Kubalekeleni ‘Kusheshe Nidvungeke Engcondvweni Yenu’

1, 2. Kubangelwa yini kutsi kukhohlisa kuvame kangaka lamuhla, futsi ngutiphi tinhlobo tekukhohlisa lesitibonako lamuhla? (Buka sitfombe lesisekucaleni kwalesihloko.)

KUKHOHLISA nemanga kuvamile kulamalanga ekugcina. Loku akukafaneli kusimangalise. LiBhayibheli likwenta kucace kutsi Sathane Develi ungumkhohlisi lonelikhono, futsi ungumbusi walomhlaba. (1 Thim. 2:14; 1 Joh. 5:19) Njengobe sisondzela ekupheleni kwalelive lelibi, lulaka lwaSathane luyakhula ngobe uyati kutsi “unesikhatsi lesincane” lesisele. (Semb. 12:12) Ngako-ke, singalindzela kutsi labo labalawulwa nguDeveli batawuchubeka nekungetsembeki. Batawetama kukhohlisa bantfu labakhonta Jehova.

² Tinkhulumo letikhohlisako nemanga laluhlata lacanjelwa tinceku taJehova ngetinkholelo tato, ngalesinye sikhatsi kukhulunywa ngato etindzabeni. Tihloko temaphephandzaba, tinhlelo te-TV kanye ne-Internet kusetjentiselwa kusakata emanga. Umphumela waloko kuba kutsi labanye bantfu bayaphatamiseka, bayengeke kalula futsi bawakholwe lawo manga.

 3. Yini lengasisita kute silwisane nekukhohliswa?

³ Siyajabula kutsi sineliVi laNkulunkulu ‘lelilungele . . . kusicondzisa,’ kute silwisane nalelichinga lesitsa setfu lelisicedza emandla. (2 Thim. 3:16) Kubalulekile kutsi sifundze kuloko umphostoli Pawula lakubhalela emaKhristu angelikhulu lekucala aseThesalonika labekadukisiwe emukela lobekungasilo liciniso. Wawecwayisa kutsi ‘angasheshi advungeke engcondvweni.’ (2 Thes. 2:1, 2) Ngutiphi tifundvo lesingatifundza kuletecwayiso telutsandvo taPawula, futsi singatisebentisa njani ekuphileni kwetfu?

 4. EmaKhristu aseThesalonika asitwa njani kutsi ahlale aliphaphamele “lilanga laJehova,” futsi tsine sisitwa njani?

⁴ Encwadzini yekucala layibhalela libandla laseThesalonika, Pawula walecwayisa ngekuta ‘kwelilanga laJehova.’ Abengafuni kutsi bazalwane bakhe babe sebumnyameni futsi bangatilungiseleli. Esikhundleni saloko, wabancenga njengobe ‘bebangemadvodzana ekukhanya’ kutsi ‘bahlale baphapheme futsi basangulukile.’ (Fundza 1 Thesalonika 5:1-6.) Lamuhla silindzele kubhujiswa kweBhabhulona Lenkhulu, umbuso wemhlaba wenkholo yemanga. Loko kutawusho kucala kwelilanga lelikhulu laJehova. Siyabonga kutsi sinekucondza lokukhulu ngekugcwaliseka kwenjongo yaJehova. Ngelibandla, sitfola tikhumbuto letifika ngesikhatsi letisisita kutsi sihlale siphapheme. Kulalela letikhumbuto letiphindvwa njalo kungacinisa kutimisela kwetfu kunikela kuNkulunkulu ‘umsebenti longcwele lesiwenta ngemandla ekucabanga.’—Rom. 12:1.

5, 6. (a) Encwadzini yakhe yesibili layibhalela baseThesalonika, yini Pawula lakhuluma ngayo? (b) Yini Nkulunkulu latayenta ngekushesha asebentisa Jesu, futsi yini lokufanele sitibute yona?

⁵ Ngemuva nje kwekutfumela incwadzi yakhe yekucala kumaKhristu aseThesalonika, Pawula wawatfumelela yesibili. Kulencwadzi yesibili wakhuluma ngekuhlupheka lokukhulu lapho iNkhosi Jesu itawukhipha sahlulelo saNkulunkulu “kulabo labangamati nakulabangatilaleli tindzaba letimnandzi.” (2 Thes. 1:6-8) Esehlukweni sesibili salencwadzi, Pawula wabhala kutsi labanye ebandleni ‘betfuswa’ lilanga laJehova futsi bebakholelwa kutsi lalisemnyango. (Fundza 2 Thesalonika 2:1, 2.) Lawo maKhristu ekucala abenekucondza lokuncane ngekugcwaliseka kwenjongo yaJehova. Nanobe kamuva Pawula wakuvuma loko nakakhuluma ngesiprofetho, watsi: “Sati incenye futsi siphrofetha incenye kodvwa nakufika loko lokuphelele, loku lokuyincenye kutawucedvwa.” (1 Khor. 13:9, 10) Letecwayiso letiphefumulelwe letabhalwa nguPawula, umphostoli Phetro kanye nalabanye bazalwane labetsembekile labagcotjiwe bangaleso sikhatsi betingabasita kutsi bahlale banekukholwa.

⁶ Kute acondzise tintfo, Pawula aphefumulelwe, wachaza ngekuhlubuka lokukhulu ‘nangemuntfu longenamtsetfo’ lobekatawuvela ngaphambi kwelilanga laJehova.a Ngemuva kwaloko, ngesikhatsi sayo lesifanele, iNkhosi Jesu ‘itawubenta lite’ bonkhe labo labakhohlisiwe. Lomphostoli wasisho ngalokucacile sizatfu salesahlulelo; “ngobe abazange balwemukele lutsandvo lweliciniso.” (2 Thes. 2:3, 8-10) Senta kahle ngekutibuta kutsi: ‘Ngilitsandza kangakanani liciniso? Ngiyabafundza yini bomagazini naletinye tincwadzi letiniketwa bantfu baNkulunkulu emhlabeni wonkhe kute ngicondzisise timfundziso teliBhayibheli?’

7, 8. (a) Ngutiphi tingoti emaKhristu asendvulo lobekufanele atibalekele? (b) Nguyiphi ingoti lengehlela emaKhristu lamuhla?

⁷ Timfundziso tetihlubuki akusito kuphela letiyingoti kumaKhristu. Pawula wabhalela Thimothi kutsi “kutsandza imali kuyimphandze yato tonkhe tinhlobo tetintfo letilimatako.” Lomphostoli wakusho kwacaca kutsi “ngekulwela kuba nalolutsandvo, labanye badukile ekukholweni, batigwaza yonkhe indzawo ngebuhlungu lobunyenti.” (1 Thim. 6:10) “Imisebenti yenyama” iyawuhlale iyingoti.—Gal. 5:19-21.

⁸ Pawula wabayala ngalokucinile baseThesalonika ngalabo lababita ngekutsi “babaphostoli bemanga.” Labanye babo bebakhuluma ‘tintfo letisontsekile kuze badvonse bafundzi kutsi babalandzele.’ (2 Khor. 11:4, 13; Imis. 20:30) Ngekuhamba kwesikhatsi Jesu walincoma libandla lase-Efesu ngobe ‘belingababeketeleli bantfu lababi.’ Labase-Efesu ‘babahlolisisa’ labo labebatsi babaphrofethi kodvwa babe banemanga. (Semb. 2:2) Kuyajabulisa kutsi encwadzini yakhe yesibili leya kubaseThesalonika, Pawula watsi kubo: “Sininika leticondziso bazalwane egameni leNkhosi Jesu Khristu, kutsi nikhweshe kunobe ngumuphi umzalwane lophila ngendlela lengakafaneli.” Wabese ukhuluma ngemaKhristu ‘labengafuni kusebenta.’ (2 Thes. 3:6, 10) Nangabe bekufanele bangatihlanganisi nelivila, bekutawuba ngulokubaluleke kakhulu-ke kungatihlanganisi nalotsite lobekasacala kukhombisa timphawu tekuhlubuka. Ngaleso sikhatsi kutihlanganisa nebantfu labanjalo kwakuyingoti kakhulu futsi bekufanele kubalekelwe—nalamuhla solo kunjalo.—Taga 13:20.

 9. Kungani kufanele sigadze nangabe lotsite sekacala kucombelela ngetintfo letingakachazwa eBhayibhelini nobe akhuluma kabi ngalabanye?

⁹ Nyalo sekusemnyango kutsi kucale kuhlupheka lokukhulu nekuphela kwalelive lelibuswa nguSathane, ngako letecwayiso letashiwo ngelikhulu lekucala leminyaka tibaluleke kakhulu lamuhla. Asifuni ‘kulahlekelwa yinjongo’ yemusa lomkhulu waJehova nesetsembiso sekuphila lokuphakadze, kungaba sezulwini nobe emhlabeni. (2 Khor. 6:1) Kufanele sihlale sigadzile, nakungenteka lotsite lesihlanganyela naye etame kusenta kutsi sicombelele ngetintfo letingakachazwa eBhayibhelini nobe akhulume kabi ngalabanye.—2 Thes. 3:13-15.

10. EmaKhristu aseThesalonika akhutsatwa kutsi abambelele kutiphi timfundziso?

¹⁰ Pawula weluleka bazalwane baseThesalonika kutsi ‘beme bacine’ futsi babambelele kuloko labakufundzile. (Fundza 2 Thesalonika 2:15.) Yini ‘labebafundziswe’ yona? Ngalokucinisekile bekungesito timfundziso letatifundziswa yinkholo yemanga lebetenta shengatsi titfutfukisa imfundvo leligugu letfolakala emiBhalweni. Esikhundleni salako, Pawula abekhuluma ngetimfundziso yena nalabanye labatitfola kuJesu naleto Nkulunkulu labangela baphostoli kutsi batibhale, letinyenti tato taba yincenye yemiBhalo lephefumulelwe. Pawula wabancoma bazalwane bakhe ebandleni laseKhorinte, kungako abhala watsi: “Niyangikhumbula kuto tonkhe tintfo, futsi niyabambelela etimfundzisweni lengitendlulisele kini.” (1 Khor. 11:2) Timfundziso letinjalo tibuya emtfonjeni lowetsembekile futsi singatikholwa.

11. Kungase kube namuphi umphela kulabanye kukhohliswa?

¹¹ Nakabhalela emaHebheru, Pawula wakhuluma ngetindlela letimbili letingase tibangele kutsi umKhristu aphelelwe kukholwa futsi ehluleke kuma acinile. (Fundza Hebheru 2:1; 3:12.) Wakhuluma ‘ngekuphambuka’ kanye ‘nekukhwesha.’ Sikebhe lesikhwesha elusentseni lwemfula ekucaleni singase sibonakale sikhwesha kancane kancane. Njengobe sichubeka sihamba, siyakhwesha elusentseni. Ngakulolunye luhlangotsi, umuntfu angase akhetse kutifushela sikebhe asikhweshise elusentseni. Totimbili letimo tikufanekisa kahle kukhohliswa labatsite labangawela kuko, bavumele kukholwa kwabo kube butsakatsaka.

12. Ngutiphi tintfo lamuhla letingase tilimate buhlobo betfu naNkulunkulu?

¹² Kungenteka labanye baseThesalonika bakuvumela kutsi bakhohliswe. Loko kungenteka yini esikhatsini setfu? Tintfo letinyenti lesitentako tingase tisitsatsele sikhatsi. Cabanga nje kutsi mangakhi ema-awa lowacitsa uchumana nebantfu usebentisa tebuchwephesha, ufundza uphindze uphendvula imilayeto usebentisa tintfo tebuchwephesha, ukhutsalele kwenta tintfo lotilibatisa ngato nobe ufundza tindzaba temidlalo. Konkhe loko lesesikubalile kungase kumphatamise umKhristu futsi kuyente ibe butsakatsaka inshisekelo yakhe. Ungaba yini umphumela waloko? Umthantazo losuka ekujuleni kwenhlitiyo, kutadisha liVi laNkulunkulu, kuya emihlanganweni kanye nekushumayela tindzaba letimnandzi kungatsikameteka. Singakubalekela njani loku kute singasheshi sidvungeke engcondvweni?

13. Njengobe kwashiwo, siyini simo sengcodvo sebantfu labanyenti, futsi yini letawuvikela kukholwa kwetfu?

¹³ Intfo lehamba embili lokufanele siyente kuhlale sati kutsi siphila kusiphi sikhatsi nebungoti bekutihlanganisa nalabo labangafuni kuvuma kutsi siphila “emalangeni ekugcina.” Ngalokuphatselene nesikhatsi lesiphila kuso, umphostoli Phetro wabhala watsi: “Kutawufika baphukuti nekuphukuta kwabo, bente ngekuvumelana netifiso tabo, batsi: ‘Kuphi lokuba khona kwakhe lokwetsenjiswa? Ngobe kusukela ngesikhatsi bokhokho betfu labafa ngaso, tonkhe tintfo tisachubeka njengobe betinjalo ekucaleni kwendalo.’” (2 Phet. 3:3, 4) Kulifundza onkhe emalanga liVi laNkulunkulu kutasisita sinake kutsi siphila kusiphi sikhatsi nyalo—kusente sicaphele kutsi siphila “emalangeni ekugcina.” Tihlubuki lokwakhulunywa ngato esikhatsini lesendlulile tabonakala futsi tisabonakala nalamuhla. Nanyalo usekhona “umuntfu lomubi” futsi uphikisa tinceku taNkulunkulu. Ngako-ke, sidzinga kuhlale siphaphamele kufika kwelilanga laJehova.—Zef. 1:7.

14. Kuba matasatasa emsebentini waNkulunkulu kusivikela njani?

¹⁴ Lokuhlangenwe nako kukhombisile kutsi indlela lengumgogodla yekusigcina siphapheme futsi sikubalekele kudvungwa, kushumayela njalo tindzaba letimnandzi teMbuso. Ngako ngesikhatsi Khristu Jesu, iNhloko yelibandla, ayala balandzeli bakhe kutsi bente bantfu bato tonkhe tive babe bafundzi, babafundzise kugcina konkhe labatjela kona, abeniketa tecwayiso letatiyewuvikela balandzeli bakhe. (Mat. 28:19, 20) Kulandzela sicondziso sakhe kudzinga kutsi sibe nenshisekelo emsebentini wekushumayela. Ungase ucabange yini ngebazalwane baseThesalonika benetiswa kushumayela nekufundzisa ngesizatfu sekutsi bekufanele bakwente loko? Khumbula emavi Pawula lababhalela wona, watsi: “Ningawucimi umlilo wemoya. Ningatedzeleli tiphrofetho.” (1 Thes. 5:19, 20) Tiyajabulisa tiphrofetho lesitifundzako siphindze sicoce ngato nalabanye!

15. Ngutiphi tintfo letilusito lesingacoca ngato ekukhonteni kwemndeni?

¹⁵ Sonkhe sifuna kusita imindeni yetfu kutsi itfutfukise emakhono ekushumayela. Bazalwane nabodzadze labanyenti batfole kutsi indlela labangakwenta ngayo loku kutsi kube nencenye letsite ekukhonteni kwemndeni lemayelana nemsebenti wekushumayela. Ungakutfola kulusito kucoca ngekutsi emalunga emndeni angabuyela njani kubantfu labatfolile ensimini labakutsandzile kucoca nawo. Yini labatawucoca ngayo ekubuyeleni lokulandzelako? Ngutiphi tihloko letingabenta bachubeke bakujabulela kufundza? Ngusiphi sikhatsi lesikahle sekubuyela kubo? Labanyenti basebentisa lesinye sikhatsi sabo sekukhonta kwemndeni kute balungiselele imihlangano yelibandla kute batewukwati kutsi yini lokutawube kucocwa ngayo kulemihlangano. Ningakwenta yini nani loko njengemndeni? Kuhlanganyela kwenu kuyo kutawucinisa kukholwa kwenu futsi kunisite nikubalekele kudvungwa engcondvweni yenu. (Hla. 35:18) Kukhonta kwemndeni kutasisita kutsi singacombeleli tintfo letingakachazwa eBhayibhelini futsi sibalekele kungabata.

16. Yini lekhutsata emaKhristu lagcotjiwe kutsi ahlale acabangisisa kahle?

¹⁶ Nasicabanga ngendlela Jehova labusise ngayo bantfu bakhe kuyo yonkhe leminyaka ngekubasita kutsi bachubeke bacondza tiphrofetho teliBhayibheli, loko kungasenta kutsi sitijabulele tibusiso letiseta. Labagcotjiwe banelitsemba lekuba naKhristu ezulwini. Lelitsemba libakhutsata kutsi bahlale bacabangisisa kahle. Lamavi Pawula lawabhalela baseThesalonika singawasebentisa kulabagcotjiwe, njengobe atsi: “Sinesibopho sekuhlale sinibongela kuNkulunkulu, ngobe wanikhetsa . . . ngekutsi aningcwelise ngemoya wakhe nangekulikholwa kwenu liciniso.”—2 Thes. 2:13.

17. Ngusiphi sikhutsato lositfola emavini laku-2 Thesalonika 3:1-5?

¹⁷ Bonkhe labo labanelitsemba lekuphila emhlabeni phakadze nabo kufanele balwele kutsi bakubalekele kudvungwa. Nangabe unelitsemba lekuphila emhlabeni, cabangisisa ngalesikhutsato selutsandvo Pawula lasibhalela labagcotjiwe baseThesalonika. (Fundza 2 Thesalonika 3:1-5.) Ngamunye wetfu kufanele awatise lamavi lanelutsandvo. Letincwadzi letabhalelwa baseThesalonika tiniketa tecwayiso letibalulekile mayelana nekucombelela ngetintfo letingakachazwa eBhayibhelini nobe tintfo letingabatisako. Njengobe siphila ngasekupheleni kwalelive, leti tecwayiso emaKhristu lamuhla lokufanele atinake kakhulu.