Umndeni Wakho Ungajabula

1, 2. Yini Jehova layifisako ngemindeni?

JEHOVA NKULUNKULU wenta umshado wekucala emhlabeni. LiBhayibheli lisitjela kutsi wadala umuntfu wesifazane “wase umyisa endvodzeni.” Adamu wajabula kakhulu waze watsi: “Lona-ke sewulitsambo lematsambo ami, nenyama yenyama yami.” (Genesisi 2:22, 23) Loko kusitjela kutsi Jehova ufuna kutsi bantfu labashadile bajabule.

² Lokubuhlungu kutsi bantfu labanyenti abati kutsi kunjani kuba semndenini lojabulako. Kodvwa liBhayibheli linetimiso letingasita bonkhe emndenini kutsi bente umndeni wabo uphumelele futsi bahlale ndzawonye bajabulile.​—Lukha 11:28.

3, 4. (a) Indvodza kufanele imphatse njani umfati wayo? (b) Kubaluleke ngani kutsi indvodza nemfati bacolelane?

³ LiBhayibheli litsi indvodza sibili kufanele itsandze umfati wayo iphindze imhloniphe. Sicela ufundze Efesu 5:25-29. Ngaso sonkhe sikhatsi indvodza itamphatsa kahle umfati wayo. Itamvikela, imnakekele futsi ngeke yente tintfo letitomvisa buhlungu.

⁴ Indvodza kufanele yente njani nangabe umfati wayo enta emaphutsa? Emadvodza atjelwa kutsi: “Chubekani nitsandza bafati benu futsi ningabatfukutseleli kakhulu.” (Kholose 3:19) Madvodza, khumbulani kutsi nani niyawenta emaphutsa. Nawufuna Nkulunkulu akucolele, nawe kufanele umcolele umfati wakho. (Matewu 6:12, 14, 15) Nangabe indvodza nemfati batimisele kucolelana, loko kungabasita kutsi bajabule emshadweni.

 5. Kubaluleke ngani kutsi indvodza imhloniphe umfati wayo?

⁵ Jehova ufuna kutsi emadvodza abahloniphe bafati bawo. Indvodza kufanele ikunakisise lokudzingwa ngumfati wayo. Loku kubaluleke kakhulu. Nangabe indvodza ingamphatsi kahle umfati wayo, Jehova ngeke ayilalele imithantazo yayo. (1 Phetro 3:7) Lokwenta bantfu babe ligugu kuJehova kutsi bayamtsandza. Bonkhe bantfu bayafana kuye, akatsatsi emadvodza njengalancono kunebafati.

 6. Kusho kutsini kutsi indvodza nemfati ‘banyamanye’?

⁶ Jesu wachaza kutsi indvodza nemfati “abasesibabili, kodvwa sebanyamanye.” (Matewu 19:6) Nguloyo kufanele atinikele kulomunye futsi kufanele bahlale betsembekile. (Taga 5:15-21; Hebheru 13:4) Umfati nendvodza kufanele benetisane nabaya ecasini. (1 Khorinte 7:3-5) Indvodza kufanele ihlale ikhumbula kutsi “kute umuntfu lowake watondza umtimba wakhe, kodvwa uyawondla aphindze awunakekele.” Ngako kufanele imtsandze futsi imnakekele umfati wayo. Ngetulu kwako konkhe, umfati ufuna indvodza yakhe ibe nemusa futsi imtsandze.​—Efesu 5:29.

 7. Yini leyenta umndeni udzinge umuntfu loyinhloko?

⁷ Wonkhe umndeni uyamdzinga umuntfu lotawuba yinhloko, loko kusita labasemndenini kutsi basebente kahle ndzawonye. Ku-1 Khorinte 11:3 liBhayibheli litsi: “Inhloko yawo onkhe emadvodza nguKhristu; inhloko yemfati yindvodza; nenhloko yaKhristu nguNkulunkulu.”

 8. Umfati angakhombisa njani kutsi uyihlonipha kakhulu indvodza yakhe?

⁸ Onkhe emadvodza ayawenta emaphutsa. Kodvwa nangabe umfati asekela tincumo letentiwa yindvodza yakhe futsi abambisane nayo, umndeni wonkhe uyajabula. (1 Phetro 3:1-6) LiBhayibheli litsi: “Nemfati kufanele abe nenhlonipho lenkhulu ngendvodza yakhe.” (Efesu 5:33) Kutsiwani nangabe indvodza ingakholwa, kukholwa umfati wayo kuphela? Kufanele achubeke ayihlonipha. LiBhayibheli litsi: “Nine bafati titfobeni emadvodzeni enu, kuze kutsi nangabe lamanye kuwo angalilaleli livi, azuzwe ngaphandle kwemavi ngekutiphatsa kwebafati bawo, ngenca yekutsi atibonele wona kutiphatsa kwenu lokumsulwa nenhlonipho yenu lenkhulu.” (1 Phetro 3:1, 2) Sibonelo lesihle semfati, singenta indvodza ikuhloniphe lakukholelwako.

 9. (a) Yini lokufanele umfati ayente nakangavumelani nendvodza yakhe? (b) UmBhalo waThithusi 2:4, 5 ubayala utsini bafati?

⁹ Yini lengentiwa ngumfati nakangavumelani nendvodza yakhe? Kufanele asho umbono wakhe ngenhlonipho. Sibonelo saloko kutsi ngalesikhatsi Sara asho intfo Abrahama labekangavumelani nayo, Jehova watsi kuye: “Kwente njengobe akutjelile.” (Genesisi 21:9-12) Akukavami kutsi tincumo tendvodza lengumKhristu tingahambisani nalokushiwo liBhayibheli, ngako-ke umfati wayo kufanele ayisekele. (Imisebenti 5:29; Efesu 5:24) Umfati sibili uyawunakekela umndeni wakhe. (Fundza Thithusi 2:4, 5.) Loko kwenta kutsi indvodza yakhe kanye nebantfwana bamtsandze kakhulu futsi bamhloniphe nababona indlela lasebenta ngayo kamatima.​—Taga 31:10, 28.

10. Litsini liBhayibheli ngekwehlukana nangedivosi?

¹⁰ Ngaletinye tikhatsi labashadile basheshe bakhetse kwehlukana noma kudivosa. Nanobe kunjalo, liBhayibheli litsi: “Umfati angehlukani nendvodza yakhe .  .  . nendvodza ingamlahli umfati wayo.” (1 Khorinte 7:10, 11) Kuyenteka kube netimo letimatima letingenta labashadile behlukane, kepha loku akusiyo nje intfo lekumelwe itsatfwe kalula. Kutsiwani ngedivosi? LiBhayibheli liveta kutsi kuphela kwesizatfu lesivumelekile lesingenta bantfu badivose kutsi lomunye wabo aye ecansini nalangakashadi naye.​—Matewu 19:9.

11. Yini ledzingwa bantfwana ngetulu kwako konkhe?

¹¹ Batali, sebentisani sikhatsi lesinyenti nikanye nebantfwana benu. Bantfwana benu bayanidzinga, ngetulu kwako konkhe badzinga kutsi nibafundzise ngaJehova.​—Dutheronomi 6:4-9.

12. Yini batali lokufanele bayente kute bavikele bantfwababo?

¹² Lelive laSathane liyachubeka nekuba libi kakhulu, labanye bantfu sebayingoti ngisho nasebantfwaneni, kangangekutsi baze babahlukumete ngekwelicasi. Labanye batali bakutfola kumatima kukhuluma ngetindzaba telicansi nebantfwababo. Kepha batali kufanele babafundzise bantfwana babo ngebantfu labayingoti nangendlela labangativikela ngayo kubo. Batali, bavikeleni bantfwana benu.a​—1 Phetro 5:8.

13. Batali kufanele babafundzise njani bantfwana babo?

¹³ Ngumsebenti webatali kufundzisa bantfwana babo indlela yekutiphatsa. Ungabafundzisa njani bantfwana bakho? Ungabafundzisa ngekutsi ubaceceshe kepha nawukwenta loko ungabatsetsisi futsi ungabi neludlame. (Jeremiya 30:11) Ungacali ubajezise bantfwana bakho nawukwatile. Awufisi kutsi emagama lowashoko ‘ahlabe njengesikhali,’ futsi abalimate. (Taga 12:18) Fundzisa bantfwana bakho kutsi kubaluleke ngani kulalela.​—Efesu 6:4; Hebheru 12:9-11; Fundza liphuzu 30 ngephasi kwesihloko lesitsi Imininingwane Lesekugcineni.

14, 15. Kubaluleke ngani kutsi bantfwana balalele batali babo?

¹⁴ Jesu bekamlalela Babe wakhe ngaso sonkhe sikhatsi ngisho nobe kwakuhle kuba lukhuni kwenta njalo. (Lukha 22:42; Johane 8:28, 29) Jehova ufuna kutsi bantfwana babalalele batali babo.​—Efesu 6:1-3.

¹⁵ Bantfwana, khumbulani kutsi Jehova nebatali benu bayajabula nanilalela, ngisho noma ngaletinye tikhatsi kulukhuni kwenta njalo.b​—Taga 1:8; 6:20; 23:22-25.

16. (a) Yini Sathane layentako kute alingele bantfu labasebasha kutsi bente tintfo letimbi? (b) Kubaluleke ngani kukhetsa bangani labatsandza Jehova?

¹⁶ Develi angakulinga kutsi wente tintfo letimbi asebentisa bangani bakho kanye nalabanye labasebasha. Wati kahle kamhlophe kutsi kulukhuni kungahambisani nabontsanga yakho. Sibonelo saloko kutsi Dina indvodzakati yaJakobe bekanebangani labangamtsandzi Jehova. Loku kwafaka yena kanye nemndeni wakhe etinkingeni letinyenti. (Genesisi 34:1, 2) Nangabe bangani bakho bangamtsandzi Jehova, bangakwentisa tintfo letingamjabulisi. Kwenta loko kungamvisa buhlungu Jehova, futsi kungakulimata wena kanye nemndeni wakho. (Taga 17:21, 25) Ngako-ke kubaluleke kakhulu kutsi ufune bangani labatsandza Jehova.​—1 Khorinte 15:33.

17. Nguyiphi indzima umuntfu ngamunye lanayo emndenini?

¹⁷ Umndeni uvikeleka etinkingeni letinyenti nawulalela imiyalo yaNkulunkulu. Nawuyindvodza, mtsandze kakhulu umfati wakho futsi umphatse kahle. Nawungumfati, yihloniphe futsi uyitfobele indvodza yakho, ulingise sibonelo semfati lokukhulunywa ngaye emBhalweni weTaga 31:10-31. Nawungumtali, fundzisa bantfwana bakho kutsandza Jehova. (Taga 22:6) Nawungubabe, ‘lengamele kahle likhaya lakho.’ (1 Thimothi 3:4, 5; 5:8) Bantfwana, lalelani batali benu. (Kholose 3:20) Ningakhohlwa kutsi sonkhe siyawenta emaphutsa, ngako-ke titfobe, ucolise nawonile. LiBhayibheli lisitjela tintfo letivela kuJehova letingasita bonkhe emndenini.