Utenta Njani Tincumo Takho?

 1. Ngutiphi letinye tetibonelo temitsetfo leseBhayibhelini, futsi kuyilalela kusizuzisa ngani?

EBHAYIBHELINI, Jehova usinikete imitsetfo lesitjela ngalokucacile kutsi ufuna senteni. Nasi sibonelo: Usitjela kutsi akukafaneli sikhonte titfombe, sebe, sidzakwe, nobe sitiphatse kabi ngekwelicansi. (1 Khorinte 6:9, 10) NeNdvodzana yaJehova lenguJesu yaniketa balandzeli bayo umyalo lotsi: “Nente bantfu bato tonkhe tive babe bafundzi bami, nibabhabhatise egameni leYise, neleNdvodzana, nelemoya longcwele, nibafundzise kugcina konkhe lenginitjele kona. Nibokwati kutsi mine nginani onkhe emalanga kute kube sekupheleni kwalelive.” (Matewu 28:19, 20) Yonkhe intfo Jehova naJesu labasitjela kutsi siyente izuzisa tsine. Imitsetfo yaJehova isifundzisa kutsi singatinakekela njani tsine nemindeni yetfu futsi isisita kutsi sibe nemphilo lencono futsi sijabule. Lokubaluleke kakhulu kutsi nasilalela imiyalo yaJehova lefaka ekhatsi kushumayela, uyajabula ngatsi futsi asibusise.

2, 3. (a) Kungani liBhayibheli lingasishayeli imitsetfo kuto tonkhe timo tekuphila? (b) Ngumiphi imibuto lesitawucoca ngayo kulesihloko? (Buka sitfombe lesisekucaleni kwalesihloko.)

² Ngesikhatsi lesifanako, liBhayibheli alisiniketi imitsetfo lemayelana nato tonkhe timo lesibhekana nato ekuphileni. Sibonelo saloku kutsi ayikho imitsetfo lecondzile letfolakala eBhayibhelini lemayelana nekutsi kufanele sigcoke ini. Loku kukhombisa kutsi Jehova uhlakaniphile. Ngisho nobe ifashini ichubeka ishintja njengobe sikhatsi sichubeka, nebantfu emhlabeni wonkhe bagcoka tinhlobo tetimphahla letehlukahlukene. LiBhayibheli lona aliphelelwa sikhatsi. Liphindze lingabi nemitsetfo lemayelana nendlela lokufanele sikhetse ngayo umsebenti nobe tekutijabulisa kanye naloko lokufanele sikwente kute sihlale sinemphilo lenhle. Jehova uvumela umuntfu ngamunye kanye netinhloko temindeni kutsi titentele letincumo.

³ Ngako nangabe sifuna kwenta sincumo lesibalulekile lesitawutsintsa kuphila kwetfu, futsi kungekho umtsetfo lokhuluma ngaso eBhayibhelini, singase sitibute: ‘Jehova unendzaba yini nalesicumo lengifuna kusitsatsa? Utawujabula yini nganome ngabe yini lengincuma kuyenta yingci nje nangabe ngingaphuli umtsetfo loseBhayibhelini? Ngingaciniseka njani kutsi titamjabulisa tincumo lengitentako?’

4, 5. Tincumo tetfu tingasitsintsa njani tsine kanye nalabanye?

⁴ Labanye bantfu bacabanga kutsi bangenta nome ngabe yini labafuna kuyenta. Kodvwa tsine sifuna kwenta loko lokujabulisa Jehova. Ngako ngaphambi kwekutsi sente sincumo, kufanele sicabange ngekutsi liBhayibheli litsini ngaloko, bese senta loko lelikushoko. Nasi sibonelo: LiBhayibheli lisitjela indlela Nkulunkulu lativa ngayo ngekusebentisa ingati, ngako silandzela loko lelikushoko. (Genesisi 9:4; Imisebenti 15:28, 29) Singathantaza kuJehova kute asisite sente tincumo letitamjabulisa.

⁵ Tincumo lesitentako tiyasitsintsa. Sincumo lesikahle singasisita sisondzelane naJehova. Sincumo lesikabi singabulimata bungani betfu naye. Tincumo tetfu tingaphindze titsintse nalabanye. Ngako asifuni kwenta nome ngabe yini letawutfukutselisa bazalwane betfu nobe yente kukholwa kwabo kube butsakatsaka. Asifuni nekubanga tinkinga emkhatsini webazalwane betfu ebandleni. Ngako kubalulekile ngatsi kwenta tincumo letikahle.​—Fundza Roma 14:19; Galathiya 6:7.

 6. Yini lengacondzisa tincumo lesitentela tona?

⁶ Singatenta njani tincumo letikahle nangabe liBhayibheli lingasitjeli ngalokucondzile kutsi senteni? Esikhundleni sekwenta loko lesicabanga kutsi kukahle, kufanele sicabangisise ngetimo lesikuto bese senta sincumo lesitawujabulisa Jehova. Ngaleyo ndlela singaciniseka kutsi utasisita sitfole imiphumela lemihle.​—Fundza Tihlabelelo 37:5.

 7. Nangabe ungekho umyalo locondzile eBhayibhelini, yini lengasisita sibone kutsi Jehova ufuna kutsi senteni kuleso simo?

⁷ Yini lengasisita sati loko lokutawujabulisa Jehova? Umbhalo wa-Efesu 5:17 uyasitjela: “Chubekani nicondza kutsi iyini intsandvo yaJehova.” Nangabe ungekho umyalo locondzile eBhayibhelini ngendzaba letsite kufanele sicondze kutsi Jehova ufuna kutsi senteni kuleso simo. Singakwenta njani loko? Kudzingeka sithantaze kuye futsi sivumele umoya wakhe longcwele kutsi usicondzise.

 8. Jesu wacondza njani kutsi Jehova ufuna enteni? Shano sibonelo.

⁸ Ngaso sonkhe sikhatsi Jesu abekucondza loko Jehova labefuna akwente. Nasi sibonelo: Ngesikhatsi sicumbi sebantfu silambile, Jesu wathantaza futsi wasipha kudla ngalokusimangaliso, kwadzimate kwaba ngemahlandla lamabili. (Matewu 14:17-20; 15:34-37) Kodvwa ngesikhatsi alambile asehlane futsi Develi afuna ashintje ematje abe sinkhwa, Jesu akazange avume. (Fundza Matewu 4:2-4.) Abemati kahle uYise, ngako bekati kutsi Jehova abengafuni kutsi asebentise umoya longcwele kute enetise tidzingo takhe. Abeciniseka kutsi uYise angamcondzisa futsi amnike kudla nakakudzinga.

9, 10. Yini letasisita kutsi sente tincumo letihlakaniphile? Shano sibonelo.

⁹ NjengaJesu, singatenta tincumo letihlakaniphile nangabe setsembela kuJehova kute asicondzise. LiBhayibheli litsi: “Tsemba Simakadze ngayo yonkhe inhlitiyo yakho, ungeyami ekwatini kwakho. Matise kuko konkhe lokwentako, yena uyakucondzisa tindlela takho. Ungatenti sihlakaniphi, yesaba Simakadze, ukuyekele lokubi.” (Taga 3:5-7) Nangabe sidadisha liBhayibheli futsi sifundza ngendlela Jehova lacabanga ngayo, sitawucondza kutsi ufuna senteni esimeni lesitsite. Njengobe sichubeka sifundza ngendlela Jehova lacabanga ngayo, kutawuba melula kutsi sente tincumo letitamjabulisa. Ngaleyo ndlela sitasinaka kakhulu sicondziso saNkulunkulu.​—Hezekeli 11:19.

¹⁰ Ase sitsi umfati loshadile usesitolo uyatsenga bese ubona ticatfulo letinhle. Kodvwa leticatfulo tiyabita. Ngisho nome indvodza yakhe ingahambi naye, uyati kutsi ingativa njani nangabe asebentisa imali lenyenti. Wati njani? Sebanesikhatsi bashadile, ngako uyati kutsi indvodza yakhe ifuna bayisebentise njani imali labanayo. Ngendlela lefanako, nasifundza ngendlela Jehova lacabanga ngayo nendlela lente ngayo esikhatsini lesendlulile, sitawati kutsi ulindzele kutsi senteni etimeni letehlukahlukene.

11. Ngumiphi imibuto lesingatibuta yona nangabe sidadisha liBhayibheli? (Hlola libhokisi lelitsi “Nangabe Udadisha LiBhayibheli, Tibute.”)

¹¹ Singati njani kutsi Jehova ucabangani? Intfo lebalulekile lesingati ngayo kutsi sifundze liBhayibheli onkhe malanga. Njengobe senta njalo, singase sitibute: ‘Loku kungifundzisani ngaJehova? Kungani ente ngalendlela kulendzaba?’ NjengaDavide natsi kufanele sicele Jehova asisite simati kancono. Davide wabhala watsi: “Ngikhombise tindlela takho, Simakadze, ungifundzise imikhondvo yakho. Ngihambise ecinisweni lakho, ungifundzise, ngobe wena unguNkulunkulu wensindziso yami. Litsemba lami likuwe lonkhe lilanga.” (Tihlabelelo 25:4, 5) Nasifundza lokutsite ngaJehova, singacabanga ngetimo lesingakusebentisa kuto loko. Singakusebentisa yini emndenini, emsebentini, esikolweni nobe nasishumayela? Nasicabanga ngesimo lesitsite, kutawuba melula kwati kutsi Jehova ufuna silusebentise kuphi lolo lwati.

12. Tincwadzi tetfu kanye nemihlangano kungasisita njani kutsi sati loko Jehova lakucabangako etimeni letihlukahlukene?

¹² Lenye indlela lesingabona ngayo kutsi Jehova ucabangani, kunakisisa loko inhlangano yakhe lesifundzisa kona lokusuka eBhayibhelini. Sibonelo saloko kutsi nakufanele sente sincumo, i-“Watch Tower Publications Index” ne-Lithulusi Lekucwaninga LaBoFakazi BaJehova kungasisita sitfole kutsi Jehova ucabangani. Singaphindze sizuze emihlanganweni yebuKhristu nasilalelisisa futsi siphendvula nalapho sizindla ngaloko lesifundziswa kona. Loku kutasisita sicabange ngendlela Jehova lacabanga ngayo. Umphumela waloko kutawuba kutsi sitawukwati kwenta tincumo letitawujabulisa Jehova futsi utasibusisa.

13. Shano sibonelo sekutsi singatenta njani tincumo letihlakaniphile nangabe sicabanga ngendlela Jehova lacabanga ngayo.

¹³ Asesihlole sibonelo sekutsi singasitsatsa njani sincumo lesihlakaniphile nasihlola indlela Jehova lacabanga ngayo. Mhlawumbe ufuna kuba lihlahlandlela. Sewulwentile lushintjo ekuphileni kwakho kute ukwati kuba nesikhatsi lesinyenti ensimini. Kodvwa usengakaciniseki kutsi utawujabula mbamba yini nasewuphila ngemali lencane futsi sewunetintfo letimbalwa. Kuliciniso kutsi liBhayibheli alisho kutsi kufanele sibe ngemahlahlandlela kute sikhonte Jehova. Singachubeka simkhonta ngekwetsembeka sibamemeteli. Kodvwa ngakulolunye luhlangotsi, Jesu utsi Jehova ubusisa labo labatidzelako ngenca yeMbuso. (Fundza Lukha 18:29, 30.) LiBhayibheli liphindze litsi Jehova uyajabula nasenta konkhe lokusemandleni etfu kute simdvumise, futsi ufuna sijabule njengobe simkhonta. (Tihlabelelo 119:108; 2 Khorinte 9:7) Nasithantaza ngaletintfo futsi sizindla ngato, singenta sincumo lesitawusebenta esimeni lesikuso nalesitawubusiswa nguJehova.

14. Ungabona njani nangabe indlela letsite yekugcoka iyamjabulisa Jehova?

¹⁴ Ase sitsi kuneluhlobo lolutsite lwetimphahla lotitsandzako, kodvwa uyati kutsi labanye ebandleni kungenteka bakhubeke nabakubona ugcoke leto timphahla. LiBhayibheli alisho lutfo ngaloluhlobo lwetimphahla. Ngako ungakwati njani loko Jehova lakucabangako kulesimo? LiBhayibheli liyasitjela: “Labasikati batihlobise ngetingubo letilungiswe kahle, ngekuzitsa nangekuvutfwa, hhayi ngetitayela temichino, ngeligolide, ngemapharele nobe ngetingubo letidule kakhulu, kodvwa abatihlobise ngendlela lefanele labasikati labatsi bahlonipha Nkulunkulu, ngemisebenti lemihle.” (1 Thimothi 2:9, 10) Kuliciniso kutsi tonkhe tinceku taJehova letifaka ekhatsi nemadvodza tingafundza lokutsite kulamavi. Nasizitsile, sisuke sicabanga ngendlela labanye lokungenteka bative ngayo ngetimphahla lesikhetsa kutigcoka. Nangenca yekutsi siyabatsandza bazalwane betfu, siyakugwema kubakhuba nobe kubacansula. (1 Khorinte 10:23, 24; Filiphi 3:17) Nangabe sicabanga ngaloko liBhayibheli lelikushoko nangendlela Jehova lacabanga ngayo, singatsatsa tincumo letitamjabulisa.

15, 16. (a) Jehova uphatseka njani nangabe sicabanga ngekutiphatsa kabi ngekwelicansi? (b) Nangabe sikhetsa kwekutijabulisa, singati njani kutsi ngukuphi lokujabulisa Jehova? (c) Singatenta njani tincumo letibalulekile?

¹⁵ EBhayibhelini sifundza kutsi Jehova uva buhlungu kakhulu nangabe bantfu benta tintfo letingakalungi futsi bacabanga tintfo letimbi. (Fundza Genesisi 6:5, 6.) Kuyacaca kutsi Jehova akafuni kutsi sitibone ngeliso lengcondvo sitiphatsa kabi ngekwelicansi. Kuliciniso kutsi nasichubeka sicabanga ngaletintfo singase sitente. Esikhundleni saloko Jehova ufuna sicabange ngetintfo letihlantekile naletilungile. Umfundzi Jakobe wabhala ngekuhlakanipha kwaJehova watsi: “Kwekucala kunako konkhe kumsulwa, futsi kunekuthula, kuyacabangela, kulungele kulalela, kugcwele umusa netitselo letinhle, akukhetsi, akutentisi.” (Jakobe 3:17) Ngako liBhayibheli lisifundzisa kutsi kufanele sikugweme kutijabulisa lokungasibangela siticabange nobe sibe nesifiso sekwenta tintfo letingcolile naletimbi. Nangabe sikucondza kahle loko Jehova lakutsandzako nalakwenyanyako, kutawuba melula ngatsi kwati kutsi ngutiphi tincwadzi, ema-movie, nobe imidlalo lesitayikhetsa. Angeke sibe khona sidzingo sekubuta labanye kutsi senteni.

¹⁶ Nangabe kunesincumo lokufanele sisitsatse, kunetindlela letehlukahlukene lesingakhetsa kuto, tonkhe letingamjabulisa Jehova. Kodvwa nangabe kufanele sente sincumo lesibaluleke kakhulu, kungaba kuhlakanipha kubuta lomdzala welibandla nobe umzalwane nobe dzadze lovutsiwe kute asinikete seluleko. (Thithusi 2:3-5; Jakobe 5:13-15) Kuliciniso kutsi angeke simcele loyo muntfu kutsi asentele sincumo. Esikhundleni saloko, sidzinga kucabangisisa ngaloko lesesivele sikwati lokuseBhayibhelini, bese sitentela sincumo. (Hebheru 5:14) Umphostoli Pawula watsi: “Nguloyo naloyo utawutetfwalela umtfwalo wakhe.”​—Galathiya 6:5.

17. Sizuza njani nangabe senta tincumo letijabulisa Jehova?

¹⁷ Nasenta tincumo letijabulisa Jehova, siyasondzelana naye futsi uyasemukela aphindze asibusise. (Jakobe 4:8) Kukholwa kwetfu kuye kuyacina. Ngako-ke asizindle ngaloko lesikufundza eBhayibhelini kute siteyicondza indlela Jehova lacabanga ngayo. Kuliciniso kutsi kutawuhlale kunalokusha lokufanele sikufundze ngaJehova. (Jobe 26:14) Nasenta konkhe lokusemandleni etfu kute sifundze ngaye nyalo, sitawuhlakanipha futsi sitawukwati kwenta tincumo letikahle. (Taga 2:1-5) Umuntfu ulala agucuka, kodvwa Jehova akashintji. Umhlabeleli watsi: “Emasu aSimakadze ayawuhlala emile kuze kube phakadze; nemicabango yakhe iyawuhlala imile kuto tonkhe titukulwane.” (Tihlabelelo 33:11) Singenta tincumo letihlakaniphile nasifundza kucabanga ngendlela Jehova lacabanga ngayo bese senta loko lokumjabulisako.