Ngisesenayo imizuzu lembalwa.

Thembi: Nangabe Jesu anguNkulunkulu, bewungeke yini ulindzele kutsi bafundzi bakhe bakusho loko?

Sibongile: Kuvakala kunengcondvo loko.

Thembi: Kute emiBhalweni lapho sifundza khona kutsi bafundzisa loko. Esikhundleni saloko, asewunake loko umphostoli Pawula, longulomunye webalandzeli bekucala baJesu lakubhala. KuFiliphi 2:9, uchaza loko Nkulunkulu lakwenta ngemuva kwekufa nekuvuka kwaJesu: “Ngako-ke Nkulunkulu wamphakamisa kakhulu [Jesu], wamnika libito lelingetulu kwemabito onkhe.” Ngekusho kwalelivesi, Nkulunkulu wamentelani Jesu?

Sibongile: Litsi Nkulunkulu wambeka esikhundleni lesisetulu.

Thembi: Ucinisile. Kodvwa-ke nangabe Jesu abelingana naNkulunkulu ngembikwekutsi afe, bese ngekuhamba kwesikhatsi Nkulunkulu umbeka esikhundleni lesisetulu, loko bekungeke yini kwente Jesu abe mkhulu kunaNkulunkulu? Kungenteka njani kutsi umuntfu abe mkhulu kunaNkulunkulu?

Sibongile: Intfo lenjalo ngeke yenteke.

Thembi: Ngivumelana nawe kuloko. Kubo bonkhe lobufakazi lesesibutfolile, usengasho yini kutsi liBhayibheli lifundzisa kutsi Jesu unguNkulunkulu?

Sibongile: Cha-ke, kubonakala kungenjalo. LiBhayibheli litsi Jesu uyiNdvodzana yaNkulunkulu.

Thembi: Ucinisile sisi. Ngicela kusho Sibongile kutsi boFakazi BaJehova bamhlonipha kakhulu Jesu. Siyakholelwa kutsi kufa kwakhe njengobe abenguMesiya lobekatsenjisiwe, kwavula indlela leholela bonkhe bantfu labetsembikile ekusindzisweni.

Sibongile: Nami ngiyakukholelwa loko.

Thembi: Ungase utibute nekutsi ‘Singamkhombisa njani Jesu kutsi siyambonga ngekutsi wasifela?’a

Sibongile: Vele bengitibuta lowombuto.

Thembi: Nakungenteka ngitawubuya sitewucoca ngemphendvulo yawo leseBhayibhelini. Utawube ukhona yini lakhaya kuleliviki lelitako ngalesikhatsi?

Sibongile: Yebo sisi, ngitawube ngikhona.

Thembi: Kulungile sisi, sitawubonana ngaleso sikhatsi.

[Umbhalo longentansi]