Khumulani Buntfu Lobudzala, Nibulahle

1, 2. Yini labanye bantfu labayishoko ngaBoFakazi BaJehova?

BANTFU labangesibo boFakazi bakhuluma ngetintfo letinhle labatibona kubantfu baJehova. Cabanga nje nganaku, mayelana nebazalwane nabodzadze lebebatfunjwe ngemaNazi eJalimane, lomunye umbhali longu-Anton Gill wabhala watsi: “EmaNazi bekabatondza kakhulu BoFakazi BaJehova. . . . Nga-1939 bekuvalelwe labangu-6 000 [etinkanjini tekuhlushwa].” Nobe kunjalo, lombhali waphindze watsi BoFakazi babeketelela kuhlushwa kabuhlungu, kodvwa bachubeka “batsembekile futsi banesimo sengcondvo lesihle ngisho nobe bebabhekene netimo letimatima” futsi “bebacinisana.”

² Eningizimu Afrika, bantfu labangasibo BoFakazi nabo babona kutsi bantfu baNkulunkulu banesimilo lesihle. Kadzeni, BoFakazi labanelibala lelingafani, bekulukhuni kutsi bahlangane ngekukhululeka kulelive. Nanobe kunjalo, ngeLisontfo langaDecember 18, 2011, kwajabulisa kakhulu kubona bazalwane betfu lebebangetulu kwa-78 000 labanelibala lelingafani baseNingizimu Afrika kanye nalabanye lebebavela emaveni labomakhelwane, bahlangene enkhundleni lenkhulu yetemidlalo leseJozi futsi bajabulela imfundvo levela kuNkulunkulu. Nakakhuluma ngalombutsano, lomunye lophetse kulenkhundla watsi: “Solo ngatsi nhlo, ngiyacala kubona sicumbi sebantfu lesitiphetse kahle kulenkhundla. Nonkhe nigcoke kahle. Nalenkhundla niyihlante yaba yinhle. Lokumangalisa nakakhulu, kutsi anibandlululani.”

 3. Yini lesenta sehluke?

³ Loko lokushiwo bantfu labangesibo boFakazi kukuveta ebaleni kutsi bazalwane labasemhlabeni wonkhe behluke kakhulu. (1 Phet. 5:9) Yini vele lesenta sehluke kuletinye tinhlangano? LiVi laNkulunkulu nemoya wakhe longcwele, kusisita sisebente kamatima kuze sikhone ‘kukhumula buntfu lobudzala,’ bese ‘sigcoka buntfu lobusha.’​—Khol. 3:9, 10.

 4. Sitawucoca ngani kulesihloko, futsi kungani?

⁴ Kunemehluko emkhatsini wekukhumula buntfu lobudzala nekubukhumula ubulahle. Kulesihloko sitawucoca ngekutsi singabukhumula kanjani buntfu lobudzala, sicoce nangekutsi kungani kufanele sisheshe sikwente loko, kanye nangekutsi kungenteka njani kutsi umuntfu ayiyekele imikhuba yakhe lemibi ngisho nobe sekayente sikhatsi lesidze. Sitawuphindze sicoce nangekutsi labo lesebanesikhatsi lesidze bakhonta Nkulunkulu yini labangayenta kute bangaphindzi babugcoke lobuntfu lobudzala. Tibaluleke ngani letikhumbuto? Lokubuhlungu kutsi labanye lebebakhonta Jehova abasanaki futsi sebabuyele emikhubeni yabo yakadzeni. Ngako-ke, sonkhe kufanele sisinake leseluleko lesitsi: “Loyo locabanga kutsi umile akacaphele angawi.”​—1 Khor. 10:12.

 5. (a) Fanekisa kutsi kungani kufanele sisheshe sibukhumule buntfu lobudzala. (Buka sitfombe lesisekucaleni kwalesihloko.) (b) Ngekwaloko lokushiwo ngu-Kholose 3:5-9, ngumiphi imikhuba lehlobene nebuntfu lobudzala?

⁵ Yini longayenta nangabe imphahla yakho ingangcola, mhlawumbe ize inuke? Ungayikhumula masinyane. Ngendlela lefananako, kufanele siwulalele ngekushesha umyalo lotsi asiyiyekele imikhuba lengamjabulisi Nkulunkulu. Sifuna kusilalela sicondziso saPawula lebekasibhekisele kulamanye emaKhristu nakatsi: “Kufanele nikulahle konkhe loku.” Asesicoce ngalemibili yemikhuba lemibi Pawula lakhuluma ngayo​—bundlundlulu kanye nekungcola.—​Fundza Kholose 3:5-9.

6, 7. (a) Emavi aPawula akhombisa njani kutsi kudzingeka umetamo kute sikhumule buntfu lobudzala? (b) Bekaphila luhlobo luni lwemphilo Sakura, futsi yini leyamsita kutsi ayekele lendlela lebekaphila ngayo?

⁶ Bundlundlulu. LiBhayibheli nalichaza “bundlundlulu” libuhlobanisa nekutiphatsa kabi ngekwelicansi lokwentiwa bantfu lababili labangakatsatsani kanye netitabani. Pawula watjela emaKhristu kutsi ‘abulale emalunga emitimba’ yawo​—lokusho kususa tonkhe tifiso letihlobene ‘nebundlundlulu.’ Emavi aPawula aveta kutsi kufanele sisuse tonkhe tifiso letinemandla tekufuna kwenta lokubi. Nasilwa kamatima kute sisuse letifiso letimbi, sitawuncoba.

⁷ Cabanga ngaloko lokwenteka kuSakuraa waseJapan. Nakasakhula, bekativa anesitunge futsi angajabuli. Kusukela nakaneminyaka lengu-15 budzala, wacala kutiphatsa kabi ngekwelicansi nebantfu labahlukahlukene etama nje kucedza lesitunge. Ativa anemahloni, watsi: “Loku kwangenta ngakhipha sisu emahlandla lamatsatfu.” Nakachaza loku, utsi: “Ekucaleni bengijabula nangitiphatsa kabi nebantfu labehlukahlukene, ngobe bengicabanga kutsi ngibalulekile futsi ngiyatsandvwa. Kodvwa nangichubeka ngitiphatsa kabi nalabantfu, injabulo yami beyiphela kancane kancane.” Sakura wachubeka aphila ngalendlela waze waba neminyaka lengu-23 budzala. Wabese ucala kufundza liBhayibheli naBoFakazi. Sakura wakujabulela loko lebekakufundza, futsi Jehova wamsita waba nanembeza lohlobile waphindze wayekela nekutiphatsa kabi ngekwelicansi. Nyalo Sakura ulihlahlandlela lelivamile futsi sewute situnge. Kunaloko, utsi: “Nyalo ngijabulela kuba nebuhlobo lobuhle naJehova onkhe malanga.”

 8. Ngumiphi imikhuba lengasenta sibukeke sibantfu labangcolile kuJehova?

⁸ Kungcola. Ligama leliseBhayibhelini lelitsi “kungcola” lisho lokungetulu nje kwekutiphatsa lokubi ngekwelicansi. Lingasho umkhuba loyingoti wekubhema nobe emahlaya langcolile. (2 Khor. 7:1; Ef. 5:3, 4) Lingaphindze lisho imikhuba lengcolile leyentiwa ngumuntfu ayedvwana, njengekufundza tincwadzi letivusa inkhanuko nobe kubukela titfombe letikhombisa kungcola, letingamenta agcine sekashaya indlwabu, lokungumkhuba longcolile.​—Khol. 3:5.b

 9. Kuba namiphi imiphumela nangabe umuntfu ‘sekanenkhanuko’ lengalawuleki?

⁹ Labo labanemkhuba wekubukela titfombe letikhombisa kungcola bangagcine ‘sebanekhanuko’ lengalawuleki, lokungabenta bakutsandze kakhulu kuya ecansini. Lucwaningo luvete kutsi bantfu labangasakhoni kuyekela kubukela titfombe letikhombisa kungcola, bayafanana nebantfu labangasakhoni kuyekela tjwala kanye netidzakamiva. Akumangalisi-ke kutsi kubukela titfombe letikhombisa kungcola kunemiphumela lebuhlungu​—lenjengekutiva utenyanya, nekungasakhoni kukhicita kahle emsebentini, umndeni longajabuli, sehlukaniso kanye nekutibulala. Ngemuva kwemnyaka lenye indvodza iyekele lomkhuba wekubuka titfombe letikhombisa kungcola, yatsi: “Nyalo sengitiva ngiyindvodza lehloniphekile.”

10. Ribeiro wawuncoba njani umkhuba wekubukela titfombe letikhombisa kungcola?

¹⁰ Labanyenti solo balwisana nekuyekela kubukela titfombe letikhombisa kungcola. Nobe kunjalo, loko lokwenteka kuRibeiro waseBrazil, kukhombisa kutsi lomkhuba uyancobeka. Ribeiro wahamba ekhaya nakasesigabeni sekutfomba futsi ngekuhamba kwesikhatsi wasebenta enkapaneni legaya kabusha emaphepha, lapho wafike waba nematfuba lamanyenti ekufundza titfombe letikhombisa kungcola. Nakachaza utsi: “Kancane kancane ngagcina sengikutsandza kubuka letitfombe. Lomkhuba wangingena kangangekutsi bese ngihlala ngigadze ematfuba ekutsi singani sami lebengihlala naso, singishiye ngendvwana endlini kute ngitobukela kahle ema-video latjengisa titfombe letingcolile.” Ngalelinye lilanga asemsebentini, Ribeiro watsi ubuka umbhukudvu wetincwadzi lebetitawugaywa, wabona lenye incwadzi lebeyinesihloko lesitsi Indlela Yekutfola Injabulo Emndenini. Wayitsatsa wayifundza. Loko lakufundza kwamenta waba nesifiso sekufundza liBhayibheli naboFakazi BaJehova, kodvwa kwaba lukhuni kutsi ayekele kubukela letitfombe letingcolile. Yini leyamsita? Utsi: “Kuthantaza, nekutadisha liBhayibheli kanye nekuzindla ngaloko lebengikufundza, kwakhulisa indlela lengimtsandza ngayo Jehova kwendlula indlela lebengitsandza ngayo kubukela titfombe letikhombisa kungcola.” Asitwa liVi laNkulunkulu kanye nemoya longcwele, Ribeiro wabukhumula buntfu lobudzala, wabhajatiswa futsi nyalo sewungulomdzala welibandla.

11. Yini umuntfu lokufanele ayente kute ayekele kubukela titfombe letikhombisa kungcola?

¹¹ Naka kutsi Ribeiro bekufanele ente lokungetulu nje kwekumane atadishe liBhayibheli kute aphumelele kuloko bekalwisana nako. Kwadzingeka kutsi atinike sikhatsi sekuzindla ngaloko bekakufundza eBhayibhelini kute kumtsintse inhlitiyo. Ngekuthantaza kanye nekuzindla, kwenta kutsi lutsandvo lwakhe ngaNkulunkulu lukhule kwengca lolo bekanalo ngetitfombe letikhombisa kungcola. Kumtsandza kakhulu Jehova kanye nekutondza lokubi kuyindlela lekahle lengakusita kutsi uyekele kubuka titfombe letikhombisa kungcola.​—Fundza Tihlabelelo 97:10.

12. Yini leyasita Stephen kutsi ayekele kuhlala atfukutsele kanye nekukhuluma emavi lahlabako?

¹² Bantfu labasheshe batfukutsele bavamise kuveta indlela labatfukutsele ngayo ngekutsi bakhulume emavi lalimatako. Emavi lanje akakuletsi kujabula emndenini. Lomunye babe longuStephen, wase-Australia utsi: “Bengivamise kusho emagama lalimatako futsi ngihlale ngitfukutseliswa tintfo letincane. Mine nemfati wami sahlala ngekwehlukana emahlandla lamatsatfu futsi bese sihlela kuwucedza umshado wetfu.” Basengakehlukanisi, laba labashadene bacala kufundza liBhayibheli naboFakazi. Kwentekani kuStephen nakacala kusebentisa loko bekakufundza eBhayibhelini? Utsi: “Imphilo emndenini wetfu yashintja. Ngekusitwa nguJehova, nyalo senginekuthula kantsi ekucaleni bengihlale ngitfukutsele futsi ngigadze longahle angitsintse.” Nyalo, Stephen uyinceku lesebentako ebandleni futsi umfati wakhe sewuneminyaka alihlahlandlela lelivamile. Emadvodza lamadzala elibandla Stephen lakulo, nakamchaza atsi: “Stephen ngumuntfu lobindzile, umzalwane lotikhandlako emsebentini futsi utfobekile.” Abakhumbuli ngisho nalinye lilanga bambona atfukutsele. Utidvumisa yena yini Stephen ngaloko labazalwane labakushoko ngaye? Naku lakushoko: “Bengingeke ngititfole letibusiso kube angizange ngivumele Jehova angisite kutsi ngishintje indlela lebengiphila ngayo.”

13. Kuyingoti ngani kutfukutsela futsi litsini liBhayibheli ngako?

¹³ Ngetizatfu letinhle, liBhayibheli liyasecwayisa ngekutfukutsela, nenkhulumo lehlabako kanye nekutsetsa. (Ef. 4:31) Lokubuhlungu kutsi tento letinjena tigcine tisenta bantfu labanebudlova. Bantfu labakulelive bangase bacabange kutsi kutfukutsela kuyintfo levamile nalengasho lutfo, kodvwa loku kuhlambalata uMdali wetfu. Labanyenti kwadzingeka kutsi bashintje buntfu babo lobudzala ngaphambi kwekutsi bembatse buntfu lobusha.​—Fundza Tihlabelelo 37:8-11.

14. Kungenteka yini vele kutsi umuntfu lobekasidlova agcine sekatfobekile?

¹⁴ Cabanga ngesibonelo saHans longulomdzala ebandleni lase-Austria. Umchumanisi welibandla Hans lakulo utsi: “Hans ngumzalwane lotfobekile nalonemusa longafisa kuba naye.” Nobe kunjalo, Hans akatalwanga atfobekile. Ngesikhatsi aseminyakeni yekutfomba, wacala kunatsa kakhulu tjwala futsi loku kwamenta waba sidlova. Ngalelinye lilanga, adzakwe kakhulu, wabulala intfombi yakhe futsi wagwetjwa iminyaka lengu-20 ejele. Imphilo yasejele ayizange ibushintje buntfu bakhe bekuba sidlova. Ngekuhamba kwesikhatsi make wakhe, wacela lomdzala welibandla kutsi avakashele lendvodzana yakhe kute afundze nayo liBhayibheli. Hans utsi: “Bekulikhuni kukhumula buntfu bami lobudzala. Ngakhutsatwa ngumbhalo wa-Isaya 55:7, lotsi: ‘Lomubi akayiyekele indlela yakhe lembi,’ kanye nembhalo wa-1 Khorinte 6:11, lokhuluma ngalabo labayekele imikhuba yabo lemibi, lotsi: ‘Nanobe kunjalo, nguloko labanye benu lebebangiko.’ Kwaphela iminyaka leminyenti Jehova angisita kutsi ngikhumule buntfu lobudzala.” Ngemuva kwekudvonsa iminyaka lengu-17 nehhafu ejele, Hans waphuma sekangumKhristu lobhajatisiwe. Utsi: “Ngimbonga kakhulu Jehova ngemusa wakhe lomkhulu kanye nekungitsetselela kwakhe.”

15. Ngumuphi umkhuba lovamile, futsi liBhayibheli litsini ngawo?

¹⁵ Ngaphandle kwenkhulumo lehlabako, kucamba emanga nako kubuntfu lobudzala. Cabanga nje nganaku, kuyintfo levamile kutsi bantfu bacale emanga nakufanele babhadale umtselo nobe bacale emanga kute bativikele nakufanele babhekane nemphumela wekona kwabo. Ngalokwehlukile kuloku, Jehova “unguNkulunkulu lowetsembekile.” (Hla. 31:5) Ngako-ke, utsi etincekwini takhe “nguloyo naloyo akakhulume liciniso kumakhelwane wakhe” futsi “ningakhulumi emanga.” (Ef. 4:25; Khol. 3:9) Ngako kufanele sikhulume liciniso ngisho nome singativa sihlazeka nobe kulukhuni kwenta kanjalo.​—Taga 6:16-19.

16. Yini lengasenta siphumelele nasikhumula buntfu lobudzala?

¹⁶ Kukhumula buntfu lobudzala yintfo lengeke sikhone kuyenta ngemandla etfu. Bantfu lesikhulume ngabo kulesihloko​—lokunguSakura, Ribeiro, Stephen, naHans—​kwadzingeka kutsi balwe kamatima kute bayekele imikhuba yabo lemibi. Bancoba ngesizatfu sekutsi bavumela emandla eliVi laNkulunkulu kanye nemoya longcwele kutsi kubasite. (Luk. 11:13; Heb. 4:12) Kute natsi lamandla asisite kufanele silifundze onkhe malanga liBhayibheli, sizindle ngaloko lesikufundzako futsi sithantaze ngaso sonkhe sikhatsi kute sitfole kuhlakanipha kanye nemandla ekusebentisa timiso letiseBhayibhelini. (Josh. 1:8; Hla. 119:97; 1 Thes. 5:17) LiVi laNkulunkulu kanye nemoya longcwele kuphindze kusisite nasilungiselela imihlangano yelibandla nalapho siya kuyo. (Heb. 10:24, 25) Ngetulu kwaloko, kufanele sitisebentise kahle tonkhe tindlela lesitfola ngato imfudvo levela kuNkulunkulu leyentelwe bantfu bakhe labasemhlabeni wonkhe.​—Luk. 12:42.

17. Sitawucoca ngani esihlokweni lesilandzelako?

¹⁷ Sicoce ngemikhuba leminyenti lemibi emaKhristu lekufanele ayikhumule futsi ayilahle. Kodvwa ngabe nguloko kuphela yini lokufanele sikwente kute semukelwe nguNkulunkulu? Cha. Kufanele siphindze sigcoke buntfu lobusha. Esihlokweni lesilandzelako sitawucoca ngetintfo letinyentana tebuntfu lobusha lokufanele sihlale sibugcokile.