Bantfu BaJehova ‘Bayakulahla Kungalungi’

 1. Yini lenendzima lekhetsekile ekukhonteni kwetfu?

UKE walibona yini libito laJehova libhalwe esakhiweni lesivamile sesive nome entfweni letsite lebekwe emsamo? Akungabateki kutsi walinaka futsi wajabula. Ngetulu kwako konkhe, libito laNkulunkulu linendzima lekhetsekile ekukhonteni kwetfu njengobe siBoFakazi BaJehova. Emhlabeni wonkhe, kute licembu lebantfu lamuhla lelisebentisa libito laNkulunkulu njengatsi. Nanobe kunjalo, siyati kutsi lelilungelo lekubitwa ngelibito laNkulunkulu lihambisana nemtfwalo lotsite.

 2. Lilungelo letfu lekubitwa ngelibito laNkulunkulu lihambisana namuphi umtfwalo?

² Kusebentisa libito laNkulunkulu nje ngekwako akusenti semukelwe nguye. Kufanele siphile ngekuvumelana netimiso takhe tekutiphatsa. Kungaleso sizatfu liBhayibheli lisikhumbuta kutsi bantfu baJehova kufanele ‘bakhweshe kulokubi.’ (Hla. 34:14) Umphostoli Pawula wasisho ngalokucacile lesimiso nakabhala atsi: “Wonkhe umuntfu lobita libito laJehova akalahle kungalungi.” (Fundza 2 Thimothi 2:19.) Njengobe siBoFakazi, satiwa ngekubita libito laJehova. Kodvwa singakulahla njani kungalungi?

3, 4. Ngumuphi umbhalo lokhange tati teliBhayibheli iminyaka leminyenti, futsi ngani?

³ Cabanga ngengcikitsi yalamavi aPawula labhalwe ku-2 Thimothi 2:19. Lombhalo ukhuluma ‘ngesisekelo lesicinile saNkulunkulu’ bese ukhuluma ngetimemetelo letimbili letibhalwe kuso. Kuyabonakala kutsi simemetelo sekucala lesitsi: “Jehova uyabati labo lababakhe,” sicashunwe kuNumeri 16:5. (Buka sihloko lesendlulile.) Simemetelo sesibili lesitsi: “Wonkhe umuntfu lobita libito laJehova akalahle kungalungi,” sikhange tati teliBhayibheli iminyaka leminyenti. Kungani?

⁴ Emavi aPawula aveta kutsi abecaphuna kulomunye umtfombo. Kodvwa kubonakala shengatsi kute umbhalo emiBhalweni YesiHebheru lohambisana nalamavi lacashunwa nguPawula. Ngako-ke abekhuluma ngani lomphostoli nakatsi: “Wonkhe umuntfu lobita libito laJehova akalahle kungalungi”? Ngekushesha nje ngaphambi kwekusho lamavi, Pawula wacaphuna sehluko 16 saNumeri, lesilandzisa ngekuvukela kwaKhora. Kungenteka yini kutsi nalesimemetelo sesibili sihlobana naloko lokwenteka lokumayelana nalokuvukela?

5-7. Ngutiphi tintfo letenteka esikhatsini saMosi letiniketa ingcikitsi yemavi aPawula labhalwe ku-2 Thimothi 2:19? (Buka sitfombe lesisekucaleni kwalesihloko.)

⁵ LiBhayibheli litsi Dathani na-Abiramu, emadvodzana a-Eliyabe, ahlanganyela naKhora aba baholi ekuvukeleni Mosi na-Aroni. (Num. 16:1-5) Bekusebaleni kutsi abengamhloniphi Mosi futsi ala ligunya lakhe labelinikwe nguNkulunkulu. Letihlubuki tachubeka tihlala nebantfu baJehova, talimata buhlobo balabo labetsembekile kuNkulunkulu. Ngalesikhatsi lifika lilanga lekutsi Jehova ehlukanise emkhatsini wetikhonti takhe letetsembekile kanye netihlubuki, waniketa umyalo locondzile.

⁶ Lokulandzisa kutsi: “Simakadze watsi kuMosi: ‘Tjela sive sikhweshe emathendeni aboKhora, naDathani, na-Abiramu.’ Mosi wasukuma waya kuboDathani na-Abiramu, nebaholi bema-Israyeli bamlandzela. Wasiyala sonkhe sive, watsi: ‘Khweshani emathendeni aletigangi leti! Ningatsintsi lutfo etintfweni tabo, funa nani nikhukhulwe kanye netono tabo.’ Ngako sive sakhwesha emathendeni aboKhora, naDathani, na-Abiramu [kuto tonkhe tinhlangotsi, NW].” (Num. 16:23-27) Jehova wase ubabulala bonkhe labo lebebavukela. Ngakulolunye luhlangotsi, tikhonti letetsembekile letalahla kungalungi ngekutsi tikhweshe kuboKhora, tasindza.

⁷ Jehova ufundza tinhlitiyo. Uyakubona kwetsembeka kwalabo lababakhe. Nanobe kunjalo, labo labebatsembekile bekufanele batsatse tinyatselo letibalulekile, batehlukanise kubantfu labangakalungi. Ngako kungenteka kutsi Pawula abekhuluma ngendzaba lekuNumeri 16:5, 23-27 nakabhala atsi: “Wonkhe umuntfu lobita libito laJehova akalahle kungalungi.” Siphetfo lesinjengalesi besitawuhambisana nemavi aPawula latsi: “Jehova uyabati labo lababakhe.”​—2 Thim. 2:19.

 8. Kungani kungakeneli kusebentisa libito laJehova nobe kuba yincenye yelibandla lebuKhristu?

⁸ Ngekukhuluma ngaletintfo letenteka ngesikhatsi saMosi, Pawula bekakhumbuta Thimothi ngesidzingo sekutsatsa tinyatselo letibalulekile kute avikele buhlobo bakhe lobuligugu naJehova. Kuba yincenye yelibandla lebuKhristu nje kukodvwana kwakungakeneli, njengobe nje nekubita libito laJehova kwakungakeneli ngesikhatsi saMosi. Tikhonti letetsembekile kufanele titsatse tinyatselo letibalulekile kute tilahle kungalungi. Bekusho kutsini loko ngaThimothi? Ngutiphi tifundvo bantfu baJehova labangatitfola lamuhla kuleseluleko saPawula lesiphefumulelwe?

 9. “Timphikiswane letibulima naletilite” talitsintsa njani libandla lebuKhristu esikhatsini lesendlulile?

⁹ LiVi laNkulunkulu lisiniketa seluleko lesicacile mayelana netinhlobo tekungalungi emaKhristu lokufanele atilahle nobe ehlukane nato. Sibonelo saloku kutsi emavesini lasondzelene na-2 Thimothi 2:19, Pawula utjela Thimothi kutsi ‘angalwi ngemavi’ futsi ‘abalekele tinkhulumo letilite.’ (Fundza 2 Thimothi 2:14, 16, 23.) Lamanye emalunga elibandla abekhutsata timfundziso tetihlubuki. Kwaphindze kwabonakala kutsi labanye bebeta nemibono lebanga timphikiswane. Ngisho nobe lemibono kwakungasho kutsi ayikasekelwa emibhalweni ngalokucondzile, yayibangela kwehlukana. Yayivusa kuphikisana nekucabana ngemavi, lobekubangela kutsi bantfu babe bete buhlobo lobuhle naNkulunkulu. Kungako Pawula agcizelela sidzingo ‘sekubalekela timphikiswane letibulima naletilite.’

10. Kufanele sentenjani nasihlangabetana netihlubuki?

¹⁰ Lamuhla, akukavami kutsi bantfu baJehova bahlangabetane netihlubuki ebandleni. Nobe kunjalo, nasitfola timfundziso letingekho emibhalweni, ngisho nome tivela kumuphi umtfombo, kufanele sitsatse sinyatselo lesibalulekile sekutibalekela. Ngeke kube kuhlakanipha kuphikisana netihlubuki, kungaba kukhuluma nato buso nebuso, kuphendvula loko letikushoko emakhelini e-Internet nobe ngaletinye tindlela tekuchumana. Ngisho nobe sihlose kusita loyo muntfu lohlubukile, kucocisana lokunjalo kuphambene nalesicondziso semBhalo lesisandza kusihlola. Njengobe sibantfu baJehova sikubalekela ngalokuphelele kuhlubuka, futsi siyakulahla.

11. Yini lengabangela “timphikiswane letibulima,” futsi labadzala labangemaKhristu bangasibeka njani sibonelo lesihle?

¹¹ Kunaletinye tintfo ngaphandle kwekuhlubuka letingase tiphatamise kuthula kwelibandla. Nasi sibonelo: Kuba nemibono leyehlukene endzabeni yekutijabulisa kungaphumela ‘etimphikiswaneni letibulima naletilite.’ Kuliciniso kutsi nangabe lotsite akhutsata kutijabulisa lokwephula timiso taJehova tekutiphatsa, labadzala labangemaKhristu akukafaneli babeketelele kutiphatsa lokunjalo ngesizatfu sekutsi bafuna kubalekela kuphikisana. (Hla. 11:5; Ef. 5:3-5) Nobe kunjalo, labadzala kufanele bacaphele kutsi bangahlohlobeteli imibono yabo. Ngekwetsembeka banamatsela esecwayisweni semBhalo lesiniketwe babonisi labangemaKhristu, lesitsi: “Yelusani umhlambi waNkulunkulu leniwuphatsisiwe, . . . ningatenti emakhosi etikwalabo labalifa laNkulunkulu, kodvwa banini tibonelo emhlambini.”​—1 Phet. 5:2, 3; fundza 2 Khorinte 1:24.

12, 13. (a) BoFakazi BaJehova bakhetsa njani endzabeni yekutijabulisa, futsi ngutiphi timiso teliBhayibheli labatisebentisako? (b) Timiso lesicoce ngato esigabeni 12 tisebenta njani etindzabeni temuntfu ngamunye?

¹² Endzabeni yekutijabulisa, inhlangano yetfu ayisitjeli ngalokucondzile kutsi ngumaphi emabhayisikobho, imidlalo ye-video, tincwadzi nobe tingoma lokufanele sitibalekele. Kungani ingakwenti loko? Kungobe liBhayibheli likhutsata umuntfu ngamunye kutsi aceceshe ‘umcondvo wakhe . . . kuze wehlukanise lokulungile nalokungakalungi.’ (Heb. 5:14) ImiBhalo isiniketa timiso letisisekelo umKhristu langacabanga ngato nakakhetsa langatijabulisa ngako. Kuto tonkhe tingoni tekuphila, umgomo wetfu kufanele ube ‘kuchubeka siciniseka kutsi yini leyemukelekako eNkhosini.’ (Ef. 5:10) LiBhayibheli lifundzisa kutsi tinhloko temndeni tineligunya lelitsite, ngako tingase tikhetse kungakuvumeli kutijabulisa lokutsite emindenini yato.a​—1 Khor. 11:3; Ef. 6:1-4.

¹³ Letimiso teliBhayibheli lesesicoce ngato atisebenti nje kuphela nasikhetsa tekutijabulisa. Imibono lemayelana nekugcoka nekutilungisa, imphilo kanye nekudla, naletinye tindzaba temuntfu ngamunye, ingase ibangele kuphikisana. Ngako-ke nangabe kute simiso semBhalo lesephulwako, bantfu baJehova ngekuhlakanipha bayakubalekela kuphikisana ngetindzaba letinjalo, “ngobe sisebenti seNkhosi akukafaneli silwe, kodvwa kufanele sibe nemusa kubo bonkhe.”​—2 Thim. 2:24.

14. Ngumuphi umfanekiso Pawula lawusebentisa kute agcizelele sidzingo sekutehlukanisa nebantfu lababi?

¹⁴ Nguyiphi lenye indlela labo ‘lababita libito laJehova labangakulahla ngayo kungalungi’? Ngekubalekela kuba nebudlelwane lobusedvute nebantfu labenta lokungakalungi. Kuyaphawuleka kutsi umfanekiso waPawula lokhuluma ‘ngesisekelo lesicinile saNkulunkulu’ wawulandzelanisa ngalomunye umfanekiso. Wabhala ‘ngendlu lenkhulu’ ‘lengahlali titja teligolide netelisiliva kuphela, kodvwa lehlala netitja tesigodvo netelubumba, letinye telikhetselo kodvwa letinye atisito telikhetselo.’ (2 Thim. 2:20, 21) Wabese wecwayisa emaKhristu kutsi ‘atigcine akhashane’ nobe atehlukanise naletitja ‘letingasito telikhetselo.’

15, 16. Yini lesingayifundza emfanekisweni ‘wendlu lenkhulu’?

¹⁵ Usho kutsini lomfanekiso? Sifaniso ngco saPawula sifanisa libandla lebuKhristu ‘nendlu lenkhulu,’ bese sifanisa emalunga elibandla ‘netitja,’ nobe tintfo letisetjentiswa endlini. Letinye titja tingangcoliswa tintfo letitsite letiyingoti nobe tibe sendzaweni lengcolile. Umnikati wendlu utawutehlukanisa letitja letingcolile etitjeni letihlobile, lokufaka ekhatsi leto latisebentisela kupheka.

¹⁶ Ngendlela lefanako, bantfu baJehova lamuhla labalwela kuphila kuphila lokuhlobile, kufanele babalekele kuba bangani nebantfu ebandleni labachubeka bangatihloniphi timiso taJehova. (Fundza 1 Khorinte 15:33.) Nangabe kufanele sente njalo ebandleni lebuKhristu, kufanele ‘sibafulatsele’ kakhulu kangakanani-ke labo labangephandle kwelibandla, labanyenti babo ‘labatsandza imali, labangalaleli batali, labangetsembeki, labanyundzelako, labanelulaka, labangakutsandzi lokuhle, labatsengisa ngalabanye, labatsandza injabulo kunekutsandza Nkulunkulu’!​—2 Thim. 3:1-5.

17. Bekatimisele kangakanani ema-Israyeli letsembekile ngesikhatsi amelana nekungalungi?

¹⁷ LiBhayibheli liyisho ngalokucacile indlela ema-Israyeli latimisela ngayo ngesikhatsi atjelwa kutsi ‘akhweshe emathendeni aboKhora, naDathani, na-Abiramu.’ Lokulandzisa kutsi ‘akhwesha masinyane.’ (Num. 16:24, 27, NW.) Akazange abe matsintsanyawo nobe ahlehlise tintfo. Lombhalo uphindze ukhulume nangekutsi alalela ngekucophelela. ‘Akhwesha . . . kuto tonkhe tinhlangotsi.’ Bantfu labetsembekile bebangafuni kutifaka engotini. Balalela ngenhlitiyo yonkhe. Baba seluhlangotsini lwaJehova futsi bamelana nekungalungi. Ngutiphi tifundvo lesingatifundza kulesibonelo?

18. Beyiyini injongo yemavi aPawula nakecwayisa Thimothi kutsi ‘abalekele tifiso tebusha’?

¹⁸ Nakufanele sivikele buhlobo betfu naJehova, kudzingeka sitsatse tinyatselo ngekushesha nangekutimisela. Bekunguleyo injongo yemavi aPawula ngesikhatsi ecwayisa Thimothi kutsi ‘abalekele tifiso tebusha.’ (2 Thim. 2:22) Ngaleso sikhatsi, Thimothi abesakhulile, mhlawumbe aseminyakeni yabo-30 budzala. Nome kunjalo, “tifiso tebusha” letibulima aticedvwa kutsi umuntfu semdzala kangakanani ngemnyaka. Nakahlangabetana netifiso letinjalo, Thimothi bekufanele ‘atibalekele.’ Ngalamanye emagama, Thimothi bekufanele ‘akulahle kungalungi.’ Jesu bekendlulisa umlayeto lofanako nakatsi: “Nangabe liso lakho likonisa, likhiphe ulilahle.” (Mat. 18:9) Lamuhla, emaKhristu lacabangisisako ngaleseluleko ayatimisela nakamelene netintfo letingaphatamisa buhlobo bawo naNkulunkulu, akangabati nobe ahlehlise tintfo.

19. Lamuhla, labanye basitsetse njani sinyatselo lesibalulekile kute bativikele etintfweni letingalimata buhlobo babo naNkulunkulu?

¹⁹ Labanye labebanenkinga yekusebentisa tjwala ngaphambi kwekutsi babe BoFakazi, batsetse sincumo sekukuyekela ngalokuphelele kunatsa tjwala. Labanye bayatibalekela tinhlobo tekutijabulisa letingavusa tifiso tekutsi batiphatse kabi, nanobe leto tinhlobo tekutijabulisa tingasito timbi. (Hla. 101:3) Nasi sibonelo: Ngaphambi kwekutsi abe nguFakazi, lomunye umzalwane abetsandza imidanso lengakalungi lebeyiba khona emaphathini labekavame kuya kuwo. Kodvwa nasekafundze liciniso, wakuyekela ngalokuphelele kudansa ngisho nasemicimbini yaBoFakazi, ngobe abesaba kutsi utawuvusa tifiso letingakalungi nobe imicabango labenayo esikhatsini lesendlulile. Akusho kutsi emaKhristu akukafaneli angabunatsi nhlobo tjwala, adanse nobe ente letinye tintfo letingashayisani netimiso teliBhayibheli. Nobe kunjalo, sonkhe kulindzeleke kutsi sitsatse sinyatselo lesibalulekile kute sitivikele etintfweni letingalimata buhlobo betfu naNkulunkulu.

20. Ngisho nobe kungenteka kungabi melula ‘kulahla kungalungi,’ yini lesiniketa sibindzi nendvudvuto?

²⁰ Lilungelo lekubitwa ngelibito laNkulunkulu lihambisana nemtfwalo lotsite. Kufanele ‘silahle kungalungi’ futsi ‘sikhweshe kulokubi.’ (Hla. 34:14) Kuliciniso kutsi kwenta njalo akusimelula ngaso sonkhe sikhatsi. Kodvwa kuyadvudvuta kwati kutsi Jehova utawuchubeka abatsandza “labo lababakhe” nalabo labanamatsela etindleleni takhe tekulunga.​—2 Thim. 2:19; fundza 2 Tikhronike 16:9a.