Kwentela Jehova Iminikelo Yenhlitiyo Yonkhe
‘Konkhe lenikwentako, kwenteni ngenhlitiyo yonkhe, kube shangatsi nentela Jehova.’—KHOL. 3:23.
1-3. (a) Kufa kwaJesu esigodvweni sekuhlushwa kusho kutsi Jehova akasayidzingi yini iminikelo? Chaza. (b) Ngumuphi umbuto lophakamako mayelana nekwenta iminikelo lamuhla?
NGELIKHULU LEKUCALA leminyaka, Jehova wembulela bantfu bakhe kutsi umhlatjelo wesihlengo waJesu besewucedze uMtsetfo waMosi. (Khol. 2:13, 14) Yonkhe iminikelo yekushiswa lebeyentiwa ngemaJuda iminyaka leminyenti bese ingasadzingeki, futsi seyite kubaluleka. UMtsetfo waMosi besewuyifezile indzima yawo yekuba ‘ngumcondzisi wetfu wekusiyisa kuKhristu.’—Gal. 3:24.
2 Loko akusho kutsi emaKhristu awasanendzaba neminikelo. Ngalokuphambene naloko, umphostoli Pawula wakhuluma ngesidzingo ‘sekunikela imihlatjelo yakamoya, leyemukelekako kuNkulunkulu ngaJesu Khristu.’ (1 Phet. 2:5) Ngetulu kwaloko, lomphostoli wakucacisa kutsi imphilo yemKhristu lotinikele—lokusho kuphila kwakhe konkhe—ingachazwa ngalokufanele kutsi ‘ingumnikelo.’—Rom. 12:1.
3 Ngako-ke, umKhristu wenta iminikelo kuJehova ngekutsi anikele ngalokutsite kuye, nobe alahlekelwe tintfo letitsite ngesizatfu saNkulunkulu. Njengobe sikucondza kahle loko lobekulindzelwe nguNkulunkulu kuma-Israyeli, singaciniseka njani kutsi yonkhe iminikelo lesiyentako lamuhla iyemukeleka kuJehova?
EKUPHILENI KWAMALANGA ONKHE
4. Yini lokufanele siyikhumbule ngemisebenti lesiyenta malanga onkhe?
4 Ekuphileni kwetfu kwamalanga onkhe, kungase kube lukhuni kuhlobanisa imisebenti lesiyentako kanye nekwenta iminikelo kuJehova. Imisebenti yasekhaya, umsebenti wesikolwa, umsebenti wekutiphilisa, kutsenga etitolo kanye nalokunye, kungase kubonakale kungahlangani nebuhlobo betfu naJehova. Nanobe kunjalo, nangabe unikele imphilo yakho kuJehova nobe unelitsemba lekwenta njalo esikhatsini lesitako, kubalulekile kunaka indlela lowenta ngayo imisebenti letsite. SingemaKhristu ngaso sonkhe sikhatsi. Kudzingeka sisebentise timiso temiBhalo kuto tonkhe tincenye tekuphila kwetfu. Ngesizatfu saloko, Pawula watsi: ‘Konkhe lenikwentako, kwenteni ngenhlitiyo yonkhe, kube shangatsi nentela Jehova hhayi bantfu.’—Fundza Kholose 3:18-24.
5, 6. Yini lokufanele itsintse indlela lesitiphatsa ngayo kanye nalesigcoka ngayo malanga onkhe?
5 Kuphila kwemKhristu kwamalanga onkhe akusiyo incenye yemisebenti lengcwele. Nanobe kunjalo, emaciniso ekutsi Pawula usikhutsata kutsi sisebente ‘ngenhlitiyo yonkhe, kube shengatsi sentela Jehova,’ asenta sicabange ngendlela lesiphila ngayo. Ngako-ke, singasisebentisa njani lesimiso ekuphileni kwetfu? Indlela lesitiphatsa ngayo kanye nalesigcoka ngayo, iyafaneleka yini ngato tonkhe tikhatsi? Nangabe senta imisebenti yamalanga onkhe, sitiva sinemahloni yini kutichaza kulabanye kutsi siboFakazi BaJehova, ngesizatfu sendlela lesitiphatsa ngayo nobe lesigcoke ngayo? Asifisi kwenta kanjalo! Bantfu baJehova abafisi kwenta nobe ngabe yini lengalimelela kabi libito laNkulunkulu.—Isa. 43:10; 2 Khor. 6:3, 4, 9.
6 Ase sihlole indlela sifiso sekusebenta ‘ngenhlitiyo yonkhe’ lesingatitsintsa ngayo tici letehlukehlukene tekuphila kwetfu. Njengobe senta njalo, kufanele sikhumbule kutsi yonkhe iminikelo lebeyentiwa ngema-Israyeli kuJehova bekufanele ibe ngulencono kakhulu kuloko labewanako.—Eks. 23:19.
INDLELA LOTSINTSEKA NGAYO
7. Kuhlanganisani kutinikela kwebuKhristu?
7 Ngesikhatsi utinikela kuJehova, kufanele kutsi wenta leso sincumo ngaphandle kwekutigodla. Ngalamanye emagama, bewusho kutsi kuto tonkhe tici tekuphila kwakho, Jehova utawuta kucala kuto. (Fundza Hebheru 10:7.) Leso bekusincumo lesihle kakhulu. Akukho kungabata kutsi sewutibonele ngewakho kutsi nawufuna sicondziso saJehova endzabeni letsite, futsi wetama kusebentisa loko lakushoko, kuba nemiphumela lejabulisa kakhulu. (Isa. 48:17, 18) Bantfu baNkulunkulu bangcwele futsi bayajabula, ngesizatfu sekutsi baveta timfanelo taLoyo lobafundzisako.—Lev. 11:44; 1 Thim. 1:11.
8. Kusisita ngani kwati kutsi Jehova bekatsatsa iminikelo lebeyentiwa endvulo njengalengcwele?
8 Iminikelo lebeyentiwa ngema-Israyeli kuJehova beyitsatfwa njengalengcwele. (Lev. 6:25; 7:1) Ligama lesiHebheru lelihunyushwe ngekutsi ‘ngcwele,’ lidlulisela umcondvo wekubekela eceleni, kwehlukaniswa nobe kwenta sento lesingcwele kuNkulunkulu. Kute iminikelo yetfu yemukeleke kuJehova, kufanele yehlukaniswe futsi ingangcoliswa kuyenga kwalelive. Akukafaneli sitsandze nobe ngabe yini etintfweni Jehova latenyanyako. (Fundza 1 Johane 2:15-17.) Loku kusho kutsi kumelwe sibalekele kutihlanganisa nebantfu nobe tintfo letitasingcolisa emehlweni aNkulunkulu. (Isa. 2:4; Semb. 18:4) Kuphindze kusho kutsi akukafaneli sivumele emehlo etfu abuke tintfo letingcolile nobe sivumele tingcondvo tetfu kutsi ticabange ngetintfo letinjalo.—Khol. 3:5, 6.
9. Ibaluleke kangakanani indlela lesibaphatsa ngayo labanye bantfu, futsi kungani kunjalo?
9 Pawula wakhutsata emakholwa lakanye nawo watsi: “Ningakuyekeli kwenta lokuhle nekuhlephulelana loko leninako, ngobe iminikelo lenjalo iyamtfokotisa Nkulunkulu.” (Heb. 13:16) Kuba ngumuntfu lokahle kanye nekwentela labanye lokuhle, kuyintfo Jehova layitsatsa njengemnikelo lowemukelekako kuye. Kutsandza labanye kuluphawu lolwehlukanisa emaKhristu eliciniso kulabangasiwo.—Joh. 13:34, 35; Khol. 1:10.
KWENTA IMINIKELO EKUKHONTENI KWAKHO
10, 11. Jehova uwubheka njani umsebenti wetfu wekushumayela kanye nekumkhonta, futsi loko kumelwe kusitsintse njani?
10 Lenye yetindlela lesiyisebentisako njengemaKhristu kute sente lokuhle kulabanye, ‘kuvuma litsemba letfu.’ Uwasebentisa onkhe yini ematfuba kute ufakaze kulabanye? Pawula wachaza lomsebenti lobalulekile wemaKhristu ngekutsi ‘ngumnikelo wekudvumisa wayo yonkhe imilomo levuma libito [laNkulunkulu].’ (Heb. 10:23; 13:15; Hos. 14:2) Kungaba lusito kucabanga ngekutsi singakanani sikhatsi lesisisebentisa ekushumayeleni tindzaba letinhle, nekutsi singalitfutfukisa njani lizinga letfu lekushumayela. Tinkhulumo letinyenti teMhlangano Wemsebenti tiyasisita kutsi sifeze loko. Nanobe kunjalo, njengobe umsebenti wetfu wekushumayela kanye nekufakaza kubantfu singakahleli ‘kungumnikelo wekudvumisa,’ futsi kuyincenye yekukhonta kwetfu, leyo minikelo kufanele ibe ngulokuncono kakhulu lesingakunikela. Nanobe timo lesikuto tingafanani, sikhatsi lesisisebentisa ekumemeteleni tindzaba letinhle siyinkhomba yekutsi siyatijabulela tintfo takamoya.
11 EmaKhristu avame kucitsa sikhatsi sawo akhonta Nkulunkulu asemakhaya nobe emabandleni. Jehova ulindzele kutsi sente njalo. Kuliciniso kutsi asisekho ngaphansi kwemtsetfo weliSabatha, futsi akukalindzeleki kutsi siye emikhosini yaseJerusalema lebeyigujwa minyaka yonkhe. Nanobe kunjalo, leyo mikhosi inekufana lokutsite nemphilo yebuKhristu. Nkulunkulu solo usalindzele kutsi siyekele kwenta imisebenti lengasho lutfo futsi sitadishe liVi lakhe, sithandaze siphindze siye emihlanganweni yebuKhristu. Tinhloko temindeni tiyahola kute tichube kukhonta kwemndeni tikanye nemalunga emindeni yawo. (1 Thes. 5:17; Heb. 10:24, 25) Endzabeni yemisebenti lesiyentela Nkulunkulu, senta kahle kutibuta kutsi: ‘Kufanele ngisitfutfukise yini sikhatsi lengisisebentisela kumkhonta?’
12. (a) Umnikelo wemphepho lobewentiwa endvulo ungafananiswa nani lamuhla? (b) Lokucatsanisa kufanele kuyitsintse njani imithandazo yetfu?
12 INkhosi Davide yahlabela kuJehova yatsi: “Shangatsi umthandazo wami ungaba njengemphepho kuwe.” (Hla. 141:2) Asewucabange kafishane ngemithandazo yakho—kutsi uthandaza kangakhi kanye nekutsi uthandaza ngani. Incwadzi yeSembulo ifananisa ‘imithandazo yalabangcwele’ nemphepho, ngobe imithandazo leyemukelekako kuJehova yenyukela kuye njengeliphunga lelimnandzi kanye nalelijabulisako. (Semb. 5:8) Ka-Israyeli wasendvulo, imphepho lebeyinikelwa njalo elatini laJehova, bekufanele inikelwe kahle nangekucophelela lokukhulu. Lemphepho beyemukeleka kuJehova kuphela nangabe inikelwe ngekuvumelana neticondziso takhe. (Eks. 30:34-37; Lev. 10:1, 2) Nangabe imithandazo yetfu lesuka enhlitiyweni siyenta ngendlela lefananako, singaciniseka kutsi iyemukeleka kuJehova.
KUPHA KANYE NEKWEMUKELA
13, 14. (a) Yini leyentiwa ngu-Ephafrodithu kanye nelibandla laseFiliphi kuPawula, futsi lomphostoli wativa njani ngaloko? (b) Singasilingisa njani sibonelo sa-Ephafrodithu kanye nesebazalwane baseFiliphi?
13 Ngisho nobe ingakanani, imali lesinikela ngayo kute sisekele umsebenti wemhlaba wonkhe ingafananiswa nemhlatjelo. (Mak. 12:41-44) Ngelikhulu lekucala leminyaka, libandla laseFiliphi latfumela Ephafrodithu eRoma kute ayonakekela tidzingo taPawula tenyama. Lomuntfu lobekatfunywe ngemaKhristu aseFiliphi bekaphetse sipho semali, lebesibuya kulelo bandla. Bekungasiko kwekucala bazalwane baseFiliphi bapha Pawula lokutsite. Ngemusa wabo, bebafisa kukhulula Pawula etinkingeni temali kute acitse sikhatsi lesinyenti emsebentini wekushumayela. Wativa njani Pawula ngalesipho? Wasibita ngekutsi ‘ngumnikelo longemakha lamnandzi, umhlatjelo lowemukelekako nalojabulisako kuNkulunkulu.’ (Fundza Filiphi 4:15-19.) BoPawula kanye naJehova basijabulela kakhulu lesipho lesivela eFiliphi.
14 Nalamuhla, Jehova uyijabulela kakhulu iminikelo lesiyentela umsebenti wemhlaba wonkhe. Ngetulu kwaloko, wetsembisa kutsi nangabe sichubeka sibeka kucala tintfo letimayelana neMbuso ekuphileni kwetfu, utawunakekela tonkhe tidzingo tetfu, temoya netenyama.—Mat. 6:33; Luk. 6:38.
KUVETE KUBONGA KWAKHO
15. Ngutiphi letinye tintfo letikwenta umbonge Jehova?
15 Kungasitsatsa sikhatsi lesidze kubala tizatfu lesinato tekubonga Jehova. Kuliciniso kutsi malanga onkhe kufanele simbonge ngesipho sekuphila lasinikete sona. Usiniketa konkhe lesikudzingako kute sichubeke siphila—kudla, kwekugcoka, indzawo yekuhlala ngisho nemoya lesiwuphefumulako imbala. Ngetulu kwaloko, kukholwa kwetfu lokusekelwe elwatini lokungulonalona kusiniketa litsemba. Kuyafaneleka kutsi sikhonte Jehova siphindze sinikele kuye iminikelo yekudvumisa, ngesizatfu saloko langiko kanye naloko lasentele kona.—Fundza Sembulo 4:11.
16. Kufanele sisabele njani emhlatjelweni waKhristu wesihlengo?
16 Njengobe kuchaziwe esihlokweni lesendlulile, sipho lesiligugu kakhulu Nkulunkulu lasiphe bantfu, ngumhlatjelo waKhristu wesihlengo. Loku kukuvetwa kwelutsandvo lwaNkulunkulu ngendlela lehamba embili. (1 Joh. 4:10) Nguyiphi indlela lefanele lesingasabela ngayo? Pawula watsi: “Lutsandvo lwaKhristu luyasichuba. Sesidzimate sefika kunasi siphetfo sekutsi: Munye lowafela bonkhe. . . . Wabafela bonkhe, kuze kutsi bonkhe labo labafela bangabe basatiphilela, kodvwa baphilele yena lowabafela waphindze wavuselwa bona.” (2 Khor. 5:14, 15) Pawula bekasho kutsi nangabe siwubonga umusa lomkhulu waNkulunkulu, sitawusebentisa kuphila kwetfu kute sidvumise Yena kanye neNdvodzana yaKhe. Lutsandvo lwetfu kanye nekubonga lesinako ngaNkulunkulu nangaKhristu, sikukhombisa ngekumlalela kanye nangesifiso setfu sekushumayela nekwenta bafundzi.—1 Thim. 2:3, 4; 1 Joh. 5:3.
17, 18. Labanye basebentise tiphi tindlela kute bandzise umnikelo wekudvumisa labawentela Jehova? Niketa sibonelo.
17 Ungakwati yini kutfutfukisa lizinga lemnikelo wekudvumisa lowentela Nkulunkulu? Ngemuva kwekucabanga ngako konkhe lokuhle Jehova labentele kona, labanyenti bancume kutsi bahlele sikhatsi sabo kanye nekutsi batfutfukise indlela labahlanganyela ngayo emsebentini wekushumayela ngeMbuso, nobe kuleminye imisebenti yebuKhristu. Labanye bakhonile kukhonta njengemahlahlandlela lasitako inyanga leyodvwa nobe ngetulu umnyaka ngamunye, kantsi labanye bakhonile kuba ngemahlahlandlela lavamile. Labanye babe nencenye emsebentini wekwakha takhiwo teMbuso. Awuvumi yini kutsi leti tindlela letikahle tekukhombisa kubonga kwakho? Nangabe lemisebenti siyenta ngesisusa lesihle—kute sivete kubonga—iyemukeleka kuNkulunkulu.
18 EmaKhristu lamanyenti ativa akweleta Jehova, futsi loko kuwakhutsata kutsi ambonge. Sibonelo semuntfu lonjalo ngu-Morena. Bekafuna timphendvulo temibuto yakhe lemayelana naNkulunkulu esontfweni lemaKatolika, lokuyinkholo lakhulela kuyo, kanye nakufilosofi yase-Asia. Lokubuhlungu kutsi akazange atitfole timphendvulo letamenetisa. Watitfola kuphela nakacala kutadisha liBhayibheli naboFakazi BaJehova. Morena, wajabula kakhulu ngetimphendvulo letisekelwe emiBhalweni tayo yonkhe imibuto labekanayo, waphindze wabonga Jehova ngesizatfu sekutsi leto timphendvulo tacinisa kuphila kwakhe, kangangekutsi wafuna kukhombisa kubonga kwakhe ngekutsi asebentise onkhe emandla akhe emsebentini waNkulunkulu. Wacala kuba lihlahlandlela lelisitako ngemuva kwekubhajatiswa kwakhe, futsi ngemuva kwekutsi timo takhe setikahle, waba lihlahlandlela lelivamile. Sekuphele iminyaka lengu-30 solo Morena enta umsebenti wasikhatsi sonkhe.
19. Ungakhona njani kukhulisa iminikelo loyentela Jehova?
19 Kuliciniso kutsi tinyenti tinceku taJehova letetsembekile letingakhoni kukhonta njengemahlahlandlela. Ngisho nobe kungakanani lesingakwentela Jehova, sonkhe singakhona kwenta iminikelo yakamoya leyemukelekako kuye. Ngekutiphatsa kwetfu, kudzingeka sivete kutsi siyatihlonipha timiso taNkulunkulu tekulunga, futsi sikhumbule kutsi simelela Jehova ngaso sonkhe sikhatsi. Ngekukholwa, setsembela ngalokugcwele ekufezweni kwetinjongo taNkulunkulu. Ngemisebenti lemihle, siba nencenye ekusakateni tindzaba letinhle. Ngekubonga lokusuka etinhlitiyweni ngaloko Nkulunkulu lasentele kona, asichubeke senta iminikelo yenhlitiyo yonkhe kuJehova.
UNGAPHENDVULA NJANI:
․․․․․
Singamdvumisa njani Jehova ekuphileni kwetfu kwamalanga onkhe?
․․․․․
Ngumiphi iminikelo lesiyentako ekukhonteni kwetfu Nkulunkulu?
․․․․․
Singanikela njani ngemcebo wetfu kuJehova?
[Emavi lacashuniwe lasekhasini 25]
Buhle baJehova buyakubangela yini kutsi utfutfukise iminikelo yekudvumisa loyentako?
[Sitfombe ekhasini 23]
Uwasebentisa onkhe yini ematfuba kute ufakaze?